Jesús caj u tuchiꞌtaj u camsʌwinicob quir u tsecꞌticob u tꞌʌn
9
Jesús caj u muchꞌquintaj u camsʌwinicob caj u jʌsaj u mucꞌ tiꞌob quir u jocꞌsicob quisin,
quir u jawsic u yajirir xan.
Lucas 9.1-22
2 Jesús caj u tuchiꞌtaj u camsʌwinicob quir u tsecꞌticob tu cu bin u reyintejob Cꞌuj quir u jawsic u yajirir.
3 Caj yaꞌaraj Jesús:
―Mʌꞌ ja chꞌiquex baꞌ tu ca binex.
Mʌꞌ ja chꞌiquex a xonteꞌ.
Mʌꞌ ja chꞌiquex chim.
Mʌꞌ ja chꞌiquex a woch.
Mʌꞌ ja chꞌiquex taqꞌuin.
Chen turirirꞌ a nocꞌ a chꞌiquex.
4 A mac a cu yʌn acsiquechex tiꞌ ca yʌn pꞌatʌrexeꞌ hasta a caꞌ binex.
5 Cax a baꞌ cajar mʌꞌ u yacsiquechex caꞌ bin xiquechex,
toc pustex u noy ruꞌum ich u cajar soc yerob cꞌas caj u betajob quireꞌ mʌꞌ tu cꞌʌmajob u tꞌʌn Cꞌuj.
6 Caj rucꞌob u camsʌwinicob Jesús caj binob ich tu cotor u cajarob caj u tsecꞌtajob u jach tsoyir u tꞌʌn Cꞌuj.
Baxuc caj u jawsajob u yajir mac tu cu binob.
Quim Juan a cu yacsic jaꞌ tu joꞌr mac
7 Caj yubaj gobernador Herodes tu cotor baꞌ cu betic Jesús yejer u camsʌwinicob quireꞌ caj u cay tucric Herodes.
Mʌꞌ ja wirej,
yʌn mac caj u yaꞌarajoꞌ:
“Juan wʌcꞌʌs ricꞌ ich u quimrir.
Rajen cu betic aroꞌ.”
8 Caj u yuba yaꞌaraꞌ Herodes ten mac:
“Rajiꞌ Elías urij,
rajen tan u betic aroꞌ.”
Chen u jer mac caj yaꞌaraj:
“Wʌcꞌʌs riqꞌuij tuririꞌ yʌjtseqꞌuir u tꞌʌn Cꞌuj,
rajen cu betic aroꞌ.”
9 Caj yaꞌaraj Herodes:
―Quireꞌ caj in tuchiꞌtaj chꞌʌcbir u car Juan,
rajen aroꞌ mʌꞌ Juan.
A mac a quin wuꞌyic yaꞌareꞌ cu betic aroꞌ?
In cꞌat in wirej ―quij.
Caj u cʌxtaj bic tabar cu bin yiric.
Jesús caj u jansaj cinco mil xib
10 Caj urob u camsʌwinicob Jesús a tuchiꞌtaꞌb caꞌch caj u tsicbʌtajob baꞌ caj u betajob tu tu tsecꞌtajob u tꞌʌn.
Caj payob ten Jesús soc u binob tu junanob yejer Jesús.
Caj payob u ber ten Jesús quir u binob ich u cajar Betsaida.
11 Caj yubaj a pimoꞌ tan u bin Jesús caj binob tu pach Jesús,
caj u chaꞌa u tarob a pimoꞌ caj tsecꞌtaꞌb tiꞌob tu cu bin u reyintejob Cꞌuj.
Caj u jawsaj a mac yʌn u yajireꞌ.
12 Tabar u bin qꞌuin,
caj tarob a doce u camsʌwinicob Jesús.
Caj yaꞌarob:
―Arej u bin a pimoꞌ quir u cʌxticob quir u wenʌnob,
quir u cʌxticob yoch xan.
Quireꞌ a teraꞌ mʌnaꞌ mac.
13 Caj araꞌb ten Jesús:
―Bʌꞌ wir cu binob,
techex tsꞌajex yoꞌochob soc mʌꞌ u binob.
Caj yaꞌarob:
―Mʌnaꞌ toꞌonex chen yʌn cinco ij coch pan yejer caꞌtur cʌy.
Arej ic bin ic mʌnej yoch quir ic jansicob.
14 Jaj ixtʌco yʌn cinco mil xib.
Jesús caj yaꞌaraj tiꞌ u camsʌwinicob:
―Arej u rʌc cutarob jun muchꞌ curicob cincuenta soc u rʌc jujuntur cincuenta cu cutarob.
15 Baxuc caj u rʌc betajob u camsʌwinicob caj rʌc curajob a pimoꞌ.
16 Jesús caj u chucaj a cinco pan yejer dos cʌy caj u nacsaj u wich caꞌanan.
Caj u yaꞌaraj tiꞌ Cꞌuj:
―Bayoꞌ Cꞌuj.
Caj tsꞌoc u tꞌʌnic caj u xatꞌaj pan caj u tsꞌaj tiꞌ u camsʌwinicob caj u jʌsejob tiꞌ a pimoꞌ.
Baxuc yejer cʌy.
17 Rʌc janob quiꞌ nachʌjob.
Caj tsꞌoc u janʌnob caj u marob u xetꞌer yoch pan yejer cʌy.
Caj chupij doce xac u xetꞌer yoch pan yejer cʌy.
Pedro caj u yaꞌaraj tiꞌ Jesús: Cristojech, caj u tuchiꞌtech Cꞌuj
18 Quireꞌ tiꞌ yʌn tu junan tu cu tꞌʌnic Cꞌuj Jesús,
quireꞌ caj u pꞌʌtaj a pimoꞌ.
Chen tiꞌ yʌn yejer u camsʌwinicob.
Jesús caj u cꞌataj tiꞌ u camsʌwinicob:
―Bic u yaquenob a pimoꞌ?
19 Caj u nuncajob caj yaꞌaraj:
―Juanech,
bin,
a cu yacsic jaꞌ tu joꞌr mac.
U jerob cu yaquech Elíasech,
bin,
chen u jerob u caꞌ aric yʌjtseqꞌuirech u tꞌʌn Cꞌuj uch,
bin,
caꞌ riqꞌuech,
bin.
20 Caj u cꞌataj tiꞌob:
―A techexeꞌ bic tabar a waquenex?
Pedro,
caj u nuncaj,
caj yaꞌaraj:
―Cristojech a caj u tuchiꞌtech Cꞌuj.
Jesús caj u yaꞌaraj: Bin in caꞌ quinsbir
21 Caj u quiꞌ maꞌquintaj tiꞌ u camsʌwinicob:
―Mʌꞌ a yʌn bin a waꞌarex tiꞌ mʌnaꞌ mac wa Cristojen.
22 Caj araꞌb tiꞌob ten Jesús:
―A tenoꞌ baxuquenechexoꞌ tu tuchiꞌten Cꞌuj,
jach yaj quin bin mucꞌyajnʌquen.
Cu bin u xunpꞌʌtiquenob u jach tsꞌurirob u cajar u winiquirob judío yejer u jach tsꞌurirob sacerdote yejer yʌjcamsʌyʌjirob u tꞌʌn Moisés.
Bin u quinsenob chen caꞌ bin tac mʌnaꞌ u nup u qꞌuinin Cꞌuj cu bin u ricꞌsiquen.
23 Pachir caj yaꞌaraj tiꞌ tu cotor mac:
―Wa mac u cꞌat u tar tin pach soc u cʌnic in tꞌʌn.
Arej u pꞌʌtej a baꞌ cu pachtic tu yor tu cotor u nonobʌjiriꞌ soc u betic a baꞌ u cꞌat Cꞌuj.
Rajraꞌ yʌn u tar tin pach cax wa quimij ich cruz.
Lucas 9.23-62
24 A mac a cu tucric tiꞌ u nonobʌjiriꞌ tiꞌ toy cuxaꞌan cu bin u satar a baꞌ jach manan coꞌoj.
Cu bin u satar u cuxtar munt qꞌuin.
Chen a mac a u cꞌat u quimin tiꞌ ten cu bin u cꞌʌmic a baꞌ jach manan coꞌoj,
cu bin u cꞌʌmic u cuxtar munt qꞌuin.
25 Mʌꞌ u jocꞌar tu tsoyir cax cu tsꞌurintic tu cotor baꞌ ich yocꞌocab wa cu satʌr u pixam.
Quireꞌ jeꞌ u boꞌotic u boꞌorir u siꞌpir.
26 Wa mac cu chꞌic suraquir tiꞌ ten yejer a baꞌ quin tsecꞌtic,
baxuc a baꞌ quin camsic.
Baxuc ten,
caꞌ bin in chꞌaꞌaj suraquir tiꞌ quireꞌ a tenoꞌ baxuquenechexoꞌ.
Quin bin in chꞌaꞌaj suraquir tiꞌ caꞌ bin taquen ich u sasirir Cꞌuj in Tet yejer u mucꞌ u yʌjmasirob u tꞌʌn Cꞌuj.
27 Chen jach taj quin wac techex.
Chʌc yʌn jun yarob mac a teraꞌ mʌꞌ ju bin quimin hasta cu yiric bic Cꞌuj cu bin u reyinticob.
Caj waysaꞌb Jesús ʌcʌtan u camsʌwinicob
28 Caj man turiꞌ semana caj tsꞌoc u camsic a raꞌ tꞌʌnoꞌ tiꞌ u camsʌwinicob.
Jesús caj naquij ich joꞌr wits quir u tꞌʌnic Cꞌuj.
Yet binacob Pedro yejer Jacobo yejer Juan,
quireꞌ payob ten Jesús.
29 Jesús caj u tꞌʌnaj Cꞌuj caj waysaꞌb u wich caj way u nocꞌ sʌc,
jach sʌc tꞌinaꞌan.
30 Ray u qꞌuinin caj cꞌuchob ixbaꞌ Moisés yejer ixbaꞌ Elías.
Caj cꞌuchob ich Jesús.
31 Caj u tsicbanʌjob yejer Jesús bic tabar u quimin Jesús soc u nupsic u tꞌʌn Cꞌuj caꞌ bin quimic ich u cajar Jerusalén.
U sasirir Cꞌuj bʌcristaꞌbob.
32 A Pedrojoꞌ yejer u yet camsʌwinicob jach pꞌencʌch tar u wenʌnob caj ajob caj yirob u wayʌr Jesús.
Baxuc tiꞌ yʌnob caꞌtur xib ich yicnʌn Jesús.
33 Quireꞌ tan u binob nanach ixbaꞌ Moisés yejer ixbaꞌ Elías,
Pedro caj yaꞌaraj tiꞌ Jesús:
―In wʌjcamsʌyʌjirech ―quij―.
Jach tsoy tiꞌ yʌnoꞌon teraꞌ.
Are caꞌ in cꞌʌxejob pʌser.
Turiꞌ tiꞌ tech.
Turiꞌ tiꞌ ixbaꞌ Moisés.
Turiꞌ tiꞌ ixbaꞌ Elías.
Caj yaꞌaraj aroꞌ quireꞌ mʌꞌ tu quiꞌ tucraj a baꞌ caj u yaꞌaraj.
34 Tiꞌ toy u tsicbar Pedro caj tari tuririꞌ u muyarir caj jaqꞌuij yorob u camsʌwinicob caj tsꞌoc u binob ixbaꞌ Moisés yejer ixbaꞌ Elías ich u muyarir.
35 Caj yubob u tꞌʌn Cꞌuj ich u muyarir.
Caj yubob yaꞌaraꞌ tiꞌob:
―A jeꞌraꞌ in jach parar a mac in jach yaj.
Caꞌ uꞌyex a baꞌ cu camsiquechex.
36 Caj tsꞌoc u yubicob u tꞌʌn tu caꞌ irob Jesús tu junan mʌnaꞌ mac tiꞌ yʌn.
A mʌnaꞌ u nup u camsʌwinicob a baꞌ caj u yirob tu cotor aroꞌ tu mʌcob u chiꞌ mʌꞌ tu yaꞌarajob tiꞌ mac a baꞌ caj u yirob.
Jesús cu jocꞌsic u quisinin tiꞌ chan xib
37 Caj sasij,
caj tsꞌoc u yemanob ich u joꞌr wits Jesús yejerob a mʌnaꞌ u nupoꞌ.
Caj tar a pimoꞌ quir u nupꞌicob Jesús.
38 Tiꞌ yʌn mac turiꞌ ich a pimoꞌ caj u puraj u tꞌʌn tiꞌ Jesús:
―In wʌjcamsʌyʌjirech quin chich cꞌatic tech caꞌ a chan yamten tiꞌ in parar quireꞌ turiꞌ ten.
39 Caꞌ bin chucuc ten quisin in chan parar.
Cu sepquintic yawʌt,
cu yʌn satʌr yor hasta cu yom u chiꞌ.
Caꞌ bin pꞌatʌc ten u quisinin in parar cu jach tsꞌabʌr u mucꞌyaj ten quisin hasta mʌnaꞌ yor.
40 A xiboꞌ caj u yaꞌaraj:
―Caj in chich araj tiꞌob a camsʌwinicob caꞌ u jocꞌsejob u quisinin chen mʌꞌ cꞌuchaꞌan yorob u jocꞌsicob.
41 Jesús caj u nuncaj tiꞌ:
―A techexoꞌ a mac cuxaꞌan u qꞌuinin bajeꞌrer.
Biquinin mʌꞌ a wacsmʌnex ta wor tiꞌ Cꞌuj?
Biquinin jach chichex a joꞌr?
Yaꞌab u qꞌuinin tiꞌ yʌnen teraꞌ mʌꞌ toy a wacsejex ta wor.
A ber caꞌ bin a wacsex ta wor ten.
Jesús caj u tꞌʌnaj a xiboꞌ:
―Toc pʌyej a parar a teꞌraꞌ.
42 Tabar u natsꞌʌr ich Jesús a quisinoꞌ caj rubsaj ich ruꞌum.
Caj satij yor ten quisin.
Chen Jesús caj u qꞌueyaj u quisinin.
A baywoꞌ caj jocꞌ u quisinin.
Caj tsꞌoc u jocꞌar u quisin caj jawij,
Jesús caj u sutaj tiꞌ u tet.
43 Jach jaqꞌuij yorob a pimoꞌ quireꞌ caj yirajob carem u beyaj Cꞌuj.
Jesús cu caꞌ aric bin in caꞌ quimin
―Quiꞌ uyex a jeꞌraꞌ a baꞌ quin camsiquechex bajeꞌrer.
Mʌꞌ ju yʌn tubur techex.
Quireꞌ bin u caꞌob u cꞌubirenob a tenoꞌ tiꞌ a mac a cu pꞌactiquenob a tenoꞌ bayxuquenechexoꞌ.
45 U camsʌwinicob mʌꞌ ju najtajob a baꞌ araꞌb tiꞌob ten Jesús.
Mʌꞌ ju najtajob quireꞌ mʌꞌ toc araꞌb ten Jesús tiꞌob a baꞌ u cꞌat yaꞌaric.
Quireꞌ suracob quir u cꞌaticob a baꞌ araꞌb tiꞌob sam.
A mac a jach noꞌjeꞌ
46 U camsʌwinicob quet u pacran acob soc yerob mac jach noꞌjoꞌ ich u yet camsʌwinicob.
47 Jesús caj u najtaj a baꞌ cu tucricob tu yorob rajen caj u pʌyaj chichan quir u chꞌiquintic yicnʌn.
48 Jesús caj u yaꞌaraj tiꞌ u camsʌwinicob:
―Wa tsoy ca betiquex tiꞌ a jeꞌ chichanaꞌ cax tiꞌ u jer xan quireꞌ ca yajquintiquen.
Tsoy ca betiquex ten xan.
Baxuc tsoy caj a betex tiꞌ Cꞌuj a mac caj u tuchiꞌtajen.
A mac a cu tucric ich u wʌcꞌʌs bʌjiriꞌ:
“Mʌꞌ noꞌjen a tenoꞌ”,
rajiꞌoꞌ toc noꞌj ʌcʌtan tu wich Cꞌuj.
A mac a mʌꞌ u pꞌactic tech rajiꞌ a nup
49 Caj yaꞌaraj Juan:
―In wʌjcamsʌyʌjirech,
tij quiraj turiꞌ mac caj u jocꞌsaj quisin caꞌch.
Caj u tꞌʌnaj a cꞌabaꞌ.
Tij caraj tiꞌ:
“Tsireꞌej” quireꞌ mʌꞌ u sayʌr ta pach quir u cʌnic a tꞌʌn.
An ten bic toꞌon quic sayʌr ta pach.
50 Caj yaꞌaraj Jesús:
―Tsireꞌej,
cax mʌꞌ ja wac tiꞌ quireꞌ a mac a mʌꞌ u pꞌactic toꞌon cu yamticoꞌon.
Jesús cu qꞌueyic Juan yejer Jacobo
51 Tabar u cꞌuchur tu qꞌuinin u caꞌ payʌr Jesús ten Cꞌuj caꞌ xic ich caꞌanan.
Jesús u cꞌat u jach bin ich u cajar Jerusalén.
Tsꞌajan yor tar u bin.
52 Rajen caj u tuchiꞌtaj mʌꞌ yaꞌabir mac soc pʌybejob cu binob.
Robob caj binob caj cꞌuchob ich u cajar Samaria,
caj u cʌxtajob mac quir u yacsaꞌrob wenʌnob.
53 Chen ich u cajar Samaria mʌꞌ u cꞌat yacsaꞌrobiꞌ quireꞌ tiꞌ cu binob ich u cajar Jerusalén,
Jesús yejer u camsʌwinicob.
54 Caj wʌcꞌʌs urob ich Jesús a tuchiꞌtaꞌbob.
Quireꞌ yubob mʌꞌ u yacsaꞌrob a Juanoꞌ yejer Jacobo quireꞌ yubob mʌꞌ acsaꞌbobiꞌ caj yaꞌarob tiꞌ Jesús:
―Arej toꞌon in wʌjcamsayʌjirechob caꞌ tac u cꞌaqꞌuir caꞌanan caꞌ rʌc erac araꞌ cajaroꞌ an bic caj u betaj Elías uch,
a cu tsecꞌtic u tꞌʌn Cꞌuj uch.
55 Jesús caj u sut u bʌj quir u pʌctic a caꞌtur u camsʌwinicob.
Caj u qꞌueyaj caj u yaꞌaraj tiꞌob:
―A techexoꞌ mʌꞌ a werex mac ca tsꞌurintiquex.
56 A tenoꞌ baxuquenechexoꞌ mʌꞌ taren in chꞌesic u cajar mac,
taren in taꞌquic tu cotor mac quireꞌ tu tuchiꞌten Cꞌuj.
Jeroj caj binob ich u jer cajar.
A mac a ju cꞌat u tarob tu pach Jesús
57 Tiꞌ toy cu binob ich u berir Jerusalén.
Turiꞌ mac caj u yaꞌaraj tiꞌ Jesús:
―Arej in tar ta pach cax tu ca bin.
58 Caj u nuncaj Jesús caj u yaꞌaraj:
―A boboch pecꞌoꞌ yʌn u jor tu cu wenʌn baxuc a chꞌichꞌoꞌ yʌn u cꞌʌbir cheꞌ tu cu wenʌn.
Chen a tenoꞌ mʌnaꞌ tu quin chatar in jesic in bʌj a tenoꞌ,
baxuquenechexoꞌ.
59 Jesús caj yaꞌaraj tiꞌ u jer mac:
―Cojen tin pach ―quij―,
quir a cʌnic in tꞌʌn.
Chen caj yaꞌaraj tiꞌ a mac pay ten Jesús:
―Arej in pꞌatʌr ich yicnʌn in tet hasta cu quimin in tet,
jeꞌ in tar ta pacheꞌ.
60 Jesús caj u nuncaj tiꞌ:
―A mac a irej a quimenoꞌ,
rajiꞌob cu bin u muquicob u quimirir.
Chen tech xen tsecꞌtej u jach tsoyir u tꞌʌn Cꞌuj tu cu bin u reyintejob Cꞌuj.
61 Chen tiꞌ yʌn u jer caj araꞌb tiꞌ:
―A tenoꞌ jeꞌ in tar ta pacheꞌ.
Ar in bin in cꞌatej tiꞌ in bʌjob wa tsoy in tar ta pach.
62 Chen Jesús caj yaꞌaraj tiꞌ:
―A mac a u cꞌat u jach tar tin pach chen mʌꞌ u jach pꞌis u bʌj caꞌ tac tin pach.
Wa cu chen tucric a baꞌ caj u pꞌʌtaj jeꞌ u nacar yor tiꞌ a baꞌ a cu tar tiꞌ.
Aroꞌ mʌꞌ tsoy u beyaj tu cu bin u reyinticob Cꞌuj.