U winiquirob judío a fariseojoꞌ caj cꞌataꞌb tiꞌ Jesús wa carem beyaj. Caj u cꞌatajob u winiquirob judío a saduceoboꞌ xan
16
U winiquirob judío a fariseojoꞌ yejer u winiquirob judío a saduceoboꞌ,
caj binob irbir Jesús quir yubicob u tꞌʌn Jesús.
Soc cꞌuchaꞌan yorob u chucur Jesús.
Rajen caj u tus cꞌatajob tiꞌ u carem beyaj a cu tar ich Cꞌuj.
2 Jesús caj u nuncaj tiꞌob:
―A techexoꞌ,
ca waꞌariquex:
“Mʌꞌ ju tar yaꞌarir oqꞌuin quireꞌ chʌc u muyarir.”
3 A techexoꞌ,
ca waꞌariquex cu sastar jeꞌ u tar yaꞌarir a mʌꞌ acꞌbir u muyarir yejer chʌc.
A techexoꞌ,
jach cꞌasechex.
Ca waꞌariquex cꞌuchaꞌan a worex a waꞌariquex mʌꞌ ju tar yaꞌarir.
A techexoꞌ,
cꞌuchaꞌan a worex a waꞌariquex:
Jeꞌ u tar yaꞌarireꞌ.
Chen aroꞌ cꞌuchaꞌan a worex a najtiquex tiꞌ.
Chen mʌꞌ ju cꞌuchur a worex a najtex u carem beyaj a betaꞌb ten Cꞌuj tu qꞌuinin bajeꞌrer.
4 Caj yaꞌaraj Jesús tiꞌob u winiquirob judío a fariseojoꞌ yejer u winiquirob judío a saduceoboꞌ:
―Techex a mac a cuxaꞌan tu qꞌuinin bajeꞌrer ca cꞌatiquex carem beyaj quireꞌ jach cꞌasechex.
Quireꞌ mʌꞌ taj caj a cꞌujintex Cꞌuj.
Chen ca binex a wirex in riqꞌuir mʌnaꞌ u nup u qꞌuinin.
Iren Jonás caj wʌcꞌʌs xeja Jonás ten cʌy quireꞌ Cꞌuj.
Raꞌ u carem beyaj bin a caꞌ a wirex.
Caj bin Jesús nach,
caj pꞌat u winiquirob judío a fariseojoꞌ yejer u winiquirob judío a saduceoboꞌ.
Quiꞌ cʌnantex a baꞌ cu camsicob u winiquirob judío a fariseojoꞌ
5 Caj bin u camsʌwinicob Jesús pʌchi cꞌacꞌnab.
Caj tubi tiꞌob u chꞌicob yoꞌoch pan u jantejob.
6 Caj yaꞌaraj Jesús tiꞌ u camsʌwinicob:
―Quiꞌ cʌnantex a bʌj tiꞌ a baꞌ ca cʌniquex tiꞌ u winiquirob judío a fariseojoꞌ yejer u winiquirob judío a saduceoboꞌ.
Quireꞌ baꞌ cu beticob irej u tsꞌac pan cu sip.
7 Quireꞌ cu tsicbarob u camsʌwinicob ich u racꞌob:
―Rajen ―quij yaꞌaric toꞌon ij cʌjcamsʌyʌjir― quireꞌ caj u yiraj mʌꞌ ic chꞌaꞌic ij coꞌoch pan.
8 Jesús caj yubaj a baꞌ cu muc u aricob u camsʌwinicob.
Caj yaꞌaraj:
―Biquinin ca waꞌariquex:
“Mʌnaꞌ a wochex pan.”
Chichin a wacsamʌnex ta worex.
Quireꞌ Jesús yer caj u tucrajob mʌꞌ tu chꞌajob yoꞌoch pan.
Chen tar pꞌatoꞌ.
9 Caj yaꞌaraj Jesús:
―Mʌꞌ wa ta najtajex?
Mʌꞌ wa cꞌaj techex?
Yʌn toꞌon cinco pan caꞌch caj in rʌc jʌsaj tiꞌ cinco mil xib.
Mʌꞌ wa cꞌaj techex mun xac cax chup a ta marex?
Mʌꞌ ja wirej,
u carem beyaj caj a wirajex?
10 Mʌꞌ wa cꞌaj techex a yʌn siete pan caj in rʌc jʌsaj tiꞌ cuatro mil xib.
Mʌꞌ wa cꞌaj techex mun xac caj ic rʌc maraj.
Mʌꞌ ja wirej,
u carem beyaj caj a wirajex?
11 Caj yaꞌaraj Jesús tiꞌ u camsʌwinicob:
―Biquinin mʌꞌ a quiꞌ najtajex?
Mʌꞌ rajiꞌ quin wac techex a woꞌochex pan.
Caj in waꞌaraj techex,
quiꞌ cʌnantex a bʌj tiꞌ a tsꞌac a cu sip yoꞌoch pan u winiquirob judío a fariseojoꞌ yejer u winiquirob judío a saduceojoꞌ.
12 Caj u najtajob u camsʌwinic Jesús:
“A baꞌ caj u yaꞌaraj Jesús,
mʌꞌ rajiꞌ cu yac toꞌon.
Tu camsa toꞌon an ten bic cu sip yoꞌoch pan,
a baꞌ cu camsicoꞌon u winiquirob judío a fariseojoꞌ yejer u winiquirob judío a saduceojoꞌ.
Quiꞌ cʌnantex a bʌj tiꞌ a baꞌ cu camsiquech u winiquirob judío a fariseojoꞌ yejer u winiquirob judío a saduceojoꞌ.”
A techoꞌ, Cristojech a quic pajic u tar ich Cꞌuj
13 Caj cꞌuchij Jesús bʌytʌc ich u cajar Cesarea de Filipo.
Caj u cꞌataj tiꞌ u camsʌwinicob:
―Mac cu yaꞌariquenob ―quij Jesús― a pimoꞌ u pararen Cꞌuj quireꞌ taren in yamtic mac tu cotor?
14 Caj yaꞌarajob:
―Mʌꞌ yaꞌab tij cuꞌyaj u juminticob caj u pʌchechob:
“Juanech,
a cu yacsic jaꞌ tu joꞌr mac.”
U jer caj yaꞌarob:
“Elíasech.”
Tiꞌ yʌn xan cu yaꞌaric:
“Jeremíasech.”
U jer cu yaꞌaric:
“U jerech yʌjtseqꞌuirech u tꞌʌn Cꞌuj.”
15 Caj yaꞌaraj Jesús tiꞌob:
―A techexoꞌ,
a mac ca waꞌariquex ten?
16 Caj yaꞌaraj Simón Pedro tiꞌ Jesús:
―A techoꞌ,
Cristojech,
a mac tuchiꞌtaꞌb ten Cꞌuj.
U pararech Cꞌuj.
A Cꞌujoꞌ cuxaꞌan.
17 Jesús caj u nuncaj tiꞌ:
―Quiꞌquintej a wor Simón,
raꞌ a tet Jonás.
Cꞌuj caj u tsꞌaj a najtej wa Cristojen.
Mʌnaꞌ mac caj u tsꞌaj a najtej tech.
Chen ic Tet a tiꞌ yʌn caꞌanan rajiꞌ caj u tsꞌaj a najtej.
18 A tenoꞌ quin waꞌaric tech Pedrojech.
U cꞌat yaꞌaric a cꞌabaꞌ Tunichech.
Quireꞌ mʌꞌ u cꞌax a tucur toc taj ca tucric jach Cristojen.
Mʌꞌ ju cꞌuchur u yor ten quisin u taquiquech tiꞌ ten quireꞌ ca jach cꞌujintiquen Cristo.
19 Caj yaꞌaraj Jesús tiꞌ Pedro:
―A tenoꞌ quin wacsiquech u tsꞌurirech a racꞌob quireꞌ in mucꞌ cu bin tsꞌabir tech.
A baꞌ cu beticob a racꞌob wa tsoy ta tꞌʌn tech,
bayiriꞌ tsoy tu tꞌʌn Cꞌuj.
Wa mʌꞌ tsoy cu beticob a racꞌob quireꞌ mʌꞌ tsoy ta tꞌʌn,
tech bayiriꞌ tiꞌ Cꞌuj xan.
20 Caj u chich araj Jesús tiꞌ u camsʌwinicob:
―Mʌꞌ a yʌn bin a waꞌarex wa Cristojen.
Jesús cu yaꞌaric bin u caꞌ quimin
21 Raꞌ u qꞌuinin Jesús caj u yʌnxchun u camsic u camsʌwinicob.
Tiꞌ cu bin u mucꞌyaj Jesús ich u cajar Jerusalén quireꞌ u jach tsꞌurirob sacerdote.
Bayiriꞌ xan tiꞌ yʌjcamsʌyʌjirob u tꞌʌn Moisés.
Bayiriꞌ tiꞌ u jach tsꞌurir u cajarob u winiquirob judío.
Bin u caꞌ quinsbir Jesús ich u cajar Jerusalén.
Yaꞌaraj caꞌ bin riqꞌuir tu quimirir:
“Caꞌ bin manac mʌnaꞌ u nup u qꞌuinin quin caꞌ riqꞌuir” ―quij Jesús.
22 Pedro caj mach u cꞌʌb Jesús caj bin Pedro yejer Jesús tu junan quir u tsicbar.
Caj yaꞌaraj Pedro:
―In cꞌat Cꞌuj caꞌ u yamtech Jaj Tsꞌur soc mʌꞌ a mucꞌyaj soc mʌꞌ a quinsaꞌ.
23 Chen Jesús caj pꞌus u pach tiꞌ Pedro.
Mʌꞌ ju cꞌat yubic Jesús yaꞌaric Pedro:
“Mʌꞌ a yʌn quinsaꞌr.”
Caj yaꞌaraj Jesús:
―Joqꞌuen Pedro,
irech quisin Satanás ―quij Jesús―.
Mʌꞌ a pꞌusic in wor ―quij Jesús―.
Mʌꞌ quet a wor yejer Cꞌuj,
quet a wor yejer xib Pedro.
24 Caj yaꞌaraj Jesús tiꞌ u camsʌwinicob:
―An ten bic ten caꞌ bin mucꞌyajnʌquen ich cruz.
Baxuc techex,
caꞌ bin mucyajnʌquechex quireꞌ caj a cꞌamex in tꞌʌn,
cax ca bin a quimechex ich cruz.
Baxuc xan,
caꞌ a pꞌʌtiquex a baꞌ ca pachtiquex ta worex wa ja cꞌatex a cʌniquex in tꞌʌn ―quij Jesús―.
25 Quireꞌ a mac mʌꞌ u cꞌat u taquic u cuxtar tiꞌ u racꞌob tu cu chucur u pach ten u racꞌob,
quireꞌ caj u yacsaj tu yor tiꞌ in tꞌʌn.
Chen raꞌ cu bin taquic u pixam.
Chen a mac u cꞌat u taquic u cuxtar tiꞌ u racꞌob tu cu chucur u pach ten u racꞌob.
Jeꞌ u satʌr u pixameꞌ,
quireꞌ mʌꞌ ju cꞌat u cꞌʌmic in tꞌʌn quir u cuxtar munt qꞌuin ich caꞌanan.
26 Cax chen toc rʌc yʌn a baꞌ yʌn teꞌ ich yocꞌocab.
Chen u pixam jeꞌ u satʌreꞌ.
Rajen mʌꞌ baꞌwir tiꞌ u baꞌtʌc ich yocꞌocab.
Mʌꞌ biqꞌuin cꞌuchaꞌan yor u boꞌotej u pixam.
27 Jesús caj yaꞌaraj tiꞌ u camsʌwinicob:
―Caꞌ bin taquen yejerob yʌjmasirob u tꞌʌn Cꞌuj.
Yejer u sasir Cꞌuj caꞌ bin taquen.
Jujuntur quin bin in boꞌotej,
a tu jach cꞌʌmajob in tꞌʌn an ten bic caj man tu tsoyir Cꞌuj.
Quireꞌ taren in yamtic mac tu cotor.
28 Caj yaꞌaraj Jesús:
―Taj quin waꞌaric techex.
Yʌn mac mʌꞌ yaꞌab teraꞌ mʌꞌ ju quimin hasta yiric in tar ich yocꞌocab quir a reyintiquex Cꞌuj.