Bic tabar cu pʌyic u siꞌpir mac
15
Caj tarob tu yʌn Jesús.
Tarob u winiquirob judío a fariseoboꞌ quir u cꞌaticob tiꞌ Jesús.
Tar u tar u winiquirob judío a fariseoboꞌ ich u cajar Jerusalén.
Yet taracob yʌjcamsʌyʌjirob u tꞌʌn Moisés.
Mʌꞌ yaꞌab caj cꞌuchob ich Jesús.
2 Caj cꞌataꞌb tiꞌ ten u winiquirob judío a fariseoboꞌ yejer yʌjcamsʌyʌjirob u tꞌʌn Moisés:
―Biquininiꞌ a camsʌwinicob mʌꞌ u quibejob a baꞌ cu yaꞌaricob ic nunquir?
Rajraꞌ cu janʌnob.
Mʌꞌ u pꞌoꞌicob u cꞌʌb cu janʌnob.
3 Caj cꞌataꞌb tiꞌob ten Jesús:
―Biquinin ca cʌrʌx betiquex u tꞌʌn Cꞌuj?
Biquinin u tꞌʌn a nunquirex ca cʌniquex?
Mʌꞌ tan a quibiquex a baꞌ cu yaꞌariquex Cꞌuj.
4 Caj u yaꞌaraj Jesús:
―“Caꞌ a sʌjt a tet,
quij Cꞌuj.
Baxuc a nʌꞌ xan ca sʌjtic.
Mʌꞌ tsoy a pachꞌic a tet yejer a nʌꞌ.
Bin a caꞌ quimin,
quireꞌ caj pachꞌaj u tet yejer u nʌꞌ.
Cu jocꞌsaꞌ chꞌinbir u joꞌr ten u racꞌob quireꞌ caj u pachꞌaj u tet yejer u nʌꞌ.”
Baxuc caj yaꞌaraj Cꞌuj ich u tꞌʌn.
5 Biquinin techex ca waꞌariquex a tet yejer a nʌꞌ mʌꞌ u cꞌuchur a worex a yamtex a tet yejer a nʌꞌ quireꞌ a baꞌ yʌn techex caj a toc tsꞌajex tiꞌ Cꞌuj?
Bajeꞌrer mʌꞌ techex yʌnin,
Cꞌuj yʌnin.
6 A techexoꞌ,
ca camsiquex cax a mac cu yaꞌaric:
“Mʌꞌ in yamtic in tet yejer in nʌꞌ.
Caj in toc rʌc tsꞌaj tiꞌ Cꞌuj.”
Quireꞌ mʌꞌ caj a quibex u tꞌʌn Cꞌuj a cu yaꞌaric:
“Caꞌ a sʌjtex a tet yejer a nʌꞌ.”
Ca chen quiꞌ cʌnantiquex u tꞌʌn a nunquirex.
7 Caj yaꞌaraj Jesús tiꞌ u winiquirob judío a fariseoboꞌ:
―Irechex wa caꞌtur a tucurex,
quireꞌ taj caj u camsa techex Isaías uch.
Caj u tsꞌibtajechex uch:
8 A jeꞌ macaꞌ,
quij Isaías.
Cu tusaricob:
“Quin sʌjticob Cꞌuj”,
chen a tu pixamoꞌ cu yaꞌaricob:
“Mʌꞌ in sʌjtic Cꞌuj.”
9 Caj u tsꞌibtaj Isaías uch:
A Cꞌujoꞌ cu yaꞌaric:
“Baꞌwir cu chen cꞌujintiquenob wa mʌꞌ u quibicob in tꞌʌn?
Mʌꞌ ja wirej,
chen u tꞌʌn winiquir cu quibicob quireꞌ rajiꞌob cu camsicob u tꞌʌn winic irej wa ju tꞌʌn Cꞌuj cu camsicob.”
Baxuc caj u tsꞌibtaj Isaías uch.
10 Jesús caj u pʌyaj mac a pimoꞌ.
Caj yaꞌaraj Jesús tiꞌ a mac caj u muchꞌquintob u bʌj:
―Uꞌyex baꞌ quin waꞌaric techex caꞌ a cʌnex.
11 A mac a cu yubic u siꞌpir,
raꞌ mʌꞌ u yacsic u siꞌpir quireꞌ a baꞌ caj u jantaj.
Raꞌ cu yacsic tu siꞌpir u tꞌʌn a cu jocꞌar tu chiꞌ,
a cꞌasoꞌ.
12 U camsʌwinicob Jesús caj u jutsꞌob u bʌj ich Jesús.
Caj araꞌb tiꞌ Jesús ten u camsʌwinicob:
―A baꞌ caj a waꞌaraj tiꞌob sam,
caj a choquintaj u yorob u winiquirob judío a fariseojoꞌ.
Mʌꞌ wa ta wuꞌyaj ―quij u camsʌwinicob?
13 Caj yaꞌaraj Jesús tiꞌ u camsʌwinicob:
―U tꞌʌn Cꞌuj mʌꞌ u chꞌejaꞌr.
A cu tus camsicob cu yaꞌaricob u tꞌʌn Cꞌuj cu tsecꞌticob.
Raꞌ cu bin chꞌejaꞌr ten ic Tet Cꞌuj caꞌanan.
Irej a mac a cu jocꞌsic u cheꞌer yejer u moꞌos.
14 Caj yaꞌaraj Jesús tiꞌ u camsʌwinicob:
―Tsireꞌej u tucurob u winiquirob judío a fariseojoꞌ.
Irob mʌnaꞌ u wichob a fariseojoꞌ.
A mac a cu pʌyic u jer chꞌop u wich tu cu bin rubur tu chꞌicaꞌanin ruꞌum.
Mʌꞌ ja wirej,
tu cu binob erar ich cꞌacꞌ.
Mʌꞌ ja wirej,
cu yubic u tꞌʌn a fariseojoꞌ.
15 Pedro caj tarij ich Jesús.
Caj cꞌataꞌb tiꞌ Jesús ten Pedro:
―Baꞌ quireꞌ u cꞌat yaꞌaric a caj a camsaj u winiquirob judío a fariseojoꞌ.
A caj a waꞌaraj tiꞌ:
“Cax mʌꞌ ju pꞌoꞌic u cꞌʌb cu janʌn.”
16 Caj yaꞌaraj Jesús tiꞌ Pedro:
―Mʌꞌ wa ja najtex irechex u winiquirob judío a fariseojoꞌ xan?
17 Araꞌb tiꞌ Pedro ten Jesús:
―A ca jantic a woꞌochoꞌ,
cu bin ta chocher,
ca taꞌic.
18 Mʌꞌ ja wirej,
tiꞌ u tar cu jocꞌar a tꞌʌn ta chiꞌ.
A cꞌasoꞌ,
tiꞌ u tar tiꞌ u tucur mac.
Quireꞌ cꞌas rajen cu pʌyic u siꞌpir.
Mʌꞌ quir u janʌn.
19 Quireꞌ a cꞌas ca tucric tiꞌ cu yʌnxchun tu tucur mac,
quireꞌ cu tucric u quinsic mac.
Quireꞌ a mac a cu man,
tiꞌ cu tar a cu tucric.
Quireꞌ cax mʌnaꞌ u mam cu tucric u man,
tiꞌ cu tar cu jocꞌar tu tucur.
Baxuc xib xan,
cu tucric u man cax mʌnaꞌ u racꞌ.
Tiꞌ cu tar u jocꞌar tu tucur.
A cu chꞌic u baꞌtʌc mac,
tiꞌ cu tar u jocꞌar tu tucur.
Quireꞌ a cu tus,
tiꞌ u tar u jocꞌar tu tucur.
Quireꞌ a cu pacꞌʌr u pach u racꞌob,
tiꞌ u tar u jocꞌar tu tucur.
20 A ray u siꞌpiroꞌ cu casquintic mac.
Quireꞌ a baꞌ cu janʌn mac cax rajraꞌ cu janʌn mʌꞌ u pʌyic u siꞌpir mac.
Caj tar xquic ich jumpet ruꞌum. Tar ich Jesús
21 Rucꞌ Jesús tu cajar tuj tar cꞌatbir ten u winiquirob judío a fariseojoꞌ tiꞌ Jesús:
―Biquinin mʌꞌ u pꞌoꞌicob u cꞌʌbob a camsʌwinicob cu janʌnob?
Caj jocꞌ Jesús tar cu bin tu ruꞌum bʌytʌc tu yʌn u cajar Tiro yejer u cajar Sidón.
22 Caj tar xquic.
Tiꞌ u tar xquic u ruꞌumin cananea.
Caj tar cʌjtar ich u ruꞌumin Tiro yejer u cajar Sidón.
Caj tar ich Jesús caj u cꞌam tꞌʌntaj:
―Jaj Tsꞌurir ―quij―,
quireꞌ u pararech a nunquir David.
Yajquinte ten yejer in chan parar xquic.
Acaꞌan quisin tiꞌ,
jach yaj.
23 Barej Jesús mʌꞌ ju nuncajiꞌ.
Caj tarob u camsʌwinicob Jesús caj u chich cꞌatajob tiꞌ Jesús:
―Cu jach chich tꞌʌniquenob a xquicoꞌ.
24 Caj yaꞌaraj Jesús:
―Mʌꞌ yaꞌaraj in bin Cꞌuj,
chen tu satʌr u winiquirob judío.
Quin bin in tsecꞌtej tiꞌob quireꞌ Cꞌuj cu yiric irob tʌmʌn yuc a satʌroꞌ.
25 Caj u jutsꞌaj u bʌj xquic ich Jesús caj xonrʌj.
Caj yaꞌaraj:
―Jaj Tsꞌurir,
chan yam ten.
26 Caj yaꞌaraj Jesús tiꞌ xquic:
―Mʌꞌ tsoy in tsꞌic tech a baꞌ caj u tsꞌaja Cꞌuj tiꞌ u winiquirob judío.
Mʌꞌ quir in yamtiquech.
Mʌꞌ u winiquir judíojech.
Quireꞌ mʌꞌ tsoy u tsꞌabʌr tech a tsꞌajaꞌan tiꞌ u winiquirob judío irej wa tan u taquic u yoch u parar quir u tsꞌic tiꞌ pecꞌ.
27 Caj yaꞌaraj a xquic:
―Jach jaj,
Jaj Tsꞌur,
a baꞌ ca waꞌaric.
A pecꞌoꞌ cu chuquic u jantej u pꞌupꞌir yoꞌoch u winiquirir wa cu potar ich yaran pojcheꞌ.
Rajen quin cꞌatic tech caꞌ a yam ten cax chichin.
28 Jesús caj u nuncaj tiꞌ xquic:
―Taj caj a quiꞌ acsaj ta wor ten xquic.
Caꞌ jocꞌac u quisinin a chan parar xquic.
A ta chich cꞌata ten.
Sep caj jaw u chan parar xquic.
Jesús caj u jawsaj mac, jach yaꞌab caj u jawsaj mac
29 Caj jocꞌ Jesús tu caj u jawsaj u parar chan xquic acaꞌan quisin tiꞌ.
Caj manij chiꞌcꞌacꞌnab.
U cꞌabaꞌ u cꞌacꞌnabir Galilea.
Caj nac Jesús ich u joꞌr pꞌuc wits caj curaj.
30 Caj cꞌuchij a pimoꞌ tu yʌn Jesús.
Caj tar purbir mech yoc.
Caj tar purbir xan chꞌop u wich.
Caj tar purbir xan mʌꞌ u jocꞌar u tꞌʌn.
Caj tar purbir mech u cꞌʌb xan.
Baxuc u yajirir yaꞌab,
caj tar purbir ich Jesús.
Caj tar chaquinbir ich yoc Jesús.
Caj jawsaꞌb ten Jesús.
31 Caj yirob a pimoꞌ jawsaꞌb a mʌꞌ u jocꞌar u tꞌʌn,
caj jocꞌ u tꞌʌn.
Caj yirob a pim caj jaw u yacꞌbir u wich,
caj u quiꞌ iraj u ber.
Caj yirob u rʌc jawʌr mech yoc,
caj yirob u ximbar.
Caj yirob u jawʌr mech u cꞌʌb,
caj tsoyij u cꞌʌb.
Caj jaqꞌuij yorob a pimoꞌ.
Caj yaꞌarab tiꞌ Cꞌuj:
―Jach caremech Cꞌuj u Cꞌujirech u winiquirob israel.
Jesús cu tsꞌic yoꞌoch cax cuatro mil xib cu jansic
32 Caj u pʌyaj u camsʌwinicob Jesús caj yaꞌaraj tiꞌ u camsʌwinicob:
―In cꞌat in yajquinticob tiꞌ a pimoꞌ,
quireꞌ wiꞌichʌjob.
Quireꞌ mʌnaꞌ u nup u qꞌuinin tiꞌ yʌnob tu yʌnen.
Mʌnaꞌ yoꞌoch,
mʌꞌ baꞌ cu janticob.
Mʌꞌ jin cꞌat in tuchiꞌtaꞌr ich yatochob,
quireꞌ mʌnaꞌ baꞌ cu janticob.
Quireꞌ mʌꞌ ju cꞌuchurob ich bej,
quireꞌ wiꞌij.
33 Caj yaꞌaraj u camsʌwinicob:
―Bic tabar ij quirej ij coꞌoch quireꞌ jach pim?
Quireꞌ mʌnaꞌ mac cʌjaꞌan teraꞌ quir ic mʌnic yoꞌoch.
34 Jesús caj u cꞌataj tiꞌ u camsʌwinicob:
―Mun yʌn techex a woꞌochex pan?
Caj u nuncajob:
―Yʌn siete pan.
Mʌꞌ yaꞌab cʌy yʌn tiꞌ.
35 Caj araꞌb u cutarob a pimoꞌ ten Jesús ich ruꞌum.
36 Caj tsꞌaꞌb tiꞌ Jesús ten u camsʌwinicob.
Siete pan caj tsꞌaꞌb tiꞌ Jesús.
Tsꞌaꞌb tiꞌ cʌy Jesús.
Caj u tꞌʌnaj Cꞌuj Jesús:
―Bayoꞌ Cꞌuj caj a tsꞌaj toꞌon ij coꞌoch.
Caj tsꞌoc u tꞌʌnic Cꞌuj,
caj u tsꞌaja tiꞌ u camsʌwinicob Jesús.
Caj u rʌc jʌsajob ich a pimoꞌ.
37 Caj jantob caj rʌc najchʌjob.
Caj xur u janticob tiꞌ rʌc pꞌat u xetꞌer.
Caj u marob u xetꞌer caj chup siete xac.
38 Yʌn cuatro mil xib caj janob.
Mʌꞌ tu xacob mun a xquic caj janʌnob.
Mʌꞌ xacaꞌan u parar xan.
39 Caj tsꞌoc u janʌnob caj yaꞌaraj tiꞌob a pim caꞌ xicob.
Caj oc Jesús ich chem caj bin tu ruꞌumin Magdala.