A baꞌ cu yacsic u siꞌpir maqueꞌ
7
Caj muchꞌrʌjob yicnʌn Jesús a ju winiquirob judío a fariseojoꞌ yejer jun yarob yʌjcamsʌyʌjirob u tꞌʌn Moisés.
Tiꞌ cu tarob tu cajarob Jerusalén.
San Marcos 7.1-23
2 A rayoꞌ caj u yirajob jun yarob u camsʌwinicob Jesús rajraꞌ caj u jantob waj,
u cꞌat yaꞌaric,
mʌꞌ u pꞌoꞌob u cꞌʌbob,
rajen caj u pʌcꞌaj u pachob.
3 Mʌꞌ ja wirej,
a winiquirob judío a fariseojoꞌ yejer tu cotor u winiquirob judío cu naj pꞌoꞌicob u cꞌʌbob wa mʌꞌ u pꞌoꞌicob u cꞌʌbob mʌꞌ u janʌnob quireꞌ a baꞌ araꞌb tiꞌob ten u nunquirob uch.
4 Barej cu yurob tu cu naj mʌnicob yoꞌoch wa mʌꞌ u pꞌoꞌicob u bʌj mʌꞌ ju janʌnob.
Yʌn u jer yaꞌab baꞌ caj u naj cʌnajob tiꞌ u nunquirob an ten bic caꞌ u pꞌoꞌej u ruchir tu cu yucꞌur.
Caꞌ u pꞌoꞌej u pꞌurir u yoꞌoch jaꞌ.
Caꞌ u pꞌoꞌej u ruchir a mascaboꞌ.
Caꞌ u pꞌoꞌej u chꞌac tu cu wenʌn.
5 Rajen u winiquirob judío a fariseojoꞌ yejer a yʌjcamsʌyʌjirob u tꞌʌn Moisés caj u cꞌatajobiꞌ:
―Biquinin a camsʌwinicob mʌꞌ u cuxtarob an ten bic cu naj camsicob ic nunquirex barej rajraꞌ cu janʌnob?
6 Caj u nuncajob rajiꞌeꞌ,
caj yaꞌaraj tiꞌob:
―Caꞌtur a tucurechex a techexoꞌ.
Jach taj caj u tsecꞌtaj Isaías tiꞌ tu cotorechex quireꞌ rajiꞌ tsꞌaꞌb u tucuric ten Cꞌuj quir u tsꞌibtic a baꞌ u cꞌat Cꞌuj rajen caj u tsꞌibtaj:
A jeꞌ macaꞌ,
quij Cꞌuj,
cu tusaricob:
“Quin sʌjticob Cꞌuj”,
chen a tu pixamob cu yaꞌaricob:
“Jeꞌ wa jin sʌjticob Cꞌuj.”
7 A Cꞌujoꞌ cu yaꞌaric:
“Baꞌ wir cu chen cꞌujintiquenob wa mʌꞌ u quibicob in tꞌʌn?
Mʌꞌ ja wirej,
chen u tꞌʌn winic cu quibicob quireꞌ robob cu camsicob u tꞌʌn winic irej wa ju tꞌʌn Cꞌuj cu camsicob.”
Baxuc caj u tsꞌibtaj Isaías uch.
8 Biquinin ca pꞌʌtiquex u tꞌʌn Cꞌuj quir a quiꞌ cʌnantiquex u tꞌʌn a nunquirirex an ten bic u pꞌobar ruch.
Caꞌ u pꞌoꞌej u ruchir tu cu yucꞌur ca betiquex xan yaꞌab u jer baꞌ an ten bic a jeraꞌ.
9 Caj u yaꞌaraj tiꞌob xan:
―Ca waꞌariquex xan,
mʌꞌ patarex u tꞌʌn Cꞌuj tiꞌ techex,
chen a nunquirexoꞌ ca quiꞌ cʌnantiquex u tꞌʌn.
Ca toc tsꞌocsiquex a baꞌ yarmʌnex a nunquirex uch.
10 Biquinin Moisés caj u yaꞌaraj uch:
“Caꞌ a sʌjtex a tet yejer a nʌꞌ.
Wa cꞌas cu tsicbar tiꞌ u tet,
tiꞌ u nʌꞌ xan,
cu jocꞌsaꞌ quinsbir”,
quij Moisés uch.
11 Barej a techexoꞌ,
ca waꞌariquex:
Wa tuririꞌ parar cu yaꞌaric tiꞌ u tet wa tiꞌ u nʌꞌ:
“Tu cotor baꞌ a ten yʌnin a ca pajiquex u yamtiquechex ucheꞌ rajiꞌ Corbán”,
u cꞌat yaꞌaric in toc sijmʌn tiꞌ Cꞌuj;
12 rajen mʌꞌ tan a chaꞌiquex u parar u betic u jer baꞌ quir u yamtic u tet wa ju nʌꞌ.
13 A baywoꞌ ca cꞌasquintiquex a baꞌ araꞌb ten Cꞌuj quireꞌ ca quiꞌ cʌnantiquex a baꞌ naj camsaꞌbechex ten a nunquirex quir a wʌcꞌʌs masiquex tiꞌ a pararex.
Baxuc ca betiquex yaꞌab u jer a baꞌ an ten bic aroꞌ.
14 Caj u wʌcꞌʌs tꞌʌnaj tu cotor a yaꞌab macobeꞌ,
caj yaꞌaraj tiꞌob:
―Uꞌyex baꞌ quin wac ―quij―,
chꞌaj a najtex.
15 Mʌnaꞌ baꞌ a cu jantic mac a cu yasic u siꞌpir,
jariꞌ a baꞌ cu betic,
wa baꞌ cu yaꞌaric,
raꞌ cu yacsic u siꞌpir mac.
16 Uꞌyex a baꞌ quin camsic techex soc a wuꞌyiquex soc a najtiquex a baꞌ u cꞌat yaꞌaric.
17 Barej caj oquij Jesús tu japnin naj caj u pꞌʌtaj a yaꞌab macoboꞌ,
jeroj tuneꞌ,
caj cꞌataꞌb tiꞌ ten u camsʌwinicob Jesús baꞌ quiriꞌ caj tsꞌoc a camsiquenob.
18 Caj u yaꞌaraj tiꞌob:
―Mʌꞌ wa quiꞌ ca tucriquex baꞌ?
A baꞌ cu jantic mac mʌꞌ raꞌ cu yacsic u siꞌpiriꞌ.
19 Quireꞌ a yoꞌochoꞌ mʌꞌ u yocar tu tucur mac chen ich u nʌcꞌ,
pachir cu jocꞌar tu chocher.
A baywoꞌ Jesús caj u yaꞌaraj tsoy u jantaꞌ ten a mac a yacsmʌnob tu yorob tu cotor yoꞌoch.
20 Barej caj u yaꞌaraj:
―Mʌnaꞌ baꞌ a cu jantic mac cu yacsic u siꞌpir,
jariꞌ a ba cu betic,
wa ja baꞌ cu yaꞌaric,
raꞌ cu yasic mac u siꞌpir.
21 Quireꞌ ich u tucur mac cu jocꞌar a baꞌ cu yacsic u siꞌpir mac.
Mʌꞌ ja wirej,
tu tucur cu jocꞌar a cꞌas u tucuroꞌ,
tu tucur cu tucric u pʌyic xquic wa yʌn u mam cax wa mʌnaꞌ u mam.
Tu tucur cu tucric u pʌyic xib a yʌn u raqꞌueꞌ,
cax a mʌnaꞌ u raqꞌueꞌ.
Tu tucur cu tucric u quinsic mac,
rajen cu quisic.
Tu tucur cu tucric u yaꞌcric u baꞌtac mac,
rajen cu yaꞌcric.
22 Tu tucur cu tucric u pachtic a baꞌ yʌn tiꞌ u jer mac.
Tu tucur cu tucric baꞌ,
rajen cu pachtic a xquicoꞌ wa ja xiboꞌ.
Tu tucur cu tucric baꞌ rajen cu tus aric mac.
Tu tucur cu tucric baꞌ,
rajen cu qꞌuextar yor.
Tu tucur cu tucric baꞌ,
rajen cu pʌqꞌuic u pach mac.
Tu tucur cu tucric baꞌ,
rajen mʌꞌ u cꞌʌmic u tꞌʌn Cꞌuj.
Tu tucur cu tucric baꞌ,
rajen mʌꞌ u cꞌujintic Cꞌuj.
23 Tu cotor a ray cꞌasoꞌ cu jocꞌar tu tucur mac,
rajen cu yacsic u siꞌpir mac.
A xquicoꞌ a cu tar ich tanxer ruꞌum
24 Barej caj ruqꞌuij taroꞌ caj bin tu ruꞌumin Tiro yejer u ruꞌumin Sidón.
Caj cꞌuchij caj oquij ich naj.
Mʌꞌ u cꞌat yertaꞌ wa tiꞌ yʌn ten a yaꞌab macoboꞌ,
barej mʌꞌ cꞌuchaꞌan yor u taquic u bʌj Jesús soc mʌꞌ yirir.
San Marcos 7.24-47
25 Tu jumintaꞌ yubej tiꞌ yʌn Jesús ich naj,
caj cꞌuchij xquic yicnʌn Jesús,
caj u puraj u bʌj ich u yoc Jesús quir u sʌjtaꞌ.
Rajiꞌ yʌn tuririꞌ u chan parar xquic a mac acaꞌan quisin tiꞌeꞌ.
26 A xquicoꞌ griego u tꞌʌn,
chen rajiꞌ tiꞌ naj cʌjaꞌan tu ruꞌumin sirofeniciajoꞌ.
Caj u chich cꞌataj tiꞌ caꞌ jocꞌsac a quisinoꞌ tiꞌ u chan parar xquic.
27 Barej Jesús caj u yaꞌaraj tiꞌ:
―Caꞌ yʌn batꞌan janac u pararob quir u nachajʌrob.
Mʌꞌ tsoy u puric u yoꞌoch u pararob tiꞌ a chan pecꞌoboꞌ.
28 A xquicoꞌ caj u nuncaj,
tan yaꞌaric tiꞌ:
―Taj a baꞌ ca wac Jaj Tsꞌurir ―quij―,
cax cu jantic yaran pojcheꞌ tu cu jutur u pꞌupꞌir yoꞌoch a chan pararob.
A chan pecꞌoꞌ cu janʌn yaram pojcheꞌ tu cu jutur u pꞌupꞌir.
29 Jeroj tuneꞌ,
caj u yaꞌaraj tiꞌ:
―Quireꞌ a jeꞌ tꞌʌnaꞌ ―quij―,
caꞌ xiquech,
toc jaw a chan parar xquic tiꞌ u quisinin.
30 Caj wʌcꞌʌs ur tu yatochoꞌ caj u yiraj u chan parar xquic characbar ich u chꞌac,
toc jocꞌsaꞌb u quisinin.
Jesús cu jawsic a mac a mʌꞌ u tꞌʌneꞌ a mʌꞌ u yubej tꞌʌneꞌ
31 Jesús caj joqꞌuij tu caꞌten tiꞌ u ruꞌumin Tiro caj u chꞌʌctaj u ruꞌumin Sidón caj cꞌuchij tu cꞌacꞌnabir Galilea.
Caj u chꞌʌctaj tan chumuc u ruꞌumin Decápolis.
32 Jeroj caj tar purbir tiꞌ tuririꞌ xib,
a mʌꞌ u jocꞌar u tꞌʌneꞌ,
a mʌꞌ u yubej tꞌʌn xan.
Caj u chich cꞌatajob tiꞌ caꞌ u tsꞌancꞌʌbtej tiꞌ quir u jawʌr.
33 U tiriꞌ tiꞌ caj u pʌyaj Jesús a mac a macar u xiquineꞌ soc mʌꞌ pꞌeriꞌ tu yʌn a yaꞌab macobob.
Jeroj caj u tsꞌaj yar u cꞌʌb tu xiquin a mac a mʌꞌ u yubic tꞌʌneꞌ,
caj tubnʌjij Jesús,
caj u tʌraj u yacꞌ xan.
34 Caj u nacsaj u wich caꞌanan caj u putaj yicꞌ,
caj u yaꞌaraj tiꞌ:
―Efata,
u cꞌat yaꞌaric:
Caꞌ jepʌjʌc a xiquin ―quij yaꞌaraꞌ ten Jesús.
35 Jach seb jaw a mʌꞌ u yubej tꞌʌn.
Tsoyjij u yacꞌ caj quiꞌ tꞌʌnʌj ich u tꞌʌn.
36 Caj u maquintaj tiꞌobeꞌ:
―Mʌꞌ a yʌn ariquex tiꞌ mac.
―Jach tsoy tu betaꞌr tu cotor,
cax inan a mʌꞌ u jocꞌar u tꞌʌn cu jawsiqueꞌ,
cu jocꞌar u tꞌʌn a macar u xiquineꞌ.