2 Caj cꞌuchij tu qꞌuinin tu cu jesicob u bʌj u winiquirob judío caj oc tu chan najir tu cu naj cꞌujinticob Cꞌuj u winiquirob judío caj oc quir u camsic tiꞌob.

Yaꞌab mac a caj u yubobeꞌ,

jʌprʌj u chiꞌob quireꞌ a baꞌ camsaꞌbob.

Caj u yaꞌarajob:

―A tub u tar tiꞌ a ray xiboꞌ a jeꞌ baꞌraꞌ?

Bic tabar tsꞌaꞌb u tucur a tiꞌeꞌ a mʌꞌ cꞌuchaꞌan yor u betaj a baꞌ a mʌnaꞌ mac yiramʌn,

mʌꞌ biqꞌuin uch a cu jacꞌar u yor mac.

3 A ray xiboꞌ mʌꞌ wa raꞌ cu suscheꞌ uchiꞌ,

u parar María,

u sucuꞌun Jacobo José,

Judas yejer Simón?

Mʌꞌ wa tiꞌ yʌnʌnob xan tu yʌnoꞌonex u yitsꞌinob a xquicob?

Rajen mʌꞌ ju sʌjtajobiꞌ cu pꞌuspachticob tiꞌ.

4 Barej Jesús caj u yaꞌaraj tiꞌob:

―U yʌjtseqꞌuir u tꞌʌn Cꞌuj,

a tsꞌaꞌb u tucureꞌ ten Cꞌuj quir u tsicbar a baꞌ u cꞌat Cꞌuj mʌꞌ u cꞌat yirir ten yet cajarob tu jach cajar.

Cax u wʌcꞌʌs u bʌjob mʌꞌ u cꞌat yiricob.

Chen a mac cʌjaꞌan nach u cꞌat yubicob.

5 A taroꞌ mʌꞌ cꞌuchaꞌan yor u betic a baꞌ mʌnaꞌ mac yiramʌnob uch mʌꞌ biqꞌuin chen caj u jawsaj jun yarob a mac a yajoꞌ.

Caj u tsꞌancꞌʌbtaj quir u jawarob.

6 A Jesusoꞌ jacꞌaꞌan yor tiꞌob quireꞌ mʌꞌ ju yacsajob tu yorob.

Pachir Jesús caj cꞌuchij tu chan cajarob a rʌc bʌcaꞌan tiꞌ u jach cajar Jesús,

caj u camsaj tiꞌob.

7 Jeroj,

caj tꞌʌnaj yicnʌn u doce camsʌwinicob,

caj yʌnxchun u tuchiꞌticob caꞌcaꞌturiꞌ,

caj u tsꞌajaj u mucꞌ tiꞌob quir u jocꞌsicob u quisininob.

8 Caj u jach araj tiꞌob:

―Mʌꞌ a chꞌiquex bar ich a ber.

Chen xomteꞌ ca chꞌiquex,

baxuc chim mʌꞌ a chꞌiquex.

Baxuc a woj wajex mʌꞌ a chꞌiquex,

baxuc a taqꞌuinex mʌꞌ a chꞌiquex ich u poxajir a taqꞌuinex.

9 Chen a pechꞌ xʌnʌb ca chꞌiquex,

baxuc tuririꞌ a noqꞌuex a chꞌiquex.

10 Caj u yaꞌaraj tiꞌob:

―Wa ber caꞌ bin acsaquechex ich naj caꞌ pꞌataquechex hasta ca jocꞌarex ca caꞌ binex.

11 Wa ca cꞌuchurex ich mac a mʌꞌ u cꞌat u yacsiquechex a mʌꞌ u cꞌat u yubicob a tꞌʌnex,

caꞌ jocꞌaquechex tiꞌ taroꞌ.

Puxtex u noy ruꞌum ta woquex soc yerob yʌn u siꞌpirob quireꞌ mʌꞌ u cꞌatob yubejob a tꞌʌnex.

Jach taj quin waꞌaric tiꞌ techex,

a ray macoꞌ ich a ray cajaroꞌ jach manan caꞌ bin mucꞌyajnʌcob tu qꞌuinin u xur tꞌʌn,

chen a mac a cʌjaꞌanob uch tu cajarjob Sodoma yejer u cajar Gomorra mʌꞌ nejach bin mucꞌyajnʌcobiꞌ.

12 Jeroj,

u doce camsʌwinicob caj jocꞌobeꞌ caj u tsecꞌtajob tiꞌ mac caꞌ u cꞌaxej u yorob caꞌ u pꞌʌtejob u cꞌasir tu cu manob.

13 Bayiriꞌ xan,

caj u jocꞌsajob yaꞌab quisin tu acaꞌanob ich mac,

caj u jicꞌtajob tsats quir u jawʌr mac a yajoꞌ,

jach yaꞌab jawij.

14 Bajeꞌrer caj u yubaj rey Herodes u tsicbʌticob u cꞌabaꞌ Jesús a Herodesoꞌ rajen yaꞌab mac tus pacꞌ Juan a cu yacsic jaꞌ tu joꞌr:

―Tin tꞌʌn ―quij―,

wʌcꞌʌs riqꞌuij tu quimirir Juan rajen cꞌuchaꞌan yor u betic a mʌnaꞌ mac yirmʌnob uch,

mʌꞌ biqꞌuin yirmʌnob.

15 Chen u jerob junintaꞌb yubej,

caj u yaꞌarajob:

―Rajiꞌ Elías u yʌjtseqꞌuir u tꞌʌn Cꞌuj a tsꞌaꞌb u tucuric ten Cꞌuj uch.

U jerob caj u yaꞌarajob:

―Rajiꞌ yʌjtseqꞌuir u tꞌʌn Cꞌuj a tsꞌaꞌb u tucuric ten Cꞌuj quir u tsicbʌtic a baꞌ u cꞌat Cꞌuj rajen rajiꞌ irej yʌjtseqꞌuir u tꞌʌn Cꞌuj uch.

16 Barej caj yubaj Herodeseꞌ,

caj u yaꞌaraj:

―Rajiꞌ Juan,

a mac a tin chꞌʌcaj u car ucheꞌ,

rajiꞌ riqꞌuij tu quimirir.

17 Mʌꞌ ja wirej,

rajiꞌ Herodes caj u tuchiꞌtaj mʌcbir Juan caj u cꞌʌraj tu cu naj mʌquic mac.

Tiriꞌ tu mʌcaj,

quireꞌ Herodías u racꞌ u sucuꞌun Felipe.

Mʌꞌ ja wirej,

Herodes caj u chꞌaj u racꞌ u sucuꞌun.

18 Mʌꞌ ja wirej,

caj u yaꞌaraj uch tiꞌ Herodes:

―Mʌꞌ tsoy a taquic u racꞌ a sucuꞌun quireꞌ raꞌ u toc chꞌamʌn a sucuꞌun.

19 A Juanoꞌ pꞌactaꞌb ten Herodías rajen cu chꞌuctic quireꞌ u cꞌat u quinsej barej mʌꞌ cꞌuchaꞌan u yor tiꞌ.

20 Mʌꞌ ja wirej,

Herodeseꞌ sajʌc tiꞌ Juan quireꞌ yer rajiꞌ tuririꞌ xib a mac taj yor,

a mac a mʌꞌ u naj man tu cꞌasir,

rajen cu cʌnantaꞌ Juan soc mʌꞌ u quinsaꞌ.

Tenten caj yubaj cax tucurnʌjij quireꞌ tsoy yubic tu xiquin a baꞌ tsecꞌtaꞌb ten Juan.

21 Jeroj,

cꞌuchij tu qꞌuinin Herodías cu pajic quir u quinsic Juan.

Rajiꞌ u qꞌuinin u cꞌabaꞌ u rey Herodes,

ber cu cꞌʌꞌoticob u qꞌuinin caj rochaꞌb Herodes ten u nʌꞌ uch.

Rajen caj u pʌyaj tu quiꞌquiꞌ janʌnob u jach tsꞌurirob a cu yamticob u rey Herodes tu cu reyinticob.

Yet payacob a mac u tsꞌurirob u soldadojob yejer a mac a neyʌn u taqꞌuinoꞌ tu ruꞌumin Galilea.

22 Barej caj oc tun u parar xquic Herodías,

ocꞌatnʌjij tu cuchir tu cu naj quiꞌquiꞌ janʌnob u rey Herodes yejer u racꞌob.

Jach tsoy tu wich u rey Herodes yejer a mac a curucbarob tu cu quiꞌquiꞌ janʌnob.

Rajen caj u yaꞌaraj a reyoꞌ tiꞌ u parar xquic Herodías:

―Cꞌatej ten,

cax a baꞌ a cꞌat,

a tenoꞌ jeꞌ in tsꞌic techeꞌ.

23 Caj u yaꞌaraj:

―Cꞌuj cu yiric ―quij Herodes―.

Tu cotor baꞌ caꞌ a cꞌatej teneꞌ jeꞌ in tsꞌic techeꞌ tac tan chumuc u ruꞌumin tu quin reyinticob.

24 Caj jocꞌ rajiꞌ u xquic u parar Herodías,

caj u yaꞌaraj tiꞌ u nʌꞌ:

―Baꞌ quin bin in cꞌatej?

U nʌꞌ tuneꞌ,

caj yaꞌaraj:

―Raꞌ a catej u joꞌr Juan a cu yacsic jaꞌ tu joꞌr mac.

25 Seb caj wʌcꞌʌs sutnʌjij tu yicnʌn rey Herodes caj u cꞌataj,

cu yaꞌaric tiꞌ:

―In cꞌat caꞌ a tsꞌic ten bajeꞌrer u joꞌr Juan a cu yacsic jaꞌ tu joꞌr mac,

caꞌ a tsꞌa ten tuririꞌ u rʌquir quir in peꞌic.

26 Mʌꞌ jach quiꞌ yor a rey Herodeseꞌ,

tu chen tucric,

barej quireꞌ caj u yaꞌaraj:

“Cꞌuj cu yiric”,

bayiriꞌ xan,

quireꞌ yubob yaꞌaric tu cotor mac a cu quiꞌquiꞌ janʌnob rajen yʌn u tsꞌic tiꞌ.

27 Seb a reyoꞌ caj u tuchiꞌtaj tuririꞌ u soldado a cu cʌnantic a reyoꞌ soc caꞌ tac purbir u joꞌr Juan.

28 Rajiꞌ caj bineꞌ caj u chꞌʌcaj u car Juan tu cu naj macar mac,

caj bin u purej u joꞌr ich tuririꞌ u rʌquir quir u peꞌic.

Jeroj,

caj u cꞌubaj tiꞌ a ray xquicoꞌ u parar Herodías aroꞌ tuneꞌ caj u tsꞌajaj tiꞌ u nʌꞌ.

29 Barej u camsʌwinicob Juan caj u yubob a baꞌ u ber,

tarob u chꞌaꞌob u baquer Juan caj u tꞌajaj ich tuririꞌ tu cu naj tꞌojar u baquer mac.

30 A mac a tuchiꞌtaꞌb ten Jesús uch quir u tsecꞌtaꞌr u tꞌʌn,

caj urob caj u muchꞌquintajob u bʌj yicnʌn Jesús,

caj u tsicbʌtajob tiꞌ tu cotor baꞌ a caj u betob uch,

bayiriꞌ xan,

yejer a baꞌ caj u camsob uch.

31 Rajiꞌ tuneꞌ,

caj u yaꞌaraj tiꞌob:

―Cuxex ich tʌcay ruꞌum quir a jeꞌsiquex a bʌj.

Mʌꞌ ja wirej,

yaꞌab mac cu tarob bayiriꞌ xan,

cu binob,

rajen mʌꞌ jeꞌerarob mʌꞌ quir u man u janʌnob.

32 Pꞌeriꞌob caj rʌc ocob ich chem quir u binob ich tʌcay ruꞌum.

U tiririꞌ tiꞌ caj binob soc tu junʌnob.

33 Irob u binob ten yaꞌab mac,

caj cꞌʌꞌotaꞌbob ten a yaꞌab macoꞌ.

Rajen caj jocꞌob tiꞌ tu cotor u cajarob soc u binob tiꞌ taroꞌ xan,

caj u cꞌʌnajob yacab.

Raꞌ batꞌan cꞌuchob a yaꞌab macoꞌ.

34 Barej caj jocꞌ Jesús ich chem,

caj u yiraj yaꞌab mac toc cꞌuchob,

rajen caj yajquintaꞌbob quireꞌ irob a tʌmʌn yucoboꞌ a mʌnaꞌ yʌjcʌnanyʌjir tʌmʌn yuc.

Jeroj tuneꞌ,

caj yʌnxchun u camsic yaꞌab baꞌ tiꞌob.

35 Tabar u bin qꞌuin,

caj tarob u camsʌwinicob tu yicnʌn caj yaꞌarajob:

―Chen tʌcay ruꞌum a teraꞌ mʌnaꞌ mac cʌjaꞌan cu bin qꞌuin cabar.

36 Tuchiꞌtaboꞌ caꞌ xicob tiꞌ corob,

cax tiꞌ u chan cajarob a rʌc bʌcaꞌanob a teraꞌ,

caꞌ u mʌnejob yoꞌoch waj quir u janʌnticob quireꞌ mʌnaꞌ baꞌ caj u jantob.

37 Caj u nuncaj Jesús,

caj u yaꞌaraj tiꞌob:

―Tsꞌajex yoꞌoch quir u janʌnob ―quij.

Caj u yaꞌarajob tiꞌ:

―Jeꞌ wa jin mʌnicob yoꞌoch a yaꞌab macoꞌ caꞌ in jʌsejob tiꞌob.

Mʌꞌ ja wirej,

mʌꞌ nupaꞌan u boꞌorir yoꞌochob,

quireꞌ baxuc u boꞌorir u beyaj mac tuririꞌ yaxqꞌuin.

38 Jesús caj u yaꞌaraj tiꞌob:

―Joqꞌuenex irex mun pan yʌn techex.

Caj tsꞌoc u yiricobeꞌ,

caj u yaꞌarajob:

―Yʌn cinco pan yejer caꞌtur cʌy.

39 Caj u yaꞌaraj tiꞌob u binob u cutarob jujumuchꞌob ich suꞌuc.

40 Pꞌeriꞌ rʌc curajob u tirir tiꞌ junmuchꞌ curaꞌanob.

U tirir tiꞌ caj u cuquintajob junmuchꞌ curicob cincuenta.

U jer junmuchꞌ curicob cien.

41 Jeroj tuneꞌ,

Jesús caj u chꞌaj a cinco panoꞌ yejer a caꞌtur cʌyeꞌ,

caj u pʌctaj caꞌanan caj u yaꞌaraj:

“Bayoꞌ Cꞌuj tiꞌ ij coꞌochex.”

Jeroj caj u xatꞌaj a panoꞌ caj u tsꞌaj tiꞌ u camsʌwinicob quir u caꞌ tsꞌaꞌicob ʌcʌtan a pimoꞌ.

Bayiriꞌ xan,

caj u jʌsaj tiꞌ tu cotor mac a caꞌtur cʌyeꞌ.

42 Rʌc janob caj najchʌjob xan.

43 Pachir caj u wʌcꞌʌs marajob doce xacob chup yejer u xetꞌer pan yejer a cʌyoꞌ.

44 A mac a caj u jantob a panoꞌ cuch cinco mil xibob.

45 Jesús caj u yaꞌaraj tiꞌ u camsʌwinicob:

―Caꞌ xiquechex ich chem soc a batꞌan cꞌuchurex ich u cajar Betsaida a tiꞌ yʌn pichir cꞌacꞌnab.

Quireꞌ rajiꞌ cu tuchiꞌtic a yaꞌab macoboꞌ.

46 Caj tsꞌoc u tuchiꞌticobeꞌ caj bin ich tuririꞌ pꞌuc wits quir u tꞌʌnic Cꞌuj.

47 Barej caj acꞌbirchʌjij,

a chemoꞌ tiꞌ yʌn uch teꞌ ich tan chumuc cꞌacꞌnab.

Rajiꞌ tuneꞌ,

pꞌat Jesús tu junan ich ruꞌum.

48 Jesús caj u yiraj jach chich tu cu babticob a chemoꞌ quireꞌ caj u nupꞌob icꞌ,

rajen caj tar Jesús tu yicnʌnob tan u ximbar yocꞌor a cꞌacꞌnaboꞌ.

Jach tabar u sastar caj u yirajob u tar.

Jesús u cꞌat u man pʌybej.

49 U camsʌwinicob Jesús tuneꞌ,

caj u yirajob tan u ximbar yocꞌor a cꞌacꞌnaboꞌ caj u tucrajob quisin cu tar,

caj awʌtʌjob.

50 Quireꞌ tu cotor caj u yirajob,

caj u chꞌaj saquirob,

jeroj,

seb tꞌʌnob,

caj yaꞌaraj tiꞌob:

―Chichquintej a worex ten ―quij―,

mʌꞌ a chꞌiquex sajaquir ―quij Jesús.

51 Caj naquij yicnʌnob ich a chemoꞌ,

caj chꞌen u tar yicꞌar.

U camsʌwincob Jesús bin yorob quireꞌ jach manan jacꞌaꞌan yorob.

52 Quireꞌ mʌꞌ ju cꞌʌꞌotajob tu yorob u mucꞌ,

cax caj u yirajob u tꞌajʌr a panoꞌ quireꞌ jach chich u joꞌrob.

53 Barej caj cꞌuchob tanxer ruꞌum tarob tu ruꞌumin Genesaret,

caj u macob a chemoꞌ.

54 Barej caj jocꞌob tiꞌ a chemoꞌ seb cꞌʌꞌotaꞌb Jesús ten a macoꞌ.

55 Caj acabnʌjob tiꞌ tu cotor a tiꞌ cʌjaꞌanob ich a ruꞌumoꞌ quir u tarob purbir yicnʌn Jesús a mac a yajoꞌ.

Caj yʌnxchun u tarob u puricob a mac yajoꞌ tiꞌ chꞌac,

jaj ix tʌco caj u yubob tiꞌ yʌn ucheꞌ.

56 Jaj ix tʌco teꞌ cu yocarobeꞌ cax wa ju chan cajarob wa ju yajaw cajarob,

cax wa ju corob,

robob cu tarob purbir mac a yajoꞌ tiꞌ tu cu naj mʌnicob yoꞌoch,

tiriꞌ cu chich cꞌaticob caꞌ u tʌrejob cax u yoquir u nocꞌ.

Tu cotor mac a caj u tʌrobeꞌ,

jeroj jaw.