A Jesúsoꞌ cu camsic a baꞌ pʌcꞌaꞌir ich cor
13
Raꞌiriꞌ u qꞌuinin caj joqꞌuij Jesús ich naj caj bin chiꞌ cꞌacꞌnab.
Raꞌiriꞌ u qꞌuinin caj toc bin Jesús cutar ich chiꞌ cꞌacꞌnab quir u camsic mac.
2 Caj rʌc tar muchꞌtaꞌbir ich Jesús jach pim.
Caj oc Jesús ich chem caj curʌj.
Caj rʌc chꞌicrʌj a pim ich chiꞌ cꞌacꞌnab.
3 Caj u camsaj Jesús a pimoꞌ an bic tabar u pʌqꞌuic u pʌcꞌar tu cor chen quir u camsic.
Caj yaꞌaraj Jesús:
―Mac bin u pʌqꞌuic,
u pʌcꞌar ich u cor.
4 A mac caj bin u qꞌuichꞌintej ich u cor.
Caj u qꞌuichꞌintaj caj rʌc rub ich bej mʌꞌ yaꞌabiꞌ.
Caj tar u ruqꞌuic chꞌichꞌ.
5 U jer tar rʌc rubeꞌ ich tunich tu mʌꞌ pim u ruꞌumin.
Seb caj tsꞌejernʌji,
quireꞌ chan jay u ruꞌumin.
Rajen seb caj jocꞌ.
6 Caj naquij qꞌuin caj quimin,
quireꞌ jay u ruꞌum.
Mʌꞌ tu bin ocac u mos.
Rajen quimij.
7 U jer caj rʌc qꞌuichꞌintaj.
Caj rub ich qꞌuiꞌix.
Caj chꞌijij caj rʌc bobʌstaꞌb ten qꞌuiꞌix caj quimij.
8 U jer caj u rʌc caꞌ qꞌuichꞌintaj ich u jer ruꞌum.
Jach tsoy u ruꞌum.
Caj u netsꞌaja u wich.
Cien caj u toc tsꞌaj u wich.
U jer caj u tsꞌaj u wich sesenta.
U jer caj u tsꞌaja u wich treinta.
9 Uꞌyex baꞌ quin camsic techex soc a wuꞌyiquex soc a najtiquex a baꞌ u cꞌat yaꞌaric.
Biquinin caj u camsajoꞌonex Jesús tiꞌ u qꞌuichꞌintic yijir
10 Caj tsꞌoc u camsaꞌ ten Jesús caj u jutsꞌ u bʌj u camsʌwinicob ich Jesús.
Caj cꞌataꞌ tiꞌ Jesús:
―Biquinin ca camsic a pim bic tabar u qꞌuichꞌintic yijir ich u cor?
11 Jesús caj yaꞌaraj tiꞌob:
―Jeꞌ u tsꞌiquex tech Cꞌuj quir a najtiquex a baꞌ tu mucu araj ten Cꞌuj tiꞌ Cristo.
Chen a pimoꞌ mʌꞌ ju bin u najtejob quireꞌ mʌꞌ tu cꞌʌmajob u tꞌʌn Cꞌujiꞌ.
12 A baꞌ ta chʌc cʌnajex bajeꞌrer ca chʌc najtiquex.
Chen jeꞌ a najtiquex hasta ca quiꞌ najtiquex bic tabar u reyinticob Cꞌuj.
Chen a pimoꞌ mʌꞌ ju bin u najtejobiꞌ.
Chen a baꞌ caj in chʌc camsaj tiꞌob jeꞌ u rʌc tubur tiꞌob.
Mʌꞌ ju pꞌatʌr tiꞌob.
13 Rajen caj in chʌc camsa a pimoꞌ bic tabar u qꞌuichꞌintic yijir u pʌcꞌar ich cor,
quireꞌ cu chen uyicob mʌꞌ ju najtobiꞌ.
14 Quireꞌ a baꞌ tsecꞌtaꞌb ten Isaías tiꞌ u winiquirob judío uch jach joqꞌuij u tajir bajeꞌrer.
Uꞌyex baꞌ araꞌb ten Isaías tiꞌ u winiquirob judío uch:
Rajraꞌ ca bin a wuꞌyex,
chen mʌꞌ a bin a najtex.
Rajraꞌ ca bin a wirex,
chen mʌꞌ a bin a jach irex.
15 Quireꞌ jach chich u joꞌr u winiquirob judío.
Mʌꞌ ja wirej,
caj u mʌchajob u xiquinob,
caj u mutsꞌajob u wichob soc mʌꞌ cꞌuchaꞌan yor yiricob.
Bayiriꞌ soc mʌꞌ cꞌuchaꞌan yor yubicob u tꞌʌn Cꞌuj,
soc mʌꞌ ju najtejob xan.
Soc u cꞌaxicob u yorob soc u jawsaꞌr u siꞌpir ten Cꞌuj.
Baxuc caj tsecꞌtaꞌb ten Isaías tiꞌ u winiquirob judío uch.
16 A techexoꞌ,
quiꞌ a worex quireꞌ ca chʌc najtiquex bic tabar cu bin u reyinticob Cꞌuj.
17 Caj yaꞌaraj Jesús tiꞌ u camsʌwinicob:
―Jach taj quin waꞌaric techex.
Yaꞌab u yʌjtseqꞌuir u tꞌʌn Cꞌuj u cꞌat yiricob a baꞌ ca wiriquex bajeꞌrer.
Baxuc xan,
yaꞌab mac a tsoy yorob u cꞌat yiricob a baꞌ ca wiriquex bajeꞌrer.
Baxuc xan,
caj u cꞌat yubicob a baꞌ quin camsiquechex.
Chen mʌꞌ tu yubob quireꞌ quimob.
Jesús cu tajquintic u camsʌwinicob a baꞌ quiriꞌ mʌꞌ ju najtajobiꞌ
18 Caj yaꞌaraj Jesús tiꞌ u camsʌwinicob:
―Uꞌyex bic tabar a caj in camsechex bic tabar u bin u pʌqꞌuic u pʌcꞌar ich u cor.
19 Jesús caj u tajquintaj tiꞌ u camsʌwinicob:
―A caj a wuꞌyajex sam.
A mac a caj yubaj in tꞌʌn tiꞌ u ruꞌumin tu cu bin u reyintejob Cꞌuj.
Cu tar a quisinoꞌ cu taꞌquic tiꞌ mac u tꞌʌn Cꞌuj soc mʌꞌ u najtej,
irej u yijir rub ich bej,
a caj in camsajechex sam.
20 Baxuc xan,
a rub yijir ich tunich,
an ten bic a mac cu yubic u tꞌʌn Cꞌuj seb caj quiꞌjij yor,
quireꞌ caj u cꞌʌmaj u tꞌʌn Cꞌuj.
21 Aroꞌ irej u yijir a mʌꞌ tam oc u mos.
Seb caj u toc pꞌʌtaj u tꞌʌn Cꞌuj quireꞌ caj yubaj u tumtaj yor.
Caj yub u chucur u pach quireꞌ caj u yacsaj tu yor.
Rajen caj u pꞌʌta yacsic tu yor.
22 A yijir tu qꞌuichꞌintaj,
rub ich qꞌuiꞌix.
Baxuc cu camsiquechex tiꞌ u tꞌʌn Cꞌuj,
an ten bic mac cu yubic u tꞌʌn Cꞌuj.
Mʌꞌ ja wirej,
a baꞌ yʌn yocꞌocab cu pachtic.
Cu pachtic u nejaꞌric u taqꞌuin,
raꞌ cu bobʌstic irej qꞌuiꞌix caj u bobʌstaj tu qꞌuichꞌintaj.
Rajen mʌꞌ ju nequiꞌ acsic yor.
Mʌꞌ taj cu yacsic tu yor.
23 Caj yaꞌaraj Jesús tiꞌ u camsʌwinicob:
―A rub yijir tu tsoy u ruꞌumin,
raꞌ quir u camsiquechex a mac tu jach cꞌʌmaj u tꞌʌn Cꞌuj.
Caj u toc tsꞌaja u wich cien.
Raꞌ cu quiꞌ man tu tsoyir.
U jer caj u caꞌ tsꞌaja u wich sesenta.
Raꞌ cu man tu tsoyir,
chen mʌꞌ cꞌuchaꞌan yor tu quiꞌ acsic tu yor cien.
U jer caj u caꞌ tsꞌajaj u wich treinta u wich.
Raꞌ cu man tu cꞌʌs tsoyir,
chen mʌꞌ tu quiꞌ acsaj tu yor tiꞌ sesenta u wich ―baxuc caj yaꞌaraj Jesús tiꞌ u camsʌwinicob.
Jesús caj u camsa bic tabar u chꞌijir u robirir ich u pʌcꞌar trigo
24 Jesús cu caꞌ camsic u camsʌwinicob bic tabar cu bin u reyinticob Cꞌuj.
Caj yaꞌaraj Jesús:
―An bic tabar u pʌqꞌuic u pʌcꞌar trigo ich cor.
Caj u rʌc qꞌuichꞌintaj tu cor.
25 Caj man u rʌc purej u robir tub u pʌcꞌman u pʌcꞌar trigo a mac a cu pꞌactic tiꞌ.
Quireꞌ wenʌn u caꞌob,
mac caj man u pur u robirir tub u pʌcꞌar trigo u racꞌob.
Pꞌactaꞌb ten u racꞌob,
rajen cu man u pʌqꞌuic u robir tu pʌcꞌaꞌan trigo.
Caj tsꞌoc u puric u robir caj bin ich yatoch.
26 Caj chꞌijij u pʌcꞌar trigo,
yet chꞌijac u robirir hasta job u wich u pʌcꞌar trigo.
Quet tar u wich u robirir.
27 Caj bin yaꞌaraj u cꞌurew tiꞌ u jach tsꞌurir:
“A ta pʌcꞌaj trigojeꞌ Jach Tsꞌur,
xacaꞌan yejer robirir cu chꞌijir.
A caj a pʌcꞌaj yirir ucheꞌ tsoy.
U chꞌijir a bajeꞌrer yʌn u robirir xacaꞌan.
An tub u tar u robirir caj jocꞌ?”
28 Caj araꞌb ten u jach tsꞌurir:
“Yʌn mac caj u pʌcꞌaj u robirir ich trigo.
Raꞌ cu pꞌactiquen.
Rajiꞌ caj u pʌcꞌaj u robirir.”
Caj yaꞌaraj tiꞌ u jach tsꞌurir:
“Ar in rʌc bin in jaquej u robirir.”
29 Caj yaꞌaraj u jach tsꞌurir:
“Mʌꞌ,
chen u robirir ca jaquiquiꞌ quet ca bin a jaquic xan u wich trigo.
30 Cax chꞌijir u robirir yejer trigo hasta cu tsꞌic u wich trigo.
Jeꞌ in tuchiꞌticob u wʌticob u wich trigo,
yet bin u jaquicob u robirir.
U robirir cu yʌn bin u jaquejob caꞌ u jepꞌ cꞌʌxtejob u robirir caꞌ u toquejob.
Cu tsꞌocareꞌ cu wʌticob trigo caꞌ u ricꞌsejob.”
Jesús caj u camsaj bic tabar u chꞌijir u yijir u pʌcꞌar mostaza
31 Jesús caj u camsaj bic tabar cu bin u reyinticob Cꞌuj.
Rajen caj u yaꞌaraj tiꞌob:
―An ten bic u chꞌijir u pʌcꞌar mostaza xib ich ruꞌum.
32 Jesús caj yaꞌaraj:
―Mʌnaꞌ u jer yijir jach mijin yijir mostaza.
Cu chꞌijireꞌ jach manan u xitꞌir u cꞌʌb.
U jer u pʌcꞌar mʌꞌ u nexitꞌir u cꞌʌb.
Hasta chꞌijir u cheꞌer jeroj cu tar chꞌichꞌ u cꞌʌxicob u cꞌuꞌ.
Jesús caj u camsaj tiꞌ u tsꞌac pan quir u sip yoꞌoch pan
33 Jesús caj u caꞌ camsaj.
Rajen caj yaꞌaraj tiꞌob:
―Bajen u ruꞌumin tu cu bin u reyinticob Cꞌuj raꞌ irej u tsꞌac yoch pan a xquicoꞌ cu puric ich harina mʌnaꞌ u nup u tenin u puric.
Cu tsꞌocar u puric cu rʌc sip tu cotor.
Biquinin Jesús caj u cꞌʌnaj u tꞌʌn quir u camsic tiꞌ a pimoꞌ
34 Mʌꞌ u camsaꞌ u jer tꞌʌn.
Toc raꞌiriꞌ caj u camsaj.
Bic tabar caj u pʌcꞌaj u yijir mostaza soc yerob bic tabar cu bin u reyintic Cꞌuj.
35 Soc u nupꞌur u tꞌʌn a baꞌ araꞌb ten yʌjtseqꞌuir u tꞌʌn Cꞌuj uch,
rajen a baywoꞌ Jesús caj u camsaj tiꞌob.
Mʌꞌ ja wirej,
a mac a tsꞌaꞌb u tucur ten Cꞌuj caj u tsꞌibtaj uch:
Quin waꞌaric tiꞌob,
quij yʌjtsꞌeqꞌuir u tꞌʌn Cꞌuj,
an ten bic mʌꞌ yubmʌn uch raꞌ u qꞌuinin caj tsꞌoc u betaꞌr ich yocꞌocab.
Baxuc caj u tsꞌibtaj a mac tsꞌaꞌb u tucur ten Cꞌuj uch.
Jesús cu camsic bic tabar u chꞌijir u robirir ich u pʌcꞌar trigo soc u najticob
36 Jesús caj yaꞌaraj tiꞌ a pimoꞌ:
―Xenex ich a watochex.
Caj binob Jesús caj oc ich yatoch mac.
Caj u jutsꞌob u bʌj u camsʌwinicob ich Jesús.
Caj yaꞌarob u camsʌwinicob:
―Arej tenob a baꞌ ca camsic tenob cu jocꞌar u robirir u pʌcꞌar trigo.
37 Caj yaꞌaraj Jesús tiꞌ u camsʌwinicob:
―Quireꞌ a mac a cu man u pʌqꞌuic tsoy yijireꞌ,
ten ―quij Jesús―.
Quireꞌ taren in yamtic mac tu cotor.
Yʌjpʌqꞌuiren.
38 A tu quin pʌqꞌuic yijireꞌ,
teꞌ ich yocꞌocab.
A quin pʌqꞌuic yijireꞌ ich yocꞌocab,
raꞌ u winiquir cu yacsic tu yor in tꞌʌn.
A robirireꞌ,
rajiꞌ winiquir mʌꞌ tu yacsaj tu yor tiꞌ ten.
39 Raꞌ u qꞌuinin caj u wʌticob u wich trigo yejer u robirir,
raꞌ u qꞌuinin caꞌ bin xuruc tꞌʌn.
Rajiꞌob a tu wʌtajob u wich trigo yejer u robirir.
Mʌꞌ raꞌ cu bin jach wʌticob,
yʌjmasirob u tꞌʌn Cꞌuj.
Wa mac caj u pʌcꞌaj robirir,
quisin caj u pʌcꞌaj yijir,
quireꞌ cu pꞌactiquen.
40 Baxuc a cu maric u robirir u purejob ich cꞌacꞌ.
Quet bayiriꞌ cu bin u teticob a mac mʌꞌ ju yacsob tu yorob.
Raꞌ cu bin purbir ten yʌjmasirob u tꞌʌn Cꞌuj ich cꞌacꞌ caꞌ bin xuruc tꞌʌn.
41 Caj yaꞌaraj Jesús:
―A tenoꞌ,
a mac tar u yamtic tu cotor mac.
Quin bin in tuchiꞌtic yʌjmasirob u tꞌʌn Cꞌuj quir u teticob a mac yʌn u siꞌpir.
Chen cu yʌn bin u teticob a mac a caj u pʌyob u siꞌpir u racꞌob.
42 Tar cu bin jocꞌar purbir ich cꞌacꞌ.
Tiꞌ cu bin yacꞌticob u bʌj ich cꞌacꞌ tu cuch tu cu toꞌquic mac.
Tiꞌ cu bin u jach mucꞌyaj ich cꞌacꞌ.
43 Chen a mac a caj u yacsaj tu yor in tꞌʌn ―quij Jesús―,
a Cꞌujoꞌ cu bin yaꞌaric tiꞌ a mac a caj u cꞌʌmob in tꞌʌn.
Jeꞌ yaꞌaraꞌ ten Cꞌuj:
―Quiꞌ in wor in wiriquech ―quij Cꞌuj―.
Jeꞌ u yesiquech tiꞌ tu cotor mac quir yiric quiꞌ yor yiriquechex Cꞌuj.
Quiꞌ uꞌyex baꞌ quin waꞌaric techex.
Jesús caj u camsaj bic tabar a mac a caj u yiraj u taqꞌuin
44 Caj yaꞌaraj Jesús:
―Bic tabar cu bin u reyintic Cꞌuj irej a mac a mʌnmʌn u ruꞌum,
caj yiraj tiꞌ mucaꞌan u taqꞌuin.
Caj yiraj tiꞌ mucaꞌan u taqꞌuin quiꞌ yor.
Caj u caꞌ mucaj caj bin u mʌnej u ruꞌum.
Caj u rʌc xupaj u taqꞌuin tu u mʌnmʌn u ruꞌum.
Cax tu rʌc canaj u baꞌtac xan quir u mʌnic.
Jesús caj u camsaj caj yiraj sʌc uj a jach coꞌoj
45 Caj yaꞌaraj Jesús tiꞌ u camsʌwinicob:
―Soc a werex bic tabar cu bin u reyintic Cꞌuj.
Irej a mac a nanij cu man u cʌxtej u mʌnej sʌc uj,
a jach coꞌoj.
46 Caj u yiraj jach coꞌoj sʌc uj,
caj yiraj mʌꞌ cꞌuchaꞌan yor u mʌnic quireꞌ jach coꞌoj.
Rajen caj rʌc bin u canic u baꞌtac quir u mʌnic sʌc uj.
Jesús caj u camsaj bic tabar u chuquic cʌy ich chim
47 Caj yaꞌaraj Jesús tiꞌ u camsʌwinicob:
―A werex bic tabar cu bin u reyintic Cꞌuj.
Irej a cu puric u chimin cʌy quir u chuquic cʌy ich cꞌacꞌnab.
Caj u chucaj xacaꞌan baꞌ cʌyir cu yocar ich chim.
48 Caj chup u cʌyir ich chim,
caj u jitaj ich chiꞌcꞌacꞌnab.
Caj curʌj u tetej a tsoyoꞌ,
caj u rʌc puraj a cꞌasoꞌ,
quireꞌ mʌꞌ quiꞌ u chiꞌbir.
Caj u butꞌaj ich xac a tsoyoꞌ.
49 Baxuc cu bin u betic ich yocꞌocab caꞌ bin xuruc tꞌʌn.
Jeꞌ u tarob yʌjmasirob u tꞌʌn Cꞌuj quir u teticob a mac cꞌas quir u tetic a mac tsoy xan.
50 Tar cu bin u teticob a mac cꞌas quir u tetic a mac tsoy xan.
Tar cu bin purbir ich cꞌacꞌ tu cuchir u toꞌquic mac quireꞌ cꞌas.
Tu cu bin u jach mucꞌyaj.
Tu cu bin u jach acꞌticob u bʌj tu cu yerar.
A baꞌ uchben, a baꞌ ricꞌben
51 Caj cꞌataꞌb ten Jesús tiꞌ u camsʌwinicob:
―Ta rʌc najtajex a baꞌ tin camsajechex?
Caj u nuncajob u camsʌwinicob:
―Tin cʌnajob Jaj Tsꞌur.
52 Caj yaꞌaraj Jesús tiꞌ u camsʌwinicob:
―Mʌꞌ ja wirej ―quij Jesús―.
Quireꞌ caj a najtex tu cu bin u reyintej Cꞌuj caꞌ bin a cʌnex irechex yʌjcamsʌyʌjirob u tꞌʌn Moisés a cu camsicob tiꞌ u racꞌob a baꞌ camsaꞌb ten yʌjtseqꞌuirob u tꞌʌn Cꞌuj uch.
Baxuc ca bin a camsex tiꞌob u tꞌʌn Cꞌuj a ricꞌbenoꞌ.
Jesús wʌcꞌʌs bin ich u cajar Nazaret
53 Jesús caj tsꞌoc u camsic bic tabar cu bin u reyinticob Cꞌuj caj bin Jesús.
54 Caj cꞌuchij Jesús tu cajar Nazaret tu chꞌijij Jesús uch.
Caj u yʌnxchun u camsic tiꞌob Jesús tu cu naj cꞌujinticob Cꞌuj u winiquirob judío:
―Tub u tar caj yubaj a jeꞌ xibaꞌ a baꞌ cu camsicoꞌon?
A ju neꞌer u camsicoꞌon Jesús.
An tub u tar caj u cʌnaj carem u beyaj ―baxuc caj yaꞌarob u racꞌob ich u cajar.
55 Caj yaꞌarob:
―Mʌꞌ wa rajiꞌ u parar yʌjsusicheꞌ?
Caj yaꞌarob:
―Biquinin raꞌ u bʌj Jacobo.
Raꞌ u bʌj José xan.
Raꞌ u bʌj Simón xan.
Raꞌ u bʌj Judas xan.
56 Caj yaꞌaraj u racꞌob tu cajar Nazaret:
―Tiꞌ cʌjaꞌan xquic u bʌjob Jesús.
Pꞌeriꞌ yejeroꞌonex.
An tub u tar caj u cʌnaj aroꞌ?
57 Rajen u racꞌob caj choquij yorob tiꞌ Jesús.
Caj araꞌb ten Jesús tiꞌ u racꞌob:
―Mʌꞌ u cꞌat yirir a mac tsꞌaꞌb u tucur ten Cꞌuj wa tiꞌ cʌjaꞌan tu jach cajar.
Cax u wʌcꞌʌs u bʌjob,
mʌꞌ u cꞌat yiricob.
Chen mac cʌjaꞌan nach u cꞌat yubicob.
58 Mʌꞌ yaꞌab caj u jawsa mac Jesús tu cajar Nazaret quireꞌ mʌꞌ ju yacsob tu yorob tiꞌ Jesús.