Yʌjqꞌuichꞌinyʌjir
4
Jesús caj wʌcꞌʌs bin ich u chiꞌcꞌacnab u cꞌabaꞌ Galilea caj u yʌnx chun u camsic bʌytʌc tu yʌn u chiꞌcꞌacꞌnab.
Jach yaꞌab mac caj u muchꞌquintob u bʌj yicnʌn Jesús rajen caj oquij ich chem a tiꞌ yʌn ich cꞌacꞌnab caj curajij.
Tu cotor a mac tiꞌ yʌnob ich ruꞌum tu chiꞌ cꞌacꞌnab.
San Marcos 4.1-20
3 ―Uꞌyex a baꞌ quin camsic techex.
Caj bin mac quir u pʌqꞌuic u pʌcꞌar ich u cor.
4 A mac caj bin u qꞌuichꞌintej ich u cor.
Cariqueꞌ caj u qꞌuichꞌintaj caj rub jun yar u pʌcꞌar ich tam bej.
Caj tar u ruqꞌuic chꞌichꞌ.
5 U jer jun yar rub ich tunich tu mʌꞌ pim u ruꞌumin.
Seb caj tsꞌernʌj quireꞌ jay u ruꞌumin,
rajen seb caj jocꞌ.
6 Barej caj naquij qꞌuin caj quimij mʌꞌ tu bin ocac u mots,
rajen quimij.
7 U jer jun yar caj u rʌc qꞌuichꞌintaj,
caj rub ich qꞌuiꞌix.
Caj chꞌijij caj rʌc bobostaꞌb ten qꞌuiꞌix mʌꞌ ju tsꞌajaj u wich.
8 U jer jun yar caj u rʌc caꞌ qꞌuichꞌintaj ich u jer u ruꞌumin.
Jach tsoy u ruꞌumin.
Caj tsꞌernʌj,
caj chꞌijij,
caj u netsꞌaj u wich.
Cien caj u toc tsꞌaj u wich.
U jer caj u tsꞌaj u wich sesenta.
U jer caj u tsꞌaj u wich treinta.
9 Uꞌyex baꞌ quin camsic techex soc a wuꞌyiquex,
soc a najtiquex a baꞌ u cꞌat yaꞌaric.
Biquinin cu camsic tiꞌob
10 Caj tsꞌoc u camsaꞌ ten Jesús caj u jutsꞌ u bʌj u doce camsʌwinicob Jesús tu yicnʌn,
quet yejer a mac a tiꞌ yʌnob bʌytʌc tiꞌ.
Caj araꞌb tiꞌ:
―Biquinin ca camsic a pimoꞌ bic tabar u qꞌuichꞌintic u pʌcꞌar ich u cor?
11 Caj u yaꞌaraj tiꞌob:
―Jeꞌ u tsꞌic techex Cꞌuj quir a najtiquex a baꞌ caj u mucu araj ten Cꞌuj tiꞌ Cristo.
Chen a pimoꞌ mʌꞌ ju bin u najtejob quireꞌ mʌꞌ ju cꞌʌmajob u tꞌʌn Cꞌuj.
Tu chen soꞌsoc uꞌyajob camsaꞌrob.
12 Rajen,
a mac a mʌꞌ yerob Cꞌuj a cu yubicob in camsicob cu chen uꞌyicob cax cu yubicob mʌꞌ ju najtejob.
Mʌꞌ bin u cꞌʌꞌoticob soc u yacsicob tu yorob soc u tocaꞌrob ten Cꞌuj.
Jesús cu tajquintic u camsʌwinicob a baꞌ quiriꞌ mʌꞌ ju najtajobiꞌ
13 Caj u yaꞌaraj tiꞌob:
―Mʌꞌ ja najtajex a jeꞌ baꞌ caj in camsajechex.
Bic tabar ca bin a najtex tu cotor a baꞌ ca soꞌsoc uꞌyiquex in camsiquechex?
14 A mac a caj bin u qꞌuichꞌintic u pʌcꞌar ich u cor rajiꞌ cu qꞌuichꞌintic u yijir u tꞌʌn Cꞌuj.
15 Yʌn jun yarob mac ich tan bej tu cu qꞌuichꞌitaꞌr u tꞌʌn Cꞌuj,
barej caj u yubob seb caj tar Satanás u taquic tiꞌ mac u tꞌʌn Cꞌuj a baꞌ yubmʌniꞌ soc mʌꞌ ju najticobiꞌ,
irej u yijir a rub ich tan bej a caj in camsajechex sam.
16 U jer jun yarob mac,
robob irob u yijir a qꞌuichꞌintaꞌb ich u tunich robob caj yubob u tꞌʌn Cꞌuj quiꞌ yorob caj u cꞌʌmajobiꞌ.
17 Quireꞌ robob irej u yijir a mʌꞌ tam oc u mots.
Seb caj u toc pꞌʌtajob u tꞌʌn Cꞌuj caj yubajob u tumtaj u yorob.
Caj yubajob u chucur u pachob quireꞌ u tꞌʌn Cꞌuj,
rajen caj u pꞌʌtajob u tꞌʌn Cꞌuj.
18 U jer jun yarob irob u yijir a qꞌuichꞌintaꞌb a rub ich qꞌuiꞌix,
robob a tu yubob u tꞌʌn Cꞌuj.
19 Chen a jeꞌ macaꞌ cu tucric u tꞌajar u baꞌtac yejer u tꞌajar u taqꞌuin yejer u beyaj.
A baꞌ yʌn yocꞌocab cu pachtic,
rajen bobʌstaꞌ u tꞌʌn Cꞌuj soc mʌꞌ cꞌuchaꞌan yor u quiꞌquintic u yor Cꞌuj irej qꞌuiꞌix caj u bobʌstaj tu qꞌuichꞌintaꞌb.
20 A rub yijir tu tsoy u ruꞌumin raꞌ quir u camsiquechex a mac a caj u jach cꞌʌmaj u tꞌʌn Cꞌuj,
caj u tsꞌaj u wich cien,
raꞌ cu quiꞌ man tu tsoyir.
U jer caj u caꞌ tsꞌajaj u wich sesenta,
raꞌ cu man tu tsoyir chen mʌꞌ cꞌuchaꞌan yor tiꞌ a caj u tsꞌaj u wich cien.
U jer caj u tsꞌajaj u wich treinta,
raꞌ cu man tu tsoyir chen mʌꞌ cꞌuchaꞌan yor tiꞌ a caj u tsꞌajaj u wich sesenta.
U tꞌʌn quir u camsic tiꞌ quib
21 Bayiriꞌ xan Jesús caj u yaꞌaraj tiꞌob:
―Mʌnaꞌ mac cu yacsic u quib yaram u chꞌac,
mʌꞌ ich yaram rec xan.
Mʌꞌ ja wirej,
cu tꞌʌquintic caꞌanan quir u yercꞌacꞌtic yatoch.
Rajen a baꞌ cu camsic tiꞌob irej wa tꞌʌbaꞌan u quib.
San Marcos 4.21-41
22 Bayiriꞌ xan,
tu cotor baꞌ a mucutacaꞌan tu cu bin u reyinticob Cꞌuj bajeꞌrer,
caꞌ bin cꞌuchuc tu qꞌuinin jeꞌ u jocꞌar u tajireꞌ.
Baxuc tu cotor mac jeꞌ u cꞌʌꞌotic caꞌ bin cꞌuchuc tu qꞌuinin jeꞌ u yubiqueꞌ.
23 Uꞌyex baꞌ quin camsic techex soc a wuꞌyiquex soc a najtiquex a baꞌ u cꞌat yaꞌaric.
24 Caj u yaꞌaraj tiꞌob xan:
―Quiꞌ uꞌyex soc mʌꞌ ju tubur techex a baꞌ ca wuꞌyiquex.
Wa chichin ca wuꞌyiquex u tꞌʌn Cꞌuj chichin cu bin u camsic techex.
Wa yaꞌab ca wuꞌyiquex u tꞌʌn Cꞌuj jeroj yaꞌab cu bin u camsic techex.
25 A mac a yʌn u tꞌʌn Cꞌuj tiꞌeꞌ u cꞌat u quiꞌ najtic,
Cꞌuj cu bin u camsic yaꞌab.
Chen a mac tiꞌ,
chichin u tꞌʌn Cꞌuj,
mʌꞌ u cꞌat u quiꞌ najtic,
jeꞌ u pꞌʌtiqueꞌ.
Quir u camsic tiꞌ u yijir a cu chꞌijireꞌ
26 Jesús tu cu camsic caj u yaꞌaraj xan:
―Tu cu bin u reyinticob Cꞌuj raꞌ irej tu cu man mac cu pʌqꞌuic u yijir ich ruꞌum.
27 Rajraꞌ cu wenʌn,
rajraꞌ cu yajar,
jeroj u man u qꞌuinin cu yiric a baꞌ u cꞌat.
U yijir a caj u pʌcꞌajeꞌ tsꞌernʌj,
jeroj cu chꞌijir.
Chen mʌꞌ yer bic tabar u chꞌijiriꞌ.
28 Mʌꞌ ja wirej,
u bʌjiriꞌ u ruꞌum tu junan cu chꞌisic u yijir a pʌcꞌaꞌan tiꞌ,
cu cꞌʌs chꞌijireꞌ,
cu jocꞌar u reꞌ.
Cu tsꞌocar u chꞌijireꞌ cu jobar yiꞌij.
Cu jobar yiꞌij cu tar u wich.
29 Cu tijireꞌ seb cu jaqꞌuic quireꞌ cꞌuchuc tu qꞌuinin u jaqꞌuic.
Quir u camsic tiꞌ u yijir mostaza
30 Jesús caj u yaꞌaraj xan:
―An bic jeꞌ in quetquintic tu cu bin u reyinticob Cꞌuj?
An bic tabar jeꞌ in camsic techex?
A baꞌ tꞌʌnin quin waꞌaric techex?
31 An ten bic u chꞌijir u pʌcꞌar mostaza xib ich ruꞌum.
Mʌnaꞌ u jer pʌcꞌar jach ne mijin yijir mostaza.
32 Cu chꞌijireꞌ jach manan u xitꞌir u cꞌʌb.
U jer pʌcꞌar mʌꞌ u ne xitꞌir u cꞌʌb.
Hasta chꞌijir u cheꞌer a jeroj,
cu tar chꞌichꞌ u cꞌʌxicob u cꞌuꞌ ich u boꞌoy.
Biquinin Jesús cu camsic a jeraꞌ
33 Yejer jach yaꞌab a jeꞌ camsaꞌbir u tꞌʌn an ten bic a jeraꞌ caj u yaꞌaraj tiꞌob u tꞌʌn hasta tu cꞌuchaꞌan yorob u najtejob.
34 Wa mʌꞌ yejer a camsaꞌbir tꞌʌn mʌꞌ ju tsicbʌtej tiꞌob baꞌ,
barej caj u toc araj tu cotor baꞌ tiꞌ u camsʌwinicob caj bin tu junanob.
Jesús tu tꞌʌnaj yicꞌar quir u chꞌenan bayiriꞌ u yamin
35 Raꞌiriꞌ u qꞌuinin caj bin qꞌuin caj u yaꞌaraj Jesús tiꞌ u camsʌwinicob:
―Cuxex tanxer ich cꞌacꞌnab.
36 Caj tsꞌoc u tuchiꞌtic a yaꞌab macoꞌ,
toc tiꞌ yʌn chem caj toc oquij Jesús quet yejer u camsʌwinicob.
Yet binacob u jer jun yarob chem.
37 A jeroj caj tar chꞌic yum yicꞌar,
caj tar u yamin xan,
tan u burur u chemin,
tabar u jurur u chem.
38 Rajiꞌeꞌ,
tan u wenʌn.
Yʌn u cꞌanjoꞌr tu cu wenʌn ich yach chem.
Aꞌas Jesús ten u camsʌwinicob,
caj u yaꞌarob tiꞌ:
―In wʌjcamsʌyʌjirechob,
mʌꞌ wa ca tucriquenob?
Tabar in jururob.
39 Caj ajij Jesús caj u tꞌʌnaj yicꞌar caꞌ chꞌenac:
―Xurej,
icꞌ ―quij―.
Mʌꞌ a tar.
―Biquinin tu jacꞌsaj a worex,
mʌꞌ wa ja wacsmʌnex ta worexiꞌ?
41 Caj u jach chꞌaj chꞌic yum sajaquirob,
caj u pacran arajob ich u yet camsʌwinicob:
―A mac a jeꞌ xibaꞌ cu yubaꞌr u tꞌʌn cax a icꞌoꞌ cax u yamin cꞌacnab cu quibicob u tꞌʌn Jesús?