A JEꞌRAꞌ U JACH TSOYIR U TꞌɅN CꞌUJ TU TSꞌIBTA LUCAS
Lucas cu yʌnxchun u tꞌʌn u bʌjob Teófilo
1
Quireꞌ a wer Teófilo yaꞌab mac caj u yʌnxchun u tsꞌibticob baꞌ u ber tu yʌnenob uch a tiꞌ yʌn tu yʌnoꞌonex uch.
2 Caj u yʌnxchun u tsꞌibticob u tꞌʌn Jesús.
Caj u tsꞌibtajob a baꞌ araꞌb ten a mac tu yirob Jesús a tu yʌnxchun rajiꞌob xan caj mʌnob u yamtejob u tsecꞌticob u jach tsoyir u tꞌʌn Jesús.
3 Rajen tin quiꞌ cʌxtaj in wirej xan wa taj caj u betaj Jesús uch caj tsꞌoc in wiric taj a baꞌ caj u betaj Jesús caj in tsꞌibtaj a baꞌ caj u yʌnxchun u betic Jesús hasta bajeꞌrer soc tech a wer u bʌjob in bʌj,
Teófilo.
4 Rajen caj in tsꞌibtaj tech Teófilo soc a toc er a baꞌ taj tu camsech uch.
Lucas 1.1-25
Yʌjmasir u tꞌʌn Cꞌuj caj yaꞌara bic tabar u rochaꞌr Juan ten u nʌꞌ. Rajiꞌ cu bin yacsic jaꞌ tu joꞌr mac
5 Tiꞌ yʌn mac cu reyintic u ruꞌumin Judea,
Herodes u cꞌabaꞌ.
Raꞌ u qꞌuinin cuxaꞌan sacerdote pʌchaꞌan u cꞌabaꞌ Zacarías.
Rajiꞌ cu beyaj yejerob yoꞌnen Abías.
Zacarías caj u raqꞌuintaj Elisabet raꞌ yoꞌnen Aarón rajiꞌ yoꞌnen xan sacerdote.
6 Zacarías yejer u racꞌ caj yiraj Cꞌuj taj cu quibicob u tꞌʌn Cꞌuj.
Caj yiraj Cꞌuj taj cu quiꞌ mʌnob ich u tsoyir a baꞌ caj u yaꞌaraj Cꞌuj.
7 Mʌnaꞌ u parar Elisabet quireꞌ mʌꞌju cꞌuchur u yor u pararʌncʌr.
Mʌꞌ ja wirej,
u beriꞌ mʌnaꞌ u parar,
toc chꞌijaꞌan toc caꞌturoꞌ yejer u mam bajeꞌrer mʌꞌ ju pararʌncʌr caj chꞌijob uch.
8 Raꞌ u qꞌuinin toc pꞌisaꞌan tu cu beyaj Zacarías an ten bic sacerdote ich carem naj tu cu naj cꞌujinticob Cꞌuj u winiquirob judío.
Raꞌ u qꞌuinin cu beyaj tiꞌ yoꞌnen Zacarías.
9 An ten bic nanij cu bin u toquic a quiꞌ u boqueꞌ ich carem naj.
Caj bin Zacarías quir u toquic quireꞌ tetaꞌb ten u yet sacerdote.
Caj tetaꞌb Zacarías caj tsꞌoc u yʌrʌcꞌtic chan tunich.
10 Raꞌ u qꞌuinin cu toquic a quiꞌ u boqueꞌ Zacarías,
tu cotor a pimoꞌ tan u tꞌʌnicob Cꞌuj ich u tancabir carem naj.
11 Yʌjmasir u tꞌʌn Cꞌuj caj u yesaj u bʌj tiꞌ Zacarías.
Zacarías caj yiraj yʌjmasir u tꞌʌn Cꞌuj,
chꞌiquicbar ich u noj tu cu toquic a quiꞌ u boqueꞌ.
12 Caj yiraj yʌjmasir u tꞌʌn Cꞌuj Zacarías jach jaqꞌuij yor quireꞌ mʌꞌ yer baꞌ u cꞌat yʌjmasir u tꞌʌn Cꞌuj caj u chꞌaj sajquir.
13 Yʌjmasir u tꞌʌn Cꞌuj caj yaꞌaraj tiꞌ:
―Mʌꞌ ju jacꞌʌr a wor ten,
Zacarías.
Cꞌuj cu yubic a tꞌʌn rajen cu bin yʌntar a parar caꞌ a pʌchej u cꞌabaꞌ Juan.
14 Caꞌ bin quiꞌac a wor jach manan quiꞌ a wor.
Yaꞌab mac cu bin quiꞌ tar yorob quireꞌ yʌn a parar Zacarías.
15 Quireꞌ a parar caꞌ bin rochac ten u nʌꞌ jach carem ʌcʌtan u wich Cꞌuj.
Mʌꞌ ju bin yuqꞌuic u cꞌab uva a parar.
Bayiriꞌ trago mʌꞌ ju bin yuqꞌuic xan.
Toc acaꞌan tiꞌ u Tajꞌor u Pixam Cꞌuj quir u tsꞌurintic caꞌ bin rochac ten u nʌꞌ.
16 Jach yaꞌab cu bin yacsic tu yor tiꞌ Cꞌuj caꞌ bin yubej u tsecꞌtic u tꞌʌn Cꞌuj u winiquirob israel.
17 A parar Juan cu bin u tsꞌurinbir u Tajꞌor u Pixam Cꞌuj soc cꞌuchaꞌan yor tiꞌ tu cotor baꞌ an ten bic Elías uch.
Caꞌ bin yubob u winiquirob judío u tsecꞌtic u tꞌʌn cu bin u quetquintic u yor u pararob yejer u tet soc pꞌeriꞌob yor.
Cu bin u tsecꞌtic tiꞌob soc u cꞌaxicob yor a mac a mʌꞌ ju quibicob Cꞌuj.
Soc cu bin u quibicob a mac taj yor,
a mac u neꞌer.
Soc cꞌuchaꞌan yor u cꞌʌmic a Cristojoꞌ caꞌ bin tac.
18 Zacarías caj u cꞌataj tiꞌ yʌjmasir u tꞌʌn Jaj Tsꞌur:
―Bic tabar in jach er taj a baꞌ ca wac quireꞌ jach uch chꞌijiquen yej in racꞌ?
19 Caj u nuncaj yʌjmasir u tꞌʌn Cꞌuj:
―A tenoꞌ,
rajiꞌ in cꞌabaꞌ Gabriel,
quin beyaj ʌcʌtan tiꞌ Cꞌuj.
Rajiꞌ tu tuchiꞌtajen quir in waꞌaric tech a jeꞌ jach tsoy tꞌʌnaꞌ.
20 A techoꞌ mʌꞌ ta quibaj in tꞌʌn a baꞌ tin toc aꞌaraj tech bajeꞌrer.
Baxuquech mʌꞌ ju bin jocꞌar a tꞌʌn hasta cu cꞌuchur tu qꞌuinin u rochaꞌr a parar ten u nʌꞌ.
Jeroj cu jocꞌar a tꞌʌn.
Caꞌ bin cꞌuchuc tu qꞌuinin cu bin jocꞌar jach taj an ten bic tin waꞌara tech.
21 Tiꞌ yʌn a pimoꞌ ich tancab tan pajicob caꞌ jocꞌac Zacarías caj jaqꞌuij yorob quireꞌ omaꞌan jocꞌ Zacarías ich japnin carem naj.
22 Caj jocꞌ Zacarías mʌꞌ ju jocꞌar u tꞌʌn.
Caj u najtajob a pimoꞌ yʌn baꞌ caj u yiraj Zacarías ich carem naj,
caj yesa yejer u cꞌʌb Zacarías quireꞌ mʌꞌ ju jocꞌar u tꞌʌn.
23 Caj cꞌuchij tu qꞌuinin u tsꞌocar u beyaj Zacarías ich carem naj,
caj bin ich yatoch.
24 Caj ur Zacarías ich yatoch caj yʌnjij u parar Elisabet.
Mʌꞌ ju cꞌʌs jocꞌar hasta manij cinco icnʌꞌ.
Tan u tucric ich yor,
Elisabet caj u tucraj tu yor:
25 “In Jaj Tsꞌurir caj u jawsaj in suraquir tu mʌꞌ ju yʌn tar in parar.
Caj u yamtajen Cꞌuj,
soc mʌꞌ jin pʌyic in suꞌtar tiꞌ a pim bajeꞌrer.”
Yʌjmasir u tꞌʌn Cꞌuj cu yaꞌaric jeꞌ u rochaꞌr Jesús ten u nʌꞌ
26 Yʌn seis icnʌꞌ caj najij u nʌcꞌ yejer yʌrʌcꞌ och Elisabet,
caj wʌcꞌʌs tuchiꞌtaꞌb ten Cꞌuj yʌjmasir u tꞌʌn raꞌiriꞌ Gabriel caꞌ xic ich u ruꞌumin Galilea tu cajar Nazaret.
Lucas 1.26-80
27 Caj bin yiric tuririꞌ xquic a mʌꞌ yer baꞌ hasta cu chꞌic u María quireꞌ José cu bin raqꞌuintic María toy cꞌataꞌb ten José,
raꞌ u nunquir David uch.
28 Yʌjmasir u tꞌʌn Cꞌuj caj oc tu yʌn María caj u tꞌʌnaj:
―A Cꞌujoꞌ cu bin u yamtiquech soc jach manan tsoyirech.
Mʌnaꞌ u jer xquic baxucoꞌ chen tech tsoyech.
29 María caj yiraj yʌjmasir u tꞌʌn Cꞌuj caj jaqꞌuij yor María a baꞌ yuba yaꞌaraꞌ tiꞌ.
Caj u tucraj tu yor:
“Biquinin cu tꞌʌniquen baxuc aroꞌ.”
30 Yʌjmasir u tꞌʌn Cꞌuj caj yaꞌaraj:
―Mʌꞌ ju jacꞌ a wor ten,
María,
Cꞌuj cu jach quiꞌ quiꞌ yajquintiquech María.
Mʌꞌ ja wirej,
Cꞌuj cu bin yesic bic u jach yajquintiquech.
31 Bajeꞌrer cu bin yʌntar a parar rajiꞌ ca bin a rochej xib,
caꞌ a pʌchej u cꞌabaꞌ JESÚS.
32 Aꞌa parar Jesúsoꞌ jach ne noꞌj,
rajiꞌ u parar Cꞌuj a tiꞌ yʌn caꞌananoꞌ.
A Jaj Tsꞌur a Cꞌujoꞌ cu bin yacsic soc u reyinticob u winiquirob judío an ten bic u nunquir David caj u reyintajob uch.
33 Rajiꞌ cu bin u reyinticob u winiquirob israel munt qꞌuin mʌꞌ ju tsꞌocar u reyinticob u winiquirob israel.
34 María caj u cꞌata tiꞌ yʌjmasir u tꞌʌn Cꞌuj:
―Bic tabar in pararʌncʌr quireꞌ mʌꞌ toy in chꞌaj in mamiꞌ.
35 Caj nuncaꞌb ten yʌjmasir u tꞌʌn Cꞌuj caj araꞌb tiꞌ:
―Jeꞌ u tar tech u Tajꞌor u Pixam Cꞌuj soc u yʌntar a parar quireꞌ jach yʌn u mucꞌ Cꞌuj jach manan tiꞌ,
rajen cu yʌntar a parar.
Caꞌ bin a rochej a parar yʌn u bin sʌjtaꞌbir ten mac quireꞌ u parar Cꞌuj.
36 Ira wirej,
a bʌjob a bʌj Elisabet bajeꞌrer yʌn u parar cax uch chꞌijic yʌnij u parar.
Cax a uchoꞌ caj u yaꞌaraj u racꞌob mʌꞌ u yʌntar u parar.
Bajeꞌrer yʌn tiꞌ seis icnʌꞌ caj yʌnij u parar xib.
37 Quireꞌ a baꞌ caj u toc araj Cꞌuj cꞌuchaꞌan yor tiꞌ cax ca tucric Cꞌuj mʌꞌ cꞌuchaꞌan yor tiꞌ.
38 Caj yaꞌaraj María:
―A tenoꞌ ―quij María―,
u cꞌurewen in Jaj Tsꞌurir.
Arej tiꞌ Cꞌuj a baꞌ u cꞌat u betic ten tsoy quireꞌ tiꞌ yʌnen quir u yʌntar in parar.
Caj tsꞌoc u tsicbar María caj bin yʌjmasir u tꞌʌn Cꞌuj.
Caj bin María irbir Elisabet
39 Mʌꞌ jach uch caj yiraj yʌjmasir u tꞌʌn María,
caj bin yirej u bʌjob u bʌj Elisabet.
Seb caj toc bin María ich u bʌjob u bʌj quireꞌ tiꞌ cʌjaꞌan Elisabet ich u cajar ich u ruꞌumin Judea a yʌn u witsir.
40 Caj oc María ich yatoch Zacarías.
Caj tꞌʌn Elisabet ten María.
41 Caj yubaj u tꞌʌnʌn Elisabet seb caj pecnʌj ich u nʌcꞌ Elisabet u chan ochir.
Quireꞌ jach yʌn tiꞌ u Tajꞌor u Pixam Cꞌuj Elisabet.
42 Rajen caj cꞌam tꞌʌn María ten Elisabet quireꞌ quiꞌ yor:
―A techoꞌ,
María,
jach manan u quiꞌ yajquintiquech Cꞌuj quireꞌ mʌnaꞌ u jer xquic tetaꞌb an ten bic tech ―quij―.
Jach tsoy a parar caꞌ bin a rochej quireꞌ Cꞌuj cu bin u yamtic a parar.
43 Maqueniꞌ cu tar yiriquen u nʌꞌ in Jaj Tsꞌurir Cꞌuj?
Mʌꞌ ja wirej,
tan u sʌjtiquen María.
44 Caj tarech caj a tꞌʌnen caj yubaj a tꞌʌniquen caj pecnʌj in chan ochir ich in nʌcꞌ quireꞌ quiꞌ yor.
45 Caj yaꞌaraj Elisabet:
―Jach quiꞌ a wor María quireꞌ ta quibaj u tꞌʌn yʌjmasir u tꞌʌn Cꞌuj caj yaꞌaraj:
“Jeꞌ u yʌntar a parar.”
Mʌꞌ ja wirej,
a wer bin u nupꞌur a baꞌ caj u yaꞌara tech Cꞌuj.
46 Caj u nuncaj María:
Jach quiꞌ in wor quireꞌ caj in waꞌaraj tiꞌ in Jaj Tsꞌurir:
jach caremech Jaj Tsꞌurir.
47 Jach quiꞌ in wor ʌcʌtan Cꞌuj quireꞌ rajiꞌ in wʌjtaquir.
48 A Cꞌujoꞌ tu yajquin ten quireꞌ u cꞌurewen Cꞌuj cax mʌꞌ noꞌjen.
Caj yaꞌaraj María:
Caꞌ bin tsꞌocac in rochic in parar jeꞌ yaꞌaric a jach pimoꞌ:
Cꞌuj caj u betaj a tsoyoꞌ tiꞌ ten.
Baxuc cu bin yaꞌariquenob mac hasta cu xur tꞌʌn.
49 A Cꞌujoꞌ jach manan chichir u mucꞌ quireꞌ caj u yamtajen.
Mʌꞌ ja wirej,
jach carem u cꞌabaꞌ quireꞌ mʌnaꞌ u siꞌpir.
50 A Cꞌujoꞌ cu yajquintic mac quireꞌ a mac cu sʌjtic Cꞌuj.
Cax ber u qꞌuinin caꞌ bin rochac ten u nʌꞌ cu bin yajquinbir ten Cꞌuj wa cu sʌjtic Cꞌuj.
51 A Cꞌujoꞌ caj u yesaj wa rajiꞌ jach manan chichir u mucꞌ,
bayiriꞌ u neꞌer tu cotor baꞌ.
Rajiꞌ cꞌuchaꞌan yor u chꞌesic u beyaj a mac a cu tucric jach carem,
a mac a cu tucricob u jach neꞌer baꞌ soc robob mʌꞌ u cꞌuchur u yor tiꞌ mʌnaꞌ baꞌ.
52 A Cꞌujoꞌ cꞌuchaꞌan yor u jocꞌsic a mac a cu tsꞌurintic u racꞌob a jach noꞌj u beyaj.
Baxuc xan cꞌuchaꞌan yor u tsꞌic u beyaj tiꞌ a mac irir ten u racꞌob a mʌꞌ noꞌjoꞌ.
53 A Cꞌujoꞌ cu bin u quiꞌquintic yor a mac a jach otsir yejer a baꞌ jach tsoyoꞌ.
Baxuc xan a mac neyaj u taqꞌuin,
mʌnaꞌ baꞌ cu tsꞌic tiꞌ.
54 A Cꞌujoꞌ caj u yamtaj u winiquirob israel quireꞌ u yaj.
A baywoꞌ caj nupꞌ u tꞌʌn Cꞌuj a baꞌ caj u toc araj tiꞌ ic nunquir uch.
55 Quireꞌ caj u cꞌʌꞌotaj u yajquintaj u winiquirob israel.
Baxuc caj araꞌb tiꞌ ic nunquir Abraham yejer u bʌjob soc munt qꞌuin cu yajquintic tiꞌob.
56 María caj pꞌat yejer u bʌjob u bʌj Elisabet.
Tres icnʌꞌ tiꞌ yʌn María ich u bʌjob u bʌj.
Pachir caj u wʌcꞌʌs bin María ich yatoch.
Caj rochaꞌb ten u nʌꞌ Juan rajiꞌ cu yacsic jaꞌ tu joꞌr mac
57 Caj cꞌuchij tu qꞌuinin caj pararnʌjij Elisabet,
xib caj u rochaj.
58 Caj yubob u racꞌob caj u rochaj u parar Elisabet,
baxuc xan u bʌjob caj rʌc quiꞌji yorob yejer Elisabet.
Caj yajquintaꞌb ten Cꞌuj rajen yʌnij u parar.
Rajen jach quiꞌ yor u racꞌob yejer u bʌjob.
59 Caj manij turiꞌ semana caj rʌc tarob quir u chan sesic u bʌqꞌuer an ten bic nanij cu beticob u winiquirob judío quir u yacsicob u cꞌabaꞌ.
U cꞌat u chen pʌchicob u wʌcꞌʌs jer u cꞌabaꞌ u tet Zacarías.
60 Caj u yaꞌaraj u nʌꞌ:
―Mʌꞌ a pʌchiquex u cꞌabaꞌ Zacarías,
tsoy ic pʌchic u cꞌabaꞌ Juan.
61 Caj yaꞌarob:
―Mʌnaꞌ u cꞌabaꞌ baxuc ich a bʌjob.
62 Caj cꞌataꞌb tiꞌ u tet baꞌ quir u cꞌabaꞌ ca bin a pʌchej,
tan yesicob yejer u cꞌʌb tiꞌ Zacarías.
63 Caj u mʌcantaj u cꞌʌb caj u cꞌataj u chan pequer cheꞌ caj tar purbir tiꞌ caj u tsꞌibtaj:
“Raꞌ u cꞌabaꞌ Juan.”
Rajen jaqꞌuij yor u racꞌob.
64 Ray u qꞌuininoꞌ seb caj jocꞌ u tꞌʌn Zacarías caj u yʌnxchun u tꞌʌnic Cꞌuj:
―Jach caremech Cꞌuj.
65 A mac tiꞌ cʌjaꞌan tu cajar Zacarías caj u chꞌaj sajaquirob caj rʌc mʌn u jumintob ich tu cotor u ruꞌumin u witsir u ruꞌumin Judea a baꞌ u ber Zacarías caj u pʌchaj u cꞌabaꞌ u parar.
66 Caj yubob u mʌn u jumintej caj u tucrob tu yor:
―A baꞌ u ber u parar Zacarías?
Quireꞌ a Cꞌujoꞌ cu bin yamtaꞌbir Juan.
Zacarías cu cꞌay quireꞌ quiꞌ yor
67 U tet Juan Zacarías jach yʌn tiꞌ u Tajꞌor u Pixam Cꞌuj,
rajen caj yaꞌaraj tiꞌ Cꞌuj:
68 Jach caremech Cꞌuj,
quireꞌ caj a cʌnantaj u winiquirob israel.
Mʌꞌ ja wirej,
caj a tacatoꞌon baxuc caj a yamtaj tiꞌob.
69 A Cꞌujoꞌ caj u tsꞌaj toꞌon ij cʌjtaquir a mac manan chichir u mucꞌ.
Raꞌ cu tar tiꞌ ic nunquir David a caj u reyintaj u winiquirob israel uch.
70 Baxuc caj u toc araj tiꞌ a mac tsꞌaꞌb u tucur ten Cꞌuj uch.
71 Baxuc caj u toc araj Cꞌuj uch:
“Jeꞌ in taquiquechex tiꞌ a mac cu pꞌactiquechex a mac a mʌꞌ u winiquirob judío”,
baxuc caj u yaꞌaraj Cꞌuj.
72 A Cꞌujoꞌ caj yaꞌaraj:
“Jeꞌ in yajquintic tiꞌ ic nunquir tan u yamtic tiꞌob.
Mʌꞌ ju bin tubur tiꞌ a baꞌ caj u toc araj uch.”
73 Baxuc caj toc araꞌb tiꞌ ic nunquir Abraham uch:
74 “Cu bin tacbir tiꞌ a mac cu pꞌacticoꞌon soc cꞌuchaꞌan ij cor ij cꞌujintic Cꞌuj soc mʌꞌ ic chꞌic sajaquir tiꞌ mac.”
75 Caj u chajex toꞌon ij cacsic tij cor soc ij cʌnic Cꞌuj soc u bur u qꞌuinin ic manex tu tsoyir ʌcʌtan tiꞌ hasta cu xur tꞌʌn.
76 Caj yaꞌaraj Zacarías tiꞌ u parar:
“A techoꞌ,
in pararech,
jeꞌ u tꞌʌniquech yʌjtseqꞌuir u tꞌʌn Cꞌuj caj bin a pʌyic u ber ic Jaj Tsꞌurir soc yer a racꞌob u winiquirob judío jeꞌ u tar Jaj Tsꞌureꞌ.
77 A Cꞌujoꞌ caj u tetaj toꞌon a techoꞌ,
chan och,
ca bin a waꞌaric Cꞌuj cu jawsic ic siꞌpir quir u taquic toꞌon.
78 Quireꞌ u jach tsoyir u pixam Cꞌuj caj u yajquintaj toꞌon caꞌ bin tac tu qꞌuinin cu cꞌuchur.
79 Ij cʌjtaquir jeꞌ u sasichʌjir u pixam ten Cꞌuj.
A mac a cu man tu yacꞌbirir yʌn u cꞌoxar u pixam ten Cꞌuj quir u sasichʌjir u pixamob.
Cu bin u rʌc rucꞌsic a baꞌ quic sʌjtic ij quimin.”
80 Caj chꞌijij Juan caj bin u cʌjtar ich tʌcay ruꞌum.
Caj u quiꞌ cʌnaj Cꞌuj Juan.
Hasta cꞌuchij tu qꞌuinin caj u yesaj u bʌj tiꞌ u racꞌob u winiquirob israel yʌjpʌyiren u ber Jaj Tsꞌur.