Riqꞌuij Jesús tu quimirir
16
Barej caj man u qꞌuinin tu cu jesicob u bʌj u winiquirob judío,
María,
a cu tar tu cajar Magdalena,
quet yejer María,
u nʌꞌ Jacobo,
quet yejer xan Salomé,
robob caj u mʌnajob a quiꞌ u boc soc cꞌuchaꞌan yorob u chojicob u baquer Jesús.
San Marcos 16.1-20
2 U qꞌuinin u yʌnxchun semana,
jach aꞌacꞌbir tan u tar qꞌuin caj tarob tu tꞌajaꞌan u baquer Jesús.
3 Cu pacran aꞌaricob a xquicoꞌ:
―Mac cu bin u bʌcꞌʌstic tiꞌ toꞌonex a tunichoꞌ a tiꞌ yʌn tu jor a tu tꞌajaꞌan u baqueroꞌ?
4 Caj cꞌuchob caj u nacsaj u wichobeꞌ,
caj u yirajob a jach carem tunicheꞌ,
toc bʌcꞌʌsaꞌan.
5 Barej caj ocob tu tꞌajaꞌan u baquer Jesús,
caj u yirajob tuririꞌ xib,
mʌꞌ uch xuruc u baqueriꞌ.
Tiꞌ cꞌuraꞌan tu noj a xquiqueꞌ.
Rajiꞌ u buquinmʌn jach cꞌʌrʌp sʌc nocꞌ.
Caj jaqꞌuij yorob a xquicoꞌ,
caj yirob curic.
6 Barej rajiꞌeꞌ,
caj u yaꞌaraj tiꞌob:
―Mʌꞌ u jacꞌʌr a worex ―quij―,
ca cʌxtiquex Jesús,
a cu tar tu cajar Nazaret ucheꞌ,
a mac quinsaꞌb tu cruz.
Wʌcꞌʌs riqꞌuij,
mʌnaꞌ Jesús teraꞌ ―quij―,
caꞌ cuxrajij ―quij― teꞌ yʌn u waꞌayaꞌ tu chaquintaꞌb u baquer uchaꞌ,
iric ―quij―.
7 Barej xenex,
arex tiꞌ u camsʌwinicob,
quet a waꞌariquex tiꞌ,
yejer Pedro:
“Arex tiꞌob cu bin tu ruꞌumin Galilea,
rajiꞌ cu bin yʌn batꞌan cꞌuchur.
A techexoꞌ,
pachir a cꞌuchurex.
Tiꞌ ca bin a wirex aroꞌ an ten bic caj u toc araj techex uch.”
8 Caj jocꞌob ich tu tꞌajaꞌan u baquer Jesús uch,
caj u cꞌʌnajob yacab quir u putsꞌurob quireꞌ jach manan sajʌcob,
tu chen quiquirʌncʌrob.
Mʌnaꞌ baꞌ caj u yaꞌarajob tiꞌ,
quireꞌ jach sajʌcob.
Irir Jesús ten María a cu tar tu cajar Magdalena
9 Barej caj riqꞌuij Jesús tiꞌ u quimirir,
aꞌacꞌbir,
u qꞌuinin u yʌnxchun semana,
caj u yʌn batꞌan esaj u bʌj tiꞌ María,
a cu tar tu cajar Magdalena,
raꞌiriꞌ María a jocꞌsaꞌb siete u quisinob ten Jesús uch.
10 Caj bin María,
caj u yaꞌaraj tiꞌ u yet manob uch Jesús,
caj cꞌuchij María cu yocꞌarob,
cu yacticob Jesús.
11 Robobeꞌ,
cax caj u yubajob cuxaꞌaneꞌ,
cax yuboboꞌ irir ten María.
Robob caj u yaꞌarajob:
―Mʌꞌ tajiꞌ ―quij.
Irir Jesús ten caꞌtur u camsʌwinicob Jesús
12 Barej pachir caꞌtur caj u yirajob mʌꞌ irej Cristo,
caj u yirajob quireꞌ jarpʌjij quimij,
cu binob ximbar ich chʌcʌn,
caj u yirajobiꞌ.
13 Caj binob,
robobeꞌ yaꞌarej tiꞌ u racꞌob,
barej,
mʌꞌ ju quibob caj yubob yaꞌaraꞌ tiꞌob,
xan.
Jesús cu tsꞌic u beyaj tiꞌ u camsʌwinicob
14 Pachir caj u yesaj u bʌj cuxaꞌan tiꞌ a oncejoꞌ u camsʌwinicob tu junanob,
quireꞌ curucbarob tu janʌnob.
Caj qꞌueyaꞌbob tiꞌob quireꞌ cax araꞌb tiꞌob ten yʌjirirob Jesús,
chen mʌꞌ ju yacsob tu yorob wa riqꞌuij.
Caj qꞌueyaꞌbob xan,
quireꞌ chich u joꞌrob.
15 Caj u yaꞌaraj tiꞌob:
―Joqꞌuenex caꞌ a tsecꞌtex u jach tsoyir u tꞌʌn Cꞌuj ich tu cotor mac ich yocꞌocab.
16 A mac a cu yacsic tu yor bayiriꞌ xan,
tan yacsaꞌ jaꞌ tu joꞌr,
bin tocac ten Cꞌuj.
Barej a mac a mʌꞌ ju yacsej tu yor,
tiꞌ toy yʌn u siꞌpir quireꞌ mʌꞌ ju yacsaj tu yoreꞌ,
rajiꞌ cu bin satʌreꞌ.
17 A baꞌ mʌnaꞌ mac yirmʌniꞌ uch,
mʌꞌ biqꞌuin yirmʌniꞌ,
raꞌ cu bin esbir ten an mac a yacsmʌnob tu yorob an ten bic a jeraꞌ:
Bin u jocꞌsicob quisinob quireꞌ ten tin tsꞌaja u mucꞌob.
Bin u tsicbarob ich u tꞌʌn a mac mʌꞌ u najticob uchiꞌ.
18 Wa cu chuquic can,
cax wa cu yuqꞌuic a baꞌ cu quinsic mac,
mʌꞌ u bin cꞌastar.
Bin u cu tsꞌancꞌʌbtic a mac yajeꞌ,
jeroj cu jawʌraꞌ.
Jesús caj bin caꞌanan
19 A Jaj Tsꞌuroꞌ,
caj tsꞌoc u tsicbar yejerob caj bin caꞌanano,
ꞌ caj curaj ich u noꞌoj Cꞌuj quir u sʌjtaꞌ ten tu cotor mac.
20 U camsʌwinicob Jesús tuneꞌ,
caj jocꞌobeꞌ quir u tsecꞌticob u tꞌʌn Jesús tiꞌ tu cotor mac,
jach quet u beyaj u Jaj Tsꞌurir yejerob.
A Jaj Tsꞌuroꞌ caj u yesaj a baꞌ cu tsicbarob u camsʌwinicob raꞌ taj cu yaꞌaricob.
Jeroj Tsꞌoquij,
quij.