Caj ricꞌsaꞌb Jesús ten Cꞌuj
28
Caj tsꞌoc u man sábado,
raꞌ u qꞌuinin cu yʌnxchun semana,
María,
tiꞌ cu tar ich u cajar Magdalena.
Tiꞌ yʌn u jer María juntur.
Caj binob tu butꞌaꞌan u baquer Jesús.
Jach aꞌacꞌbir caj binob.
2 Seb caj yubajob u jach chꞌic yum u pec ruꞌum,
quireꞌ caj tarij yʌjmasir u tꞌʌn Jaj Tsꞌur.
Tiꞌ u tar caj emij caꞌanan.
Caj cꞌuch tu butꞌaꞌan u baquer Jesús.
Rajiꞌ caj rac u mac u jor,
caj curaj tu jor.
3 Jach sʌc tꞌinen u nocꞌ yʌjmasir u tꞌʌn Cꞌuj,
irej u baꞌ jaꞌ,
jach sʌc tꞌinen u wich,
irej u raramʌncʌr xan.
4 Caj yirob soldado romano yʌjmasir u tꞌʌn Cꞌuj caj jaqꞌuij yorob.
Caj rʌc babʌcnʌjob orac sʌj quimicob.
5 Caj yaꞌaraj yʌjmasir u tꞌʌn Cꞌuj tiꞌ xquic:
―Mʌꞌ u jacꞌʌr a worex ten.
In wer tan a cʌxtiquex Jesús a cu bʌjʌꞌr ich cruz.
6 Mʌnaꞌ teraꞌ,
quireꞌ riqꞌuij an ten bic caj u toc araj uch.
Cojen irex u waꞌay tu yʌn caꞌch.
7 Seb caꞌ xiquechex a waꞌarex tiꞌ u camsʌwinicob Jesús.
Arex tiꞌob wʌcꞌʌs riqꞌuij tu quimirir Jesús.
Ti cu yʌn bin ich u ruꞌumin Galilea.
Tiꞌ taroꞌ cu bin u nupic tiꞌob.
Tar cu bin yiricob.
Jariꞌ yʌn in wac techex.
8 Jach jacꞌaꞌan yorob xquic caj binob arbir tiꞌ u camsʌwinicob.
Seb caj binob yaꞌarej.
Jach manan quiꞌ yorob.
9 A xquicoꞌ,
seb caj u nupob Jesús ich bej.
Jesús caj u tꞌʌnaj.
A xquicoꞌ,
caj u juts u bʌjob ich Jesús,
caj xonrʌjob.
Caj mecꞌab yoc Jesús ten xquic quir u cꞌujinticob.
10 Caj yaꞌaraj Jesús:
―Mʌꞌ ja sajquirex ten.
Xenex,
arex tiꞌ in camsʌwinicob:
“Tar quin bin ich u ruꞌumin Galilea tiꞌ cu bin yiriquenob.”
A baꞌ araꞌb tiꞌ soldado romano ten u tsꞌurirob sacerdote
11 Caj binob a xquicoꞌ,
caj binob soldado yʌjcʌnanyʌjirob u baquer Jesús.
Mʌꞌ yaꞌab bin yaꞌarej tiꞌ u jach tsꞌurirob sacerdote ich u cajar Jerusalén.
Caj yaꞌarob baꞌ u ber tiꞌ tu cotor.
12 U jach tsꞌurirob sacerdote caj bin tsicbarob yejer u jach tsꞌurirob u cajar u winiquirob judío a cu yaꞌaric a Nuxiboꞌ.
Quir u pꞌeriꞌquinticob yor quir u tsꞌabʌr u taqꞌuin tiꞌ soldado romano.
13 Caj yaꞌaraj u jach tsꞌurirob sacerdote:
―Tus arex tiꞌ mac:
“Chumuc acꞌbir caj tar chꞌabir u baquer Jesús ten u camsʌwinicob.
Quireꞌ wenʌn in caꞌob.”
14 Wa cu yubic u jumintaꞌr gobernador jeꞌ in binob in cʌnanticob a pachex soc in taꞌquiquechex tiꞌ gobernador ―quij yaꞌaricob sacerdote.
15 Caj tsꞌoc u cꞌʌmiquicob u taqꞌuin soldado romano caj binob yaꞌaricob ich u winiquirob judío a baꞌ toc araꞌb tiꞌ ten u jach tsꞌurirob sacerdote.
Rajen a jeꞌ tꞌʌnaꞌ cu man u juminticob ich u winiquirob judío hasta bajeꞌrer.
Jesús cu tuchiꞌtic u camsʌwinicob quir u tsecꞌticob u tꞌʌn
16 Caj binob u camsʌwinicob a oncejoꞌ ich u ruꞌumin Galilea.
Caj binob ich wits bic caj araꞌb ten Jesús uch.
17 Tiꞌ irir Jesús ten u camsʌwinicob ich u joꞌr pꞌuc wits.
Caj u cꞌujintajob Jesús.
Chen tiꞌ yʌn ich u camsʌwinicob caj u tucrajob:
―Mʌꞌ rajiꞌ Jesús.
18 Jesús caj u jutsꞌaj u bʌj ich u camsʌwinicob caj yaꞌaraj tiꞌob:
―Tu toc tsꞌaja ten Cꞌuj tu cotor u mucꞌ Cꞌuj,
soc cꞌuchaꞌan in wor in betic a baꞌ in cꞌat,
cax ich yocꞌocab,
cax ich caꞌanan.
19 Rajen quin toc aric techex:
Caꞌ xiquechex ich tu cotor mac quir a camsiquex in tꞌʌn soc u yacsicob tu yor.
Acsex jaꞌ tu joꞌr mac yejer u mucꞌ in Tet,
yejer u mucꞌ u parar Cꞌuj yejer u mucꞌ u Tajꞌor u Pixam Cꞌuj.
20 Bayiriꞌ camsex a racꞌob caꞌ u quibejob a caj in toc araj techex.
A werex tiꞌ yʌnen yejerechex u burur qꞌuin.
Mʌꞌ biqꞌuin bin in caꞌ pꞌʌtiquechex.
Hasta cu xur tꞌʌn.
Jeroj tsꞌoquij quij.