Riqꞌuij Jesús tu quimen
24
U qꞌuinin u yʌnxchun semana,
jach aꞌacꞌbir a xquicoꞌ caj wʌcꞌʌs binob tu butꞌ u baquer Jesús.
Caj u cuchob a quiꞌ u boque a caj u mʌnajob.
Lucas 24.1-53
2 Caj cꞌuchob a xquicoꞌ caj yirob toc bʌcꞌʌsaꞌan u tunichir u mac u jor tu butꞌij Jesús.
3 Caj ocob tu japnin tunich tu butꞌij Jesús.
Chen mʌꞌ caj u yirob u baquer.
4 A xquicoꞌ xacaꞌan u tucurob quireꞌ yirob mʌnaꞌ u baquer Jesús.
Seb caj yirob tiꞌ yʌn caꞌtur xib tu chꞌicaꞌanob xquic.
U buquimʌnob u nocꞌ jach sʌc tꞌinen.
5 A xquicoꞌ caj chinrajob u joꞌr quireꞌ sajʌcob.
A xiboꞌ caj yaꞌaraj tiꞌob:
―Ca tarechex a cʌxtex tu butꞌ u baquer Jesús?
6 Mʌꞌ tiꞌ yʌn a teraꞌ bajeꞌrer quireꞌ riqꞌuij tu quimen,
cuxaꞌan bajeꞌrer.
Mʌꞌ wa cꞌajtechex baꞌ caj u yaꞌaraj techex uch.
Tiꞌ toy yʌnechex ich u ruꞌumin Galilea.
7 Cꞌajtechex caj yaꞌaraj:
“Yʌn in quinsaꞌr,
a tenoꞌ,
quij Jesús,
quireꞌ caj u tuchiꞌten Cꞌuj a baxuquechexoꞌ.
A mac jach cꞌasoꞌ,
rajiꞌ cu bin u bʌjiquenob ich cruz.
Caꞌ bin tsꞌocac in quinsaꞌ quin bin in riqꞌuir,
mʌnaꞌ u nup u qꞌuinin.”
Baxuc caj yaꞌaraj Jesús uch.
8 A xquicoꞌ caj u cꞌʌꞌotajob u tꞌʌn Jesús uch.
9 Caj urob tu bin yirob tu butꞌ u baquer Jesús caj binob ich a oncejoꞌ u camsʌwinicob Jesús.
Baxuc tiꞌ yʌnob a yet manob Jesús ucheꞌ.
Caj u yaꞌarob tiꞌ a baꞌ caj u yirob yejer a baꞌ caj u yubob.
10 A xquicoꞌ a mac binob caꞌch quir yaꞌaricob tiꞌ u camsʌwinicob cuxaꞌan Jesús.
Rajiꞌob,
María,
a cu tar tiꞌ u cajar Magdalena,
yejer Juana,
yejer María,
u nʌꞌ Jacob yejer u jer mʌꞌ yaꞌab xquic.
11 Chen u camsʌwinicob mʌꞌ ju quibob a baꞌ caj araꞌb tiꞌob:
“Riqꞌuij Jesús.”
Cu chen tucricob a baꞌ caj u yubob yaꞌaric a xquic quireꞌ yerob u sosoc aꞌbar.
12 A Pedrojoꞌ,
seb caj riqꞌuij caj u cꞌʌnaj yacab caj bin yiric tu butꞌij u baquer Jesús.
Caj cꞌuchij caj u tac chꞌenaptaj caj u yiraj u noqꞌuir tu top u baquer uch.
Chen u noqꞌuir yʌn ich u way.
Caj sutnʌj tu junan ich yatoch jach jacꞌaꞌan yor a baꞌ caj u yiraj.
Jesús caj u yesʌj u bʌj tiꞌ u camsʌwinicob caꞌturoꞌ ich u berir Emaús
13 Raꞌiriꞌ u qꞌuinin caꞌturob u camsʌwinicob Jesús,
caj binob tu berir u cajar Emaús.
Yʌn once kilómetros u nachir tiꞌ u cajar Jerusalén.
14 Caj pacran tsicbnʌjob tu cu binob ich bej.
Caj tsicbnʌjob tiꞌ a baꞌ u ber tiꞌ Jesús.
15 Tiꞌ toy cu tsicbarob ich bej tan u chich tsicbarob.
Jesús caj u cꞌʌs nʌtsꞌaj u bʌj ich u camsʌwinicob soc quet u binob.
16 U camsʌwinicob mʌꞌ yerob wa Jesús quireꞌ mʌꞌ tsꞌaꞌb u tꞌʌnin u cꞌʌꞌotaꞌr ten u camsʌwinicob.
17 Jesús caj u cꞌataj tiꞌob:
―Baꞌ ca chich tsicbʌtiquex ich a ber?
Biquinin tucurex a caj tu ca binex ich bej?
18 Tuririꞌ ich a winicoꞌ u cꞌabaꞌ Cleofas caj u nuncaj tiꞌ caj yaꞌaraj:
―A jeꞌ qꞌuinaꞌ tu cotor mac ich u cajar Jerusalén yerob baꞌ u ber a teraꞌ.
Cax jamach tiꞌ yʌnech ich u cajar Jerusalén.
Tin tꞌʌn jariꞌ techeꞌ,
mʌꞌ a wer baꞌ u ber Jesús.
19 Jesús caj yaꞌaraj:
―Baꞌ u ber teraꞌ?
Rajiꞌob caj u nuncajob tiꞌ,
caj yaꞌarajob.
Mʌꞌ wa ta wuꞌyaj baꞌ u ber tiꞌ Jesús a cu tar ich u cajar Nazaret?
Rajiꞌ yʌjtseqꞌuir u tꞌʌn Cꞌuj.
A Jesúsoꞌ caj u quiꞌquintaj yor Cꞌuj.
Baxuc a pimoꞌ caj u quiꞌquintaj yorob.
Quireꞌ caj u yirob u carem beyaj Jesús.
Baxuc a baꞌ caj u camsaj.
20 Mʌꞌ wa caj a wuꞌyaj ―quij yaꞌaraꞌ tiꞌ― u jach tsꞌurirob sacerdote yejer u jach tsꞌurirob u cajar a nuxiboꞌ,
bic caj u cꞌubajob Jesús tiꞌ Pilato caj tsꞌoc u taꞌquicob u joꞌr.
Caj araꞌb u bin bʌjbir ich cruz.
21 Bajeꞌrer ―quij yaꞌaraꞌ tiꞌ―,
yʌn tres u qꞌuinin tu tsꞌoc u bajʌr Jesús ich cruz.
A tenob tan in pajicob wa rajiꞌ tuchiꞌtaꞌb ten Cꞌuj quir u taquicoꞌonex u winiquirob judío tiꞌ u winiquirob romano.
22 Bayiriꞌ ―quij yaꞌaraj―,
xquic a pꞌeriꞌoꞌ yejeroꞌon caj u jacꞌs in worob quireꞌ aꞌacꞌbir caj binob yirejob tu butꞌ u baquer Jesús.
23 Caj cꞌuchob mʌꞌ ju yirob u baquer,
caj sutnʌjob tu yʌnenob caj tsicbʌnʌjob tenob an ten bic tu jach irob yʌjmasir u tꞌʌn Cꞌuj a mac caj u yaꞌaraj tiꞌob cuxaꞌan Jesús.
24 Bayiriꞌ xib xan tres a pꞌeriꞌoꞌenob yejerob caj bin yirob tu butꞌ u baquer.
Caj yirob taj a baꞌ araꞌb ten a xquicoboꞌ.
Chen mʌꞌ ju yirob Jesús.
25 Jesús caj yaꞌaraj tiꞌob:
―Biquinin jach chichex a joꞌrex quireꞌ quiꞌ tsꞌabir ca wacsiquex a worex quireꞌ mʌꞌ ja wacsajex ta worex a baꞌ tsꞌibtaꞌb ten yʌjtseqꞌuirob u tꞌʌn Cꞌuj uch.
26 A werex jach taj yʌn u mucꞌyaj Cristo quireꞌ baxuc u cꞌat Cꞌuj soc u bin sʌjtaꞌbir ten tu cotor mac.
27 Jesús caj u quiꞌ camsaj tiꞌob a baꞌ araꞌb tiꞌ tu cotor ich u tꞌʌn Cꞌuj tiꞌ u wʌcꞌʌs bʌjiriꞌ ich tu cotor u tꞌʌn Cꞌuj.
Caj u yʌnxchun tub tsꞌibaꞌan ich u tꞌʌn Moisés.
Caj tsꞌoc u quiꞌ camsic tiꞌob a baꞌ araꞌb tiꞌ ten Moisés.
Caj u quiꞌ camsaj tiꞌob a baꞌ araꞌb tiꞌ ten yʌjtseqꞌuirob u tꞌʌn Cꞌuj uch.
28 Tabar u cꞌuchurob tu cajar tu cu binob caꞌch.
Jesús irej wa bin u caꞌ u potmastej u cajar.
29 Chen u camsʌwinicob caj u chich arob tiꞌ caj yaꞌarob:
―Pꞌaten yejeroꞌon,
tabar u bin qꞌuin quireꞌ tabar u yacꞌbirchʌjʌr.
Rajen Jesús caj oquij quir u pꞌatʌr yejerob.
30 Caj tsꞌoc u cutarob quir u janʌnob.
Jesús caj u chucaj u yoch pan caj yaꞌaraj tiꞌ Cꞌuj:
―Bayoꞌ ―quij.
Caj u xatꞌaj caj u tsꞌaj tiꞌob quir u janticob.
31 Caj tsꞌaꞌb u tꞌʌnin quir u cꞌʌꞌoticob Jesús seb caj binij Jesús mʌꞌ ju yirob tu binij.
32 Caj u pacraj arob:
―Jach quiꞌ ij cor caꞌch caj u tsicbʌta toꞌon ich bej,
caj u quiꞌ tsicbʌta toꞌon u tꞌʌn Cꞌuj,
tu tsꞌibaꞌan.
33 A caꞌturoꞌ u camsʌwinicob Jesús,
raꞌiriꞌ u qꞌuinin seb caj wʌcꞌʌs urob ich u cajar Jerusalén.
Caj cꞌuchob tu muchꞌaꞌan a oncejoꞌ u camsʌwinicob Jesús yejer u jerob u racꞌob.
34 A oncejoꞌ caj yaꞌarajob tiꞌ a tan tu cꞌuchurob:
―Jach jaj ic Jaj Tsꞌur,
riqꞌuij tu quimen quireꞌ Jesús caj tu yes u bʌj tiꞌ Simón.
35 A tan tu cꞌuchurob caj u tsicbʌtajob a baꞌ u ber tiꞌob ich u berir Emaús.
Caj u cꞌʌꞌotajob Jesús caj xatꞌaj u yoꞌoch pan tiꞌob.
Jesús caj u yesaj u bʌj tiꞌ u jerob u camsʌwinicob
36 Tiꞌ toy cu tsicbarob a baꞌ u ber tiꞌob.
Seb caj chꞌicraj Jesús chumuc tu yʌnob u camsʌwinicob.
Caj araꞌb tiꞌob ten Jesús:
―Caꞌ quiꞌac a worex ten Cꞌuj ―quij Jesús.
37 Chen u camsʌwinicob jach jaqꞌuij yorob caj u chꞌaj sajquirob.
Cu tucricob caꞌch caj u yirob u pixam a mac quimenoꞌ.
38 Jesús caj yaꞌaraj tiꞌob:
―Biquinin sajquechex?
Biquinin ca tucriquex ta worex:
Mac a jeꞌraꞌ?
39 Pʌctex a wirex in cꞌʌb yejer in woc soc a werex ten.
Tʌrex a wuꞌyex wa ten quireꞌ u pixam mac mʌnaꞌ u bʌqꞌuer an ten biquen yʌn in bʌqꞌuer.
Mʌnaꞌ u baquer an ten biquen.
40 Caj tsꞌoc yaꞌaric tiꞌob aroꞌ caj u yesaj u cꞌʌb tiꞌob soc yiricob tu bʌjaꞌan yoc yejer u cꞌʌb.
41 Quireꞌ jach quiꞌ yorob,
rajen mʌꞌ ju quibob wa rajiꞌ quireꞌ jacꞌaꞌan yorob xan.
Jesús caj yaꞌaraj tiꞌob:
―Chan chuquej ten a wochex in jantej.
42 Robob caj u tsꞌajob tiꞌ u xetꞌer cꞌacꞌbir cʌy quir u chiꞌic caj u yʌrob tiꞌ cab.
43 Jesús caj u cꞌʌmaj caj u chiꞌaj cʌy ʌcʌtan tu yʌnob baxuc cab caj u mʌcꞌaj.
44 Jesús caj yaꞌaraj tiꞌob:
―A baꞌ caj in waꞌaraj techex tiꞌ yʌnen ta wicnʌnex caꞌch.
Caj in waꞌaraj techex caꞌch,
yʌn in nupsic tu cotor a bar tsꞌibaꞌan ich u tꞌʌn Moisés.
Baxuc a tsꞌibaꞌan ich u tꞌʌn yʌjtseqꞌuirob u tꞌʌn Cꞌuj.
Baxuc a baꞌ tsꞌibaꞌan ich u tꞌʌn salmos.
45 Raꞌiriꞌ u qꞌuinin Jesús caj u tsꞌaj tiꞌob caꞌ u najtejob a baꞌ tsꞌibaꞌan ich u tꞌʌn Cꞌuj tiꞌ Jesús.
46 Jesús caj yaꞌaraj tiꞌob:
―Baxuc a jeꞌ tsꞌibaꞌan tiꞌ:
“Cristo a tuchiꞌtaꞌb ten Cꞌuj.
Yʌn u quimij,
caj tsꞌoc u quimij cu man mʌnaꞌ u nup u qꞌuinin cu riqꞌuir tiꞌ u quimirir,
quireꞌ a Cristojoꞌ,
u parar Cꞌuj.
47 A techexoꞌ yʌn a bin a tsecꞌtiquex in tꞌʌn ich tu cotor u cajar tu cʌjaꞌan mac.
Tar ca yʌnxchun a tsecꞌtiquex ich u cajar Jerusalén.
Caꞌ a tsecꞌtex tiꞌ caꞌ u yʌn cꞌaxejob tu yorob soc u pꞌʌticob u cꞌasirob soc Cꞌuj cu jawsiob u siꞌpirob.”
48 Caꞌ xic a waquex tiꞌ mac a baꞌ caj a wirex,
baxuc a baꞌ u ber tenoꞌ.
49 Baxuc xan,
jeꞌ in tuchiꞌtic techex u Tajꞌor u Pixam Cꞌuj an ten bic caj u toc araj Cꞌuj.
Jeꞌ u pꞌatʌr ta wicnʌnex.
Tar ca pꞌatʌrex ich u cajar Jerusalén hasta caꞌ bin a cꞌʌmiquex a muqꞌuex a tar u tar ich caꞌanan tiꞌ in Tet Cꞌuj.
Jesús cu bin ich caꞌanan
50 Jesús caj u pʌyaj u berob u camsʌwinicob ich u xur u cajar.
Tabar u cꞌuchob ich cajar Betania.
Caj u nacsaj u cꞌʌb ich yocꞌor u camsʌwinicob caj u cꞌataj tiꞌ Cꞌuj caꞌ cʌnantacob ten Cꞌuj.
51 Caj tsꞌoc u cꞌatic tiꞌ Cꞌuj caꞌ cʌnantacob ten Cꞌuj,
Cꞌuj caj u pʌyaj Jesús caꞌanan.
52 Jamach pꞌatob u camsʌwinicob quir u cꞌujinticob Jesús.
Caj tsꞌoquij caj binob ich u cajar Jerusalén,
jach quiꞌ yorob.
53 Rajraꞌ tiꞌ yʌnob u camsʌwinicob Jesús ich carem naj tan u cꞌujinticob Cꞌuj.