2 U tsꞌurirob u winiquirob judío caj u yʌnxchun u taꞌquicob u joꞌr Jesús caj yaꞌarajob:

―Tsꞌoc in wiricob soc u quinsaꞌ Jesús.

Mʌꞌ ja wirej,

caj u pꞌusaj yorob u winiquirob judío.

Quireꞌ cu yaꞌaric:

“Mʌꞌ tsoy a boꞌotiquex u taqꞌuin a ruꞌumex tiꞌ u rey César.”

Baxuc xan,

u bʌjiriꞌ cu yaꞌaric:

“Cristojen,

a caj u tuchiꞌten Cꞌuj quir u reyintiquen mac.”

3 Pilato,

caj u cꞌataꞌ tiꞌ:

―Arej ten wa ju reyech u winiquirob judío?

Jesús caj u nuncaj tiꞌ:

―An ten bic tech caj a waꞌaraj sam,

rajiꞌen.

4 Pilato caj u yaꞌaraj tiꞌ u jach tsꞌurirob sacerdote yejer a pimob caj u muchꞌquintob u bʌj:

―Mʌꞌ jin wiraj u siꞌpir a jeꞌ xibaꞌ.

5 Caj u pꞌencʌch arob baꞌ u winiquirob judío:

―Caj u jach pꞌusaj yorob u winiquirob judío tu cu camsic tiꞌob.

Caj u yʌnxchun u camsic ich u ruꞌumin Galilea.

Baxuc ich tu cotor u cajar Judea hasta cꞌuchij teraꞌ xan.

6 Pilato caj yubaj a baꞌ caj u yaꞌarajob yʌjtaꞌquirob u joꞌr Jesús.

Caj u cꞌataj tiꞌob:

―Tiꞌ wa ju tar a jeꞌ xibaꞌ ich u ruꞌumin Galilea?

7 Caj u yuba yaꞌaraꞌ tiꞌ u tar ich u ruꞌumin Galilea.

Caj yaꞌaraj caꞌ xic purbir Jesús ich Herodes quir u taꞌquicob u joꞌr.

Quireꞌ rajiꞌ gobernador ich u ruꞌumin Galilea.

Quireꞌ tiꞌ cꞌuchij Herodes ich u cajar Jerusalén.

8 Caj cꞌuchij Jesús ich Herodes,

jach quiꞌ yor Herodes quireꞌ uch u chen cꞌat yiric Jesús quireꞌ cu pachtic yirej caꞌ esac tiꞌ carem beyaj Herodes.

Quireꞌ cu yubic u tsibʌticob a pimob a baꞌ cu betic Jesús.

9 Cax yaꞌab baꞌ caj u cꞌataj Herodes tiꞌ Jesús.

Mʌꞌ baj cꞌʌs nuncaꞌb tiꞌ.

10 U jach tsꞌurirob sacerdote yejer yʌjcamsʌyʌjirob u tꞌʌn Moisés caj tarob chꞌictarob ʌcʌtan Herodes quir u taꞌquicob u joꞌr Jesús.

Cꞌam u tꞌʌnob.

11 Herodes,

caj u pꞌastaj Jesús yejer tu cotor u tsꞌurirob soldadojoꞌ caj u chejtajob tiꞌ.

Caj u tʌcajob u nocꞌ a tsoyoꞌ soc irej rey.

Caj tsꞌoc u tʌquicob u nocꞌ caj wʌcꞌʌs tuchiꞌtaꞌb Jesús ich Pilato.

12 Raꞌiriꞌ u qꞌuinin Pilato yejer Herodes caj u yajquintajob u bʌj quireꞌ a uchoꞌ cu pꞌacticob u bʌj.

13 Pilato caj u muchꞌquintaj u jach tsꞌurirob sacerdote yejer u jach tsꞌurirob u cajar u winiquirob judío yejer a pimob.

Tu cu taꞌquicob u joꞌr Jesús uch.

14 Pilato caj u yaꞌaraj tiꞌob:

―Tarex a puric a jeꞌ xibaꞌ ʌcʌtan ten.

Caj a waꞌarajex caj u pꞌusaj yor u winiquirob judío.

Caj tsꞌoc in cʌxtic in wirej wa yʌn u siꞌpir,

mʌꞌ tin wiraj u siꞌpir tuririꞌ a ca taꞌquiquex u joꞌr.

15 A mʌꞌ Herodesoꞌ caj u yiraj u siꞌpir xan.

Rajen caj u wʌcꞌʌs tuchiꞌtaj toꞌonex.

Mʌnaꞌ baꞌ caj u betaj quir u quinsaꞌ.

16 Bajeꞌrer quin bin in wac u jʌtsꞌob u pach.

Cu tsꞌocar u jatsꞌʌr caꞌ sipac caꞌ xic Jesús.

17 Caj yaꞌaraj baxucoꞌ quireꞌ nanij u sipic mac Herodes,

rajraꞌ cu cꞌuchur tu qꞌuinin u quiꞌquiꞌ janʌn,

raꞌ u qꞌuinin pascua.

18 Chen tu cotor mac caj u cꞌamquintajob u tꞌʌn,

caj yaꞌarajob:

―Quinsej a ra xiboꞌ.

Ij cꞌat caꞌ a siptej Barrabás.

19 A jeꞌ Barrabásaꞌ caj chuquij caj maquij tu cu maꞌcʌr winic uch quireꞌ caj u pꞌusaj yorob mac ich u cajar quir u jocꞌsicob u tsꞌurir u cajar.

Bayiriꞌ caj u quinsaj mac xan.

20 Pilato u cꞌat u siptic caꞌ xic Jesús,

rajen tu caꞌ tꞌʌnaj a pimoꞌ.

21 A pimoꞌ caj u caꞌ purajob u tꞌʌn.

Cꞌam caj yaꞌarob:

―Sinej ich cruz.

Caꞌ ten caj u caꞌ arob:

―Sinej ich cruz ―quij.

22 Mʌnaꞌ u nup u tenin caj yaꞌaraj Pilato:

―Biquinin yʌn in sinic ich cruz?

Arex ten baꞌ cꞌasir caj u betaj?

A tenoꞌ mʌꞌ jin wiraj u siꞌpir quir u quinsaꞌ.

Rajen quin bin in waꞌaric u jatsꞌʌr u pach.

Cu tsꞌocar u jatsꞌʌr u pach,

cu chabʌr caꞌ xic.

23 Chen a pimoꞌ caj u tsꞌʌraj u pach Pilato,

caj u chich araj tiꞌ Pilato:

―Sinej ich cruz.

Quireꞌ cꞌam yawʌt tꞌʌnob.

24 Pilato caj u quibaj u tꞌʌn.

Rajen Pilato caj u yaꞌaraj caꞌ quinsac Jesús soc u betic a baꞌ u cꞌatob u winiquirob judío.

25 Pilato caj u siptaj Barrabás,

a mac chucaꞌan uch cax raꞌ caj u pꞌusaj yorob u racꞌob quir u jocꞌsicob u tsꞌurir u cajar cax caj u quinsaj mac.

Chen Jesús caj u cꞌubaj caꞌ quinsaꞌ ten u soldado quireꞌ baxuc u cꞌat u winiquirob judío.

26 U soldado u winiquirob romano,

caj u jocꞌsajob Jesús quir u quinsicob.

Caj u chucob tuririꞌ xib u cꞌabaꞌ Simón.

Tiꞌ u tar caj urij tancab tu cajar.

Tiꞌ u tar uch ich u cajar Cirene uch.

Caj tsꞌar u pach u cꞌochej u cruz Jesús.

Pachir u bin a Simónoꞌ.

Jesús pʌyber.

27 Baxuc xan,

yaꞌab mac caj binob tu pach Jesús.

Tiꞌ yʌn xquic ich a pimob a cu tarob tu pach Jesús.

Awʌt ocꞌar u caꞌob quireꞌ cu tucricob Jesús.

28 Jesús caj u sut u bʌj u pʌctic u pach quir u tꞌʌnic a xquicoꞌ:

―A techexoꞌ u xquiquirechex u cajar Jerusalén.

Mʌꞌ a wacꞌtiquenex.

Caꞌ a wactex a wʌcꞌʌs bʌjiriꞌex yejer a pararex.

29 Taj quin wac techex jeꞌ u cꞌuchur tu qꞌuinin cu bin yaꞌaric mac:

“Jach tsoy a xquicoꞌ a mʌꞌ pararnʌjij.

Quireꞌ mʌꞌ cꞌuchaꞌan yor tiꞌ.

Bayiriꞌ a mʌꞌ tu rochaj u parar.

Bayiriꞌ jach tsoy a xquicoꞌ a mʌnaꞌ u chan och quir u tsꞌic chuꞌch.”

30 Raꞌiriꞌ u qꞌuinin cu bin u chich aric caꞌ quimic,

irej a cu yaꞌaricob mac.

Caꞌ rubuc a witsoꞌ ich yocꞌorob caꞌ maxʌcob.

Bayiriꞌ cu tꞌʌnicob pꞌuc witsoꞌ caꞌ mucucob,

ten pꞌuc wits.

31 Wa cu quinsiquenob cax mʌnaꞌ in siꞌpir chen jach manan cu bin u mucꞌyajob ich u winiquirob judío quireꞌ cꞌas caj u betajob.

32 Caj bin purbir Jesús quir u quinsaꞌ,

yet binacob caꞌtur xib a cu yacrʌ baꞌ quir u quinsaꞌob xan.

33 Caj rʌc cꞌuchob tu pʌchaꞌan u cꞌabaꞌ u baquer u joꞌr mac quireꞌ a ruꞌumoꞌ irej u baquer u joꞌr mac.

Tiꞌ caj u bʌjob ich cruz,

Jesús a baxuc a cu yacrʌ baꞌ caꞌturoꞌ caj sinob ich u cruzob.

Turiꞌ tu noj Jesús,

turiꞌ tu tsꞌic Jesús.

34 Jesús caj yaꞌaraj tiꞌ Cꞌuj wa ber tan u bajarob ich cruz:

―In Tetech ―quij―,

jawse u siꞌpirob a mac a cu pꞌactiquenob quireꞌ mʌꞌ yerob baꞌ cu beticob ten ―quij Jesús.

U soldado u winiquirob romano caj u jʌsob u nocꞌ Jesús caj u yʌrʌcꞌtajob chan tunich quir yiric mac cu bin u chꞌic u nocꞌ Jesús,

baxuc nanij u beticob uch.

35 Tarob yaꞌab mac quir u chen pʌcticob u quimin Jesús.

U tsꞌurirob u winiquirob judío caj u yutsꞌajob u niꞌ quireꞌ tan u pꞌasticob Jesús,

caj yaꞌarob:

―U jer caj u tacaj;

chen u bʌjiriꞌ mʌꞌ tu tacaj u bʌj,

wa jach jaj a Cristojoꞌ,

a tuchiꞌtaꞌb ten Cꞌuj quir u taquic tu cotor mac caꞌ u wʌcꞌʌs tac u bʌj xan.

36 U soldado u winiquirob romano,

caj u chejtajob Jesús quireꞌ caj nʌtsꞌob u bʌj ich Jesús caj u tsꞌajob tiꞌ Jesús u cꞌab uva a pʌjeꞌ caꞌ u yuqꞌuej.

37 Caj yaꞌarob tiꞌ:

―Wa ju jach u reyech u winiquirob judío,

toc tac a bʌj bajeꞌrer.

38 Tiꞌ tsꞌibaꞌan a jeꞌ tꞌʌnaꞌ ich cꞌʌs chumuc u cruz u joꞌr Jesús soc yer biquinin sinij ich cruz.

Caj tsꞌibtaꞌb:

“A jeꞌ xibaꞌ u rey u winiquirob judío.”

39 Tuririꞌ cu yacrʌ baꞌ tiꞌ sinaꞌan ich Jesús caj u pꞌastaj Jesús tan yaꞌaric:

―Wa jach taj Cristojech toc tac a bʌj yejerenob bajeꞌrer.

40 Chen u jer u yet bʌjaꞌan Jesús caj u qꞌueyaj u yet acrʌ baꞌ caj yaꞌaraj tiꞌ:

―Mʌꞌ tan a chꞌic sajʌquir tiꞌ Cꞌuj.

Mʌꞌ wa quet caj bʌjoꞌon yejer Jesús quir ij quimin xan?

41 A toꞌonoꞌ ―quij yaꞌaraꞌ tiꞌ―,

taj caj u tacaj ic joꞌrob,

rajen tan ic jach mucꞌyaj quireꞌ raꞌ u boꞌorir ic siꞌpir.

Chen a jeꞌ xibaꞌ mʌnaꞌ baꞌ caj u betaj quir u quinsaꞌ.

42 Caj yaꞌaraj tiꞌ Jesús:

―Jesús ―quij―,

chan cꞌʌꞌote ten caꞌ bin cꞌuchech tu ca reyintic.

43 Jesús caj yaꞌaraj tiꞌ:

―Taj quin waꞌaric tech bajeꞌrer tiꞌ yʌnech yejeren ich Cꞌuj.

44 Caj cꞌuchij cꞌacꞌchunqꞌuin caj acꞌʌꞌchʌjij ich tu cotor ruꞌumin.

Hasta las tres caj sasichʌjij.

45 Tiꞌ toy acꞌbir ic yum caj jatij u noqꞌuir tub tꞌinaꞌan ich carem naj tu cu naj cꞌujinticob Cꞌuj u winiquirob judío.

Rajen jat chumuc u noqꞌuir tub tꞌinaꞌan quireꞌ caj u yesaj toꞌon bic tabar ic bin ʌcʌtan Cꞌuj.

Mʌꞌ ja wirej,

a uchoꞌ mʌꞌ cꞌuchaꞌan yor mac u jeꞌic u noqꞌuir quir u yocar ʌcʌtan Cꞌuj tu cu yaꞌaricob tiꞌ yʌn Cꞌuj.

Chen rajiꞌ cu yocar a uchoꞌ u jach tsꞌurir sacerdote.

Teniꞌ cu yocar tuririꞌ yaxqꞌuin.

46 Raꞌiriꞌ u qꞌuinin caj quimij Jesús caj jat u noqꞌuir tiꞌ tꞌinaꞌan.

Cꞌam caj awʌtnʌjij Jesús caj yaꞌaraj:

―In Tet Cꞌuj ―quij―,

tan in tsꞌic tech in pixam quir a cʌnantic.

Caj tsꞌoc yaꞌaric caj quimij.

47 A yʌjtꞌʌninoꞌ cien soldado u winiquirob romano,

caj yiraj baꞌ u ber tiꞌ Jesús caj u cꞌujintaj Cꞌuj caj yaꞌaraj:

―Jach jaj a jeꞌ xibaꞌ mʌnaꞌ u siꞌpir toc taj yor.

48 Yaꞌab mac caj tarob uch quir yiricob u quinsaꞌr Jesús.

Caj tsꞌoc yiricob baꞌ u ber caj sutnʌjob tu yatochob.

Caj u pʌxajob u semob quireꞌ tan yesicob tucur u caꞌob quireꞌ baxuc nanij u beticob u winiquirob judío.

49 Tu cotor mac a yet manob Jesús uch.

Baxuc yejer a xquicob a tarob tu pach Jesús ich u cajar Galilea.

Caj yirob baꞌ u ber tiꞌ Jesús nanach chicaꞌanob caj yirob Jesús.

50 Tiꞌ yʌn caꞌch tuririꞌ xib,

tiꞌ u tar ich u cajar Arimatea,

raꞌ u waꞌan u ruꞌumin Judea.

José u cꞌabaꞌ.

Rajiꞌ tuririꞌ u tsꞌurir u winiquirob judío.

Jach tsoy yor José,

José cu quibic a baꞌ tsꞌibaꞌan ich u tꞌʌn Moisés.

51 Mʌꞌ ja wirej,

a Joséjoꞌ,

tan u pajic u qꞌuinin cu tuchiꞌtic mac Cꞌuj quir u reyinticob u winiquirob judío.

Rajiꞌ cu pajic José.

A Joséjoꞌ,

mʌꞌ quet yor u cꞌubic quinsbir Jesús yejer u yet jach tsꞌurirob u winiquirob judío.

52 Caj bin José ich Pilato quir u cꞌatic u baquer Jesús.

53 Pilato caj u tsꞌaj u baquer Jesús tiꞌ José quir u butꞌic u baquer ich japnin tunich José,

cu yaꞌaraj tiꞌ mac:

―Ensej u baquer Jesús.

Caj tsꞌoc u yensaꞌ caj u tapaj yejer sʌc nocꞌ,

lino u cꞌabaꞌ u noqꞌuir,

jach coꞌoj aroꞌ.

Caj bin u butꞌej ich japnin tunich tu ricꞌben,

mʌnaꞌ mac u butꞌmʌniꞌ.

54 Baꞌ u ber tiꞌ Jesús.

Raꞌ u qꞌuinin cu chʌquic yoch quir u quiꞌquiꞌ janʌnob u qꞌuinin pascua.

Rajiꞌ tabar u cꞌuchur tu qꞌuinin quir u jesicob u bʌj u winiquirob judío.

55 A xquicoꞌ a tarob ich u pach Jesús caj ruqꞌuij ich u ruꞌumin Galilea caj binob tu pach José soc u yiricob u butꞌur u baquer Jesús ich japnin tunich.

56 A xquicoꞌ caj tsꞌoc yiricob u butꞌur u baquer Jesús.

Caj urob ich yatoch ich u cajar Jerusalén.

Caj u mʌnob a quiꞌ u boqueꞌ soc u choꞌicob ich u baquer Jesús.

Rajiꞌ u tsꞌac mirra u cꞌabaꞌ yejer u tsꞌac aloe u cꞌabaꞌ quireꞌ nanij u winiquir judío,

u choꞌic ich u baquer a mac quimenoꞌ.

A xquicoꞌ caj u jesajob u bʌj tiꞌ u beyaj.

Quireꞌ raꞌ u qꞌuinin tu cu jesicob u bʌj u winiquirob judío.

An ten bic cu yaꞌaric tu tsꞌibaꞌan u tꞌʌn Moisés.