19
Pilato caj yaꞌaraj u jatsꞌʌr Jesús.
Rajen u soldado Pilato caj u chꞌajob Jesús caj u jʌtsꞌajob u pach Jesús.
2 A soldadojoꞌ caj u jitꞌajob qꞌuiꞌix caj u tʌcʌjob caj u pꞌoꞌquintaj Jesús.
Caj u tʌcob u buquintej Jesús u cꞌʌrʌb nocꞌ.
Rajiꞌ u nocꞌ chʌc irej cu buquintic a reyoꞌ.
Jesús condenado a muerte (Juan 19.1-16)
―Caꞌ cuxraquech yaꞌab u qꞌuinin u reyech u winiquirob judío ―baxuc nanij cu tꞌanic jach rey.
Rajraꞌ tan u tacꞌ jʌtsꞌticob Jesús.
4 Pilato caj caꞌ joqꞌuij ich tancab tuꞌ yʌnob u winiquirob judío caj u yaꞌaraj tiꞌob:
―Irex,
tin jocꞌsaj a jeꞌ xibaꞌ ʌcʌtan techex soc a werex mʌnaꞌ tuririꞌ u siꞌpir tin wiraj tiꞌ.
5 Caj jocꞌsab Jesús ʌcʌtan tiꞌob.
Jesús tiꞌ toy u pꞌoꞌquinmʌn qꞌuiꞌix.
Baxuc u nocꞌ tiꞌ toy u buquinmʌn a chʌc nocꞌoꞌ.
Pilato caj u yaꞌaraj tiꞌ u winiquirob judío:
―Ireꞌex a jeꞌ xibaꞌ.
6 Rajen caj yirob Jesús u jach tsꞌurirob sacerdote yejer u policía a cu beyajob ich carem naj tu cu naj cꞌujinticob u winiquirob judío.
Caj u yʌnxchun u cꞌam aricob tiꞌ Pilato:
―Bʌjej ich cruz,
bʌjej ich cruz.
Rajen Pilato caj yaꞌaraj tiꞌob:
―Chꞌaꞌex caꞌ a bʌjex ich cruz a bʌjiriꞌex quireꞌ a tenoꞌ mʌꞌ in wiric wa yʌn u siꞌpir.
7 U winiquirob judío caj u nuncob tiꞌ tan yaꞌaric:
―A tenob yʌn in tꞌʌnob.
Aj in tꞌʌnob cu yaꞌaric caꞌ in quinsob wa cu tucric u bʌjiriꞌ rajiꞌ u parar Cꞌuj.
8 Pilato caj u toc chꞌaj sajquir uch a baꞌ cu bin tar tiꞌ Jesús.
Caj tsꞌoc u yubic a baꞌ caj u yaꞌarob tiꞌ,
tu jach chꞌaj sajaquir Pilato quireꞌ yerob u parar Cꞌuj,
u winiquirob judío.
9 Pilato caj caꞌ oquij ich palacio yejer Jesús caj u cꞌataj tiꞌ Jesús:
―Tub a tar?
―quij.
Jesús mʌꞌ cꞌʌs baꞌ tu nuncaj tiꞌ.
10 Rajen Pilato caj u yaꞌaraj tiꞌ Jesús:
―A techoꞌ mʌꞌ ja nunquic ten quireꞌ a tenoꞌ a tsꞌurirenex.
Wa jin cꞌat in chaꞌiquech caꞌ xiquech.
A tenoꞌ cꞌuchaꞌan in wor in waꞌaric caꞌ in quinsech ich cruz xan.
11 Jesús caj u yaꞌaraj tiꞌ:
―Mʌꞌ cꞌuchaꞌan a wor a betic baxuc aroꞌ tiꞌ ten wa Cꞌuj mʌꞌ ju cꞌat,
a tiꞌ yʌn ich caꞌananoꞌ.
Rajen u jach tsꞌurirob sacerdote a mac tu cꞌubajenob tiꞌ tech,
jach manan yʌn u siꞌpirob.
12 Rajen Pilato u cꞌat u chaꞌic Jesús caꞌ xic chen u winiquirob judío caj u cꞌam arob:
―Wa ca chaꞌic u bin mʌꞌ tan a quiꞌ beyaj tiꞌ a rey César quireꞌ tu cotor mac a ju cꞌat yocar rey cu pꞌactic u rey César.
13 Pilato caj tsꞌoc yubic yaꞌaric a pimoꞌ caj u yaꞌaraj tiꞌ u soldado caꞌ u yacsej Jesús tu reꞌaꞌan naj.
Ich chumuc tuꞌ reꞌaꞌan naj tiꞌ yʌn u cutan gobernador rajiꞌ betaꞌb tiꞌ tunich.
Rajiꞌ quir u cutar soc yaꞌaric wa cu chaꞌbʌr wa yʌn u quinsaꞌr wa ber cu tsꞌocar u toꞌcar u joꞌr.
U cutan gobernador pʌchaꞌan u cꞌabaꞌ ich u tꞌʌn hebreo Gabata.
Rajen Pilato caj oc u cutar tiꞌ taroꞌ.
14 Caj cꞌuchij cꞌacꞌchunqꞌuin caj oc Pilato quir u cutar ich u cutan gobernador.
Rajiꞌ u jach qꞌuinin pascua.
Caj curʌj Pilato caj yaꞌaraj tiꞌ u winiquirob judío:
―Iriquex a jeꞌ reyexaꞌ.
15 U winiquirob judío caj u cꞌam arajob,
tan yaꞌaricob:
―Sinej ich cruz caꞌ quimic.
Sinej ich cruz caꞌ quimic.
Chen Pilato caj yaꞌaraj tiꞌob:
―Cax wa ja reyex quin sinic ich cruz caꞌ quimic?
U jach tsꞌurirob sacerdote caj u yaꞌarob:
―Rajiꞌ mʌꞌ ic reyex aroꞌ.
Chen rajiꞌ ic reyex César.
16 Rajen Pilato caj u quibaj a baꞌ u cꞌatob caj u cꞌubaj tiꞌob u soldado caꞌ u bʌjej ich cruz.
Rajen a soldadojoꞌ caj u pʌyob Jesús.
La crucifixión (Juan 19.17-37)
Bʌjaꞌan Jesús ich cruz
17 Rajen u soldado caj u tsꞌʌraj u pach Jesús,
rajen tu cꞌochaj u cruz.
Caj bin tu cuchir a cu yaꞌaric u baquer u joꞌr mac.
Ich u tꞌʌn hebreo pʌchaꞌan u cꞌabaꞌ Gólgota.
18 Tiꞌ tu bʌjob ich cruz,
yet bajac caꞌtur mac,
u tiriꞌ bʌjaꞌan xan tu tsꞌic,
u tiriꞌ bʌjaꞌan xan tu noꞌoj Jesús.
Chumuc yʌn Jesús.
19 Pilato caj u tsꞌibtaj ich yocꞌo cheꞌ jun xotꞌ caj u tsꞌibta,
baxuc tan yaꞌaric:
“A jeꞌ Jesús a cu tar ich u cajar Nazaret,
rajiꞌ u rey u winiquirob judío.”
Rajiꞌ bʌjaꞌan ich yocꞌor u joꞌr Jesús ich u cruz.
20 Yaꞌab u winiquirob judío cu xaquicob tuꞌ tsꞌibaꞌan quireꞌ tiꞌ bajij Jesús ich bʌytʌc tu cu yocarob ich u cajar Jerusalén.
A baꞌ caj u tsꞌibtaj Pilato ich u tꞌʌn hebreo yejer ich u tꞌʌn griego yejer ich u tꞌʌn latino.
21 U jach tsꞌurirob sacerdote caj tsꞌoc yiricob a baꞌ tsꞌibaꞌan ich cruz Jesús caj bin yaꞌaricob tiꞌ Pilato:
―Cꞌaxej a baꞌ caj a tsꞌibtaj soc mʌꞌ yaꞌaric:
“Rajiꞌ u rey u winiquirob judío.”
Chen caꞌ a tsꞌibtej:
“Rajiꞌ cu yaꞌaric u reyen u winiquirob judío.”
22 Pilato caj u nuncaj tiꞌob tan yaꞌaric:
―An bic caj in tsꞌibtaj toc tsireꞌej,
a tenoꞌ,
mʌꞌ in cꞌaxic ―quij Pilato.
23 A mac a tu bʌjob Jesús cuatrojob soldado.
Caj tsꞌoc u bʌjicob Jesús tu chꞌajob u nocꞌ.
Jujuntur tu chꞌaj tuririꞌ,
cꞌʌs pꞌatij tuririꞌ.
Rajiꞌ u caꞌ yarir u nocꞌ Jesús quireꞌ toc coch caj sʌctaꞌb u tan u noqꞌuir,
mʌnaꞌ u ber u chuyur.
24 Rajen u soldado cu pacran aricob:
―Cax mʌꞌ ic jʌtic.
Caꞌ ij cʌrʌcꞌtej chan tunich,
caꞌ ij quirej mac cu bin chꞌic u caꞌ yarir u nocꞌ.
A baxucoꞌ caj u nupꞌsaj tuꞌ tsꞌibaꞌan u tꞌʌn Cꞌuj uch caj u yaꞌaraj:
“Mʌꞌ u bin u jʌticob u caꞌ yarir in nocꞌ.
Cu chen binob yʌrʌcꞌticob chan tunich soc yiricob mac cu bin u toc chꞌic in nocꞌ”,
quij.
Baxuc yaꞌaric yʌjtseqꞌuir u tꞌʌn Cꞌuj uch.
Rajen baxuc caj u betob u winiquirob soldado.
25 Tiꞌ chꞌicaꞌan u nʌꞌ Jesús tuꞌ bʌjaꞌan ich cruz Jesús.
Tiꞌ yʌn u bʌj u nʌꞌ Jesús u cꞌabaꞌ María xan.
U cꞌabaꞌ u mam Cleofas.
Baxuc tiꞌ yʌn María Magdalena.
26 Tiꞌ yʌn Juan bʌytʌc tuꞌ bʌjaꞌan Jesús,
a mac jach yajbir ten Jesús.
Tiꞌ yʌn tuꞌ yʌn u nʌꞌ Jesús.
Rajen Jesús caj yiraj tiꞌ yʌnob u nʌꞌ yejer Juan,
caj yaꞌaraj Jesús tiꞌ u nʌꞌ:
―Nʌꞌ,
quen,
rajiꞌ Juan,
chꞌaꞌej tech soc irej a parar.
27 Jesús caj u yaꞌaraj tiꞌ Juan:
―Rajiꞌ in nʌꞌ,
chꞌaꞌej tech soc irej a nʌꞌ tech.
Rajen Juan tu yacsaj tu yatoch soc tiꞌ cu cʌjtar ich yatoch Juan.
Quimij Jesús
28 Caj tsꞌoc u toc aric tiꞌ Juan aroꞌ,
Jesús yer yʌn u rʌc nupꞌsic a baꞌ tsꞌibaꞌan ich u tꞌʌn Cꞌuj uch,
rajen caj u yaꞌaraj:
―Ucꞌchʌjen ―quij Jesús.
29 Tiꞌ yʌn ich ruch chup u cꞌab uva,
pʌj.
Rajen caj u tsꞌʌmaj u noqꞌuir ich u cꞌab uva a pʌjoꞌ quir u tsꞌuꞌtsꞌic yaꞌarir a nocꞌoꞌ irej tʌmʌn.
Caj u tʌcaj ich jʌrʌr u cꞌabaꞌ hisopo caj u tichꞌitej u chiꞌ Jesús caꞌ u tsꞌuꞌtsꞌaj.
30 Jesús caj u tsꞌuꞌtsꞌaj u cꞌab uva a pʌjoꞌ caj tsꞌoc aroꞌ caj u yaꞌaraj:
―Tin tsꞌocsaj in beyaj ―quij Jesús.
Caj u chinquintaj u joꞌr quireꞌ quimij.
Caj rom u chꞌʌraꞌtir Jesús ten soldado
31 Quireꞌ a samanoꞌ u qꞌuinin quir u jesicob u bʌj u winiquirob judío,
rajen u tsꞌurirob sacerdote.
Mʌꞌ u cꞌatob yiricob u pꞌatʌrob u baquer ich cruz.
Mʌꞌ ja wirej,
tiꞌ u winiquirob judío jach noꞌj yiricob u qꞌuinin saman tu cu bin u jesicob u bʌj.
Rajen caj u cꞌatajob tiꞌ Pilato soc u wʌticob u baquerob a mac a bʌjaꞌanob ich cruz xan,
u chac bʌqꞌuerob soc seb cu quiminob soc cꞌuchaꞌan yorob u yemsicob u baquer ich cruz.
32 Rajen caj cꞌuchob soldado caj u rʌc wʌtob u chac bʌqꞌuer a tuririꞌ u yet bʌjaꞌan winicoꞌ.
Caj cꞌuchob tuꞌ yʌn u jer yet bʌjaꞌan winiquir caj u wʌtob u chac bʌqꞌuer.
33 Caj natsꞌ tuꞌ yʌn Jesús caj yirob quimij,
rajen mʌꞌ tu wʌtob u chac bʌqꞌuer Jesús.
34 Chen tuririꞌ soldado tu ramaj u chꞌaraꞌtir Jesús yejer ransa caꞌch.
Sasameꞌ caj jocꞌ u qꞌuiqꞌuer yet jocac u yaꞌarir u bʌqꞌuer.
35 A tenoꞌ,
quij Juan,
caj in wiraj bic caj quimij Jesús.
Rajen taj a baꞌ quin waꞌaric soc baxuc a werex xan.
36 A baꞌ u ber tiꞌ Jesús ich cruz ten soldado,
raꞌ quir u nupꞌsic a baꞌ tsꞌibaꞌan ich u tꞌʌn Cꞌuj uch,
tu cu yaꞌaric:
“Mʌꞌ ju bin wʌtbir u baquer,
mʌꞌ tuririꞌ”,
baxuc caj yaꞌaraj u tꞌʌn Cꞌuj uch.
37 Baxuc tiꞌ tsꞌibaꞌan u jer ich u tꞌʌn Cꞌuj uch,
tan yaꞌaric:
“Robob cu bin u yiricob tiꞌ tuꞌ rom in chꞌʌraꞌtir”,
baxuc tsꞌibaꞌan ich u tꞌʌn Cꞌuj xan.
Butꞌ Jesús ich japnin tunich
38 Pachir José a cu tar ich u cajar Arimatea,
rajiꞌ tu muc u acsaj tu yor tiꞌ Jesús quireꞌ cu sʌjtic u jach tsꞌurirob u winiquirob judío,
mʌꞌ ju yaꞌaraj tiꞌ u racꞌob wa tu yacsaj tu yor.
Caj yiraj quimij Jesús caj bin ich Pilato quir u cꞌatic wa tsoy u chꞌic u baquer Jesús quir u butꞌic ich japnin tunich.
Pilato caj u yaꞌaraj tiꞌ caꞌ yens u baquer ich cruz quir u chꞌic u butꞌ u baquer ich japnin tunich.
Caj bin u chꞌic.
La resurrección (Juan 19.38-20.18)
39 Yet binac Nicodemo,
rajiꞌ a mac bin tsicbar yejer Jesús oqꞌuin uch.
Bin u yamtej José.
Nicodemo tu mʌnaj u tsꞌac mirra,
xacaꞌan yejer u tsꞌac áloes quir u jicꞌtic tu bʌqꞌuer Jesús,
treinta kilos yʌn.
40 Robob caj u cuchob u baquer Jesús,
José yejer Nicodemo.
Caj u sʌsʌjcꞌʌstajob u baquer Jesús yejer sʌc nocꞌ.
Tu cu sʌsʌjcꞌʌsticob u baquer Jesús,
tiꞌ cu puricob u tsꞌac mirra yejer u tsꞌac áloes soc mʌꞌ netuꞌ u boc quireꞌ baxuc nanij cu beticob u winiquirob judío tu cu bin u butꞌic u baquer u racꞌob ich japnin tunich.
41 Tuꞌ tu sinob Jesús ich cruz uch bʌytʌc tiꞌ u chan corir u pʌcꞌar u cheꞌer Olivos.
Tuꞌ yʌn u cheꞌer Olivos tiꞌ yʌn u mucnaj japnin tunich a betaꞌb ten mac.
Mʌnaꞌ mac u butꞌmʌn u baquer quireꞌ ricꞌben.
42 Tabar u qꞌuinin quir u jerar u winiquirob judío quireꞌ tabar u bin qꞌuin.
Quireꞌ bʌytʌc tiꞌ yʌn u japnin tunich,
rajen cꞌuchaꞌan yorob u butꞌicob u baquer Jesús.