A BAꞌ TU BETAJOB A MAC A TETAꞌB QUIR U TSECꞌTOB U TꞌɅN CꞌUJ
HECHOS
Tu toc araj Jesús jeꞌ u tar u Tajꞌor u Pixam Cꞌuj
1
Ucheꞌ tin yʌn tsꞌibtaj u juꞌunin tech Teófilo,
a mac in jach yajeꞌ.
Caj in waꞌaraj tech tu cotor a baꞌ caj u betaj Jesúseꞌ.
Bayiriꞌ xan,
tu cotor a baꞌ caj u camsaj a raꞌ u qꞌuinin tu yʌnxchun u beyaj Jesúseꞌ.
2 Tin toc tsꞌibtaj tech Teófilo a baꞌ caj u betaj Jesús hasta caj bin caꞌanan.
Chen mʌꞌ toy xic Jesús caꞌananiꞌ,
caj u tetaj u camsʌwinicob.
Mʌꞌ ja wirej,
tsꞌaꞌb u tꞌʌnin tiꞌob ten u Tajꞌor u Pixam Cꞌuj soc yerob a baꞌ cu bin u beticob.
3 Caj tsꞌoc u mucꞌyaj Jesús,
caj riqꞌuij caj u yesaj u bʌj tiꞌ u camsʌwinicob cuxaꞌan.
Jach jaj caj u yesaj u bʌj tiꞌob.
Yaꞌab u beyaj caj u yesaj tiꞌob soc yerob cuxaꞌan.
Cuarenta qꞌuin tiꞌ yʌn yejer u camsʌwinicob cu tsicbar tiꞌob bic cu bin u reyinticob Cꞌuj.
4 Tiꞌ toy yʌn Jesús yejer u camsʌwinicob caj u yaꞌaraj tiꞌob:
―Mʌꞌ a yʌn pꞌʌtiquex ich u cajar Jerusalén.
Tiꞌ a yʌn toc pajiquex a baꞌ tu toc araj in Tet Cꞌuj u tsꞌic techex ―quij―.
Baxuc caj in waꞌaraj techex.
5 Mʌꞌ ja wirej,
a Juanoꞌ caj u yacsaj jaꞌ tu joꞌr mac yejer jaꞌ.
Chen mʌꞌ yaꞌab qꞌuin jeꞌ u tar ta wicnʌnex u Tajꞌor u Pixam Cꞌuj.
Rajiꞌ bin u caꞌ cꞌasiquex techex in tꞌʌn.
Jesús caj caꞌ binij caꞌanan
6 Tiꞌ u rʌc muchꞌaꞌanob u camsʌwinicob ich Jesús barej caj cꞌataꞌb tiꞌ ten u camsʌwinicob:
―Ber u qꞌuinin cu bin u reyinticob u ruꞌumin u winiquirob israel?
Bajeꞌrer wa?
―quij.
7 Caj u nuncaj tiꞌob Jesús tan yaꞌaric tiꞌob:
―Mʌꞌ tsꞌajaꞌan techex quir a wetiquex tu qꞌuinin u tar.
Mʌꞌ chumuc yaxqꞌuin,
wa ju qꞌuinin cu tar jaꞌ.
Chen Cꞌuj u ricsmʌn tiꞌ,
u bʌjiriꞌ yer.
8 Barej caꞌ bin tac u Tajꞌor u Pixam Cꞌuj,
jeꞌ a cꞌʌmiquex u mucꞌ ich a worex.
Taj jeꞌ a bin a waꞌariquenex ich u cajar Jerusalén,
cax ich u ruꞌumin Judea,
cax ich u ruꞌumin Samaria hasta tu cu xur tu cotor u cajarob ich yocꞌocab.
9 Caj tsꞌoc u yaꞌaric a jeroj tiꞌob,
jeroj tiꞌ toy cu pʌcticob Jesús.
Seb caj binij caꞌanan.
Robob caj u yirajob u bin caꞌanan,
jeroj caj tar u muyarir.
Jeroj,
mʌꞌ chʌcaꞌan u bin Jesúsiꞌ.
10 Cu quiꞌquiꞌ chanticob caꞌanan u camsʌwinicob Jesús,
caj tarob tu yʌnob caꞌtur xib.
Robob u buquimʌnob jach sʌc u nocꞌ.
11 Tu yaꞌarajob tiꞌ u camsʌwinicob Jesús:
―Mʌꞌ a yʌn pʌctiquex caꞌanan,
a techex u xibirechex u ruꞌumin Galilea.
Jeꞌ u caꞌ tareꞌ Jesús an bic caj a wirajex u bin caꞌanan ―baxuc araꞌb tiꞌob ten a caꞌtur xiboꞌ.
Tetaꞌb Matías quir u yocar tu beyaj Judas
12 Tiꞌ u witsir u cꞌabaꞌ Olivo,
caj sutpʌjob ich u cajar Jerusalén.
A ray witsoꞌ,
nʌtsꞌaꞌan tiꞌ u cajar Jerusalén,
bay u nachir u bin mac u qꞌuinin tu cu jesicob u bʌj u winiquirob judío.
Caꞌtur kilómetro.
13 Caj wʌcꞌʌs sutnʌjob u camsʌwinicob ich u cajar Jerusalén.
Tiꞌ nacob caꞌanan tu jun cꞌas naj tu jamach ocob.
Rʌc tiꞌ yʌnob Pedro,
Jacobo,
Juan,
Andrés,
Felipe,
Tomás,
Bartalomé,
Mateo,
Jacobo,
raꞌ u parar Alfeo.
Simón,
a cu sayʌr tu pach cananistajeꞌ yejer Judas u sucuꞌun Jacobo.
14 Tu cotor a jeroj quet yorob cu tꞌʌnicob Cꞌuj quet yejer a xquicoꞌ.
Mʌꞌ ja wirej,
tiꞌ yʌn u nʌꞌ Jesús cu tꞌʌnic Cꞌuj xan.
Tiꞌ yʌn u jach itsꞌinob Jesús xan.
15 Raꞌiriꞌ u qꞌuinin tu cu tꞌʌnicob Cꞌuj,
caj riqꞌuij u chꞌictar Pedro ich chumuc tu yʌn a mac a yacsmʌnob tu yorob.
Tiꞌ yʌn ciento veinte a mac a yacsmʌnob tu yorobeꞌ.
Caj yaꞌaraj Pedro tiꞌob:
16 ―In wet acsaꞌorirex,
yʌn u tsꞌocsic a tu tsꞌibaꞌan u tꞌʌn Cꞌuj a tu araꞌb ten u Tajꞌor u Pixam Cꞌuj uch.
Mʌꞌ ja wirej ―quij―,
David ic nunquirex caj u tsꞌibtaj tiꞌ ixbaꞌ Judas uch,
a raꞌ caj u cꞌubaj Jesús caꞌ quinsac.
17 Mʌꞌ ja wirej,
ber caj tetaꞌb Judas ten Jesús,
pꞌeriꞌ ic beyajex yejer Judas.
A Judasoꞌ rajiꞌ ic nupex.
18 Chen rajiꞌ Judas yejer u taqꞌuin a ju boꞌorir tu tu cꞌubaj Jesús caj u mʌnaj u ruꞌumin.
Tiriꞌ tu jichꞌaj u cꞌoꞌoch,
caj u quinsaj u bʌj.
Caj rub Judas bʌjaꞌan binquij u joꞌr.
Jeroj caj buj u nʌcꞌ,
caj jocꞌ u chocher,
caj jocꞌ u qꞌuiqꞌuer Judas.
19 Rajen a mac a cʌjaꞌan ich u cajar Jerusalén caj yubob bic caj u quinsaj u bʌj Judas,
jeroj robob tu pʌchajob u cꞌabaꞌ u ruꞌumin a tu mʌnajeꞌ,
Acéldama,
raꞌ u cꞌat yaꞌaric,
u ruꞌumin tu jocꞌ u qꞌuiqꞌuer Judas.
20 Mʌꞌ ja wirej ―quij Pedro―,
toc tsꞌibaꞌan ich u juꞌunin salmos tu cu yaꞌaric:
“Mʌꞌ a chaꞌic u cajʌr mac soc chen saj nʌj.”
Tu caꞌ araj ich u jer ich u juꞌunin salmos,
tu cu yaꞌaric:
“Arej u chꞌaj u yet beyaj soc u jer quir u cꞌʌnic beyaj”,
baxuc caj yaꞌaraj ich u tꞌʌn Cꞌuj a salmosoꞌ.
21 ’Rajen ―quij Pedro―,
in wet acsaꞌorirex caꞌ ic tetex bajeꞌrer a mac ij quet manex yejeroꞌonex u burur qꞌuin tiꞌ yʌnoꞌonex yejer Jesús uch.
22 Rajiꞌ caꞌ ic tetex a mac a caj u yiraj Juan tu yacsaj jaꞌ tu joꞌr mac hasta caj u yiraj tu wich u bin Jesús caꞌanan,
quireꞌ rajiꞌ yʌn u man u jumintej wa riqꞌuij Jesús.
Taj cu bin u jumintej Jesús.
23 Jeroj caꞌturob caj u tetajob ich u racꞌob.
Jeroj José,
caꞌpꞌer u cꞌabaꞌ José,
Barsabás,
rajiꞌ u yoꞌnen Justo.
Jeroj u jer tuririꞌ tetaꞌb xan,
Matías u cꞌabaꞌ.
24 Jeroj tuneꞌ,
caj u rʌc tꞌʌnajob Cꞌuj caj yaꞌarob:
―Tech,
Jaj Tsꞌurir ―quij yaꞌaric―.
A werob u pixam tu cotor mac,
ese toꞌonex mac a cꞌat tech ich a jeꞌ caꞌturob.
25 Soc rajiꞌ cu caꞌ tsecꞌtic a tꞌʌn soc rajiꞌ cu bin quir u yamticoꞌonex.
Mʌꞌ ja wirej,
caj u pꞌʌtaj u beyaj Judas caj u cꞌubaj Jesús,
jeroj caj bin erar Judas.
26 Jeroj caj yʌrʌcꞌtajob u chan tunich quir yiric mac cu yocar beyaj yejer u camsʌwinicob Jesús.
Caj tsꞌoc u puric a chan tunichoꞌ,
jeroj caj u tetaj Matías.
Caj oc u beyaj yejer u camsʌwinicob Jesús,
yejer a oncejoꞌ.