Jesús cu yesic u bʌj tiꞌ u camsʌwinicob a sietejoꞌ
21
Jesús caj u caꞌ esaꞌr u bʌj tiꞌ u camsʌwinicob.
Caj u yesaj u bʌj ich chiꞌ cꞌacꞌnab u cꞌabaꞌ Tiberias.
Baxuc a jeraꞌ caj u yesaj u bʌj tiꞌ u camsʌwinicob.
Jesús en el mar de Galilea (Juan 21.1-25)
2 Tiꞌ tu muchꞌquintajob u bʌj Simón Pedro yejer Tomás a toc caꞌtur caj rochaꞌb ten u nʌꞌ.
Tiꞌ yʌn Natanael tiꞌ u tar ich u cajar Cana ich u ruꞌumin Galilea.
Tiꞌ yʌn xan caꞌturob u camsʌwinicob Jesús rajiꞌ u tetob Zebedeo.
Tiꞌ yʌn xan u jer caꞌturob u camsʌwinicob.
3 Simón Pedro caj u yaꞌaraj tiꞌ u yet camsʌwinicob:
―Bin in caꞌ chuc cʌy yejer chim.
Robob caj yaꞌarob:
―Baxuc a tenob tar in caꞌob yejerech.
Caj rʌc ocob ich chem caj binob u chuquejob cʌy.
U burur acꞌbir tu puricob u chimin,
mʌꞌ ju chucobiꞌ.
4 Caj sasij tiꞌ chꞌicaꞌan Jesús ich chiꞌ cꞌacꞌnab chen u camsʌwinicob mʌꞌ yerob wa rajiꞌ Jesúsiꞌ.
5 Jesús caj u cꞌataj tiꞌob:
―Chichanechex,
mʌꞌ wa ta chuquex u cʌyir?
Caj u nuncajob:
―Mʌnaꞌ ―quij.
6 Jesús caj yaꞌaraj tiꞌob:
―Purej u chimin tu noꞌoj chem.
Jeꞌ a chuquiquex a cʌyoꞌ.
Baxuc caj u betajob caj u purajob u chimin caj u jarajob u chimin jach chup u cʌyir.
Rajen mʌꞌ ju cꞌuchur u yorob u jaricob ich cꞌacꞌnab.
7 A Juanoꞌ,
rajiꞌ a yajbir ten Jesús.
Rajiꞌ u camsʌwinic xan,
caj yaꞌaraj tiꞌ Pedro:
―Rajiꞌ ic Jaj Tsꞌurirex.
Simón Pedro caj u yubaj yaꞌaric,
“Rajiꞌ ic Jaj Tsꞌurirex”,
caj u buquintaj u nocꞌ quireꞌ chʌcpiten caꞌch caj u puraj u bʌj ich jaꞌ quir u cꞌuchur ich chiꞌ cꞌacꞌnab tuꞌ yʌn Jesús.
8 Caj tarob u camsʌwinicob yejer chem,
tan u payticob u chimin cʌy quireꞌ jach chup u cʌyir.
Mʌꞌ nach yʌn tiꞌ u chiꞌcꞌacꞌnab chen cien metros.
9 Caj jocꞌob ich chem caj cꞌuchob ich chiꞌcꞌacꞌnab.
Caj yirob nutsꞌaꞌan cꞌacꞌ.
Tiꞌ yʌn u chuquir,
tiꞌ yʌn cʌy,
tan u cꞌacꞌtic yocꞌor yejer waj.
10 Jesús caj u yaꞌaraj tiꞌob:
―Chꞌayex cʌy jach yaꞌab a tan ta chuquiquex.
11 Rajen binij Simón Pedro ich chem.
Caj u jitaj u chimin chup yejer cʌy.
Jach carem u cʌyir caj u xacaj caj u yiraj ciento cincuenta y tres u cʌyir.
Cax chup u chimin mʌꞌ ju jatʌr.
12 Rajen caj u yaꞌaraj tiꞌob:
―Cojenex ta jananex ―quij.
Mʌnaꞌ u camsʌwinicob caj u yaꞌaraj:
“Maquech”,
quireꞌ bajeꞌrer yerob rajiꞌ u Jaj Tsꞌurirob.
13 Jesús caj u chucaj waj caj u tsꞌaj tiꞌob u camsʌwinicob.
Baxuc caj u tsꞌaj tiꞌob yoch cʌy xan.
Caj u rʌc jantajob.
14 A jeraꞌ mʌnaꞌ u nup u tenin tu yesa u bʌj tiꞌob u camsʌwinicob a caj tsꞌoc u riqꞌuir tiꞌ u quimirir.
Jesús cu tsicbar yejer Simón Pedro
15 Caj tsꞌoc u janʌnob Jesús caj u cꞌata tiꞌ Simón Pedro:
―Simón,
u pararech Jonás.
A nupob cu yajquintiquen,
chen tech wa jach manan ca yajquintiquen?
Pedro caj u nuncaj:
―Tech,
Jaj Tsꞌurir,
a wer quin yajquintiquech.
Jesús caj u yaꞌaraj tiꞌ:
―Cʌnen,
jansej tiꞌ ten tu cotor mac a tu yacsob tu yorob tiꞌ ten soc cu bin u chichquinticob tu pixamob an ten bic yʌjcʌnʌnyʌjir tʌmʌn yuc cu jansic u chan ar tʌmʌn yuc.
16 Jesús caj u caꞌ cꞌataj tiꞌ:
―Simón,
u pararech Jonás,
jach quiꞌ wa ca yajquintiquen?
Pedro caj u nuncaj:
―Tech,
Jaj Tsꞌurir,
a wer in quiꞌ yajquintiquech.
Jesús caj yaꞌaraj tiꞌ:
―Cʌnen,
jansej tiꞌ ten tu cotor mac a tu yacsob tu yorob tiꞌ ten soc cu bin u chichquinticob tu pixamob an ten bic yʌjcʌnʌnyʌjir tʌmʌn yuc cu jansic u chan ar tʌmʌn yuc.
17 Mʌnaꞌ u nup caj cꞌataꞌb ten Jesús tiꞌ:
―Simón,
u pararech Jonás,
ca jach quiꞌ wa ca yajquintiquen?
Pedro caj tucurnʌjij quireꞌ tu yubaj mʌnaꞌ u nup u tenin caj cꞌataꞌb tiꞌ:
“Ca yajquintiquen wa?”
Caj u yaꞌaraj:
―Tech,
Jaj Tsꞌurir,
tu cotor a wer.
A wer quin yajquintiquech.
Jesús caj yaꞌaraj tiꞌ:
―Cʌnen,
jansej tiꞌ ten tu cotor mac a tu yacsob tu yor tiꞌ ten soc cu bin u chichquinticob tu pixamob an ten bic yʌjcʌnʌnyʌjir tʌmʌn yuc cu jansic u chan ar tʌmʌn yuc.
18 Jesús caj yaꞌaraj:
―Taj a baꞌ quin wac tech.
Chen chichanech uch ta quiꞌ buquintaj a nocꞌ caj bin tub a cꞌat.
Caꞌ bin chꞌijiquech cu bin u cꞌʌxicob a cꞌʌb yejer a winquirir ich cheꞌ quir u quinsiquech.
19 Caj u yaꞌaraj tiꞌ aroꞌ quir u camsic bic tabar cu bin quimin soc mac cu bin u yiricob jach carem a Cꞌujoꞌ.
Jesús caj yaꞌaraj tiꞌ:
―Cojen tin pach ―quij.
U camsʌwinic a yajbir ten Jesús
20 Pedro caj u sut u bʌj caj u yiraj tan u tar Juan tu pach a mac yajbir ten Jesús,
raꞌiriꞌ a tiꞌ yʌn ich Jesús caj u jantob yoch u qꞌuinin pascua,
caj u cꞌataj uch tiꞌ:
“Jaj Tsꞌurir,
quij,
mac cu bin u cꞌubiquech?”
quij.
21 Pedro caj u yiraj Juan caj u cꞌataj tiꞌ Jesús:
―Jaj Tsꞌurir ―quij―,
baꞌ cu bin tar tiꞌ a ray in nupoꞌ?
22 Jesús caj u nuncaj tiꞌ,
tan yaꞌaric:
―Wa jin cꞌat caꞌ pꞌatac Juan hasta quin caꞌ ur,
mʌꞌ baꞌwir ca tucric tiꞌ.
Tech yʌn a tar tin pach ―quij.
23 Rajen caj bin u sosoc arej ich mac a tu yacsob tu yorob,
tan yaꞌaric:
―A Juanoꞌ mʌꞌ ju bin quimin ―quij.
Chen Jesús mʌꞌ ju yaꞌaraj:
“Mʌꞌ ju bin quimin.”
Tu chen araj:
“Wa jin cꞌat caꞌ pꞌatac Juan hasta quin wuꞌur mʌꞌ baꞌwir ca tucric tiꞌ.”
24 Tu cotor a baꞌ tsꞌibaꞌan a teraꞌ,
rajiꞌ caj u yiraj Juan,
baxuc caj u yubaj a rajiꞌ u camsʌwinic Jesús.
Rajen ij querex taj a baꞌ cu yaꞌaric.
25 Tiꞌ toy yʌn yaꞌab baꞌ caj u betaj Jesús.
Wa toc tsꞌibaꞌan jujuntur ich u juꞌunin jach pꞌecʌch yaꞌab u juꞌunin cu bin tsꞌibtaꞌbir.
Chen a tsꞌibaꞌan a teraꞌ tiꞌtiꞌ soc ij querex bic tabar ic taquic ic bʌjex.