Jesús caj riqꞌuij quir u caꞌ cuxtar
20
Raꞌ u qꞌuinin cu yʌnxchun semana tiꞌ toy acꞌbir caj cꞌuchij María Magdalena tuꞌ butꞌ u baquer Jesús.
Caj u yiraj toc bʌcꞌʌsaꞌan u tunichirir u mac u jor a tu tu butꞌaj u baquer Jesús.
2 María Magdalena caj u cꞌʌnaj u yacab caj bin tuꞌ yʌn Juan u yajbir ten Jesús yejer Simón Pedro.
Caj yaꞌaraj:
―Tu cuchob u baquer ic Jaj Tsꞌurirex,
mʌꞌ ij quer tu tu purob u baqueriꞌ.
3 Rajen Pedro yejer Juan caj jocꞌob caj binob tuꞌ butꞌaꞌan u baquer Jesús.
4 Quet caj u cꞌʌnob yacab.
Chen Juan jach chich yacab rajiꞌ yʌn batꞌan cꞌuchij tu butꞌ u baquer Jesús.
Chen Pedro sen yacab,
pachir caj cꞌuchij.
5 A Juanoꞌ caj u tac chꞌenaꞌbtaj tu japnin caj u yiraj u sʌc nocꞌ tu top u baquer Jesús uch.
Tiꞌ janaꞌan ich ruꞌum.
Juan mʌꞌ oc tu japnin tunich.
6 Caj cꞌuchij Simón Pedro seb caj oquij tu japnin tu butꞌ u baquer Jesús uch.
Rajiꞌ caj u yiraj tiꞌ janaꞌan u sʌc noqꞌuir tu top u baquer Jesús uch.
U beriꞌ jenric.
7 Baxuc tu yiraj u panyujir tu top u wich Jesús uch.
Toc caꞌ tsꞌaꞌan,
u tiriꞌ janaꞌan.
8 Pachir caj oquij Juan a yʌn cꞌuch sasameꞌ tu butꞌ u baquer Jesús.
Caj u yira tiꞌ toc janaꞌan u noqꞌuir caj u quibaj riqꞌuij Jesús tuꞌ quimen an ten bic caj u yaꞌaraj Jesús.
9 A uchoꞌ mʌꞌ ju najtob tu tsꞌibaꞌan u tꞌʌn Cꞌuj uch wa yʌn u riqꞌuir Jesús tu quimirir.
Raꞌiriꞌ u qꞌuinin caj u najtajob.
10 Rajen Pedro yejer Juan yej u yet camsʌwinicob caj wʌcꞌʌs sutnʌjob tu yatochob.
Jesús cu yesic u bʌj tiꞌ María Magdelena
11 María caj caꞌ urij tu butꞌ u baquer Jesús uch.
Caj bin Pedro yejer Juan tiꞌ pꞌat María.
Ocꞌar u caꞌ.
Tiꞌ toy cu yocꞌar caj u tac chꞌenaptaj yirej u japnin tu butꞌ u baquer Jesús uch.
12 María caj yiraj yʌjmasirob u tꞌʌn Cꞌuj caꞌtur,
jach sʌc u nocꞌob tiꞌ curaꞌanob tu chaquintaꞌb u baquer Jesús uch.
Tuririꞌ tu joꞌrir,
tuririꞌ tu yoquir tu chaquintaꞌb u baquer Jesús uch.
13 Caj cꞌataꞌb tiꞌ ten yʌjmasirob u tꞌʌn Cꞌuj:
―Xquic ―quen―,
biquinin tan a wocꞌar?
Rajiꞌ caj u nuncaj tan yaꞌaric:
―Quireꞌ tu cuchob u baquer in Jaj Tsꞌurir,
mʌꞌ in wer tuj tu purob u baquer in Jaj Tsꞌurir.
14 María caj tsꞌoc yaꞌaric aroꞌ caj u sut u bʌj caj u yiraj tiꞌ yʌn Jesús chen mʌꞌ yer wa Jesúsiꞌ.
15 Jesús caj yaꞌaraj tiꞌ María:
―Xquic ―quij―,
biquinin tan a wocꞌar?
Mac tan a cʌxtiquiꞌ?
María yer rajiꞌ a cu cʌnantic u chan corir tub u pʌcꞌmʌn u cheꞌer Olivo.
Rajen caj u yaꞌaraj tiꞌ:
―Tech wa ta chꞌajaj u baquer in Jaj Tsꞌurir,
arej ten tub a puraj caꞌ xiquen in chꞌaꞌej.
16 Jesús caj u nuncaj tiꞌ:
―María ―quij.
Rajen María caj u sut u bʌj caj u yaꞌaraj tiꞌ ich u tꞌʌn hebreo:
―Raboni ―quij yaꞌaraj.
Rajiꞌ u cꞌat yaꞌaric:
A wʌjcamsʌyʌjiren,
quij Juan.
17 Jesús caj u yaꞌaraj tiꞌ:
―Mʌꞌ a yʌn suꞌsiquen quireꞌ mʌꞌ xiquen tuꞌ yʌn in Tet ich caꞌanan.
Caꞌ xiquech a waꞌarej tiꞌob in camsʌwinicob a irej in witsꞌinob.
Arej tiꞌob:
tar quin bin ich in Tet.
Baxuc tech,
rajiꞌ a Tet xan.
Tiꞌ quin bin ich Cꞌuj baxuc tech,
rajiꞌ a Cꞌuj xan.
Baxuc yʌn a wac tiꞌ in camsʌwinicob.
18 Rajen María Magdalena caj bin ich u camsʌwinicob Jesús caj u yaꞌaraj:
―A tenoꞌ ―quij―,
tin wiraj ic Jaj Tsꞌurirex.
Caj u yaꞌaraj tiꞌob tu cotor a baꞌ araꞌb tiꞌ ten Jaj Tsꞌur.
Jesús cu yesic u bʌj tiꞌ u camsʌwinicob
19 Raꞌiriꞌ u qꞌuinin,
oqꞌuin tiꞌ toy u qꞌuinin cu yʌnxchun semana.
U camsʌwinicob tiꞌ u muchꞌquinmʌnob u bʌj ich yatoch.
U quiꞌ mʌcmʌnob u jor quireꞌ cu sʌjticob u jach tsꞌurirob u winiquirob judío.
Seb caj yubob tiꞌ cꞌuchij Jesús tuꞌ yʌnob.
Caj chꞌicrʌj Jesús chumuc tuꞌ yʌnob caj u rʌc tꞌʌnaj tan yaꞌaric:
―Taren in quiꞌquint a worex ―quij Jesús.
Jesús se aparece a los discípulos (Juan 20.19-31)
20 Caj tsꞌoc yaꞌaric aroꞌ tiꞌob caj yes u cꞌʌb tuj bajij yejer u chꞌʌꞌraꞌtir tuj rom.
Rajen yerob ic Jaj Tsꞌurirex.
Rajen jach quiꞌ yorob.
21 Jesús tu caꞌ araj tiꞌob:
―Quiꞌquintex a worex.
An ten bic in Tet caj u tuchiꞌtajen ich yocꞌocab.
Baxuc techex quin tuchiꞌtiquechex quir a beyajex tiꞌ ten.
22 Caj tsꞌoc yaꞌaric aroꞌ caj u yustaj u camsʌwinicob caj yaꞌaraj tiꞌob:
―Bajeꞌrer a wet binaquex u Tajꞌor u Pixam Cꞌuj.
23 A mac cu cꞌaxicob yor cꞌuchaꞌan a worex a waꞌariquex tiꞌob:
“Jawsaꞌb u siꞌpirob.”
Chen a mac mʌꞌ u cꞌaxicob yor cꞌuchaꞌan a wor a waꞌariquex tiꞌob:
“Mʌꞌ jawsaꞌan u siꞌpirobiꞌ.”
Tomás mʌꞌ ju quibaj wa riqꞌuij Jesús
24 Tomás mʌꞌ tiꞌ yʌn caꞌchiꞌ yejer u yet camsʌwinicob caj cꞌuchij Jesús.
Rajiꞌ tuririꞌ ich a doce u camsʌwinicob Jesús.
Rajiꞌ a toc caꞌtur caj rochaꞌb ten u nʌꞌ uch.
25 Caj cꞌuchij Tomás.
U yet camsʌwinicob caj u yaꞌarob:
―Tin wirob ic Jaj Tsꞌurirex.
Chen Tomás caj u nuncaj tan yaꞌaric:
―Wa mʌꞌ in wiric u cꞌʌb tu bajij yejer clavo.
Wa mʌꞌ in jupic u yar in cꞌʌb tu jorir clavo tuj bajij u cꞌʌb,
baxuc wa mʌꞌ in jupic in cꞌʌb tuj rom u chꞌʌraꞌtir,
mʌꞌ in quibic wa riqꞌuir Jesús ―quij Tomás.
26 Caj cꞌuchij u jer semana u camsʌwinicob tiꞌ cu muchꞌquinticob u bʌj.
A ray u qꞌuininoꞌ tiꞌ yʌn Tomás yejerob ich yatoch.
Quiꞌ mʌcmʌnob u jor.
Seb caj yubob tiꞌ yʌn Jesús yejerob caj chꞌirʌj Jesús chumuc tuꞌ yʌnob.
Caj yaꞌaraj:
―Taren in quiꞌquintic a worex ―quij Jesús.
27 Jesús caj yaꞌaraj tiꞌ Tomás:
―Cojen jupej yar a cꞌʌb tuj bʌjaꞌan in cꞌʌb iric in cꞌʌb.
Tichꞌej yar a cꞌʌb caꞌ a jupej tuj rom in chꞌʌraꞌtir.
Mʌꞌ a tucric wa mʌꞌ tajiꞌ quireꞌ riqꞌuen tuj quimen.
Quibej riqꞌuen ich in quimirir.
28 Rajen Tomás caj u nuncaj caj yaꞌaraj:
―In Jaj Tsꞌurirech ―quij―,
in Cꞌujech xan ―quij Tomás.
29 Jesús caj yaꞌaraj tiꞌ:
―Tomás ―quij―,
a techoꞌ mʌꞌ ja quibaj hasta caj a wiraj riqꞌuen tiꞌ in quimirir.
Chen jach manan quiꞌ yorob a mac a cu quibicob riqꞌuen tiꞌ in quimirir cax mʌꞌ ju yirajenob.
Biquinin Juan caj u tsꞌibtaj a jeꞌ juꞌunaꞌ