Caj tarij u Tajꞌor u Pixam Cꞌuj
2
Caj cꞌuchij tu qꞌuinin Pentecostés,
pꞌeriꞌ muchꞌricob ich naj a caj u yacsaj tu yorob u tꞌʌn Cꞌuj.
U qꞌuinin Pentecostés,
raꞌ u qꞌuinin u quiꞌquiꞌ janʌnob u winiquirob judío.
2 Jeroj tuneꞌ,
caj u yubob u tar u jum icꞌ,
seb caj yubob u tar.
Tar u tar u jum icꞌ ich caꞌanan.
Cꞌam u jum icꞌ oc ich naj tu muchꞌaꞌanob tu curucbarob a yacsmʌnob tu yorob.
3 Caj tar tiꞌob irej u job cꞌacꞌ.
Caj u rʌc jʌsaj tiꞌob jujuntur,
bajen u job cꞌacꞌ tu joꞌrob.
Chichin u job tu joꞌrob a mac a yacsmʌnob tu yorob u tꞌʌn Cꞌuj.
4 Caj tarij u Tajꞌor u Pixam Cꞌuj yicnʌob quir u tar u mucꞌ Cꞌuj tu yʌnob.
5 Raꞌiriꞌ u qꞌuinin,
caj tarob u winiquirob judío quir u cꞌujinticob Cꞌuj.
Tarob ich u jer u cajarob tarob quir u cꞌujinticob Cꞌuj ich u cajar Jerusalén.
Tiꞌ cʌjaꞌanob ich u cajar Jerusalén.
6 Robob xan,
caj yubob u jum bajen u tar u jum icꞌ,
robob xan,
caj binob u yiricob a baꞌ u ber ich a yacsmʌnob tu yorob.
Caj cꞌuchob a pimoꞌ tu muchꞌaꞌanob ich naj.
Jeroj,
caj jaqꞌuij u yorob quireꞌ yubaꞌb bajen u wʌcꞌʌs tꞌʌnob a tub u tarob.
Robob cu tꞌʌnob a mac a yacsmʌnob tu yorob u tꞌʌn Cꞌuj.
7 Jaqꞌuij yorob a pimoꞌ,
sajacob,
mʌꞌ cu jocꞌarob u tꞌʌnob.
Chen sasameꞌ caj jocꞌ u tꞌʌnob,
caj yaꞌarajob:
―Ir a wirej ―quij yaꞌaric―.
A mac a cu tꞌʌnob tar u tarob ich u ruꞌumin Galilea.
8 Baꞌ u ber,
quireꞌ quij cuyiquex u tꞌʌnob ich ic tꞌʌnex?
9 Teꞌ yʌnaꞌ tu yʌnoꞌonex a mac a cu tarob ich u cajar Partia.
U jer a tar u tarob ich u cajar Media.
Tiꞌ yʌn xan,
a tar u tarob ich u cajar Elam.
Tiꞌ yʌn xan,
a cu tarob ich u cajar Mesopotamia.
Tiꞌ yʌn xan,
a cu tarob ich u cajar Judea.
Tiꞌ yʌn xan,
a cu tarob ich u cajar Ponto.
Tiꞌ yʌn xan,
a cu tarob ich u ruꞌumin Asia.
10 Teꞌ yʌnaꞌ tu yʌnoꞌonex a mac a tar u tarob ich u cajar Panfilia.
Tiꞌ yʌn xan,
a cu tarob ich u ruꞌumin Egipto.
Tiꞌ yʌn xan a cu tarob ich u cajar Libia tu nʌtsꞌaꞌan Cirene.
Tiꞌ yʌn xan,
a mac u winiquirob romano,
quireꞌ raꞌ u cajar Roma,
Tar binob yirej ich u cajar Jerusalén,
u winiquirob romanojoꞌ.
A jeꞌ pimaꞌ u winiquirob judío.
Chen yʌn mac teꞌ yʌnaꞌ tu yʌnoꞌonex caj tarob u cꞌujinticob Cꞌuj irej u winiquirob judío cu beticob.
11 Teꞌ yʌnaꞌ tu yʌnoꞌonex a mac a tar u tarob ich u cajar Arabia,
cax mʌꞌ u winiquirob judío,
tar u cꞌujinticob Cꞌuj an ten bic u winiquirob judío,
cax tiꞌ u ruꞌumin Creta caj tarob xan.
Chen biquinin quij cuyiquex u tsicbarob toꞌonex ich ic wʌcꞌʌs tꞌʌnobex tan u yaꞌaricob a baꞌ jach manan u beyaj Cꞌuj a tu betaj?
―baxuc caj yaꞌarajob a pimoꞌ a caj tarob tu yʌn a yacsmʌnob tu yorobeꞌ.
12 Tu yʌnob a pimoꞌ,
tu cotor jach jacꞌaꞌan yorob quireꞌ mʌꞌ yerob baꞌ quiriꞌ.
Caj u cꞌatajob ich u bʌjob:
―A baꞌ u cꞌat yaꞌaric tu cotor a jeraꞌ,
a quij cuyiquexeꞌ?
13 U jerob a tu yubob u tꞌʌnob a tu yacsaj tu yorob u tꞌʌn Cꞌuj,
robob caj u cheꞌtajob caj yaꞌarob:
―Cʌraꞌanob,
rajen cu tsicbarob ich ic tꞌʌnobex.
A baꞌ araꞌb ten Pedro tiꞌ a pimoꞌ
14 Rajen caj riqꞌuij Pedro yejer u yet camsʌwinicob a mac tuchitaꞌb ten Jesús.
Caj ricꞌob u chꞌictarob,
chen Pedro,
cꞌam caj u tꞌʌnaj a mac a caj u cheꞌtob,
caj u yaꞌaraj tiꞌob:
―Uꞌyex u xibirex Judea,
bayiriꞌ xan a techoꞌ a mac a cʌjaꞌanob ich u cajar Jerusalén.
Quiꞌquiꞌ uꞌyex in tꞌʌn soc a najtiquex.
15 Ca tucriquex cʌraꞌanenob a tenob,
chen mʌꞌ cʌraꞌanenobiꞌ.
Mʌꞌ ja wirej ―quij Pedro―,
mʌꞌ nacʌc a qꞌuinoꞌ bajeꞌrer,
quireꞌ mʌꞌ u carchʌjʌr a mac u winiquirob judío a bay qꞌuinoꞌ.
16 A baꞌ ca wiriquex bajeꞌrer tu yʌn tsꞌibtaj Joel uch.
Mʌꞌ ja wirej,
rajiꞌ Joel tsꞌab u tucur ten Cꞌuj quir u tsicbar a baꞌ u cꞌat Cꞌuj.
Rajen caj u yaꞌaraj Joel tiꞌ Cꞌuj a baꞌ tu toc araj Cꞌuj.
Uꞌyex baꞌ tu toc araj:
17 Jeꞌ u cꞌuchur tu qꞌuinin a tabar u xur tꞌʌn ich yocꞌocab,
quij yaꞌaric Cꞌuj.
Jeꞌ in tuchitic u Tajꞌor u Pixam Cꞌuj soc rajiꞌ tiꞌ yʌn tuꞌ yʌnechex,
a mac a tiꞌ yʌn ich yocꞌocabeꞌ.
A pararex jeꞌ u tsecꞌticob in tꞌʌnob,
cax xquic xan.
A mʌꞌ xuraꞌan xiboꞌ,
quij yaꞌaric Cꞌuj,
jeꞌ u yiricob a baꞌ cu yesaꞌ ten Cꞌuj a bajen u wʌyʌcꞌ.
Jeꞌ u wʌyʌcꞌtiquenob a mac nuxiboꞌ,
quij yaꞌaric Cꞌuj.
18 A raꞌiriꞌ u qꞌuinin a tabar u xur tꞌʌnoꞌ,
quij yaꞌaric Cꞌuj,
a mac a cu yamtiquenob,
cax wa xib,
cax wa xquic,
Jeꞌ in tuchiꞌtic u Tajꞌor in Pixam Cꞌuj soc tiꞌ yʌn tu yʌnob.
Robob jeꞌ u tsecꞌticob in tꞌʌnob a jeꞌ xibaꞌ,
bayiriꞌ,
a jeꞌ xquicaꞌ xan.
19 Jeꞌ in wesic techex,
quij yaꞌaric Cꞌuj,
raꞌ cu bin u jacꞌar a worex ich caꞌanan.
Bayiriꞌ xan,
ich yocꞌocab bin in caꞌ in wesic techex carem beyaj soc a werex u chichir in mucꞌ.
Jeꞌ a wiriquex,
quij yaꞌaric Cꞌuj,
qꞌuicꞌ.
Jeꞌ a wiriquex cꞌacꞌ,
quij yaꞌaric Cꞌuj,
a bay u pimin muyar u butsꞌir.
20 A raꞌiriꞌ u qꞌuininoꞌ,
quij yaꞌaric Cꞌuj,
bin in caꞌ in wesic techex u chichir in mucꞌ,
a tenoꞌ u Jaj Tsꞌuriren tu cotor mac.
Tabar in tar u Jaj Tsꞌuriren tu cotor mac.
Bin u caꞌ acꞌbirchʌjʌr qꞌuin.
21 Tu cotor mac,
quij yaꞌaric Cꞌuj,
a mac a cu tꞌʌniquen quir in taquiqueꞌ,
jeꞌ in taquiqueꞌ.
Baxuc caj u tsꞌibtaj toꞌon Joel,
a mac tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌujoꞌ.
22 Pedro caj u yaꞌaraj tiꞌob:
―Uꞌyex in wac,
u xibirechex Israel.
A werex Jesús,
a cʌjaꞌan ich u cajar Nazaret uch.
Rajiꞌ caj u yesaj toꞌonex carem u beyaj,
rajen ij querex wa tetaꞌb Jesús ten Cꞌuj.
A techexoꞌ,
caj a wirajex a baꞌ betaꞌb ten Cꞌuj tiꞌ Jesús,
wa ber tiꞌ yʌn Jesús tiꞌ yʌn yejeroꞌonex uch.
23 A Cꞌujoꞌ,
yer jeꞌ a cꞌubiquex quinsbir Jesús quireꞌ sasir u wich Cꞌujoꞌ.
A Cꞌujoꞌ yer xan bin a quinsiquex Jesús,
chen rajiꞌ tu chaꞌjex.
A techexoꞌ,
caj a cꞌubex Jesús tiꞌ a mac jach cꞌasoꞌ caꞌ u sinejob ich cruz quir u quimin.
24 Chen rajiꞌ caj ricꞌsaꞌb ten Cꞌuj ich u quimirir.
Mʌꞌ tu chaꞌj u pꞌatʌr Jesús ich u quimirir rajen ricꞌsaꞌb.
25 Mʌꞌ ja wirej,
David caj u toc tsꞌibtaj uch wa yʌn u riqꞌuir Cristo.
Rajen caj u yaꞌaraj David a uchoꞌ:
U burur qꞌuin quin quibic u tꞌʌn Jaj Tsꞌur,
rajraꞌ tiꞌ yʌn Jaj Tsꞌur tin wicnʌn soc mʌnaꞌ baꞌ cu tar ten.
26 Rajen quiꞌ in wor in cꞌay,
quij David.
Mʌnaꞌ baꞌ quin tucric quireꞌ tech ca cʌnantiquen.
Cax quimic in winquirir,
mʌꞌ in tucric quireꞌ quiꞌ in wor,
quij.
27 In wer,
quij David.
Mʌꞌ ja pꞌʌtic in pixam ich in quimirir caꞌ bin quimiquen.
Mʌꞌ ja chaꞌj u tuꞌtar in winquirir tu tꞌajaꞌanen.
In wer a jach yajen.
28 A techoꞌ,
quij David,
caj a wesaj in ber quir in bin caꞌanan quir in cuxtar munt qꞌuin.
Jeꞌ a quiꞌquintic in wor quireꞌ pꞌeriꞌ quij cuxtarex.
Baxuc caj u yaꞌaraj David a uchoꞌ.
29 Pedro caj u yaꞌaraj:
―In wet winiquirob israel ―quij Pedro―.
Taj yʌn in waꞌaric techex.
Uch quimic ic nunquirex David.
Tiꞌ tꞌajaꞌan u baquer ich u japnin tunich,
chʌcaꞌan tu tꞌajaꞌan u baquer bajeꞌrer.
30 David u toc er aroꞌ quireꞌ rajiꞌ tsꞌaꞌb u tucur ten Cꞌuj quir u yaꞌaric a baꞌ u cꞌat Cꞌuj.
Jach araꞌb tiꞌ ten Cꞌuj tan u yaꞌaric tiꞌ:
Jeꞌ u tar a Cristojoꞌ.
Jeꞌ u yʌn tar baxuc u parareꞌ.
Rajiꞌ bin u caꞌ reyintic irej David.
31 A uchoꞌ yer David jeꞌ u riqꞌuir Cristojeꞌ tu quimen,
rajen caj u tsꞌibtaj David mʌꞌ u tuꞌtar u winquirir Cristo,
mʌꞌ ju pꞌatʌr tu tꞌajaꞌan u baquer.
32 Taj quin waꞌaric techex ―quij Pedro―.
Raꞌiriꞌ Jesús caj ricꞌsaꞌb ten Cꞌuj,
in bʌjiriroꞌ caj in wirajob rajen quin waꞌaricob techex.
33 Mʌꞌ ja wirej,
caj ricꞌsaꞌb Jesús ten Cꞌuj ich u noj Cꞌuj soc u sʌjtaꞌ ten tu cotor mac.
Caj u cꞌʌmaj u Tajꞌor u Pixam Cꞌuj Jesús,
quireꞌ toc araꞌb tiꞌ ten Cꞌuj uch.
A baꞌ caj a toc irajex bajeꞌrer,
baxuc a baꞌ caj a toc uꞌyajex,
raꞌ cu tar ich Cristo.
Mʌꞌ ja wirej,
Cristo caj u tuchiꞌtaj u Tajꞌor u Pixam Cꞌuj.
34 Chen David u bʌjiriꞌ mʌꞌ bin caꞌananiꞌ quireꞌ tu yʌn araj David tan yaꞌaric:
In Jaj Tsꞌurir caj u yaꞌaraj tiꞌ in Jaj Tsꞌurir:
“Yʌn curen,
quij Cꞌuj,
tin noj,
35 hasta quin tsꞌic tech u mosatiquech a mac u pꞌec yiriquechoꞌ.”
Baxuc caj araꞌb tiꞌ David a uchoꞌ.
36 Caj u yaꞌaraj Pedro:
―Yʌn cꞌʌꞌotiquex quireꞌ u winiquechex israel soc mʌꞌ a tucriquex wa mʌꞌ Cristo.
Quireꞌ rajiꞌ tetaꞌb ten Cꞌuj Cristo quir u reyintaꞌr ten tu cotor mac.
Raꞌiriꞌ Jaj Tsꞌur xan.
Chen techex a ta bʌjex ich cruz soc u quimin.
Quin waꞌaric techex quen,
rajiꞌ u jach tajir Cristo.
37 Caj tsꞌoc u tsicbar Pedro,
a mac a caj u yubob u tꞌʌn Pedro jach choc yorob caj yubob u yet winiquirob judío.
Robob caj u cꞌatajob tiꞌ Pedro yejer u yet camsʌwinicob a mac tuchiꞌtaꞌb ten Jesús.
Tan u cꞌataꞌ tiꞌob:
―Baꞌ quic bin ic betex quireꞌ ic bʌjobechex?
―baxuc caj u cꞌatajob tiꞌ Pedro.
38 Pedro caj u nuncaj,
cu yaꞌaric tiꞌob:
―Caꞌ a cꞌaxex a worex tan a pꞌʌtiquex a cꞌasirex.
Caꞌ a tꞌʌnex Jesús yʌn cꞌatiquex tiꞌ caꞌ u jawsej a siꞌpirex.
Bayiriꞌ caꞌ yʌn acsac jaꞌ ta joꞌrex,
jujuntur techex.
Jeroj tuneꞌ,
Cꞌuj jeꞌ u tuchiꞌtiquechex u Tajꞌor u Pixam Cꞌuj quir u tar tu yʌnechex.
39 Quireꞌ Cꞌuj caj u toc araj,
jeꞌ u tsꞌic techex u Tajꞌor u Pixam Cꞌuj tiꞌ a pararex xan,
an ten bic techex.
Jeꞌ u tsꞌic tiꞌ a mac a nach xan.
Bayiriꞌ,
jeꞌ u tsꞌic u Tajꞌor u Pixam Cꞌuj tiꞌ a mac tetaꞌb ten Cꞌuj xan.
40 Pedro taj caj u yaꞌaraj tiꞌ u yet winiquirob judío yejer u jer yaꞌab tꞌʌn,
cu chich aric tiꞌob:
―Caꞌ a acsex ta worex,
yʌn pꞌʌtiquex a mac a cu beticob cꞌas soc mʌꞌ quet a werarex ich cꞌacꞌ ―baxuc tu yaꞌaraj Pedro tiꞌ a pimoꞌ.
41 Tsoy caj yubob u tꞌʌn Pedro a ju yet winiquirob judío,
rajen caj u yacsajob tu yorob u tꞌʌn Jesús bayiriꞌ xan,
caj acsaꞌb jaꞌ tu joꞌrob.
Raꞌiriꞌ u qꞌuinin caj u yacsajob tu yorob tres mil winic.
42 Robob xan,
caj u tsꞌaj u tucurob tiꞌ a baꞌ camsaꞌb ten a mac a tuchiꞌtaꞌb ten Jesús quir u cʌnicob u tꞌʌn.
Rajen pꞌeriꞌ yorob bayiriꞌ quiꞌ yorob.
Robob xan caj u tꞌʌnajob Cꞌuj.
Bayiriꞌ pꞌeriꞌ u janʌnob quir u cꞌʌꞌoticob wa ber caj quimij Cristo tiꞌob.
Raꞌ tu yʌn acsajob tu yorob tiꞌ u tꞌʌn Cꞌuj
43 A pimoꞌ,
caj u yirajob bic jach chich u mucꞌ Cꞌuj caj jaqꞌuij u yorob a pimoꞌ.
Mʌꞌ ja wirej,
caj u yirajob u jach carem beyaj a ju camsʌwinicob a tuchiꞌtaꞌb ten Jesús quir u tsecꞌticob u tꞌʌn.
Cꞌuj caj u yamtaj tiꞌob tu beyajob a ju camsʌwinicob a tuchiꞌtaꞌb ten Jesús quir u tsecꞌticob u tꞌʌn.
44 A mac a caj u yacsajob tu yorob,
pꞌeriꞌ u tucurob,
bayiriꞌ xan,
pꞌeriꞌ u baꞌtacob.
45 Robob caj u canajob u baꞌtac,
caj u rʌc jʌsajob u taqꞌuin tiꞌ a mac a ju cꞌat u jʌsicob tiꞌeꞌ.
46 Rajraꞌ samaneꞌ tiꞌ yʌnob tu cu cꞌujinticob u winiquirob judío ich a carem najoꞌ.
Bayiriꞌ xan,
tiꞌ cu janʌnob ich yatochob,
pꞌeriꞌ u janticob yoꞌoch pan quireꞌ quiꞌ yorob.
Mʌꞌ ja wirej,
pꞌeriꞌob yorob a caj u yacsajob tu yorob.
47 Robob,
cu cꞌujinticob Cꞌuj a caj u yacsajob tu yorob u tꞌʌn Cꞌuj tan yaꞌaricob:
―A Cꞌujoꞌ,
jach tsoy.
A ju yet cajarob cu sʌjticob a caj u yacsajob tu yorob u tꞌʌn Cꞌujeꞌ.
A Cꞌujoꞌ cu pimquintic u yacsicob tu yorob.
Mʌꞌ ja wirej,
u jer u qꞌuinin cu jach pimtarob.