Jawsaꞌb a mech yoqueꞌ
3
Tan u bin qꞌuin,
raꞌ u qꞌuinin cu naj tꞌʌnicob Cꞌuj u winiquirob judío tu cu naj cꞌujinticob Cꞌuj u winiquirob judío ich a carem najoꞌ.
Tiꞌ cu binob xan Pedro yejer Juan,
quir u tꞌʌnicob Cꞌuj.
Raꞌ u cꞌat yaꞌaric las tres cu binob.
2 Caj cꞌuchob tu yʌn ich u jor carem naj tu cu naj cꞌujinticob Cꞌuj u winiquirob judío,
raꞌ u cꞌabaꞌ u jor naj,
A Jach Tsoyoꞌ.
Tiꞌ yʌn ich a ray u jor najoꞌ a mac mech u yoqueꞌ.
Toc beriꞌ caj rochaꞌb ten u nʌꞌ uch.
Rajraꞌ cu tarob saman cu tar purbir ten u racꞌob,
quir u cꞌatic u taqꞌuin tiꞌ a mac a cu yocar ich a carem najoꞌ.
Tan tu cꞌuchur a mech yoqueꞌ caj tarob Pedro yejer Juan.
3 Jeroj caj cꞌataꞌb u taqꞌuinob ten a mac mech u yoqueꞌ tiꞌ Pedro yejer Juan.
Cu yocarob Pedro yejer Juan,
caj cꞌataꞌb u taqꞌuinob tiꞌob.
4 Caj xurob Pedro yejer Juan,
caj quiꞌ pʌctaꞌb u wich,
a mech u yoqueꞌ,
ten Pedro yejer Juan,
chen Pedro caj u yaꞌaraj:
―Pʌctenob ―quij Pedro.
5 Pʌctaꞌb Pedro ten a mac mech u yoqueꞌ.
Mʌꞌ ja wirej,
cu tucriqueꞌ,
jeꞌ u tsꞌabʌr u taqꞌuineꞌ.
6 Chen Pedro caj u yaꞌaraj tiꞌ:
―Cax mʌnaꞌ in taqꞌuinoꞌ,
a tenoꞌ jeꞌ in yamtiquecheꞌ yejer u mucꞌ Jesucristo a caj u tsꞌaj teneꞌ.
A cu tar tu cajar Nazaret ucheꞌ.
Pedro caj u tꞌʌnaj caj u yaꞌaraj tiꞌ:
―Riqꞌuen,
chꞌicren ―quij Pedro.
7 Jeroj,
caj mach u cꞌʌb ten Pedro caj u ricꞌsaj,
caj chꞌicrʌj,
quireꞌ seb caj chichnʌjij u joꞌr u baquer,
rʌc yejer u yoc,
jeroj caj chꞌicrʌj.
8 Jeroj,
a mac mech u yoqueꞌ,
caj sitꞌnʌjij quir u chꞌictar,
caj ximbanʌjij.
Jach quiꞌ yor cu man cu quiꞌ tꞌʌntic Cꞌuj,
cu yaꞌaric:
“Bayoꞌ Cꞌuj.”
Cu sitꞌ xan,
jeroj quet yejer Pedro yejer Juan caj oquij ich carem naj.
9 Tu cotor mac cu yiricob u man u ximbar cu quiꞌ tꞌʌntic Cꞌuj.
10 A mac a caj u yirajob tu cꞌʌꞌotajob tiꞌ a cu naj cutar ich u jor carem naj.
Tiꞌ cu naj cꞌatic u taqꞌuin ich u jor naj a ju cꞌabaꞌ A Jach Tsoyoꞌ.
Rʌc jaqꞌuij yorob caj u yirajob jach seb caj rʌc jaw a mech yoqueꞌ.
Pedro cu tsecꞌtic u tꞌʌn Cꞌuj tu cu naj cꞌujinticob Cꞌuj u winiquirob judío
11 Tiꞌ yʌn Pedro yejer Juan tu reꞌaꞌan u jor naj a pach u cꞌabaꞌ U Jor Naj a Salomónoꞌ.
A mac mech u yoc ucheꞌ,
caj u mʌchaj u cꞌʌb Pedro yejer Juan.
Mʌꞌ u cꞌat u chaꞌbʌr.
A mac a caj u yirajobiꞌ caj u cꞌʌnajob yacab quir u muchꞌquinticob u bʌj ich Pedro yejer Juan.
Jach jacꞌaꞌan u yorob.
12 Pedro caj u yiraj cu muchꞌquinticob u bʌj tu yʌnob,
jeroj tuneꞌ,
Pedro caj u tꞌʌnaj tiꞌob,
tan yaꞌaric:
―Uꞌyex u xibirechex Israel,
biquinin ca pʌctiquenex a tenoboꞌ?
Biquinin cu jacꞌʌr a worex an ten bic a tenob caj in jawsajob a mech yoqueꞌ yejer in mucꞌob?
Quireꞌ chen Cꞌuj caj u jawsaj tiꞌ.
A techexoꞌ,
ca tucriquex a tenob caj in jawsajobiꞌ,
quireꞌ taj quin cꞌujinticob Cꞌuj.
13 Mʌꞌ ja wirej,
ij cꞌujirex,
baxuc u cꞌujir ic nunquirex Abraham,
baxuc u cꞌujir ic nunquirex Isaac,
baxuc u cꞌujir ic nunquirex Jacob,
rajiꞌ caj u yesaj toꞌonex bic jach carem u parar Cꞌuj,
a Jesúsoꞌ,
quireꞌ ricsaꞌb Jesús ten Cꞌuj ich u quimirir.
Rajiꞌ caj pay caꞌanan ten Cꞌuj quir u sʌjtaꞌ ten tu cotor mac.
A techexoꞌ ―quij Pedro―,
caj a cꞌubajex quinsbir Jesús ten Pilato,
cax u cꞌat u chaꞌbʌr ten Pilato uch.
Chen a techexoꞌ ―quij Pedro―,
mʌꞌ a cꞌatex u chaꞌbʌr.
A techex,
a cꞌatex a wiriquex u quimin.
14 Jesús ―quij Pedro―,
jach taj yor,
rajiꞌ caj u betaj a baꞌ tsoy tu tꞌʌn Cꞌuj.
Chen a techexoꞌ,
mʌꞌ ja cꞌatex u chaꞌbʌriꞌ.
Raꞌ caj a cꞌatajex u chaꞌbʌr yʌjquinsir mac.
15 A techexoꞌ ―quij Pedro―,
caj a waꞌarajex u quinsaꞌ a mac a cu tsꞌic ij cuxtarex munt qꞌuin.
Chen a Cꞌujoꞌ caj u ricsajiꞌ ich u quimirir.
A tenob in werob taj quireꞌ caj in wirajob cuxaꞌan a Jesúsoꞌ.
16 A techexoꞌ,
caj a cꞌʌꞌotajex ―quij Pedro―,
a rʌc jaw a mech u yoqueꞌ,
quireꞌ caj in wacsajob tin worob u cꞌabaꞌ Jesús.
Mʌꞌ ja wirej,
quireꞌ caj in wacsajob tin worob u tꞌʌn Jesús rajen jaw a jeꞌ macaꞌ a mech u yoc ucheꞌ.
Ʌcʌtan ta cotorechex caj a wirajex tsꞌoc u jawʌr a mech u yoqueꞌ.
17 Pedro caj u yaꞌaraj tiꞌob tan yaꞌaric:
―Uꞌyex in wet winiquirob judío.
Techex mʌꞌ ja werex a baꞌ caj a betajex caj a waꞌarajex u quinsaꞌ Jesús.
Mʌꞌ yerob xan ic jach tsꞌurirex a baꞌ caj u betajob tiꞌ Jesús.
A tenoꞌ in wer mʌꞌ ja najtexiꞌ.
18 Mʌꞌ ja wirej,
a Cꞌujoꞌ caj u tsꞌaj u tucur tiꞌ mac caꞌ u tsicbʌtob a baꞌ u cꞌat Cꞌuj rajen robob caj u tsecꞌtajob wa yʌn u mucꞌyaj Cristo,
yʌn u quinsaꞌ xan.
Toc nupꞌsaꞌb a baꞌ araꞌb ten Cꞌuj bajeꞌrer.
19 Rajen caꞌ a cꞌaxex a worex.
Caꞌ a pꞌʌtex a cꞌasirex.
Caꞌ a tꞌʌnex Cꞌuj quir u jawsic a siꞌpirex soc quiꞌ a worex tiꞌ Cꞌuj.
20 Soc jaj ix tʌcoj wa Cꞌuj,
jeꞌ u caꞌ tuchiꞌtic Jesús quir u caꞌ tar teraꞌ.
Mʌꞌ ja wirej,
uch tetaꞌb Cristo ten Cꞌuj quir u taquic tu cotor mac.
21 Chen Jesús tiꞌ cu yʌn pꞌatʌr ich caꞌanan bajeꞌrer hasta caꞌ bin cꞌuchuc tu qꞌuinin quir u tar.
Yʌn u tsꞌocar u tajquintic teraꞌ ich yocꞌocab,
a baꞌ toc araꞌb ten Cꞌuj,
tiꞌ a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj.
22 Mʌꞌ ja wirej ―quij Pedro―,
ic nunquirex Moisés caj u yaꞌaraj:
“A Jaj Tsꞌuroꞌ,
a Cꞌujir techex,
jeꞌ u tetic caꞌ tac ich a wet winiquirob judíojoꞌ tuririꞌ mac,
a jeꞌ u tsꞌabʌr u tucur ten Cꞌuj,
quir u tsicbar a baꞌ u cꞌat Cꞌuj an ten bic Cꞌuj caj u tetaj a tenoꞌ.
Caꞌ uꞌyex a baꞌ cu bin u tsecꞌtic techex.
23 Chen tu cotor mac a mʌꞌ u yubicob u tꞌʌn a cu bin u tsecꞌticoꞌ,
jeꞌ u jocꞌsaꞌ ten Cꞌuj ich u yet winiquirob judío quir u bin erar.”
A baxucoꞌ caj u yaꞌaraj Moisés uch ―quij Pedro.
24 Raꞌiriꞌ xan,
caj u tsecꞌtajob uch tu cotor mac a tsꞌaꞌb u tucur ten Cꞌuj a baꞌ ca wiriquex bajeꞌrer.
A Samueloꞌ,
a mac tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj,
rajiꞌ caj u tsecꞌtaj a baꞌ ca wiriquex bajeꞌrer,
bayiriꞌ xan,
a ju jerob,
a mac a tsꞌaꞌb u tucur ten Cꞌuj a caj tarob tu pach Samueloꞌ caj u tsecꞌtajob a baꞌ ca wiriquex bajeꞌrer xan.
25 A techexoꞌ ―quij Pedro―,
u pararechex a mac a tsꞌaꞌb u tucurob ten Cꞌuj uch,
quir u tsicbarob a baꞌ u cꞌat Cꞌuj,
quireꞌ robob a nunquirex a mac a tsꞌaꞌb u tucurob ten Cꞌuj quir u tsicbarob a baꞌ u cꞌat Cꞌuj.
Mʌꞌ ja wirej,
a techexoꞌ bin a cꞌʌmex a quet yor tꞌʌnoꞌ,
a caj u betaj Cꞌuj yejer a nunquirex a baꞌ tu toc araj tiꞌob uch.
Quireꞌ baxuc caj yaꞌaraj Cꞌuj tiꞌ ic nunquirex Cꞌuj uch.
Uꞌyex baꞌ caj u yaꞌaraj Cꞌuj tiꞌ ic nunquirex Abraham uch:
“Barer caꞌ bin pimac u parar a parar,
quij yaꞌaric Cꞌuj,
jeꞌ u tar tuririꞌ mac ich u parar a caꞌ parar quir u yamtic tu cotor mac a tiꞌ yʌn ich yocꞌocab.”
26 Rajen,
a Cꞌujoꞌ caj u tetaj u parar Cꞌuj caꞌ u tuchiꞌtej ich yocꞌocab tu yʌnechex u winiquirob judío.
Pʌyber caj u tuchiꞌtaj ich techex soc a cꞌaxiquex a worex soc a pꞌʌtiquex a siꞌpirex ―baxucoꞌ caj u tsecꞌtaj Pedro tiꞌ u yet winiquirob judío.