Pedro yejer Juan ʌcʌtan chꞌiric ich u jach tsꞌurirob a carem najoꞌ tu cu naj cꞌujinticob Cꞌuj u winiquirob judío
4
Tiꞌ toy cu tsicbar Pedro yejer u yet winiquirob judío a tu muchꞌquintajob u bʌj ich Pedro yejer Juan,
quireꞌ jawsaꞌb a mech u yoqueꞌ.
Jeroj caj cꞌuchob u jach tsꞌurirob a sacerdote tiꞌ u winiquirob judío yejer u tsꞌurirob u policía a tiꞌ yʌn ich a carem najoꞌ tu cu naj cꞌujinticob u winiquirob judío.
Yet taracob saduceo,
a cu yaꞌaricob:
“Mʌꞌ u riqꞌuir mac ich u quimirir.”
2 Raꞌ u jach tsꞌuririrob caj pꞌujob tiꞌ Pedro yejer Juan quireꞌ cu camsicob u yet winiquirob judío ich a carem najoꞌ.
Mʌꞌ jaꞌririꞌ,
pꞌujob quireꞌ cu tsecꞌticob wa jeꞌ u riqꞌuir mac ich u quimirir an ten bic Jesús riqꞌuij ich u quimirir.
3 Jeroj tuneꞌ,
chuc Pedro yejer Juan ten u policía a tiꞌ yʌnob ich carem naj tu cu naj cꞌujinticob Cꞌuj u winiquirob judío.
Quireꞌ caj u chucajob oqꞌuin caj bin purbir mʌcbir tu cu naj mʌquic mac soc samaneꞌ cu jocꞌsicob u tocar u joꞌr Pedro yejer Juan.
4 Yʌn yaꞌab mac a caj u yacsajob tu yorob tu tu yubob u tsecꞌtic u tꞌʌn Cꞌuj Pedro.
Yʌn cinco mil xib caj u yacsajob tu yorob,
jaꞌriꞌ xacaꞌan a xiboꞌ,
mʌꞌ xacaꞌan a xquicoꞌ.
5 Caj sasij caj u muchꞌquintajob u bʌj ich u cajar Jerusalén quir u tocar u joꞌr Pedro yejer Juan.
Caj tarob u jach tsꞌurirob u winiquirob judío,
yet taracob yʌjcamsʌyʌjirob u tꞌʌn Moisés,
yet taracob u tsꞌurir u cajar a cu yaꞌaraꞌ a nuxiboꞌ.
6 Yet tarac Anás,
rajiꞌ u jach tsꞌurir tu cotor u sacerdote u winiquirob judío.
Yet tarac Caifás,
yet tarac Juan,
yet tarac Alejandro u bʌjob Anás.
7 Jeroj tuneꞌ,
caj tuchiꞌtaꞌb mac caꞌ xic pʌybir Pedro yejer Juan tu mʌcaꞌanob.
Caj cꞌuchob caj chꞌicrʌj Pedro yejer Juan ich ʌcʌtan tu cotor u tsꞌurirob u winiquirob judío.
Caj cꞌataꞌb ten u tsꞌurirob u winiquirob judío tiꞌ Pedro yejer Juan:
―Baꞌquir a muqꞌuexiꞌ quir a jawsiquex a mac mech u yoqueꞌ?
Mac caj u tsꞌaja techex a beyajex quir a betiquex a baxucoꞌ?
8 Caj u nuncaj tiꞌob Pedro,
chen Pedro mʌꞌ cu nunquiquiꞌ,
u Tajꞌor u Pixam Cꞌuj,
rajen rajiꞌ caj u yaꞌaraj tiꞌob:
―Ca cꞌatiquex tenob an ten bic caj in jawsajob a mech u yoqueꞌ.
9 Uꞌyex ―quij Pedro―,
in jach tsꞌurir ij quet winiquirob judío yejer in tsꞌurir a nuxiboꞌ.
Bayiriꞌ xan,
uꞌyex tu cotorechex u winiquirob judío.
10 Uꞌyex a baꞌ quin wac techex caꞌ a najtex bic tabar caj in jawsajob a mech yoqueꞌ.
Mʌꞌ ja wirej,
yejer u mucꞌ Jesús caj in jawsajob a mech yoqueꞌ.
A Jesúsoꞌ,
a cʌjaꞌan ich u cajar Nazaret ucheꞌ.
A caj a sinajex ich cruzeꞌ,
chen ricꞌsaꞌb Jesús ich u quimirir ten Cꞌuj.
Rajen tiꞌ yʌn ʌcʌtan techex chꞌicric tu yʌnechex a mech yoc ucheꞌ bajeꞌrer.
11 Uꞌyex tu cotorechex u winiquirob judíojoꞌ,
rajen tsꞌibtaꞌb ich u tꞌʌn Cꞌuj tiꞌ Jesús tu cu yaꞌaric wa rajiꞌ u tunichir a pur ten a mac a tu tsꞌʌpquintajob tunich quir u beticob a carem najoꞌ.
Chen bajeꞌrer raꞌ u tunichir a cu chichquintic u yoc najeꞌ.
Mʌnaꞌ u jer u tunichir an ten bic rajiꞌ.
Mʌꞌ ja wirej,
a techexoꞌ,
caj a cʌnajex a mac a caj u pichꞌtajob a ray u tunichiroꞌ,
quireꞌ techex mʌꞌ ja cꞌʌmex Jesús.
12 Mʌꞌ ja wirej ―quij Pedro―,
mʌnaꞌ u jer mac cu bin u taquicoꞌonex,
quireꞌ mʌnaꞌ u jer tuchiꞌtaꞌb ten Cꞌuj quir u taquicoꞌonex teraꞌ ich yocꞌocab ―baxuc tu yaꞌaraj Pedro tiꞌob.
13 U jach tsꞌurirob u winiquir judio caj tsꞌoc u yubicob a baꞌ araꞌb tiꞌob ten Pedro yejer Juan caj u yaꞌarajob:
―A biquinin jach chich yorob yubicob,
robob mʌꞌ yerob juꞌuniꞌ,
tin tꞌʌnob robob yubicob gente?
Chen caj u cꞌʌꞌotob yet manacob yejer Jesús rajen jacꞌaꞌan u yorob u jach tsꞌurirob u winiquirob judío.
14 Bayiriꞌ xan,
caj u yirob tiꞌ chꞌicaꞌan a mac a jaw u yoqueꞌ tu yʌnob rajen mʌꞌ yerob bic tabar u nuquicob.
15 Jeroj caj u jamach jocꞌsajob Pedro yejer Juan ich tancab soc u tsicbarob ich u wʌcꞌʌs jach tsꞌurirob.
16 Caj u tsicbʌjtajob tan yaꞌaricob:
―Bic quic bin ic betex tiꞌ a ray xiboꞌ a tiꞌ yʌn ich tancaboꞌ?
Mʌꞌ ja wirej,
caj u yubob ij quet winiquir judío u jumintaꞌ u jawʌr a mech u yoqueꞌ rajen yerob tu cotor mac ich u cajar Jerusalén.
Mʌꞌ bic tabar ij cariquex:
“Mʌꞌ tajiꞌ” wa quij cariquex mʌꞌ carem u beyaj aroꞌ.
17 Soc mʌꞌ u manob u tsecꞌticob Pedro yejer Juan,
caꞌ ic jacꞌsex u yorob soc u pꞌʌticob u tsecꞌticob u tꞌʌn tiꞌ Jesús ―baxuc caj u yaꞌarajob u jach tsꞌurirob u winiquirob judío.
18 U jach tsꞌurirob u winiquirob judío caj u wʌcꞌʌs pʌyajob Pedro yejer Juan ich tu yʌn a jach tsꞌurirob u winiquirob judío.
Jeroj acsaꞌb Pedro yejer Juan tu yʌnob.
Jeroj tuneꞌ,
caj qꞌueyaꞌb Pedro yejer Juan ten u jach tsꞌurirob cu yaꞌaricob wa mʌꞌ u yʌn camsicob tiꞌ Jesús mʌꞌ u yʌn tsecꞌticob tiꞌ xan.
19 Pedro caj u nuncaj tiꞌob,
tan yaꞌaric:
―Tucrex wa baꞌ tsoy tu tꞌʌn Cꞌuj,
wa quin chen uꞌyicob a tꞌʌnex,
wa yʌn in wuꞌyicob a baꞌ cu yaꞌaric Cꞌuj?
20 Tin tꞌʌn,
mʌꞌ in wuꞌyicob a tꞌʌnex,
yʌn in wuꞌyicob a baꞌ cu yaꞌaric Cꞌuj.
Yʌn in man in waꞌaricob a baꞌ caj in wirajob yejer a baꞌ caj in wuꞌyajob ―baxuc tu yaꞌaraj Pedro tiꞌ u jach tsꞌurirob.
21 Jeroj tuneꞌ,
chich tꞌʌn Pedro yejer Juan ten u jach tsꞌurirob u winiquirob judío,
caj tsꞌoquij caj chaꞌb u binob ten u jach tsꞌurirob.
Mʌꞌ ja wirej,
u jach tsꞌurirob mʌꞌ yerob bic cu bin u beticob tiꞌob quireꞌ cu sʌjtaꞌr u yet winiquirob judío quireꞌ robob cu jach tꞌʌnicob Cꞌuj cu yaꞌaricob bic jach carem Cꞌuj,
quireꞌ a baꞌ u ber tiꞌ a mech u yoqueꞌ.
22 Bayiriꞌ xan,
a mac jawsaꞌb tiꞌ a mech yoqueꞌ manij cuarenta yaxqꞌuin.
A mac a yacsmʌnob tu yorob cu tꞌʌnicob Cꞌuj quir u chichquintic u yorob
23 Caj tsꞌoc u chaꞌbʌr Pedro yejer Juan ten u jach tsꞌurirob u winiquirob judío,
caj binob tu yʌn a yacsmʌnob tu yorob u tꞌʌn Cꞌuj.
Caj cꞌuchob caj tsicbanʌjij Pedro a baꞌ araꞌb tiꞌob ten u jach tsꞌurirob u winiquirob judío a nuxiboꞌ,
yejer u jach tsꞌurirob u sacerdote u winiquirob judío.
24 Caj tsꞌoc u yubicob a baꞌ caj u yaꞌaraj Pedro tiꞌob jeroj caj u tꞌʌnajob Cꞌuj.
Pꞌeriꞌob cu tsicbarob yejer Cꞌuj tu cu tꞌʌnicob,
tan yaꞌaricob:
―Jach caremech Cꞌuj ―quij yaꞌaricob―,
cꞌuchaꞌan a wor a betej tu cotor baꞌ.
Tech Cꞌuj caj a betaj ruꞌum,
tech caj a betaj cꞌacꞌnab yejer tu cotor a baꞌ yʌn ich cꞌacꞌnab.
Tech caj a betaj caꞌanan yejer tu cotor a baꞌ tiꞌ yʌn ich caꞌanan.
25 Ic nunquirex David caj u quibaj a baꞌ araꞌb tiꞌ ten u Tajꞌor u Pixam Cꞌuj rajen baxuc a jeraꞌ caj u tsꞌibtaj uch:
An biquinin caj pꞌujob tu cotor u cajar a tu yʌn a mʌꞌ u winiquirob judío?
An biquinin cu tucricob cꞌas a pimoꞌ?
quij David.
26 Mʌꞌ ja wirej,
cu tsꞌiquintaꞌ Cꞌuj ten u jach tsꞌurirob u cajarob.
Bayiriꞌ xan,
cu tsꞌiquintaꞌ Cꞌuj ten a reyoꞌ a cu reyinticob u cajarob.
Cu rʌc muchꞌquinticob u bʌj quir u tsꞌictarob yejer Cꞌuj,
bayiriꞌ yejer a mac a tetaꞌb ten Cꞌuj.
Baxuc caj u tsꞌibtaj David caj tsꞌaꞌb u tucur ten Cꞌuj uch.
27 A mac a tiꞌ toy cu tꞌʌnicob Cꞌuj caj u yaꞌarajob tiꞌ Cꞌuj:
―Jach jaj Cꞌuj,
toc nupꞌ a tꞌʌn tech bajeꞌrer,
quireꞌ ich a jeꞌ cajaraꞌ,
u cajar Jerusalénaꞌ,
cu muchꞌquintob u bʌj.
Mʌꞌ ja wirej,
cu muchꞌquintob u bʌj Pilato yejer u rey a Herodes yejer a mac a mʌꞌ u winiquirob judío,
cax yejer u winiquirob judío quireꞌ u pꞌec yiricob Jesús.
Tan u tsꞌiquintaꞌr a parar Jesús,
Cꞌuj,
a mac a tech caj a tetaj.
28 Jeroj,
caj tsꞌoc u pꞌacticob caj u quinsajob a parar Cꞌuj an ten bic tech caj a toc araj uch,
quireꞌ baxuc caj a toc tucraj tu chꞌic chunin.
29 Ir a wirej Cꞌuj,
―quij yaꞌaric a yacsmʌnob tu yorob―,
bajeꞌrer robob cu pꞌacticob a tenob a mac a tech caj a tetaj.
Rajen chichquintej in worob a tenoboꞌ Cꞌuj bajeꞌrer,
soc mʌꞌ in chꞌic sajaquirob tiꞌob,
soc in bin in tsecꞌticob a tꞌʌn Cꞌuj.
30 Chuquej tenob a mucꞌ Cꞌuj,
soc cꞌuchaꞌan in worob in jawsicob a mac a yʌn u yajiriroꞌ.
Chuquej tenob a mucꞌ Cꞌuj,
quir in beticob carem beyajob,
soc in wesicob tiꞌob u mucꞌ a parar Jesús,
Cꞌuj.
―baxuc caj u tꞌʌnajob Cꞌuj a yacsmʌnob tu yorob.
31 Jeroj caj tsꞌoc u tsicbarob tiꞌ Cꞌuj,
tu curaꞌanob ich naj caj pecnʌjij u nʌjir,
jeroj tuneꞌ,
caj tar u Tajꞌor u Pixam Cꞌuj tu yʌnob a yacsmʌnob tu yorob,
jeroj caj rucꞌob,
caj binob u tsecꞌticob u tꞌʌn Cꞌuj.
Jach chichij u yorob tu tu tsecꞌtajob u tꞌʌn Cꞌuj.
Raꞌ u baꞌtac tu cotor mac
32 A mac a yacsmʌnob tu yorob u tꞌʌn Cꞌuj caj u pꞌeriquintob u tucurob soc pꞌeriꞌ u yorob.
Rajen mʌnaꞌ mac cu yaricob:
“A tenoꞌ ten yʌninoꞌ.”
Quireꞌ tu cotor mac yʌnin.
33 Mʌꞌ ja wirej,
a mac a tuchiꞌtaꞌb ten Cristo cu man u tsicbʌticob riqꞌuij Cristo.
Jach manan yʌn u mucꞌob tu cu tsicbʌticob tiꞌ Cristo ich mac.
Mʌꞌ ja wirej,
a Cꞌuj jach manan caj u yamtaj tiꞌob.
34 Quireꞌ tʌcʌ yʌn u nocꞌob.
Wa cu yiricob mʌnaꞌ u baꞌtac cu jasʌr tiꞌ.
Baxuc wa mʌnaꞌ u yoꞌochob cu jasʌr tiꞌ.
Wa mʌnaꞌ u nocꞌob cu tsꞌabʌr tiꞌ.
Quireꞌ a mac a yʌnin ruꞌum cu cʌnic quir u jaricob u taqꞌuin,
bayiriꞌ xan,
a mac a yʌnin yatochoꞌ cu canic quir u jaric u taqꞌuin.
35 Tu cu jaricob u taqꞌuinob tiꞌ cu binob u pꞌʌticob u taqꞌuinob ich a mac a tuchtaꞌbob ten Jesús quir u tsecꞌticob u tꞌʌn.
Robob tuneꞌ,
cu rʌc jʌsicob tiꞌ a mac mʌnaꞌ tiꞌeꞌ.
36 A baywoꞌ,
José tiꞌ yʌn tu yʌnob a yacsmʌnob tu yorob u tꞌʌn Cꞌuj.
Rajiꞌ cʌjaꞌan ich u petenin Chipre uch.
Raꞌ pachij u jer u cꞌabaꞌ,
Bernabé u cꞌabaꞌ.
Rajiꞌ pʌchaꞌan ten a mac a tuchiꞌtaꞌb ten Jesús quir u tsecꞌticob u tꞌʌn,
quireꞌ rajiꞌ u cꞌat u yaꞌaric:
Raꞌ cu chichquintic u yor mac.
Raꞌ u yoꞌnen Leví xan,
a Bernabéjoꞌ.
37 Bernabé xan,
caj u canaj u ruꞌum caj tsꞌoc u canic caj tar pꞌʌtbir u taqꞌuin u boꞌorir u ruꞌum ich a mac a tuchiꞌtaꞌb ten Jesús quir u tsecꞌticob u tꞌʌn.