U siꞌpir Ananías yejer u siꞌpir Safira
5
Chen tiꞌ yʌn u jer xib caj tꞌʌnij Ananías.
Yʌn u racꞌ a tꞌʌnij Safira.
Bayiriꞌ xan,
tu canajob u ruꞌum.
Jun xotꞌ caj u canajob,
pꞌeriꞌ u ruꞌumobeꞌ.
2 U racꞌ Ananías u cꞌabaꞌ Safira yer mun tu jaraj caj u canaj u ruꞌumob.
Mʌꞌ ja wirej,
tu mucu chꞌaj jun xotꞌ u taqꞌuin tu tu canajob u ruꞌum,
jeroj tuneꞌ,
Ananías caj bin u pꞌʌtej a jun xotꞌ u taqꞌuinoꞌ ich a mac a tuchiꞌtaꞌb ten Jesús quir u tsecꞌtaꞌr u tꞌʌn.
3 Pedro caj yaꞌaraj tiꞌ Ananías:
―An biquinin caj a wuꞌyaj u tꞌʌn quisin quireꞌ a techoꞌ caj a chen pꞌʌtaj jun xotꞌ a taqꞌuinex ich a tenob?
Jeꞌ wa ju cꞌuchur a wor a tusic tiꞌ u Tajꞌor u Pixam Cꞌuj Ananías.
Mʌꞌ ja wirej,
caj a mucu chꞌaj jun xotꞌ a taqꞌuinex tu caj a canaj a ruꞌumex soc yʌn taqꞌuin tiꞌ a nojnoj bʌjiriꞌex.
4 Mʌꞌ ja wirej,
Ananías quen,
wa mʌꞌ ta cʌnajex a ruꞌumex caꞌch,
toc techex yʌnin,
bayiriꞌ xan,
caj tsꞌoc a caniquex a ruꞌumex toc techex yʌnin a taqꞌuinoꞌ.
An biquinin techex caj a tucrajex a mucu chꞌiquex jun xotꞌ a taqꞌuinoꞌ?
Mʌꞌ ta tusa xibiꞌ an bic ten caj a tusen,
ta tusex Cꞌuj.
5 Caj tsꞌoc u yubic u tꞌʌn Pedro,
Ananías seb caj quimij.
Tu cotor mac a tu yubob bic tabar quimij Ananías caj jaqꞌuij u yorob.
6 Jeroj tuneꞌ,
caj tarob caꞌtur xib,
a mʌꞌ uch xuruc u baqueroꞌ caj ricꞌob quir u pixicob u baquer Ananías.
Jeroj caj cꞌochaꞌb u baquer caj binob u muquejob u baquer.
7 Caj tsꞌoc u man tres hora caj cꞌuchij u racꞌ a Safirajoꞌ,
caj cꞌuchij ich tu yʌnob a yacsmʌnob tu yorob.
Chen mʌꞌ yer wa quimij u mamiꞌ.
8 Caj cꞌataꞌb tiꞌ Safira ten Pedro:
―Arej ten wa baxuc u boꞌorir caj a canaj a ruꞌumex?
Safira caj u nuncaj:
―Jach baxucoꞌ u boꞌorir caj u canaj.
9 Pedro caj u yaꞌaraj tiꞌ:
―An biquinin periꞌ caj a tumtajex u yor u Tajꞌor u Pixam Cꞌuj quir a wiriquex wa sasir u wich?
A ra chꞌicaꞌanob tu jor naj a yʌjcꞌochirob u baquer a mamoꞌ.
Baxuc tech caꞌ bin u cꞌochob a baquer tech xan ―baxuc caj u yaꞌaraj Pedro.
10 Seb caj quimij Safira ʌcʌtan ich Pedro.
Jeroj tuneꞌ,
caj tarob yʌjcꞌochirob u baquer u mam.
Caj irir quimen Safira caj u cꞌochob u baquer caj muquij.
Caꞌrac caj mucob.
11 Caj rʌc jaqꞌuij yorob a yacsmʌnob tu yorob u tꞌʌn Cꞌuj tu muchꞌaꞌanob ich Pedro.
Baxuc a mac yubmʌnob an bic tabar quimob Ananías yejer Safira,
jaqꞌuij u yorob xan.
U carem beyajob a mac a tuchiꞌtꞌb ten Jesús quir u tsecꞌticob u tꞌʌn
12 A mac tuchiꞌtaꞌb ten Jesús quir u tsecꞌticob u tꞌʌn caj u yesajob u mucꞌ Cꞌuj yaꞌab,
ich tu cotor mac a tiꞌ yʌn ich u cajar Jerusalén.
Mʌꞌ ja wirej,
robob ich u cajar Jerusalén caj u yirajob a carem beyajob a tu betajob.
A mac a yacsmʌnob tu yorob u tꞌʌn Cꞌuj tu muchꞌquintajob u bʌj tu reꞌaꞌan u jor naj u cꞌabaꞌ Salomón.
13 Cu chen iricob tsoy a yacsmʌnob tu yorob u tꞌʌn Cꞌuj ten a mac cʌjaꞌanob ich u cajar Jerusalén.
Chen cu sʌjticob.
Cu chꞌic sajquirob tiꞌ u yet winiquirob judío ten a mʌꞌ u yacsmʌnob tu yorob tiꞌ u tꞌʌn Cꞌuj.
Mʌꞌ ju binob tu yʌn a yacsmʌnob tu yor u tꞌʌn Cꞌuj.
14 Cax yʌn yaꞌab mac a mʌꞌ yacsmʌnob tu yorob,
a yacsmʌnob tu yorob tan u jach pimtarob cax xib,
cax xquic tan u rʌc pimtarob.
15 Tu cu man Pedro tiꞌ cu tar purbir u yajirob soc u jawʌrob.
Cax tiꞌ cu chaquinticob ich u boꞌoy Pedro,
yerob jeꞌ u jawareꞌ.
Cu tarob purbir yejer chꞌac bayiriꞌ xan,
yejer yorxaꞌan cu tarob purbir ich Pedro.
16 Bayiriꞌ xan,
a mac cʌjaꞌanob bʌytʌc tu cajar Jerusalén cu tarob purbir a mac acaꞌan u quisinin tiꞌob.
Cu tarob purbir ich Pedro quir u jocꞌsaꞌr u quisinin.
Baxuc a mac a yajoꞌ,
cu tarob purbir ich Pedro caꞌ jawʌcob u yajirob.
Pedro caj u rʌc jawsaj u yajirob.
Chuc Pedro yejer Juan
17 Mʌꞌ ja wirej,
jach choquij yorob u sacerdote u winiquirob judío yejer u nupob u winiquirob a saduceojoꞌ,
quireꞌ cu yiricob a mac tuchiꞌtaꞌb ten Jesús quir u tsecꞌtaꞌr u tꞌʌn,
a baꞌ tsoyir cu beticob.
18 Rajen tuchiꞌtaꞌb policía ten u jach tsꞌurirob,
caꞌ u chuquejob a mac a tuchiꞌtaꞌb ten Jesús quir u tsecꞌtaꞌr u tꞌʌn.
Caj tsꞌoc u chuquicob caj binob u purob tu cuch tu cu naj mʌquicob mac.
19 Chen acꞌbir,
caj tarij yʌjmasir u tꞌʌn Cꞌuj tu mʌcaꞌanob a mac tuchiꞌtaꞌb ten Jesús quir u tsecꞌtaꞌr u tꞌʌn.
Rajiꞌ caj u qꞌueꞌaj u jor tu mʌcaꞌanob,
caj jocꞌsaꞌob.
Acꞌbir caj jocꞌsaꞌbob,
jeroj tuneꞌ,
rajiꞌ caj u yaꞌaraj tiꞌob:
20 ―Joqꞌuenex,
caꞌ xiquechex,
arex yubob ich carem naj tu cu naj cꞌujinticob Cꞌuj u winiquirob judío.
Toc arej tiꞌob u tꞌʌn Cꞌuj,
soc yerob bic tabar u cuxtarob mac munt qꞌuin,
caꞌ jawʌc u siꞌpirob.
21 Barej caj tsꞌoc u yubicob a baꞌ araꞌb tiꞌob ten yʌjmasir u tꞌʌn Cꞌuj,
a mac mʌcaꞌanob caꞌch caj binob tu carem naj tu cu naj cꞌujinticob Cꞌuj u winiquirob judío.
Jeroj tuneꞌ,
caj ocob u camsicob u tꞌʌn Cꞌuj.
Tabar u sastar caj cꞌuchob.
Jeroj tuneꞌ,
u jach tsꞌurir sacerdote caj cꞌuchij yejer a mac u yet binacob,
robob caj u pʌyob caꞌ tac u muchꞌquinticob u bʌj tu cotor u jach tsꞌurirob u winiquirob judío,
quet yejer u jach tsꞌurirob u winiquirob judío a cu yaꞌaric,
a nuxiboꞌ.
Barej caj rʌc cꞌuchob tu cotor u jach tsꞌurirob,
jeroj tuneꞌ,
caj tuchiꞌtaꞌb pʌybir tu mʌcaꞌanob a mac a tuchiꞌtaꞌb ten Jesús quir u tsecꞌtaꞌr u tꞌʌn.
22 Chen caj cꞌuchob a policíajoꞌ tu mʌcaꞌanob caꞌch,
a mac a tuchiꞌtaꞌb ten Jesús quir u tsecꞌtaꞌr u tꞌʌn,
caj u yirob mʌnaꞌ.
A policíajoꞌ,
caj wʌcꞌʌs urob ich u jach tsꞌurirob u winiquirob judío.
23 Caj u yaꞌarajob:
―Mʌnaꞌ,
quiꞌ toy cꞌʌraꞌan u jor,
bayiriꞌ xan,
tiꞌ yʌnob yʌjcʌnʌnyʌjirob tu mʌcaꞌanob caꞌch.
Caj in qꞌueꞌajob,
mʌnaꞌ tu cuch,
chen naj ―baxuc tu yaꞌaraj a policíajoꞌ tiꞌ u jach tsꞌurirob.
24 Caj yubob u jach tsꞌurirob u sacerdote u winiquirob judío yejer u capitán a policíajoꞌ,
jaqꞌuij yorob.
Mʌꞌ ja wirej,
robob mʌꞌ yerob bic tabar caj jocꞌob,
quireꞌ quiꞌ cꞌʌraꞌan u jor tu mʌcaꞌan a mac tuchiꞌtaꞌb ten Jesús quir u tsecꞌtaꞌr u tꞌʌn.
25 Raꞌiriꞌ u qꞌuinin caj tarij mac caj u yaꞌaraj tiꞌob:
―A caj a mʌcajex joꞌoraj tiꞌ yʌnob ich carem naj tu quic naj cꞌujinticob Cꞌuj.
Tiꞌ chꞌicaꞌanob,
cu camsicob u yet winiquirob judío.
26 Caj tsꞌoc u rʌc uꞌyicob yaꞌaraj,
caj binob pʌybirob ten u capitánoꞌ policía yejer u racꞌob u yet policía.
Caj binob u pʌyej a mac a tuchiꞌtaꞌb ten Jesús quir u tsecꞌtaꞌr u tꞌʌn.
Caj cꞌuchob tu yʌnob a mac a tuchiꞌtaꞌb ten Jesús quir u tsecꞌtaꞌr u tꞌʌn,
caj u quiꞌ pʌyajob,
quireꞌ wa mʌꞌ ju quiꞌ pʌyob,
cu chꞌic sajquirob u chꞌininob u joꞌr ten u yet winiquirob judío,
a tiꞌ muchꞌaꞌanob ich a mac a tuchiꞌtaꞌb ten Jesús quir u tsecꞌtaꞌr u tꞌʌn.
27 Jeroj caj tarob purbir ich u jach tsꞌurirob sacerdote u winiquirob judío yejer u yet tsꞌurirob u winiquirob judío,
tsꞌar u pachob u chꞌictarob ich ʌcʌtan u jach tsꞌurirob u winiquirob judío.
Chen a mac u jach tsꞌurir u sacerdote u winiquirob judío,
caj u cꞌataj tiꞌob tan yaꞌaric:
28 ―Mʌꞌ wa caj in waꞌarob techex,
mʌꞌ a yʌn camsiquex u tꞌʌn Jesús?
Chen mʌꞌ ja quibex in tꞌʌnob.
Raꞌ a mac cʌjaꞌan ich u cajar Jerusalén caj u yubob baꞌ caj a camsajex.
Mʌꞌ jariꞌ,
ca pʌqꞌuiquex in pachob an ten bic caj in quinsob tiꞌ.
29 Pedro caj u nuncaj tiꞌ u jach tsꞌurir u sacerdote u winiquirob judío.
Bayiriꞌ a ju yet tuchiꞌtacob ten Jesús quir u tsecꞌtaꞌr u tꞌʌn,
caj u nuncajob u tꞌʌn xan,
caj u yaꞌarajob:
―Yʌn uꞌyibir a baꞌ cu yaꞌaric Cꞌuj caꞌ in quibejob,
cax mʌꞌ in wuꞌyicob u tꞌʌn mac,
a baꞌ cu yaqueꞌ.
30 A techexoꞌ,
caj a quinsajex Jesús caj a waꞌarajex caꞌ sinic ich cruz,
chen ij Cꞌujirex raꞌ u Cꞌujir ic nunquirex caj u ricꞌsaj Jesús tiꞌ u quimirir.
31 A Jesúsoꞌ,
caj payij caꞌanan ich u noj Cꞌuj quir u tsꞌurintic tu cotor mac,
bayiriꞌ xan,
quir u taquic tu cotor mac.
Mʌꞌ ja wirej,
a Cꞌujoꞌ u cꞌat u yiric u cꞌaxicob u yorob soc u pꞌʌticob u cꞌasirob tu cotor u winiquirob israel,
quir u jawsic u siꞌpirob.
32 A jeꞌ quin waꞌaricob techex,
taj quireꞌ caj tsꞌoc u riqꞌuir ich u quimirir caj in wirajob tin wich,
bayiriꞌ xan,
u Tajꞌor u Pixam Cꞌuj yer a baꞌ quin tsicbʌticob techex jach taj.
Mʌꞌ ja wirej,
jariꞌ tsꞌaꞌb u Tajꞌor u Pixam Cꞌuj tiꞌ a mac a cu quibicob u tꞌʌn ―baxuc caj u nuncajob a mac a tuchiꞌtaꞌb ten Jesús quir u tsecꞌtaꞌr u tꞌʌn.
33 Caj yubob yaꞌaraꞌr ten a mac a tuchiꞌtaꞌb ten Jesús quir u tsecꞌtaꞌr u tꞌʌn,
jeroj u jach tsꞌurirob,
u winiquirob judío jach pꞌujob yorob rajen u jach tsꞌurirob u jach cꞌat u quinsicob a mac a tuchiꞌtaꞌb ten Jesús quir u tsecꞌtaꞌr u tꞌʌn.
34 Chen tuririꞌ a tiꞌ yʌniꞌ ich u jach tsꞌurirob u winiquirob judío,
a mac a fariseojoꞌ,
Gamaliel u cꞌabaꞌ,
rajiꞌ xan,
yʌjcamsʌyʌjir u tꞌʌn Moisés.
Tsoy yiricob Gamaliel tu cotor mac.
Caj riqꞌuij chꞌictar Gamaliel quir u tsicbar yejer u yet tsꞌurirob u winiquirob judío.
Chen caj u yʌn araj caꞌ jocꞌsacob ich tancab a mac a tuchiꞌtaꞌb ten Jesús quir u tsecꞌtaꞌr u tꞌʌn.
Jamach jocꞌsaꞌb tu muchꞌaꞌanob u jach tsꞌurirob u winiquirob judío.
35 Caj jocꞌsaꞌb,
jeroj caj u tꞌʌnaj u yet jach tsꞌurirob u winiquirob judío Gamaliel,
caj u yaꞌaraj tiꞌob:
―In wet jach tsꞌurirobex u winiquirob judío,
a techexoꞌ,
u xibirechob Israel quiꞌ quiꞌ cʌnantej a bʌjex tiꞌ a jeꞌ xiboꞌ a ca pʌqꞌuiquex u pachob,
a mac a tiꞌ yʌn ich tancab bajeꞌrer.
36 Mʌꞌ wa cꞌaj techex a ray u qꞌuininoꞌ caj tsꞌiquij Teudas,
quireꞌ u jach tsꞌurir u cajar.
Cꞌaj wa techex a baꞌ caj u yaꞌaraj Teudas?
Mʌꞌ wa caj u yaꞌaraj:
“A tenoꞌ u jach tsꞌuriren tu cotor mac.”
Yʌn mac tu quibajob u tꞌʌn,
rajen caj sayob tu pach Teudas.
Yʌn cuatrocientos xib caj sayob tu pach Teudas ucheꞌ.
Chen caj quinsaꞌb Teudas jeroj a mac a sayob tu pach ucheꞌ caj rʌc binob tu yatochob.
A baywoꞌ tsꞌoc u binob.
37 Caj u wʌcꞌʌs araj Gamaliel tiꞌ u yet tsꞌurirob u winiquirob judío,
tan yaꞌaric:
―Mʌꞌ wa ja cꞌʌꞌotex u qꞌuinin caj ic tsꞌibtajex ij cꞌabaꞌex quet yejer tu cotor mac soc yerob mun u piminoꞌonex?
Jeroj tuneꞌ,
caj tsꞌiquij a mac u cꞌabaꞌ Judas yejer u jach tsꞌurirob tu cajar.
A Judasoꞌ raꞌ cʌjaꞌan ich u ruꞌumin Galilea.
Raꞌiriꞌ xan,
caj u pʌyaj caꞌ xicob tu pach a pimoꞌ.
Jeroj caj quimij Judas xan.
A mac a cu sayʌrob tu pach ucheꞌ caj binob ich yatochob.
38 Rajen quin waꞌaric techex ―quij Gamaliel―.
Yʌn tsireꞌej,
pꞌʌtej tu junanob.
Jeꞌ u tsꞌocareꞌ ―quij―,
wa chen yejer u mucꞌ xib cu camsicob.
39 Chen wa cu tar ich Cꞌuj a baꞌ cu camsicobeꞌ.
Mʌꞌ u cꞌuchur a worex a suꞌsiquex a baꞌ cu camsicobeꞌ.
Mʌꞌ ja wirej,
jeꞌ a tsꞌiquintiquex Cꞌuj ―baxuc caj yaꞌaraj Gamaliel tiꞌ u yet tsꞌurirob u winiquirob judío.
40 U jach tsꞌurirob u winiquirob judío caj u quibajob a baꞌ caj u yubob yaꞌaraꞌ tiꞌob ten Gamaliel.
Jeroj,
tu caꞌ acsajob a mac tuchiꞌtaꞌb ten Jesús quir u tsecꞌtaꞌr u tꞌʌn ich tu yʌn u jach tsꞌurirob u winiquirob judío.
Robob caj u cꞌam tꞌʌnajob tiꞌob,
caj tsꞌoc u jʌtsꞌicob u pachob,
caj yaꞌarob tiꞌ a mac a tuchiꞌtaꞌb ten Jesús quir u tsecꞌtaꞌr u tꞌʌn:
―Mʌꞌ a yʌn manex a camsiquex u tꞌʌn Jesús,
mʌꞌ biqꞌuin ca camsiquex u tꞌʌn.
Jeroj tuneꞌ.
Caj chaꞌbob caꞌ xicob a mac a tuchiꞌtaꞌb ten Jesús quir u tsecꞌtaꞌr u tꞌʌn.
41 Robob caj jocꞌob tiꞌ u jach tsꞌurirob u winiquirob judío jach manan quiꞌ yorob a mac a tuchiꞌtaꞌb ten Jesús quir u tsecꞌtaꞌr u tꞌʌn.
Mʌꞌ ja wirej,
quiꞌ yorob quireꞌ Cꞌuj caj u chaꞌj u mucꞌyajob quireꞌ caj u yacsajob tu yorob u tꞌʌn Jesús.
42 Jeroj tuneꞌ,
a mac a tuchiꞌtaꞌb ten Jesús quir u tsecꞌtaꞌr u tꞌʌn mʌꞌ ju pꞌʌtob u camsicob u tꞌʌn Jesús,
mʌꞌ ju pꞌʌtob u tsecꞌticob wa Jesús rajiꞌ a Mesíasoꞌ,
cax ich carem naj tu cu naj cꞌujinticob Cꞌuj u winiquirob judío,
cax ich yatoch mac.