―Iric,

mʌꞌ tsoy a jʌsiquex,

quireꞌ coy a jʌsiquex yoꞌoch tiꞌ a xquicoꞌ a quimenob u mameꞌ,

a mac a cu tꞌʌnob griego,

quireꞌ rajraꞌ coy a jʌsiquex yoꞌoch.

2 Rajen a mac a tetaꞌb ten Jesús quir u tsecꞌtaꞌr u tꞌʌn,

caj u tꞌʌnajob u yet acsaꞌorirob quir u muchꞌquinticob u bʌj ich a doce xib a tetaꞌb ten Jesús quir u tsecꞌtaꞌr u tꞌʌn.

Robob caj u yaꞌarajob tiꞌ u yet acsaꞌorirob:

―Mʌꞌ tsoy in chen pꞌʌticob in tsecꞌticob u tꞌʌn Cꞌuj soc tsoy in jʌsicob a baꞌ u cꞌat a xquicoꞌ a quimenob u mameꞌ.

3 Rajen in wet acsaꞌorirex caꞌ ic tetejex ich ij quet acsaꞌorirex siete xib a mac tsoy ta tꞌʌnex,

a raꞌ cu tsꞌurinticob u Tajꞌor u Pixam Cꞌuj,

a ju jach erob baꞌ.

A ray xibob,

jeꞌ ic tetiquex soc robob cu jasʌrob a baꞌ u cꞌat tiꞌ a xquicoꞌ a quimenob u mameꞌ.

4 Chen a tenob,

a mac a tetaꞌb ten Cꞌuj quir in tsecꞌticob u tꞌʌn,

chen rajraꞌ quin tsecꞌticob u tꞌʌn Cꞌuj quet rajraꞌ quin tꞌʌnicob Cꞌuj quireꞌ raꞌ in beyajob ―baxuc caj u yaꞌaraj ij cʌjtuchiyʌjir Jesús.

5 Caj quiꞌjij yorob a ju yet acsʌꞌorirob caj tsꞌoc u yubicob a baꞌ araꞌb tiꞌob ten a xiboꞌ a tetaꞌb ten Jesús quir u tsecꞌtaꞌr u tꞌʌn,

rajen pꞌeriꞌob caj u tetajob Esteban,

quireꞌ taj caj u yacsaj tu yor u tꞌʌn Jesús,

bayiriꞌ xan,

quireꞌ u Tajꞌor u Pixam Cꞌuj cu jach tsꞌurintic Esteban.

Caj tetaꞌb xan,

Felipe.

Caj tetaꞌb Prócoro.

Caj tetaꞌb Nicanor.

Caj tetaꞌb Timón.

Caj tetaꞌb Parmenas.

Caj tetaꞌb Nicolás a raꞌ cu tar ich u cajar Antioquía.

Mʌꞌ ja wirej,

rajiꞌ a uchoꞌ,

caj u cꞌujintaj Cꞌuj an ten bic u winiquirob judío,

chen a bajeꞌreroꞌ caj u yacsaj tu yor u tꞌʌn Jesús.

6 Jeroj caj tsꞌoc u teticob a siete xiboꞌ,

a cu bin u yamticob u beyaj a mac a tetaꞌb ten Jesús quir u tsecꞌtaꞌr u tꞌʌn,

caj pʌyob ich ʌcʌtan a ray doce xiboꞌ.

Jeroj caj tsicbanjʌjob Cꞌuj a mac a tetaꞌb ten Cꞌuj quir u tsecꞌtaꞌr u tꞌʌn,

u yʌjyaminob u beyaj.

Caj tsꞌoc u tꞌʌnicob Cꞌuj caj u tsꞌancꞌʌbtajob tiꞌob,

a tetaꞌanobeꞌ,

quir u cꞌʌmicob u beyajob a tetaꞌaneꞌ.

7 A baywoꞌ,

yaꞌab mac caj u yʌnxchun u cꞌʌmicob u tꞌʌn Cꞌuj.

Mʌꞌ ja wirej,

cu jach pimtarob a yacsmʌnob tu yorob ich u cajar Jerusalén.

Cax yaꞌab u sacerdote u winiquirob judío tu cu naj cꞌujinticob Cꞌuj u winiquirob judío caj u cꞌʌmajob u tꞌʌn Cꞌuj,

caj sayob tu pach Jesús.

8 Mʌꞌ ja wirej,

a Estebanoꞌ quireꞌ tan u yamtaꞌ ten Cꞌuj,

rajen jach chich u mucꞌ.

Jeroj tuneꞌ,

caj u yesaj yaꞌab u carem beyajob,

cax a baꞌ cu jacꞌsic yorob mac xan.

Baxuc caj esaꞌb ten Esteban tiꞌ u yet winiquirob judío soc yeticob tiꞌ yʌn Cꞌuj yejer Esteban.

9 Chen a ray u qꞌuininoꞌ,

tiꞌ yʌn mac a cu tarob tiꞌ u chan najir tu cu naj cꞌujinticob Cꞌuj u winiquirob judío.

A ju chan najir tu cu naj cꞌujinticob Cꞌujoꞌ,

a rayoꞌ,

pʌchaꞌan u cꞌabaꞌ ten mac uch:

“A cꞌurewoꞌ.”

Mʌꞌ ja wirej,

tiꞌ cu tarob u cꞌurewob mac a uchoꞌ,

chen bajeꞌrer toc chaꞌb u binob.

Ich a ray xiboꞌ tar u tarob ich u cajar Cirene.

Tiꞌ cu tarob ich u cajar Alejandría.

Tiꞌ cu tarob ich u cajar Cilicia.

Bayiriꞌ xan,

tiꞌ cu tarob jun yar ich u ruꞌumin Asia.

Robob caj rʌc binob tu yʌn Esteban quir u nuncaꞌrob u tꞌʌn Esteban.

10 Jeꞌ wa ju cꞌuchur yorob u nuncbir u tꞌʌn Esteban ten a ray xiboꞌ?

Mʌꞌ cꞌuchaꞌan yorob u nuncaꞌrob u tꞌʌn Esteban,

quireꞌ u neꞌer baꞌ,

quireꞌ tan u yamtaꞌr u nuncaꞌr u tꞌʌn Esteban ten u Tajꞌor u Pixam Cꞌuj.

11 Quireꞌ caj u yirajob mʌꞌ cꞌuchaꞌan yorob tiꞌ Esteban,

a ray xiboꞌ caj u mucu boꞌtajob a cu nuncaꞌrob u tꞌʌn Estebaneꞌ.

Caj boꞌotaꞌbob mac soc u tus pacꞌʌr u pach Esteban.

Caj u tusarajob:

―Mʌꞌ ja wirej ―quij―,

tij cuꞌyajex tan u pꞌastic Moisés,

Esteban.

Bayiriꞌ xan,

tij cuꞌyajex tan u pꞌastic Cꞌuj.

12 Baxuc a jeraꞌ a mac a cu nuncaꞌob u tꞌʌn Esteban caꞌch,

caj u pꞌusajob u yorob a nuxiboꞌ a mac u tsꞌurirob u cajar.

Baxuc xan,

caj u pꞌusajob u yorob a yʌjcamsʌjʌjirob u tꞌʌn Moisés,

quet bayiriꞌ caj u pꞌusajob u yorob a pimoꞌ soc u tarob chucbir Esteban quir u pʌyic ich tu muchꞌaꞌanob u jach tsꞌurirob u winiquirob judío.

13 A mac a boꞌotaꞌb ten a mac a cu nuncaꞌob u tꞌʌn Esteban caꞌch,

robob cu pacꞌarob u pach Esteban ich ʌcʌtan u jach tsꞌurirob u winiquirob judío.

Caj yaꞌarajob tiꞌob:

―A jeꞌ Estebanaꞌ,

mʌꞌ u xur u pꞌastic u tꞌʌn Cꞌuj a tu yaꞌaraj Moisés ucheꞌ.

Mʌꞌ ju xur u pꞌastic a jeꞌ carem najaꞌ.

14 Tij cuꞌyajex yaꞌaric,

Jesús,

a cu tar ich u cajar Nazareteꞌ,

jeꞌ u rʌc jubsic a jeꞌ carem najaꞌ.

Bayiriꞌ,

tij cuꞌyajex yaꞌaric bin u rʌc tsꞌocsej Jesús u tꞌʌn Moisés yejer a baꞌ nanij tic rʌc betajex ―baxuc caj u yaꞌaraj a mac a tan u pʌqꞌuicob u pach Esteban.

15 Tiꞌ curaꞌanob u jach tsꞌurirob u winiquirob judío caj u pʌctajob u tsꞌurirob u winiquirob judío.

Cu pʌcticob Esteban.

Robob caj u yirob u sasir u wich Esteban irej sasir u wich yʌjmasirob u tꞌʌn Cꞌuj.