Tu nunca Esteban tiꞌob
7
Caj cꞌataꞌb tiꞌ Esteban ten u jach tsꞌurir sacerdote u winiquirob judío:
―Jach taj wa tu pʌqꞌuicob a pach?
―quij.
2 Esteban caj u nuncaj tiꞌ caj u yaꞌaraj:
―Uꞌyex a baꞌ quin wac techex in jach tsꞌurirechex ij quet winiquirob judío,
bayririꞌ xan,
uꞌyex in wet winiquirob judío.
U Cꞌujir,
a mac jach manan chichir u muqꞌueꞌ,
caj u tꞌʌnaj ic nunquirex Abraham uch,
wa ber tiꞌ toy yʌn uch ich u ruꞌumin Mesopotamia,
cax mʌꞌ toy xic cʌjtariꞌ ich u cajar Harán.
3 Mʌꞌ ja wirej,
a Cꞌujoꞌ caj u yaꞌaraj tiꞌ ic nunquirex Abraham uch:
“Toc pꞌʌt a bʌjob ―quij Cꞌuj.
Toc pꞌʌt a cajar caꞌ xiquech tu quin pʌyic a ber.
Tiꞌ ca bin cʌjtar.”
Baxuc caj araꞌb ten Cꞌuj tiꞌ ic nunquirex Abraham ―quij Esteban.
4 Ic nunquirex Abraham caj joqꞌuij caj u pꞌʌtaj tu cʌjaꞌanob u winiquirob Caldea.
Jeroj tuneꞌ,
bin u cʌjtar ich u cajar Harán.
Caj quimij u tet Abraham,
caj pʌyij ten Cꞌuj,
caj u pꞌʌtaj u cajar Harán,
caj bin cajʌr ich u cajar tu cʌjoꞌonex bajeꞌrer.
5 Chen a Cꞌujoꞌ mʌꞌ ju tsꞌajaj a jeꞌ ruꞌumaꞌ tiꞌ ic nunquirex,
mʌꞌ tsꞌaꞌb tiꞌ chichin ruꞌumiꞌ.
Taj toc araꞌb tiꞌ ten Cꞌuj:
“Jeꞌ in tsꞌic tech a jeꞌ ruꞌumaꞌ soc u cajʌrob u parar a pararob.”
Mʌꞌ wa cꞌaj techex,
mʌnaꞌ u pararob ic nunquirex Abraham caj toc araꞌb tiꞌ ten Cꞌuj aroꞌ ―quij.
6 A Estebanoꞌ,
tiꞌ toy cu tsicbar ich u jach tsꞌurirob u winiquirob judío:
―Mʌꞌ jarariꞌoꞌ,
quij yaꞌaric Cꞌuj tiꞌ ic nunquirex Abraham uch.
Caj u toc araj Cꞌuj wa jeꞌ u binob u parar u pararob ich u jer ruꞌum.
Tiriꞌ cu bin cꞌʌnbir beyajob u parar u pararob Abraham.
Tiriꞌ cu bin jʌtsꞌbir soc u beyajob xan hasta caꞌ bin manʌc cuatrocientos yaxqꞌuin.
7 Chen a Cꞌujoꞌ caj u toc araj tiꞌ ic nunquirex Abraham:
“Jeꞌ in tsꞌic u siꞌpirob,
quij Cꞌuj,
tiꞌ a mac a cu cꞌʌnicob tu beyajob u parar a pararob.
Mʌꞌ ja wirej,
quij Cꞌuj,
a mac a tu jʌtsꞌajob u pachob u parar a pararob soc u beyajob,
jeꞌ in tsꞌic u siꞌpirobeꞌ.
Caꞌ bin tsꞌocac aroꞌ,
quij Cꞌuj,
quin bin in pʌyic u parar a pararob quir u cꞌujintiquenob a tenoꞌ a teraꞌ.”
8 Rajen Cꞌuj,
soc quet u yor yejer ic nunquirex Abraham caj u tsꞌajaj u tꞌʌn tiꞌ,
rajen ic nunquirex Abraham soc u yesaꞌr quet u yor yejer a baꞌ araꞌb tiꞌ ten Cꞌuj,
jeroj u yʌnxchun u tsꞌiric u chan parar a xiboꞌ,
caj tsꞌoc u man tuririꞌ semana.
Rajen caj rochaꞌb ten u nʌꞌ Isaac caj u chꞌuctaj tuririꞌ semana,
jeroj tuneꞌ,
caj tsꞌiraꞌb Isaac ten u tet Abraham.
Caj cꞌuchij tu qꞌuinin caj pararnʌjij u racꞌ Isaac,
bayiriꞌ caj u chꞌuctaj tuririꞌ semana caj tsꞌiraꞌb u parar ten u tet.
Jacob u parar.
Baxuc caj pararnʌjij u racꞌob,
Jacob caj tsꞌiraꞌb u parar.
Mʌꞌ ja wirej,
a doce u pararob Jacob raꞌ u yoꞌnenob ic nunquirob uch.
9 Caj u yaꞌaraj Esteban tiꞌ u jach tsꞌurir u winiquirob judío:
―A doce u pararob Jacob,
raꞌ u yoꞌnenob ic nunquirob uch.
Chen tiꞌ yʌn ich a docejoꞌ a mac pʌchꞌaꞌan u cꞌabaꞌ José.
Jeroj caj con José ten u sucuꞌunob quireꞌ choc yorob tiꞌ u yitsꞌinoꞌ.
Caj conij tiꞌ a mac a cu binob ich u ruꞌumin Egipto.
Chen Cꞌuj tiꞌ yʌn yejer ic nunquirex José.
10 Mʌꞌ ja wirej,
Cꞌuj caj u tsꞌaj u tꞌʌnin tiꞌ rey,
a Faraónoꞌ.
Rajen caj u jocꞌsaj José quireꞌ yirir jach tꞌoj a Joséjoꞌ.
Rajen tsꞌaꞌb u tꞌʌnin ten Faraón quir u yocar u tsꞌurintic u ruꞌumin Egipto.
Cax a mac a tiꞌ yʌnob ich yatoch Faraón.
11 Jeroj tuneꞌ,
caj cꞌuchij tu qꞌuinin mʌꞌ ju chꞌijir u yoꞌochob ich u ruꞌumin Egipto,
quireꞌ mʌnaꞌ jaꞌ.
Mʌꞌ ju chꞌijir ich u ruꞌumin Canaán.
Caj u masajob wiꞌij,
quireꞌ mʌꞌ ju chꞌijir yoꞌoch ic nunquirex.
12 Jeroj caj u yubaj Jacob tiꞌ yʌn yoꞌoch ich u ruꞌumin Egipto,
rajen caj u yʌn chꞌic tuchiꞌtaj u mʌnejob yoꞌoch ic nunquirex uch,
robob ic nunquirex u pararob Jacob.
13 Caj wʌcꞌʌs binob ic nunquirex ich u ruꞌumin Egipto,
jeroj,
caj u tꞌʌnaj u sucuꞌunob soc u cꞌʌꞌotaꞌ ten u sucuꞌunob,
a ray u qꞌuininoꞌ,
caj cꞌʌꞌotaꞌb José ten u sucuꞌunob,
caj tsꞌoc u tꞌʌnʌnob.
Bayiriꞌ xan,
caj cꞌʌꞌotaꞌb José ten a rey Faraón tu cu tar u yoꞌnen José.
14 Jeroj tuneꞌ,
José,
caj u tuchiꞌtaj u sucuꞌunob pʌybir u tet Jacob.
Caj pay u tet yejer tu cotor u bʌjob.
Rajen caj rucꞌob ich u ruꞌumin tu yʌnoꞌonex ―quij Esteban―,
caj rʌc binob ich u ruꞌumin Egipto tu yʌn José,
caj cꞌuchob ich José tiꞌ yʌn setenta y cinco u bʌjob José.
15 A baywoꞌ,
caj cꞌuchij u tet José ich u ruꞌumin Egipto.
Jacob u tet José.
Jeroj tiriꞌ quim Jacob yejer tu cotor ic nunquirex ich u ruꞌumin Egipto.
16 Caj manij yaꞌab yaxqꞌuin,
caj cuchob purbir u baquer Jacob yejer u baquerob ic nunquirex ich u japnin tunich.
A jeꞌ u japnin tunichoꞌ u toc mʌnmʌn ic nunquirex Abraham uch ich u ruꞌumin Siquem.
Mʌꞌ ja wirej,
rajiꞌ caj u mʌnaj u ruꞌumin tu yʌn u japnin tunich tiꞌ u parar Hamor yejer u bʌjiriꞌ u taqꞌuin.
17 Tiꞌ toy cu tsicbar Esteban ich u jach tsꞌurirob u winiquirob judío.
Rajiꞌ caj u yaꞌaraj tiꞌob:
―Jeroj,
jach tabar u cꞌuchur tu qꞌuinin a baxuc caj toc araꞌb ten Cꞌuj tiꞌ ic nunquirex Abraham uch,
jach pimij u pararob ic nunquirex ich u ruꞌumin Egipto uch.
Mʌꞌ ja wirej,
Cꞌuj yʌn u tsꞌic u ruꞌumin an ten bic caj u toc araj.
18 Jeroj tuneꞌ,
caj oc u jer rey quir u reyinticob u ruꞌumin Egipto.
Rajiꞌ mʌꞌ iraꞌan José,
mʌꞌ cꞌʌꞌotaꞌan ten reyiꞌ José.
19 A jeꞌ reyoꞌ,
caj u tsꞌʌraj u pach ic nunquirex tan u jatsꞌʌrob soc u beyajob.
Mʌꞌ ja wirej,
rajiꞌ caj u yaꞌaraj caꞌ jocꞌacob u chan och a xiboꞌ ic nunquirex soc u quinsaꞌ.
20 Raꞌiriꞌ u qꞌuininoꞌ a ray reyoꞌ,
tan u reyinticob u ruꞌumin Egipto,
baxuc raꞌiriꞌ u qꞌuinin caj rochaꞌb Moisés ten u nʌꞌ.
A chan Moisésoꞌ jach tsoy tu wich Cꞌuj.
Caj tsemtaꞌb ten u nʌꞌ ich yatoch u tet hasta tres ic nʌꞌ.
21 Wa ber caj jocꞌsaꞌb Moisés ten u nʌꞌ ich chiꞌ jaꞌ,
jeroj caj irir ten u parar rey Faraón.
Xquic u parar rey Faraón.
Rajiꞌ u parar Faraón caj u chꞌaj u tsemtej chan Moisés an ten bic u wʌcꞌʌs bʌjiriꞌ u parar.
22 Rajen caj camsaꞌb Moisés tiꞌ tu cotor baꞌ yerob ich u ruꞌumin Egipto.
Jach tꞌoj Moisés tsicbar,
bayiriꞌ tꞌoj a baꞌ cu betic xan.
23 ’Caj cꞌuchij tu qꞌuinin yʌn cuarenta yaxqꞌuin a Moisésoꞌ,
u cꞌat u bin u yiric u yet winiquirob judío,
raꞌ u pararob u nunquir israel.
24 Caj cꞌuchij Moisés,
caj u yiraj tan u jatsꞌʌr ten u winiquir egipto u yet winiquir israel,
rajen Moisés tu yamtaj u yet winiquir israel.
Mʌꞌ ja wirej,
caj u tacaj u racꞌob tiꞌ a winiquir egipto caj u quinsa Moisés u winiquir egipto.
25 Mʌꞌ ja wirej,
caj u tucraj jeꞌ u cꞌʌꞌotaꞌr Moisés ten u yet winiquir israel wa tuchiꞌtaꞌb ten Cꞌuj a Moisésoꞌ.
Chen robob mʌꞌ tu najtajobiꞌ wa tuchiꞌtaꞌb Moisés ten Cꞌuj soc u taquicob tu cu cꞌanan beyajob ten u jach tsꞌurir u beyajob.
26 Wʌcꞌʌs bin Moisés saman ―quij Esteban―,
ich u racꞌob.
Caj cꞌuchij caj u yiraj Moisés tan u tsꞌictarob caꞌtur u racꞌob.
A Moisésoꞌ,
u cꞌat u sisquintic u yorob,
rajen Moisés caj u tꞌʌnob u racꞌob:
“In racꞌob,
quij Moisés,
biquinin ca tsꞌictarex yejer a bʌj?
Mʌꞌ tsoy wa ja tsꞌictarex yejer a bʌj”,
quij.
27 Chen a mac a yʌn u siꞌpir tiꞌ,
caj pꞌujij yor caj u tenchꞌintaj Moisés.
Jeroj caj u yaꞌaraj tiꞌ:
“Mʌꞌ ju tetech Cꞌuj quir in tsꞌuritiquechob.
Mʌꞌ a yʌn aric caꞌ tsoyac in worob.
28 Jeꞌ wa ja quinsiquen an ten bic caj a quinsaj u winiquir egipto joꞌoraj?”
29 Caj yubaj Moisés a baꞌ caj u yaꞌaraj caj jaqꞌuij yor Moisés caj putsꞌij.
Ti bin u cajar ich u jer u cajar ich u ruꞌumin Madián,
tuꞌ mʌnaꞌ mac yeriꞌ.
Tiriꞌ caj u chꞌaj u racꞌ Moisés caj yʌnjijoꞌ u parar.
Caꞌ tur xib u pararob.
30 Tiꞌ toy cu tsicbar Esteban ich u jach tsꞌurirob u winiquirob judío,
jeroj caj u yaꞌaraj tiꞌob:
―Wa ber caj wʌcꞌʌs manij u jer cuarenta yaxqꞌuin,
tiriꞌ yʌn Moisés ich tʌcay ruꞌum baytʌc tu yʌn u pꞌuc witsir u cꞌabaꞌ Sinaí.
Caj u yiraj yerar cꞌacꞌ ich u chan cheꞌer.
A Moisésoꞌ caj bin u yirej yerar cꞌacꞌ ich u chan cheꞌer quireꞌ mʌꞌ ju tupur u cꞌaqꞌuir.
Jeroj seb,
caj u yiraj yʌjmasir u tꞌʌn Cꞌuj tu cu yerar cꞌacꞌ.
31 A baꞌ caj u yirajeꞌ jacꞌ yor Moisés.
Tu cꞌʌs nʌtsꞌaj u bʌj u yirej Moisés caj u yubaj u tꞌʌn Jaj Tsꞌur.
Caj tꞌʌn Moisés ten Jaj Tsꞌur.
32 Moisés caj u yubaj yaꞌaraꞌ:
“A tenoꞌ Cꞌujen.
Tu cꞌujintajen a nunquir Abraham.
Tu cꞌujintajen a nunquir Isaac.
Tu cꞌujintajen a nunquir Jacob.”
Jach jaqꞌuij yor Moisés rajen caj babacnʌjij.
Mʌꞌ u cꞌat u pʌctic biqꞌuiniꞌ.
33 Araꞌb tiꞌ Moisés ten Jaj Tsꞌur:
“Yʌn pit a pech xʌnʌb caꞌ ocaquech teraꞌ tu jach tsoy u ruꞌumin,
quij Cꞌuj,
quireꞌ ten yʌnin u ruꞌumin,
quij Cꞌuj.
34 A tenoꞌ,
quij Cꞌuj,
jach taj caj in wiraj u jatsꞌʌrob tu cu tsꞌarʌr u pachob beyajob.
Caj in wuꞌyaj tu cu cꞌanan tu cu tsꞌaraꞌr u pachob u beyajob ten u winiquirob egipto.
Taren in taquicob,
quij yaꞌaric tiꞌ,
caꞌ xiquech bajeꞌrer ich u ruꞌumin Egipto.”
35 Esteban caj u yaꞌaraj tiꞌ u jach tsꞌurirob u winiquirob judío:
―A jeꞌ Moisésoꞌ,
a mac tenchꞌintaꞌb ten u wʌcꞌʌs racꞌob,
a jeꞌ Moisésoꞌ,
a mac araꞌb tiꞌ:
“Mʌꞌ ju tetech Cꞌuj quir in tsꞌurintiquechobꞌ.
Mʌꞌ a yʌn aric tenob caꞌ tsoyac in worob.”
A jeꞌ Moisésoꞌ tuchiꞌtaꞌb ten Cꞌuj quir u yocar u tsꞌurinbir ten u racꞌob.
Rajiꞌ tuchiꞌtaꞌb ten Cꞌuj quir u tocar ic nunquirex ich u ruꞌumin Egipto.
Mʌꞌ ja wirej,
a ray u qꞌuininoꞌ,
caj tuchiꞌtaꞌb Moisés ten Cꞌuj,
a ray u qꞌuininoꞌ,
caj u masaj u tꞌʌn Cꞌuj yʌjmasir u tꞌʌn Cꞌuj tu tu yiraj Moisésoꞌ yerar cꞌacꞌ ich u chan cheꞌer.
36 A jeꞌ Moisésoꞌ caj u jocꞌsaj ic nunquirex tiꞌ u ruꞌumin Egipto tan u pʌyir u berob.
Rajiꞌ caj u yesaj carem beyajob yejer u jer yaꞌab baꞌ a cu jacꞌʌr u yor mac teꞌ ich u ruꞌumin a Egiptojoꞌ,
bayiriꞌ xan,
tiriꞌ ich u chiꞌ cꞌacꞌnab u cꞌabaꞌ Chʌc Cꞌacꞌnab bayiriꞌ xan,
tiriꞌ ich tʌcay ruꞌum tu cu pʌyic u berob cuarenta yaxqꞌuin.
37 A jeꞌraꞌ raꞌiriꞌ a Moisésoꞌ a tu yaꞌaraj tiꞌ u yet winiquirob israel:
“Jeꞌ u tetic Cꞌuj u jer a mac a cu bin tsꞌaꞌbir u tucur ten Cꞌuj quir u tsicbar a baꞌ u cꞌat Cꞌuj an ten bic caj tu tetaj ten,
quij Moisés.
Tiriꞌ cu bin u tetic ich in wet winiquirob israel.
A ray macoꞌ,
a cu bin taroꞌ yʌn quiꞌ uꞌwiquex a baꞌ cu yaꞌaric techex.”
38 A jeꞌ Moisésaꞌ uch ―quij Esteban―.
Tiriꞌ tiꞌ yʌn ich tʌcay ruꞌum yejer ic nunquirex wa ber caj tarob tu tu muchꞌquintajob u bʌj ich u pꞌuc witsir Sinaí.
Tiriꞌ yʌn Moisés caj tꞌʌnij ten yʌjmasir u tꞌʌn Cꞌuj caj cꞌuchij ich u jach joꞌr u pꞌuc witsir Sinaí.
Bayiriꞌ xan,
tiriꞌ yʌn Moisés,
caj tsꞌoc u tsicbar yejer u yʌjmasir u tꞌʌn Cꞌuj,
caj bin u masej u tꞌʌnob tiꞌ ic nunquirex tu yʌnob cabar ich u nʌcꞌ u witsir Sinaí.
Mʌꞌ ja wirej,
a jeꞌ Moisésoꞌ,
rajiꞌ caj u cꞌʌmaj u tꞌʌn Cꞌuj,
a cuxaꞌanoꞌ,
quir u masic toꞌonex.
39 ’Chen ic nunquirex ―quij Esteban―,
tu mʌꞌquintob u quibicob u tꞌan Moisés.
Mʌꞌ tu cꞌʌmajob u tꞌʌn Moisés,
quireꞌ ic nunquirex tu wʌcꞌʌs pachtajob u sutob tu pach ich u yorob tu tarob ich u ruꞌumin Egipto.
40 Mʌꞌ ja wirej,
tiꞌ yʌn Moisés ich u joꞌr u pꞌuc witsir cuarenta qꞌuin,
jeroj caj cꞌuchob ic nunquirex ich u sucuꞌun Moisés,
Aarón.
Caj u yaꞌarajob tiꞌ:
“Mʌꞌ ij querex baꞌ u ber Moisés a witsꞌinoꞌ,
a cu pʌyicoꞌonex ich u ruꞌumin Egipto.
Aarón cu yaꞌaraꞌ ten u yet winiquirob israel:
Betej cꞌujob toꞌonex soc caꞌ manʌc ʌcʌtan toꞌonex quir u pʌyic ic berex.”
41 A ray u qꞌuininoꞌ,
caj u betajob chan wacʌx u tus cꞌuj.
Raꞌ betaꞌb u taqꞌuin oro.
Jeroj caj u quinsajob yaꞌab u yʌrʌcꞌ wacʌx quir u tsꞌic tiꞌ u tus cꞌuj.
Tiriꞌ tu tsꞌʌpquintajob u bʌqꞌuer wacʌx ich u tus cꞌuj quir u cꞌujinticob.
U winiquir israel caj u quiꞌquintaj yorob quireꞌ u tus cꞌuj caj u betajob.
42 Rajen pꞌat ic nunquirex ten Cꞌuj quir u chaꞌic u cꞌujinticob u tus cꞌuj,
caj u chaꞌaj u cꞌujinticob,
a saboꞌ a tiꞌ yʌn ich caꞌananoꞌ.
Baxuc tu tsꞌibtaj a mac a tsꞌaꞌb u tucur ten Cꞌuj uch tu cu yaꞌaric:
A techexoꞌ,
u winiquirechex israel wa ber caj a quinsajex a wʌrʌcꞌ wacʌx quir a toquiquex ten wa ber tiꞌ yʌnechex cuarenta yaxqꞌuin ich tʌcay ruꞌum?
43 A mʌꞌ ta chen cuchajex u yatoch a tus cꞌujex,
a raꞌ u yatoch a tus cꞌuj Moloc,
a yʌn yochir sab,
a tus cꞌuj Renfán caj a cuchajex quir a cꞌujintiquex cax a bʌjiriꞌex ta betajexiꞌ.
Rajen,
quij Cꞌuj,
jeꞌ in jocꞌsiquechex caꞌ xiquechex pichir tu yʌn u cajar Babilonia.
Baxuc caj u tsꞌibtaj a mac tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.
44 Tiꞌ toy cu tsicbar Esteban ich u jach tsꞌurirob u winiquirob judío,
barej caj u yaꞌaraj tiꞌob:
―Wa ber tiꞌ yʌnob ic nunquirex ich tʌcay ruꞌum a uchoꞌ,
caj u cuchajob u najir otꞌ quir u cꞌujinticob Cꞌuj tu yʌnob ich tʌcay ruꞌum.
A ray u najiroꞌ,
a betaꞌb ten ic nunquirex caj betaꞌb an ten bic esaꞌb tiꞌ yʌjmasir u tꞌʌn Cꞌuj.
Mʌꞌ ja wirej,
toc araꞌb tiꞌ Moisés caꞌ u betej an ten bic esaꞌb ich u joꞌr u pꞌuc witsir uch.
45 Tiꞌ toy yʌn Moisés caj tetaꞌb Josué ten Cꞌuj.
A Josuéjoꞌ,
caj u pʌyaj u ber ic nunquirex caj tsꞌoc u quimin Moisés.
Mʌꞌ ja wirej,
ic nunquirex caj u cꞌʌmajob a ray u najir otꞌ,
rajen pꞌeriꞌob caj u cuchajob yejer Josué ich u ruꞌumin tu cʌjaꞌanoꞌonex bajeꞌrer ―quij Esteban―.
Tiꞌ binob ich u ruꞌumin a teraꞌ ―quij Esteban―,
a toc araꞌb ten Cꞌuj uch.
Cꞌuj caj u jocꞌsaj caꞌ xicob a mac yʌnin u ruꞌumin uch.
U berer caj u cꞌujintajob Cꞌuj ic nunquirex ich u najir otꞌ hasta caj cꞌuchij tu qꞌuinin u tar ic nunquirex David u reyinticob ic nunquirex.
46 Jach yajbir David ten Cꞌuj rajen cu yaꞌaric ic nunquirex David tiꞌ Cꞌuj:
“Arej in betej tech carem naj soc tiriꞌ cu tarob u cꞌujinticob tech tu cotor mac,
a techoꞌ,
u cꞌujirech Jacob.”
47 Chen mʌꞌ chaꞌb u betic a carem najoꞌ ten Cꞌuj.
Chen u parar ic nunquirex chaꞌb u betic a carem najoꞌ ten Cꞌuj.
U cꞌabaꞌ Salomón.
48 Chen ―quij Esteban―,
U cꞌujir caꞌanan jach carem.
Mʌꞌ u cʌjtar ich carem naj tu cu cꞌaxʌr ten mac,
quireꞌ quet bayiriꞌ caj u yaꞌaraj a mac a tsꞌaꞌb u tucur ten Cꞌuj caj u tsꞌibtaj a baꞌ u cꞌat Cꞌuj uch:
49 A tenoꞌ,
quij Cꞌuj,
cu chen tsꞌurintiquen mac ich caꞌanan a mac,
a tiꞌ yʌn ich yocꞌocab.
A tenoꞌ,
quij Cꞌuj,
tiꞌ yʌnen ich caꞌanan,
bayiriꞌ xan,
tiꞌ yʌnen ich yocꞌocab.
Rajen mʌꞌ in watochintej a mac a cu cꞌʌxic yatoch,
quireꞌ tiꞌ yʌnen,
quij Cꞌuj,
ich tu cotor mac.
50 Mʌꞌ ja wirej,
quij Cꞌuj,
mʌꞌ wa ten caj in rʌc betaj tu cotor baꞌ?
51 Esteban caj u yaꞌaraj tiꞌ u jach tsꞌurirob a tiꞌ yʌnob:
―Jach chich a joꞌrex,
quen.
Jach tam a pixamex.
Jach tam a xiquinex,
an ten bic a mac a mʌꞌ yerob Cꞌuj.
Rajraꞌ tan a mʌquiquex u ber u Tajꞌor u Pixam Cꞌuj,
caj a jach cʌnajex a nunquirex.
52 Arex ten baꞌ u cꞌabaꞌ a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj a mʌꞌ tu chucob u pachob ic nunquirex?
Mʌꞌ wa robob caj u quinsajob uch a mac a tarob tan u tsecꞌticob uch jeꞌ u tar a mac a jach taj u yoroꞌ?
A mac tsecꞌtaꞌb ten a mac tsꞌab u tucur ten Cꞌuj quir u tsicbar a baꞌ u cꞌat Cꞌuj jeroj cꞌuchij,
chen a techexoꞌ caj a cꞌubajex soc u quinsaꞌr.
53 Jin,
techex ―quij Esteban―,
a ta cꞌʌmajex u tꞌʌn Cꞌuj a tu masaj techex Moisés uch.
Mʌꞌ wa raꞌ tu yʌn masaj u yʌjmasir u tꞌʌn Cꞌuj tiꞌ Moisés.
Cax caj a cꞌʌmajex u tꞌʌn Cꞌuj,
mʌꞌ ta quibajexiꞌ.
Chꞌin u joꞌr Esteban
54 A mac a tiꞌ yʌnob ich Esteban an ber caj u yubajob caj jach tsꞌiquijob.
Caj u jʌtsꞌajob u cojob an ten bic cu tsꞌictarob jach qꞌuecꞌʌn.
55 A Estebanoꞌ,
caj u jach tsꞌurintaj u Tajꞌor u Pixam Cꞌuj,
caj u quiꞌ pʌctaj caꞌanan,
a ray u qꞌuininoꞌ,
caj u yiraj u sasirir Cꞌuj.
Bayiriꞌ xan,
caj u yiraj chꞌiric Jesús ich u noꞌj Cꞌuj,
raꞌiriꞌ Jesús a tuchiꞌtaꞌb ten Cꞌuj ich yocꞌocab uch.
56 Jeroj caj u yaꞌaraj Esteban quireꞌ cu yiric ich caꞌanan:
―Ir a wirej ―quij―.
Quin wiric chꞌiric Jesús ich u noꞌj Cꞌuj,
raꞌiriꞌ tiꞌ a mac a tuchiꞌtaꞌb ten Cꞌuj ich yocꞌocab uch.
57 U winiquirob judío,
a mac a tiꞌ yʌnob ich Esteban,
caj u mʌcob u xiquinob,
quireꞌ mʌꞌ u cꞌat yubob u tꞌʌn Esteban.
Jach cꞌam awʌtnʌjob,
jeroj tuneꞌ,
tu cotorob caj u cꞌʌnajob yacabob chubir Esteban.
58 Robob u winiquirob judío,
caj tsꞌoc u chuquicob Esteban,
caj jocꞌsaꞌb tiꞌ ich tancab u cajarob.
Tiriꞌ caj u purobiꞌ.
Jeroj caj u pitob u caꞌ yaꞌarir u nocꞌ soc tsoy u chꞌinicob u joꞌr Esteban.
Caj u pꞌʌtob u nocꞌob u cʌnantej Saulo,
soc tsoy u chꞌinicob Esteban.
Caj chꞌin u joꞌr Esteban a caj u tacajob u joꞌr ucheꞌ.
59 Barej caj u chꞌinob u joꞌr Esteban a ray u qꞌuininoꞌ,
caj u tꞌʌnaj Cꞌuj Esteban,
tan yaꞌaric:
―Cꞌʌmej in pixam,
in Jaj Tsꞌurech Jesús ―quij.
60 Caj xonrʌj Esteban cꞌam cu puraj u tꞌʌn tiꞌ Cꞌuj:
―Jawsej u siꞌpirob Jaj Tsꞌur,
quireꞌ caj u chꞌinob in joꞌr.
Caj tsꞌoc u yaꞌaric,
jeroj caj quimij Esteban.