Saulo cu chuquic u pachob a mac a yacsmʌnob tu yorob
8
A Saulojoꞌ,
caj u quetquint u yor soc u quinsaꞌ Esteban uch.
Raꞌiriꞌ u qꞌuinin caj chꞌinij Esteban caj u yʌnxchun u chuquicob u pachob a yacsmʌnob tu yorob ten a mac a mʌꞌ yacsmʌnob tu yorob.
Jach jocꞌ u yorob a mac a mʌꞌ ju yacsob tu yorob quireꞌ a yacsmʌnob tu yorob a tiꞌ yʌnob ich u cajar Jerusalén.
Rajen putsꞌob a yacsmʌnob tu yorobeꞌ.
Tiꞌ putsꞌob ich u ruꞌumin Judea.
Tiꞌ putsꞌob ich u ruꞌumin Samaria,
chen robob a mac tetaꞌb ten Jesús quir u tsecꞌtaꞌr u tꞌʌn,
tiriꞌ pꞌatob ich u cajar Jerusalén.
2 Chen a mac a cu sʌjticob Cꞌuj,
caj u yirajob quimij Esteban caj u chꞌajob u mucob u baquer Esteban.
Jach acꞌtaꞌb Esteban ten a yacsmʌnob tu yorob.
3 Chen a Saulo ucheꞌ,
caj u pachtaj u chꞌesic a mac a caj u yacsajob tu yorob u tꞌʌn Jesús.
A Sauloꞌ,
cu rʌc jocꞌsic ich yatoch tu yʌn a mac a caj u yacsajob tu yorob caꞌ xic mʌcbir,
cax xquic,
cax xib cu chuquic.
Rajiꞌ caj manij cʌxtaꞌbir tu cʌjaꞌanob a mac a tu yacsajob tu yorob caꞌ u chuquej,
caꞌ u chopʌytejob u purej tu cu naj mʌquicob mac.
Caj u tsecꞌtaj u tꞌʌn Cꞌuj ich u cajar Samaria
4 A yacsmʌnob tu yorob,
a putsꞌob tiꞌ u cajar Jerusalén,
quireꞌ chucob u pachob,
cax tu binob ich u jerob u cajarob,
caj u tsecꞌtajob u jach tsoyir u tꞌʌn Cꞌuj.
5 A Felipejoꞌ,
tuririꞌ a mac a putsꞌoꞌ,
caj bin ich u cajar Samaria,
jeroj tuneꞌ,
caj u yʌnxchun u tsecꞌtic tiꞌob,
caj yaꞌaraj wa Jesús,
rajiꞌ a Mesíasoꞌ.
6 A mac a tiꞌ cʌjaꞌanob ich u cajar Samaria,
caj u quiꞌ sarob u xiquin tiꞌ a baꞌ araꞌb tiꞌob ten Felipe.
Mʌꞌ ja wirej,
tu quiꞌ sarob u xiquin,
quireꞌ a baꞌ caj u yaꞌaraj tiꞌob quet bayiriꞌ,
quireꞌ caj u yirajob u carem beyaj a caj u betaj.
7 A Felipejoꞌ,
caj u jocꞌsaj quisin,
a mac acaꞌan quisin tiꞌ.
Caj jocꞌsaꞌb u quisinin barej awatnʌjob,
caj jocꞌob u quisinin ich u winquirir.
Cax a mech yoc caj u jawsaj Felipe,
cax a mac a characbarob,
a mʌꞌ u pequeꞌ,
caj u jawsaj Felipe.
8 Rajen tu cotor mac caj quiꞌjij yorob ich u cajar Samaria.
9 Tiriꞌ yʌn ich u cajar Samaria,
tuririꞌ xib,
u cꞌabaꞌ Simón.
Rajiꞌ cu man u tus cꞌʌyic u yet cajarob,
rajen jacꞌaꞌan u yorob.
Rajiꞌ caj u yaꞌaraj tu cu man:
―A tenoꞌ ―quij Simón―,
jach manan caremen a tenoꞌ.
10 Tu cotor mac a tiꞌ cʌjaꞌanob tu cajar Samaria caj u quiꞌ sarob u xiquin tiꞌ Simón,
quireꞌ cu tus sʌjtaꞌ ten u racꞌob,
cax a chichanoꞌ,
cax u jach tsꞌurirob tu cajar Samaria.
Mʌꞌ ja wirej,
caj u yaꞌarajob:
―A jeꞌ Simónaꞌ,
yʌn u mucꞌ Cꞌuj tiꞌ,
a cu yaꞌariqueꞌ:
A Jach Manan Mucꞌoꞌ ―baxuc cu yaꞌaricob.
11 A mac cʌjaꞌan ich u cajar Samaria caj u yirajob an bic caj u cꞌʌyaj mac,
jeroj caj u quiꞌquiꞌ sarob u xiquin tiꞌ,
quireꞌ jacꞌaꞌan u yorob tiꞌ uch.
12 Chen a Felipejoꞌ caj u tsecꞌtaj tiꞌob u jach tsoyir u tꞌʌn an bic cu bin u reyinticob Cꞌuj,
bayiriꞌ caj u tsecꞌtaj tiꞌob u cꞌabaꞌ Jesucristo.
Jeroj tuneꞌ,
robob a mac a tiꞌ yʌnob ich u cajar Samaria caj u yacsjob tu yorob,
bayiriꞌ xan,
acsaꞌbob jaꞌ tu joꞌrob,
cax xquic,
cax xib.
13 Cax u bʌjiriꞌ yʌjcꞌʌyir mac Simón caj u yacsaj tu yor u tꞌʌn Jesús,
bayiriꞌ acsaꞌb jaꞌ tu joꞌr xan.
Caj u pꞌeriꞌquint u bʌj soc u yet man Felipe,
Simón.
Jach jaqꞌuij yor Simón caj u yiraj carem beyaj caj u betaj Felipe,
bayiriꞌ xan,
barej u yiraj a baꞌ cu jacꞌsic u yor mac a caj u betaj Felipe xan.
14 Barej caj u yubajob a mac a tetaꞌb ten Jesús quir u tsecꞌtaꞌr u tꞌʌn a pꞌatob ich u cajar Jerusalén.
Mʌꞌ ja wirej,
caj u yubajob cu yacsicob tu yorob a mac a cʌjaꞌanob ich u cajar Samaria.
Rajen tuchiꞌtaꞌbob Pedro yejer Juan ten a mac a tetaꞌb ten Jesús quir u tsecꞌtaꞌr u tꞌʌn.
15 Caj cꞌuchob Pedro yejer Juan ich u cajar Samaria tu muchꞌaꞌanob a mac a yacsmʌnob tu yorob u tꞌʌn Jesús.
Robob caj u tꞌʌnajob Cꞌuj soc u cꞌʌmbicob u Tajꞌor u Pixam Cꞌuj ten a mac a yacsmʌnob tu yor u tꞌʌn Jesús.
16 Quireꞌ u Tajꞌor u Pixam Cꞌuj mʌꞌ toy tac tu yicnʌnobiꞌ.
Jarariꞌ chen acsaꞌbob jaꞌ tu joꞌrob ich u cꞌabaꞌ Jaj Tsꞌur Jesús,
quireꞌ caj u cꞌʌmajob u tꞌʌn Jesús.
17 Jeroj tuneꞌ,
tsꞌancꞌʌbtaꞌb a yacsmʌnob tu yorob ten Pedro quet yejer Juan,
jeroj caj tar u Tajꞌor u Pixam Cꞌuj ich yicnʌnob a mac a yacsmʌnob tu yorob ich u cajar Samaria.
18 Barej u yiraj Simón bic caj tar u Tajꞌor u Pixam Cꞌuj caj tsꞌaꞌb tiꞌob tu ju chen tsꞌancꞌʌbtajob Pedro quet yejer Juan.
A Simónoꞌ,
u cꞌat u tsꞌic u taqꞌuin tiꞌob,
Pedro yejer Juan.
19 Caj u yaꞌaraj Simón:
―Jeꞌ a taqꞌuinexaꞌ,
caꞌ a chan chuquex ten u mucꞌ Cꞌuj soc in tsꞌancꞌʌbtic mac xan,
soc u tar u Tajꞌor u Pixam Cꞌuj tu yicnʌnob xan.
20 Caj u nuncaj Pedro tiꞌ Simón tan yaꞌaric tiꞌ:
―Caꞌ xiquech yejer a taqꞌuin tu ca bin erar,
quireꞌ caj a tucraj a mʌnej u Tajꞌor u Pixam Cꞌuj yejer a taqꞌuin.
Mʌꞌ ja wirej,
rajiꞌ sijbir tiꞌ mac ten Cꞌuj.
21 Cꞌuj yer ―quij Pedro―,
mʌꞌ taj caj a wacsaj ta wor u tꞌʌn Jesús,
Simón.
Rajen mʌꞌ quet a beyaj yejer Cꞌuj,
baxuc a tenob,
mʌꞌ in beyajob yejerech xan.
22 Toc cꞌaxej a wor Simón tiꞌ a jeꞌ cꞌasir caj a tucraj sam.
Caꞌ a tꞌʌnej Cꞌuj soc ix tiꞌ u rucꞌsic tech a baꞌ cꞌasir caj a tucraj.
23 Quin wiric choc a wor ―quij Pedro―,
bayiriꞌ xan toc yʌn tech a siꞌpir.
24 Caj u nuncaj Simón,
caj u yaꞌaraj tiꞌob:
―Tꞌʌnex Jaj Tsꞌur ten soc mʌꞌ u tar tin wocꞌor a baꞌ caj a waꞌara sam.
25 Caj tsꞌoc u tsecꞌticob u tꞌʌn Jesús a baꞌ caj u yirob,
Pedro yejer Juan u betic Jesús,
quet bayiriꞌ a baꞌ caj u yirob tu tsicbataj Jesús tu cu tsecꞌtaj u jach tsoyir u tꞌʌn Cꞌuj uch.
Jeroj caj jocꞌob Pedro yejer Juan caj u wʌcꞌʌs sutnʌjob tu pach ich u cajar Jerusalén caj u tsecꞌtajob u jach tsoyir u tꞌʌn ich yaꞌab u cajarob a tiꞌ yʌn ich u ruꞌumin Samaria.
Tiꞌ tu nupꞌaj Felipe a mac a cu tar tu ruꞌumin Etiopía
26 Caj tsꞌoc aroꞌ,
caj cꞌuchij u yʌjmasir u tꞌʌn Jaj Tsꞌur ich Felipe,
caj tꞌan Felipe ten yʌjmasir u tꞌʌn Jaj Tsꞌur,
caj araꞌb tiꞌ:
―Joqꞌuen ich u cajar Samaria caꞌ xiquech tu berir a cu bin ich u cajar Jerusalén a raꞌ u berir cu bin ich nojar a tar u wich u bin ich u cajar Gaza ―baxuc araꞌb tiꞌ.
Raꞌ u wich u berir a cu bin ich tʌcay ruꞌum.
27 Jeroj tuneꞌ,
Felipe caj riqꞌuij caj binij.
Tar binij ich nojar ich u berir Gaza.
Jeroj tiꞌ yʌn xib a cu tar ich u ruꞌumin Etiopía,
toc pꞌesaꞌan soc mʌꞌ u pararʌncʌr uch.
A jeꞌ xibaꞌ acsaꞌb tu tsꞌurir ten a mac a cu reyinticob u ruꞌumin Etiopía,
xquic a cu reyinticob u winiquirob etiopía,
u cꞌabaꞌ Candace.
A xiboꞌ cu cʌnantic u taqꞌuin a Candacejoꞌ.
A jeꞌ xibaꞌ caj cꞌuchij ich u cajar Jerusalén quir u cꞌujintic Cꞌuj.
28 Bajeꞌrer cu sut tu pach quir u wʌcꞌʌs ur ich u ruꞌumin Etiopía.
Rajiꞌ curucbar ich u carro a cu jitaꞌr ten tsimineꞌ.
Tu curaꞌan cu xaquic tꞌʌn a tu tsꞌibtaj uch a Isaíasoꞌ,
rajiꞌ a tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.
29 A ray u qꞌuininoꞌ,
caj araꞌb tiꞌ Felipe ten u Tajꞌor u Pixam Cꞌuj:
―Cꞌʌnej a wacab caꞌ a nupꞌej u carro u winiquir etiopía.
30 Caj tsꞌoc u yaꞌaraꞌ ten u Tajꞌor u Pixam Cꞌuj,
caj u cꞌʌnaj u yacab Felipe quir u nupꞌic a carrojoꞌ a cu cuchic u winiquir etiopía.
Caj cꞌuchij ich yicnʌn caj u yubaj cu xaquic u juꞌunin a tsꞌibaꞌan ten Isaías quireꞌ tsꞌaꞌb u tucur ten Cꞌuj quir u tsꞌibtic uch.
Caj cꞌataꞌb tiꞌ ten Felipe:
―Ca quiꞌ najtic wa ca xaquic?
31 U winiquir etiopía caj u yaꞌaraj tiꞌ:
―Bic tabar quin najtic wa mʌnaꞌ mac cu camsiquen?
Caj tꞌʌn Felipe caꞌ tac nacʌr ich u carro soc pꞌeriꞌ caꞌ curacob.
32 A tu xaquic Isaías,
raꞌ jun xotꞌ tsꞌibaꞌan u tꞌʌn Cꞌuj.
Baxuc a jeraꞌ,
cu yaꞌaric Isaías ich a baꞌ tu tsꞌibtaj uch:
Baxuc tʌmʌn yuc cu chaꞌbʌr u quinsaꞌr ten mac,
bayiriꞌ xan,
irej a mac a tetaꞌb ten Cꞌuj caꞌ xic quinsbir.
Baxuc cu jochꞌtaꞌr u tsoꞌtser a tʌmʌn yucoꞌ,
mʌꞌ u jocꞌar yawʌt,
bayiriꞌ xan,
irej a mac a tetaꞌb ten Cꞌujeꞌ,
mʌꞌ u jocꞌar yawʌt cax jatsꞌʌc ten mac.
33 Mʌꞌ ja wirej,
pꞌastaꞌb a mac a tetaꞌb ten Cꞌuj,
cax mʌnaꞌ u siꞌpir toc quinsaꞌb an ten bic mac a yʌn u siꞌpir caj quinsaꞌb.
Mʌnaꞌ mac cꞌuchaꞌan yor yaꞌaric u siꞌpirob a ray u qꞌuinin cuxaꞌan a mac a tetaꞌb ten Cꞌuj quireꞌ tu quinsajob.
Baxuc caj u yaꞌaraj a mac a tsꞌaꞌb u tucur quir u tsꞌibtic a baꞌ u cꞌat Cꞌuj.
34 Jeroj tuneꞌ,
u winiquir etiopía tan u cꞌataꞌ tiꞌ Felipe:
―Chan arej ten soc quin najtic.
U bʌjiriꞌ wa Isaías wʌcꞌʌs aric,
wa Cꞌuj tsꞌaj u tucur Isaías quir yaꞌaric a mac cu bin tar biqꞌuin?
35 Caj tꞌan Felipe,
caj u yʌnxchun u tsicbʌtic tub u tsꞌibmʌn Isaías,
caj u tsibʌtaj tiꞌ u jach tsoyir u tꞌʌn Cꞌuj a cu tsicbʌtic Jesús u tar.
36 Caj u manob ich bej,
u berir a cu bin Gaza,
caj cꞌuchob tu yʌn jaꞌ.
Caj araꞌb tiꞌ ten a ju winiquir etiopía:
―A jeꞌ jaꞌ ―quij yaꞌaric tiꞌ―.
Tsoy wa ca wacsic jaꞌ tin joꞌr?
―quij.
37 Caj u nuncaj Felipe:
―Wa jach taj caj ta wacsaj ta wor,
tu cotor wa ta wor ca wacsic u tꞌʌn Jesús.
Jeꞌ in wacsic jaꞌ ta joꞌr.
Rajiꞌ caj u nuncaj tan yaꞌaric:
―In wacsmʌn tin wor u tꞌʌn Jesús,
quireꞌ in wer rajiꞌ u parar Cꞌuj.
38 U winiquir etiopía caj u yaꞌaraj caꞌ xuruc u carro,
jeroj tuneꞌ,
robob a caꞌturoꞌ caj emob ich jaꞌ.
Jeroj Felipe caj u yacsaj jaꞌ tu joꞌr u winiquir etiopía.
39 Cu nacʌticob u chiꞌ jaꞌ caj pʌyij Felipe ten u Tajꞌor u Pixam Cꞌuj.
Mʌꞌ caꞌ irij Felipe ten u winiquir etiopía.
Rajiꞌ caj sutnʌjij tu cajar jach quiꞌ yor.
40 Chen Felipe seb caj cꞌuchij ich u cajar Azoto.
Caj u man u tsecꞌtic u jach tsoyir u tꞌʌn Cꞌuj.
Caj u man tu cotor u cajarob ich u ruꞌumin aroꞌ hasta cꞌuchij ich u cajar Cesarea.