Caj u yacsaj tu yor u tꞌʌn Jesús, Saulo
9
Mʌꞌ ja wirej,
a Sauloꞌ mʌꞌ ju pꞌʌtic u chuquic u pachob a yacsmʌnob tu yorob,
quireꞌ u cꞌat u rʌc chꞌesicob.
Rajen caj binij ich yicnʌn u jach tsꞌurir sacerdote u winiquirob judío.
2 Rajiꞌ bin u cꞌatej u juꞌunin quir u bin u chuquej a jeꞌ mac a cu sayʌrob tu pach Jesúseꞌ,
a mac a tiꞌ yʌnob ich u cajar Damasco.
Caj bin u cꞌatej caꞌ tsꞌibtac juꞌun ten u jach tsꞌurir sacerdote tiꞌ u jach tsꞌurirob ich jujuntur u chan najir tu cu naj cꞌujinticob Cꞌuj u winiquirob judío ich u cajar Damasco.
Ich a jeꞌ juꞌunaꞌ caj cꞌataꞌbir ten u jach tsꞌurir sacerdote caꞌ yamtacob Saulo quir u chuquicob,
cax xquic,
cax xib caꞌ u chuquejob caꞌ xic u purej ich u cajar Jerusalén.
Cax a mun cu yiricob cu chuquicob cu bin u purob.
3 Jeroj,
caj bin Saulo,
cu tar ich bej caj cꞌuchij bʌytʌc tu yʌn u cajar Damasco.
Seb caj sasichʌjij caꞌanan.
Caj tar u sasir caꞌanan ich Saulo,
rʌc bʌcristaꞌb Saulo ten u sasir caꞌanan.
4 Caj rub Saulo ich ruꞌum jeroj,
caj yubaj u tꞌʌn Jaj Tsꞌurir:
―Biquinin tech Saulo,
ca man a chuquic u pachob a mac a cu sayʌrob tin pacheꞌ?
Mʌꞌ ja wirej ―quij―,
ten tan a man a chuc quin pach ―quij Jesús.
5 Caj u cꞌataj Saulo:
―Maquechiꞌ,
Jaj Tsꞌurir?
Caj yubaj u nuncaꞌ tiꞌ Saulo:
―A tenoꞌ ―quij―,
Jesúsen,
a macaꞌ ca man a chuquicob ten ―quij Jesús.
A wʌcꞌʌs bʌjiriꞌ ca pꞌactic a bʌj Saulo.
Mʌꞌ ja wirej,
baxuquech a wacʌxoꞌ,
a tan u conconchꞌʌctic a quiꞌ yej u niꞌeꞌ.
6 Caj jaqꞌuij yor Saulo cu babacancʌr tu cotor u winquirir Saulo.
Caj u yaꞌaraj Saulo:
―Baꞌ a jach cꞌat in betech,
Jaj Tsꞌurir?
Caj yaꞌaraj Jesús:
―Riqꞌuen,
Saulo chꞌicren,
caꞌ ocaquech ich u cajar Damasco.
Jeꞌ u yac tech a baꞌ ca bin a betej.
7 A mac a yet binacob Saulo,
robob xib,
mʌꞌ u jocꞌarob u tꞌʌn,
quireꞌ jach jacꞌaꞌan yorob.
Mʌꞌ ja wirej,
a yet tarob Saulo,
cu chen uꞌyaꞌr u jum u tꞌʌn Jesús,
chen mʌꞌ u yubaꞌr baꞌ cu yaꞌaric Jesús,
quireꞌ mʌꞌ ju yirajob maquiꞌ.
8 Barej caj chꞌicraj Saulo caj pꞌir u wich,
chen mʌꞌ u yir u ber,
quireꞌ acꞌbichʌj u wich.
Caj mach u cꞌʌb Saulo caꞌ xic purbir ich u cajar Damasco.
9 Tiꞌ yʌn Saulo ich u cajar Damasco mʌnaꞌ u nup u qꞌuinin,
acꞌbir u wich,
mʌꞌ ju janan,
mʌꞌ ju yucꞌur.
10 Chen tiꞌ cʌjaꞌan ich u cajar Damasco turiri xib a yacsmʌn tu yor tiꞌ u tꞌʌn Jesús.
U cꞌabaꞌ Ananías.
Jeroj caj u wʌyʌcꞌtaj Jaj Tsꞌur,
Ananías caj araꞌb tiꞌ ten Jaj Tsꞌur:
―Ananías ―quij.
Rajiꞌ caj u nuncaj tiꞌ:
―Teꞌ yʌnenaꞌ,
Jaj Tsꞌurir.
11 Jeroj tuneꞌ,
caj araꞌb tiꞌ ten Jaj Tsꞌur:
―Riqꞌuen caꞌ xiquech ich u berir a cu yaꞌaraꞌ Taj.
Mʌꞌ ja wirej,
raꞌ u cꞌabaꞌ u berir taj.
Caꞌ bin cꞌuchuquech,
cꞌatej ich yatoch Judas,
quireꞌ tiꞌ yʌn tuririꞌ xib,
u cꞌabaꞌ Saulo,
a cu tar ich u cajar Tarso ucheꞌ.
Tiriꞌ yʌn Saulo cu tꞌʌniquen ―quij Jesús.
12 A Sauloꞌ,
caj u wʌyʌcꞌtaj a tar Ananías.
Caj u wʌyʌcꞌtaj a wocar a tsꞌancꞌʌbtej caꞌ jawʌc u yacꞌbirir u wich ―quij Jesús.
13 Ananías caj tsꞌoc u yubic a baꞌ araꞌb ten Jaj Tsꞌur,
caj u nuncaj,
tan yaꞌaric:
―Jaj Tsꞌurir ―quij―,
caj in wuꞌyob u jumintaꞌ u bʌjiriꞌ Saulo cu man u chuquic u pachob a mac a tu yacsajob tu yorob a tꞌʌn ich u cajar Jerusalén ucheꞌ.
14 Caj in wuꞌyob u bʌjiriꞌ tarij Saulo quir u chuquic u cꞌʌxenob,
caꞌ u pur u maquenob ich u cajar Jerusalén.
Caj in wuꞌyob baxuc caj u tsꞌibtaj u jach tsꞌurir sacerdote u winiquirob judío.
15 Chen Ananías tan u nuncaꞌ ten u Jaj Tsꞌurir.
―A tenoꞌ,
in tetmʌn Saulo quir u beyaj ten bajeꞌrer.
Caꞌ manʌc u tsecꞌt in tꞌʌn ich tu mʌꞌ u winiquirob judío,
bayiriꞌ xan,
caꞌ manʌc u tsecꞌt in tꞌʌn ich u yet winiquirob israel,
bayiriꞌ xan,
caꞌ manʌc u tsecꞌt in tꞌʌn ich a reyob tu cu reyinticob mac,
rajen caꞌ xiquech ich Saulo.
16 A tenoꞌ,
in bʌjiriꞌ jeꞌ in wesic tiꞌ mun cu bin mucꞌyaj tu cu tsecꞌtic in tꞌʌn ―quij Jesús.
17 Jeroj caj tsꞌoc yubic ich u wʌyacꞌ a baꞌ araꞌb ten Jaj Tsꞌur,
caj riqꞌuij caj binij,
caj cꞌuchij yatoch Judas tu yʌn Saulo.
Caj oquij Ananías caj u tsꞌancꞌʌbta Saulo.
Caj araꞌb ten Ananías:
―In wet acsaꞌorirech Saulo ―quij―.
Ic Jaj Tsꞌurir Jesús a ta wiraj caj tarech ich bej,
rajiꞌ caj u tuchiꞌten caꞌ tac in tsꞌancꞌʌbtech caꞌ jawʌc a wich.
Caꞌ a tsꞌurintej u Tajꞌor u Pixam Cꞌuj,
Saulo.
18 Barej caj tsꞌoc u tsicbar Ananías,
seb caj rucꞌ u pix u wich,
jeroj caj sasichʌjij u wich Saulo,
jeroj tuneꞌ,
caj riqꞌuij caj acsaꞌb jaꞌ tu joꞌr.
19 Jeroj,
barej caj janij,
caj tar u mucꞌ xan tu caꞌ ten.
Saulo cu tsecꞌtic u tꞌʌn Jesús ich u cajar Damasco
Jeroj tune,
Saulo tiriꞌ pꞌatij mʌꞌ yaꞌab u qꞌuinin ich u yet acsaꞌorirob.
20 Seb Saulo caj bin u tsecꞌtic u tꞌʌn Jesús ich u chan najir tu cu naj cꞌujinticob Cꞌuj u winiquirob judío.
Tan yaꞌaric uch Saulo:
“Jach jaj u parar Cꞌuj Jesús.”
21 A mac a yubmʌnob cu tsecꞌtic u tꞌʌn Jesús,
jach jaqꞌuij yorob caj u yaꞌarajob:
―A ray macoꞌ,
mʌꞌ wa raꞌ cu chuquic a mac a yacsmʌnob tu yorob u tꞌʌn Jesús ich u cajar Jerusalén quir u chꞌesicob uch?
Mʌꞌ wa tij cuꞌyajex tarij a ray macoꞌ,
quir u chuquic a yacsmʌnob tu yorob u tꞌʌn Jesús teꞌ ich ij cajarex Damasco,
quir u puricob mʌcbir ich u cajar Jerusalén,
tu yʌn u jach tsꞌurirob sacerdote?
22 Chen a Saulojoꞌ,
chich caj u tsecꞌtaj u tꞌʌn Jesús,
mʌꞌ u jacꞌʌr yor u tsecꞌtic u tꞌʌn Jesús.
A mac a cu yubicob tu cu tsecꞌtic u tꞌʌn Jesús,
mʌꞌ cꞌuchaꞌan yorob u nunquicob tiꞌ Saulo.
Mʌꞌ ja wirej,
tu cu tsecꞌtic u tꞌʌn Jesús tiꞌ a mac cʌjaꞌanob ich u cajar Damasco,
cu yaꞌaric tiꞌob:
―Jach jaj,
a Cristojoꞌ a mac tetaꞌan ten Cꞌuj tarij ich yocꞌocab uch,
rajiꞌ Jesús.
U winiquirob judío cu putsꞌicob Saulo
23 Caj tsꞌoc u man mʌꞌ yaꞌab u qꞌuinin,
caj u muchꞌquintajob u bʌj u winiquirob judío.
Tiriꞌ caj u tucrajob bic tabar cu bin u chuquicob Saulo quir u quinsaꞌ.
24 Chen a baꞌ cꞌasir caj u tucrajobeꞌ,
caj nup u tꞌʌnob ten mac,
jeroj caj u masaj tiꞌ Saulo.
U winiquirob judío caj u cʌnantob u jor u paꞌteꞌ ich u cajar Damasco.
U burur qꞌuin u burur acꞌbir cu pajicob ich u jor paꞌteꞌ quir u chuquicob u quinsej Saulo.
25 Chen a mac a tu yacsajob tu yorob u tꞌʌn Jesús,
caj u yacsajob Saulo,
caj emsaꞌb yejer carem xac pichir bʌcris paꞌteꞌ u cajar Damasco.
Acꞌbir caj putsꞌij Saulo.
Saulo tar u tar ich u cajar Jerusalén
26 Barej caj cꞌuchij Saulo ich u cajar Jerusalén,
cu chen cꞌat u pʌcteꞌquintic u bʌjob yejer a yacsmʌnob tu yorobeꞌ.
Chen a yacsmʌnob tu yorob cu sʌjtaꞌrob Saulo quireꞌ mʌꞌ yerob wa yacsmʌn tu yor Saulo u tꞌʌn Jesús ucheꞌ.
27 Caj tar irbir Saulo ten Bernabé,
caj payij Saulo ten Bernabé ich tu yʌn a xiboꞌ a tetaꞌb ten Jesús quir u tsecꞌtaꞌr u tꞌʌn.
Caj tsicbanʌjij Bernabé ʌcʌtan a ray xiboꞌ,
caj u toc araj tiꞌob baꞌ u ber Saulo ich u berir Damasco an bic caj u yiraj Jaj Tsꞌur,
an bic caj u tsicbʌtaj tiꞌ Jaj Tsꞌur.
Bayiriꞌ xan,
caj u tsicbʌtaj tiꞌob bic Saulo caj u chich tsecꞌtaj u tꞌʌn Jesús ich u cajar Damasco.
28 A bajeꞌrer caj u quibob u yacsmʌn tu yor Saulo.
Jeroj yet manob,
quireꞌ caj u quibob a baꞌ araꞌb tiꞌob ten Bernabé.
Tiriꞌ pꞌatij Saulo ich u cajar Jerusalén yejer a mac a yacsmʌnob tu yorob u tꞌʌn Jesús.
29 Saulo chich caj u tsecꞌtaj u tꞌʌn Jesús.
Suꞌsuꞌ cu tsicbar Saulo tiꞌ u winiquirob judío.
Cꞌam u nunquirob u tꞌʌn Saulo u winiquirob judío a ju tꞌʌn griego.
Rajen caj u tumtob yirej wa jeꞌ u quinsicob Saulo.
30 Barej a yacsmʌnob caj u yorob tu yubob yaꞌaraꞌ u quinsaꞌ Saulo,
rajen tiꞌ bin purbir Saulo ich u cajar Cesarea,
pachir caj tuchiꞌtaꞌb Saulo ich u jach cajar Tarso.
31 Caj tsꞌoc u yacsic tu yor u tꞌʌn Jesús,
Saulo,
a mac a yacsmʌnob tu yorob ich u ruꞌumin Judea,
bayiriꞌ xan,
a mac a yacsmʌnob tu yorob ich u ruꞌumin Galilea,
bayiriꞌ xan,
a mac a yacsmʌnob tu yorob ich u cajar Samaria,
rʌc sisij yorob a mac a caj u chucob u pachob ucheꞌ,
mʌnaꞌ mac cu man u chuquicob u pachob.
Jeroj,
caj jach quiꞌ tajijoꞌ u quiꞌ acsicob tu yorob a yacsmʌnob tu yorobeꞌ.
A baꞌ araꞌan tiꞌob ten Cꞌuj cu quiꞌquiꞌquibicob.
Tan u chichquintaꞌr u yorob ten u Tajꞌor u Pixam Cꞌuj,
rajen cu jach pimtar a yacsmʌnob tu yorob.
Jawsaꞌb Eneas ten Pedro
32 Cꞌuchij tu qꞌuinin caj manij Pedro yirej tu cotor u ruꞌumin tu cʌjaꞌanob mac a yacsmʌnob tu yorob,
caj u nupaj xan,
a mac a yacsmʌnob tu yorob ich u cajar Lida.
33 Barej caj cꞌuchij ich u cajar Lida caj u yiraj tuririꞌ xib.
U cꞌabaꞌ Eneas.
Jach yaj,
ocho yaxqꞌuin u cʌnmʌn u yajir,
mʌꞌ ju pec,
u burur qꞌuin characbar Eneas.
34 Pedro caj u tꞌʌnaj,
caj u yaꞌaraj:
―Jesucristo jeꞌ u jawsiquech bajeꞌrer,
Eneas.
Riqꞌuen,
quen Eneas.
Jʌyej a tas.
Seb caj riqꞌuij Eneas caj u jʌyaj u tas.
35 Caj irir ten u racꞌob,
a mac cʌjaꞌan ich u cajar Lida bic jawsaꞌb Eneas,
bayiriꞌ xan,
a mac a cʌjaꞌanob ich u cajar Sarón,
rajen caj u rʌc pꞌʌtajob a baꞌ camsaꞌb tiꞌob ten u nunquirob uch,
caj u yacsajob tu yorob u tꞌʌn Jaj Tsꞌur.
Ricsaꞌb tu quimirir Dorcas
36 Tiꞌ yʌn ich u cajar Jope tuririꞌ xquic u cꞌabaꞌ Tabita.
Rajiꞌ u yacsmʌn tu yor.
U cꞌabaꞌ Tabita chen wa tꞌʌnbir ich u tꞌʌn griego cu yaꞌaric Dorcas.
A jeꞌ xquicaꞌ Dorcas cu naj jʌsic u yoꞌoch tiꞌ a mac a jach otsir,
cu naj yamtic mac wa baꞌ u cꞌat.
37 A ray u qꞌuininoꞌ,
barej tiꞌ yʌn Pedro ich u cajar Jope,
caj yajij Dorcas,
jeroj caj quimij.
Caj tsꞌoc u pꞌobar u baquer ten u racꞌob,
an ten bic cu naj pꞌoꞌicob u winiquirob judío a mac a cu quiminoꞌ.
Jeroj tuneꞌ,
caj acsaꞌb u baquer ich jun cꞌas naj.
38 A mac a yacsmʌnob tu yorob ich u cajar Lida yubmʌnob tiꞌ yʌn Pedro ich u cajar Jope,
quireꞌ tiꞌ yʌn bʌytʌc tu cajar Lida,
rajen tuchiꞌtaꞌb caꞌtur xib pʌybir Pedro.
Araꞌb tiꞌ:
―Chich pʌyex Pedro,
chan arex tiꞌ caꞌ tac seb tu yʌnoꞌonex teꞌ ich u cajar Lida.
39 Caj tsꞌoc u yubic a baꞌ araꞌb tiꞌ ten a caꞌtur yʌjpʌyirob Pedro,
caj bin yejerob.
Caj cꞌuchij,
caj bin purbir tu yʌn a quimeneꞌ.
Caj oc Pedro ich jun cꞌas naj caꞌanan tu yʌn u baquer a quimenoꞌ.
Jeroj,
caj u yesob u nocꞌob tiꞌ Pedro a chuꞌy u nocꞌob ten Dorcas,
a cuxaꞌan toy Dorcas ucheꞌ.
Raꞌ a quiminob u mameꞌ,
robob caj u yesajob u nocꞌob tiꞌ Pedro.
Tan yacꞌataꞌr Dorcas ten a xquicoꞌ a quimen u mamoꞌ.
40 Pedro caj u rʌc jocꞌsaj tu cotor mac tancab,
chen Pedro pꞌat tu junan tu yʌn u baquer Dorcas.
Jeroj tuneꞌ,
caj xonrʌj Pedro quir u tꞌʌnic Cꞌuj.
Caj tsꞌoc u tꞌʌnic Cꞌuj,
caj riqꞌuij Pedro.
Caj u sut u bʌj caj u pʌctaj u baquer Dorcas.
Tu tꞌʌn Pedro:
―Riqꞌuen,
Tabita,
quen.
Jeroj tuneꞌ,
Dorcas caj u pꞌir u wich,
caj u yiraj Pedro,
caj ricꞌ cutar.
41 Pedro caj u tsꞌaj u cꞌʌb tiꞌ,
caj mach u cꞌʌb ten Dorcas,
caj u ricꞌsaj caꞌ chꞌicrar.
Jeroj tuneꞌ,
caj tꞌan a yacsmʌnob tu yorob ten Pedro.
Caj tꞌan xan a xquicoꞌ a quimen u mameꞌ caꞌ rʌc tacob.
Caj esaꞌbob tiꞌ,
cuxaꞌan Dorcas.
42 Tu yubob ricꞌsaꞌb tiꞌ u quimirir Tabita ten Pedro,
rajen yaꞌab mac caj u yacsob tu yorob u tꞌʌn Jaj Tsꞌur.
43 Tiriꞌ pꞌat yaꞌab u qꞌuinin Pedro ich u cajar Jope.
Acsaꞌb Pedro ten Simón.
A jeꞌ Simónoꞌ cu banic u yotꞌer wacʌx.