22
―Uꞌyex baꞌ quin waꞌaric techex in wet winiquirob judío a in wet chꞌibarob. Uꞌyex baꞌ quin waꞌaric techex u winiquirob judío a nuxiboꞌ. Uꞌyex baꞌ quin bin in waꞌaric techex soc ʌcʌtan techex tu cotor soc a werex mʌnaꞌ in siꞌpir a tenoꞌ ―quij Pablo.
2 Caj yubob tan u tꞌʌn ich u tꞌʌnob u winiquirob judío, mʌꞌ cꞌʌs baꞌ cu tsicbarob u winiquirob judío. Jeroj caj u yaꞌaraj tiꞌob:
3 ―A tenoꞌ ―quij Pablo―, u winiquiren judío, caj u rochen in nʌꞌ tu cajar Tarso tar ich u ruꞌumin Cilicia. Chen teꞌ chꞌijen ich u cajar Jerusalén. A teraꞌ caj u camsajen Gamaliel uch. A baꞌ nanij u camsic tiꞌ ic nunquirex raꞌ caj in cʌnaj. Gamaliel tu quiꞌ camsajen. Jach manan in cꞌat in betej an ten bic a tenoꞌ caj in tucraj a Cꞌujoꞌ u cꞌat. Rajen tsꞌajan in wor in betej an ten bic tu cotorechex bajeꞌrer.
4 A uchoꞌ ―quij Pablo―, caj binen in cʌxtej a yacsmʌnob tu yorob u tꞌʌn Jesús, quir in chuquic in cꞌʌxej quir in bin in purej quinsbir, cax wa xib, cax wa xquic caj in cꞌubajob cꞌʌrbirob.
5 U jach tsꞌuirob u sacerdote u winiquirob judío yejer u jach tsꞌurirob u winiquirob judío, a nuxiboꞌ, cꞌuchaꞌan yorob yaꞌaricob techex bic tabar caj u chucajob juꞌun ten soc in puric tiꞌ in wet winiquirob judío ich u cajar Damasco. Mʌꞌ ja wirej, tiꞌ binen uch quir in chuquic u pach a mac a yacsmʌnob tu yorob u tꞌʌn Jesús, soc toc cꞌʌxaꞌan caꞌ taquen in purej mʌcbir ich u cajar Jerusalén, soc u tsꞌabʌr u mucꞌyajob ten u tsꞌurirob u winiquirob judío.
Pablo cu tsicbar bic tabar caj u yacsaj tu yor u tꞌʌn Jesús
6 Caj yaꞌaraj Pablo:
―Quireꞌ tan in bin ich u berir u cajar Damasco. Seb caj tar u chꞌic yum u sasirir caꞌanan tu yʌnen an ten bic u sasirir a cu cꞌuchur cꞌacꞌchunqꞌuinoꞌ, jach manan u sasirir. Caj tar u sasir cꞌacꞌchunqꞌuin tu yʌnen.
7 A tenoꞌ, caj ruben ich bej, a raꞌiriꞌ u qꞌuinin, caj in wuꞌyaj u tꞌʌn mac, rajiꞌ caj u yaꞌaraj ten: “Saulo, Saulo, quireꞌ raꞌ in cꞌabaꞌ a uchoꞌ? Biquinin, ca man a chuc quin pach. Mʌꞌ ja wirej, a mac a cu chuquic u pach a mac a cu sayʌrob tin pach, tan u chuquic in pach xan.”
8 A tenoꞌ tuneꞌ, caj in nuncaj: “An maquech, Jaj Tsꞌur?” ―quen. Rajiꞌ caj u yaꞌaraj ten: “A tenoꞌ Jesúsen a cʌjaꞌanen tu cajar Nazaret uch. Tan a chuquic in pach a tenoꞌ.”
9 A mac a tiꞌ yʌnob, a jin wet taracob, cax caj u yirob u sasirir caꞌanan, caj jaqꞌuij yorob. Chen mʌꞌ ju yubob u tꞌʌn a cu tꞌʌniquenoꞌ.
10 Caj in waꞌaraj tuneꞌ: “Baꞌ ca bin a waꞌare ten in Jaj Tsꞌurir.” Caj u yaꞌaraj ten Jaj Tsꞌur: “Riqꞌuen, joqꞌuen xen ich u cajar Damasco. A rayoꞌ tiꞌ yʌn mac a cu bin yaꞌaric tech tu cotor baꞌ a Cꞌujoꞌ u cꞌat tech caꞌ a betej.”
11 Caj riqꞌuen ―quij Pablo―, mʌꞌ jin wiraj in ber, quireꞌ acꞌbirchʌjij in wich ten u chꞌic yum sasirir Cꞌuj. Caj mach in cꞌʌb quir u pʌyicob in ber. U pʌybarob in ber in wet binob, jeroj caj oquen ich u cajar Damasco.
12 ’Tiriꞌ ich u cajar Damasco tiꞌ yʌn tuririꞌ xib, Ananías u cꞌabaꞌ. A ray xiboꞌ, cu jach cꞌujintic Cꞌuj. Cu naj betic tu cotor a baꞌ tsꞌibaꞌan ich u tꞌʌn Moisés uch. Bayiriꞌ xan, tu cotor u winiquirob judío cu tucricob wa tsoy cu betic Ananías.
13 Caj cꞌuchij Ananías tu yʌnen, tiꞌ chꞌicaꞌan tin wicnʌn uch caj u yaꞌaraj ten: “Bajeꞌrer in wet acsaꞌorirech Saulo bin a caꞌ irej a ber.” Seb caj caꞌ sasichʌjij in wich, jeroj caj in wiraj Ananías.
14 Caj yaꞌara ten Ananías ―quij Pablo―: “U cꞌujir ic nunquirex a tu cꞌujintajob uch, caj u tetech caꞌ a najtej a baꞌ u cꞌat tech. Caj u tetech soc a wuꞌyic u tꞌʌn tu chiꞌ Jesús. Caj u tetech Cꞌuj soc a wiric u parar a mac taj yoreꞌ.
15 Mʌꞌ ja wirej, a Cꞌujoꞌ caj u tetech quir a toc aric u tꞌʌn ʌcʌtan tu cotor mac cax a baꞌ a wirmʌn yejer a baꞌ a wuꞌymʌn.
16 Bajeꞌrer, quij yaꞌaraj Ananías, baꞌwir ca pajic, riqꞌuen caꞌ xicoꞌon soc in wacsic jaꞌ ta joꞌr. Caꞌ a tꞌʌnej Jaj Tsꞌur soc u jawsic a siꞌpir Cꞌuj.”
Tetaꞌb Pablo ten Jaj Tsꞌur quir u tsecꞌtaꞌr u tꞌʌn tu mʌꞌ u winiquirob judío
17 Caj yaꞌaraj Pablo tiꞌ a pim u winiquirob judío:
―Barej, caj sutnʌjen tin pach tu cajar Jerusalén caj binen ich carem naj tu quic naj binex quir ij cꞌujintiquex Cꞌuj. A tenoꞌ, caj oquen quir in tꞌʌnic Cꞌuj. Tu jin tꞌʌnaj Cꞌuj uch, caj in wʌyʌcꞌtaj Cꞌuj.
18 Caj in wiraj in Jaj Tsꞌurir, rajiꞌ caj u yaꞌaraj ten: “Joqꞌuen pꞌʌtej u cajar Jerusalén. Sebquint a bin quireꞌ u winiquirob judío a mʌꞌ ju yacsajob tu yorob a baꞌ ca tsecꞌtiquenob tiꞌ mʌꞌ ju bin u cꞌʌmob.”
19 Chen a tenoꞌ, caj in waꞌaraj: “Jaj Tsꞌur, quen, robob u toc erob a tenoꞌ caj in chucaj caj in puraj mʌcbir a mac a yacsmʌnob tu yorob a tꞌʌn tech. Robob u toc yerob a tenoꞌ caj oquen ich jujuntur u chan najir tu cu naj cꞌujinticob Cꞌuj u winiquirob judío, caj in cʌxtaj a mac a yacsmʌnob tu yorob a tꞌʌn quir in chuquicob in mʌquej tu cu maꞌcʌr mac, caj in chich jʌtsꞌajob xan.
20 Caj chꞌin Esteban ten u winiquirob judío soc caꞌ quimic. Raꞌiriꞌ u qꞌuinin caj quimij Esteban, jach tsoy caj in tucraj. Mʌꞌ ja wirej, a tenoꞌ caj in cʌnantic u nocꞌob a cu chꞌininob Esteban uch.” Aroꞌ caj tsicbʌnʌjen yejer Jaj Tsꞌur.
21 Caj yaꞌaraj ten Jaj Tsꞌur: “Joqꞌuen xen ich a mʌꞌ u winiquirob judío.” Jeroj tuneꞌ, caj u tuchiꞌten Cꞌuj ich tantanxer ruꞌum nachir.
Chuc Pablo ten u jach tsꞌurir u soldados romano
22 A pim u winiquirob judío caj yubob u tꞌʌn Pablo hasta yubob yaꞌaric: “A mʌꞌ u winiquirob judío.” Jeroj tuneꞌ, cꞌam caj awatnʌjob u winiquirob judío, tan yaꞌaricob:
―A jeꞌ xiboꞌ caꞌ quimic. Jocꞌsej cax quimic soc mʌꞌ u cuxtar.
23 Mʌꞌ ja wirej, caj cꞌam awʌtob soc yesicob jach pꞌujob. U bʌjiriꞌob caj u jʌtajob u nocꞌob u winiquirob judío, caj u purajob u noy ruꞌum ich caꞌanan soc yer jach pꞌujob.
24 Caj irir ten u jach tsꞌurir u soldados romano bic caj pꞌujob. Caj u tꞌʌnaj u soldados soc u pururob Pablo ich yatoch tu cu naj wenʌnob a soldadojoꞌ. Caj araꞌb ten u jach tsꞌurir soldados tiꞌ u soldados caꞌ chich jatsꞌ Pablo:
―Caꞌ ij quirex wa Pablo cu yaꞌaric tenob a baꞌ u siꞌpir tiꞌeꞌ. Jeꞌ in wirob biquinin caj u pꞌusaj yobob u winiquirob judío quir u yawatob.
25 Barej caj tsꞌoc u cꞌʌxic Pablo yejer otꞌ quir u jʌtsꞌic u pach, caj u yaꞌaraj Pablo:
―A tenoꞌ u winiquirenob romano. Tsoy wa ca jatsꞌiquenex cax wa mʌꞌ ja wiraj wa yʌn in siꞌpir? ―baxuc caj yaꞌaraj Pablo tiꞌ a capitánoꞌ.
26 Barej caj u yubaj yaꞌaraꞌ ten Pablo aroꞌ, a yʌjtꞌʌnir cien soldados caj jocꞌ. Caj bin ich u jach tsꞌurir quir yaꞌaric tiꞌ a baꞌ araꞌb tiꞌ ten Pablo. Caj cꞌuchij, caj u yaꞌaraj tiꞌ:
―Quiꞌ irej a baꞌ ca bin a betic. Mʌꞌ ja wirej, a ray xiboꞌ u winiquirob romano.
27 Rajen u jach tsꞌurir tu cotor soldados, caj bin ich Pablo. Caj u yaꞌaraj tiꞌ:
―Arej ten wa ju winiquirech romano?
Caj u yaꞌaraj Pablo:
―A tenoꞌ u winiquirenob romano.
28 Caj u nuncaj u jach tsꞌurir tu cotor soldados:
―A tenoꞌ, caj in boꞌotaj jach yaꞌab taqꞌuin soc u winiquirenob romano.
Pablo caj u yaꞌaraj:
―A tenoꞌ, u winiquirenob romano, quireꞌ in tet u winiquirob romano quet yejer in nʌꞌ, u winiquirob romano.
29 Seb caj pꞌat Pablo ten a soldadojoꞌ a cu bin jʌtsꞌbir u pach Pablo ucheꞌ. Yet binac u jach tsꞌurir tu cotor soldados, quireꞌ jach sajʌc caj u yubajob u winiquir romano Pablo. Caj u chꞌaj sajquir xan, quireꞌ caj u cꞌʌraj yejer mascab.
Pablo ʌcʌtan tu cotor u jach tsꞌurirob u winiquirob judío
30 Caj sasij soc yer jach taj mʌꞌ baꞌwir cu taquicob u joꞌr Pablo, u jach tsꞌurir tu cotor soldados caj u tuchiꞌtaj tꞌʌnbir tu cotor u jach tsꞌurirob sacerdote u winiquirob judío, yet taracob u jach tsꞌurir u winiquirob judío, a nuxiboꞌ. Caj u tuchiꞌtaj tꞌʌnbir caꞌ rʌc tarob u muchꞌquinticob u bʌj. Caj pit tu cꞌʌxaꞌan Pablo caj bin purbir ʌcʌtan tu cotor u jach tsꞌurirob u winiquirob judío. Ʌcʌtan chꞌicric Pablo.