―Mʌꞌ a yʌn bin Pablo tu cajar Jerusalén.

Quireꞌ baxuc caj yaꞌaraj tenob u Tajꞌor u Pixam Cꞌuj.

5 Barej caj tsꞌoc a ray siete u qꞌuininoꞌ,

caj joqꞌuenob quir in binob.

A yacsmʌnob tu yorob caj rʌc jocꞌob yirob in binob.

Caj rʌc jocꞌob yejer u racꞌ baxuc xan,

yejer u pararob.

Periꞌ caj binoꞌonex chiꞌ cꞌacꞌnab quir ic tꞌʌniquex Cꞌuj.

Jeroj caj xonrʌjoꞌonex ich chiꞌcꞌacꞌnab quir ic tꞌʌniquex Cꞌuj.

Caj tsꞌoc ic tꞌʌniquex Cꞌuj caj ic rʌc pacran pʌtʌxmecꞌtaj ic bʌjex yejer ij quet acsaꞌorirex.

6 Caj tsꞌoc ic rʌc pʌtʌxmecꞌtic ij quet acsaꞌorirex,

caj oquenob ich chem quir in binob.

Chen robob caj sutnʌjob tu pachob quir u binob tu yatochob.

7 A baywoꞌ,

quij Lucas,

caj in pꞌʌtajob u cajar Tiro,

jeroj caj cꞌuchenob yejer chem ich u cajar Tolemaida.

Tiriꞌ caj joqꞌuenob ich chem caj binenob in wirob ij quet acsaꞌorirex.

Tiꞌ pꞌatenob tuririꞌ u qꞌuinin yejerob.

8 Barej caj sasij caj joqꞌuenob quir in binob,

caj cꞌuchenob tu cajar Cesarea.

Jeroj,

caj u yacsajenob Felipe tu yatoch.

A jeꞌ Felipejaꞌ,

raꞌ tuririꞌ ich a siete xiboꞌ,

a tetaꞌb quir u yamticob a mac a tetaꞌb ten Jesús uch quir u tsecꞌtaꞌr u tꞌʌn.

A ray sietejoꞌ,

raꞌ cu jʌꞌsʌr yoꞌoch xquic a quimen u mameꞌ.

A Felipejeꞌ,

cu tsicbʌtic u jach tsoyir u tꞌʌn Cꞌuj tu cotor mac.

Tiꞌ pꞌatenob yejer Felipe,

quij Lucas.

9 Tiꞌ yʌn u parar xquic Felipe,

rʌc yʌn u nup u parar xquic.

Mʌꞌ chꞌaꞌaniꞌ u parar xquic Felipe.

Robob cu tsicbʌticob u tꞌʌn Cꞌuj quireꞌ tsꞌaꞌb u tucurob ten Cꞌuj quir u tsicbarob a baꞌ u cꞌat Cꞌuj.

10 Quireꞌ tiꞌ toy yʌnenob ich yatoch Felipe,

quij Lucas,

jeroj tuneꞌ caj cꞌuchij ich yatoch Felipe,

a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj.

U cꞌabaꞌ Agabo.

Rajiꞌ tar u tar tu ruꞌumin Judea.

11 Rajiꞌ tar u yiriquenob.

Caj cꞌuchij,

jeroj,

caj cꞌuchij Agabo,

caj pit u cꞌax u nʌcꞌ Pablo ten Agabo a tiꞌ yʌn u nʌcꞌ Pablo.

Agabo caj u cꞌaxaj u wʌcꞌʌs bʌjiriꞌ u cꞌʌb yejer u cꞌax u nʌcꞌ Pablo,

caj u wʌcꞌʌs cꞌʌxaj yoc xan.

Jeroj,

caj u yaꞌaraj:

―Baxuc cu bin u cꞌʌx a cꞌʌb yejer a woc u winiquirob judío ich u cajar Jerusalén.

Caꞌ bin tsꞌocac u cꞌʌriquechob cu bin u puriquech tu mʌꞌ u winiquirob judío ―baxuc caj yaꞌaraj ten u Tajꞌor u Pixam Cꞌuj uch.

12 Caj tsꞌoc ij cuꞌyiquex,

quij Lucas,

yaꞌaric Agabo caj tic chich arajex tiꞌ Pablo mʌꞌ u yʌn bin tu cajar Jerusalén.

Bayiriꞌ xan,

caj u yaꞌarajob a yacsmʌnob tu yorob a cʌjaꞌanob tu cajar Cesarea.

13 Caj u nuncaj Pablo tiꞌob:

―Yaj in wiric a wocꞌarex.

Mʌꞌ ja wirej,

tan a tupsiquex in wor cax cu chuquenob u cꞌʌxenob tu cajar Jerusalén quir in quinsaꞌ.

Cax quimiquen tiꞌ Jesús,

in Jaj Tsꞌurir ―quij.

14 Barej caj ij quirajex mʌꞌ cꞌuchaꞌan ij corex ij cꞌax u tucur Pablo,

soc mʌꞌ u bin tu cajar Jerusalén.

Caj tsꞌoc ic tsibarex caj ij carajex:

―Caꞌ u betej a baꞌ u cꞌat Jaj Tsꞌur.

15 Caj tsꞌoc u qꞌuinin caj in wirajob Felipe,

caj in marajob in baꞌtacob quir in binob tu cajar Jerusalén.

Caj tsꞌoc in maricob caj binenob.

16 Yet binacob jun yarob a yacsmʌnob tu yorob u tꞌʌn Jesús a cʌjaꞌanob tu cajar Cesarea.

Robob caj u purenob tu yʌn tuririꞌ xib a caj tarij uch tiꞌ u petenin Chipre.

U cꞌabaꞌ a ray xiboꞌ,

Mnasón.

Rajiꞌ caj u yʌn acsaj tu yor uch.

Mnasón caj u yacsajenob tu yatoch.

17 Barej caj cꞌuchoꞌonex tu cajar Jerusalén,

quij Lucas,

caj u quiꞌ acsajoꞌonex ij quet acsaꞌorirex.

Jach quiꞌ yor a yacsmʌnob tu yorob caj yiroꞌonex.

18 Caj sasij caj binoꞌonex yejer Pablo ich Jacobo.

Tiriꞌ muchꞌaꞌanob a nuxibob u jach tsꞌurirob a yacsmʌnob tu yorob tu cajar Jerusalén.

19 Caj tsꞌoc u rʌc tꞌʌnanobeꞌ caj u tsicbʌtaj tiꞌob a baꞌ caj u betaj Cꞌuj ich a mʌꞌ u winiquirob judío quireꞌ tsecꞌtaꞌb u tꞌʌn Cꞌuj ten Pablo tiꞌ a mʌꞌ u winiquirob judío.

A baꞌ caj u betaj Cꞌuj Pablo caj u yaꞌaraj jujuntur.

20 Caj tsꞌoc u yubicob a baꞌ tsicbanʌjij Pablo caj u quiꞌ tꞌʌnajob Cꞌuj caj yaꞌarob:

―Jach caremech Cꞌuj.

Jeroj tuneꞌ,

tuririꞌ mac ich u yet acsaꞌorirob a tetaꞌb quir u tꞌʌnic Pablo yʌjtꞌʌnir tu cotor u yet acsaꞌorirob,

caj u yaꞌarajob tiꞌ Pablo:

―Iric,

ij quet acsaꞌorirech.

A techoꞌ,

a wer yʌn yaꞌab a yacsmʌnob tu yorob u tꞌʌn Jesús ich ij quet winiquirob judío.

Robob tu cotor tan u chich aricob caꞌ u quiꞌ cʌnantej tu cotor mac a baꞌ araꞌb ich u tꞌʌn Moisés,

baxuc toꞌonex.

21 Mʌꞌ ja wirej,

robob caj u yubajob u jumintaꞌr cu yaꞌaricob tan a man a camsic tu cotor a wet winiquirob judío tu cʌjaꞌanob a wet winiquirob judío tantanxer ruꞌum,

wa caꞌ u pꞌʌtob u quibicob a baꞌ tsꞌibtaꞌb ten Moisés ucheꞌ.

Baxuc caj u yubob u jumintaꞌr tan a camsicob xan mʌꞌ ju tsꞌir u chan ochir a xiboꞌ,

an ten bic quic naj betiquex tiꞌ a chan ochoꞌ,

soc u cʌnanticob a baꞌ cu naj betic ij quet winiquirob judío.

22 Baꞌ quic bin ic betex caꞌ bin yubob cꞌuchech teraꞌ?

Quireꞌ jach taj,

jeꞌ yubicob tiꞌ yʌnech teꞌraꞌ.

Jeꞌ u muchꞌquinticob u bʌj caꞌ bin yubob aroꞌ.

23 Caꞌ a wuꞌyej a baꞌ quin waꞌaricob tech Pablo.

A tenoboꞌ,

yʌn in rʌc nupoꞌ xib a teraꞌ,

a yacsmʌnob tu yorob.

Robob tabar u nupꞌsicob a baꞌ tu toc arob tiꞌ Cꞌuj yʌn u nup xiboꞌ.

24 Pʌyej a jeꞌ rʌc yʌn u nup xibaꞌ,

caꞌ xiquech yejerob ich carem naj tu cu naj cꞌujinticob Cꞌuj u winiquirob judío.

An ten bic caj u betajob a rʌc yʌn u nup xiboꞌ quet bayiriꞌ xan,

caꞌ a betic xan an ten bic cu naj beticob u winiquirob judío.

A techoꞌ,

boꞌotej u boꞌorir u cꞌosar u joꞌr a wet binacob.

Toc betej aroꞌ soc yerob a wet winiquirob judío a baꞌ caj u pʌcꞌajob a pachob mʌꞌ tajiꞌ quireꞌ a baꞌ caj u yubob u jumintaꞌr.

Caꞌ a yʌn a bet aroꞌ soc yerob ca quibic u tꞌʌn Moisés raꞌ cu yaꞌaric toꞌon quir ij cuxtar.

25 Chen araꞌb tiꞌ Pablo ten u jach tsꞌurirob a yacsmʌnob tu yorob:

―A tenob,

caj in tsꞌibtob juꞌun tiꞌ a mʌꞌ u winiquirob judío,

a yacsmʌnob tu yorob u tꞌʌn Jesús.

Caj in toc arajob tiꞌob a baꞌ quin tucricob.

Caj in waꞌarajob caꞌ a chen uꞌyex a jeꞌ tꞌʌnaꞌ:

“Mʌꞌ a yʌn jantiquex a baꞌ cu yesic mac tiꞌ yochir u tus cꞌuj.

Mʌꞌ a chiꞌiquex bʌcꞌ,

a yʌn u qꞌuiqꞌueroꞌ,

yʌn sisbʌstex.

Baxuc xan,

mʌꞌ a yʌn wenʌnex yejer mac a mʌꞌ a mamexoꞌ mʌꞌ a yʌn wenʌnex yejer a mac a mʌꞌ a raqꞌuexoꞌ.”

26 Jeroj,

caj sasij caj bin Pablo yejer a rʌc yʌn u nup xiboꞌ caj u yʌn pꞌojob u bʌjob an ten bic u winiquirob judío nazarite cu pꞌoꞌic u bʌj tu tsꞌibaꞌan ich u tꞌʌn Moisés.

Caj tsꞌoc aroꞌ,

caj oquij Pablo yejer a rʌc yʌn u nup xibob ich carem naj tu naj cꞌujinticob Cꞌuj u winiquirob judío.

Jeroj,

caj u pꞌisaj u qꞌuinin tiꞌ u jach tsꞌurirob sacerdote soc yerob nupꞌ u pꞌoꞌicob u bʌjob.

Soc yerob u jach tsꞌurirob sacerdote cu bin u purob u sijejob tiꞌ Cꞌuj,

tiꞌ jujuntur cu binob an ten bic caj yaꞌaraj ten Moisés uch u tꞌʌn caꞌ bin cꞌuchuc tu qꞌuinin.

27 Barej orac manij a siete qꞌuin,

tiꞌ irij Pablo ich carem naj tu cu naj cꞌujinticob Cꞌuj u winiquirob judío.

Caj irij Pablo ten u winiquirob judío a cu tarob ich u ruꞌumin Asia.

Robob caj u pꞌusajob u yorob soc tsꞌictarob u yet winiquirob judío,

a tiꞌ yʌnob soc u tarob chucbirob Pablo.

Jeroj caj u purajob u bʌj ich yocꞌor Pablo.

28 Cꞌam awʌtnʌjob,

tan yaꞌaricob:

―Cojenex,

yam tenob u xibirechex u winiquirob israel quir in chuquicob a jeꞌ xibaꞌ.

Mʌꞌ ja wirej.

rajiꞌ tan u camsic tu cotor mac,

mʌꞌ baꞌwir caꞌ u quibej a baꞌ cu yaꞌaric u tꞌʌn ic nunquirex Moisés.

Rajen tan u camsic mʌꞌ patar a toꞌonex u winiquirob judío.

Baxuc cu yaꞌaric xan,

mʌꞌ baꞌwir tiꞌ a jeꞌ carem najoꞌ tu quic naj cꞌujintiquex Cꞌuj.

Mʌꞌ jaririꞌ,

caj u yacsaj a mʌꞌ u winiquirob judío ich a jeꞌ carem najoꞌ,

tu quic naj cꞌujintiquex Cꞌuj.

Bajeꞌrer,

caj u cꞌasquintaj a jeꞌ carem naj xan a tu quij cꞌujintiquex Cꞌuj.

29 Mʌꞌ ja wirej,

Pablo irir ten mac uch tan u man ich u cajar Jerusalén yejer u nup Trófimo.

A Trófimojoꞌ,

tiꞌ cu tar tu cajar Efeso.

Rajen caj u tus tucrajob acsaꞌboꞌ ten Pablo ich carem naj tu cu naj cꞌujinticob Cꞌuj u winiquirob judío.

30 Seb caj u muchꞌquintajob u bʌj quir u chucurob Pablo.

Orac tu cotor mac tu cajar Jerusalén caj oc u chuquej Pablo ich carem naj.

Caj chopʌtaꞌb Pablo ich tancab carem naj.

Seb caj u mʌcajob u jor a carem naj.

Caj rʌc pꞌujob yorob tu cotor mac tu cajar.

31 Quireꞌ caj u tumtob u quinsej Pablo,

caj bin tꞌʌnbir u jach tsꞌurirob soldado.

Araꞌb tiꞌ tan u rʌc pꞌujur yorob tu cotor mac tu cajar Jerusalén.

32 Caj jocꞌ u tꞌʌn u soldados yejer u capitánob.

Caj tꞌʌnob ten u jach tsꞌurir soldado.

Seb caj binob tu cu chucur Pablo.

Caj yirob cu tar u jach tsꞌurirob soldado caj pꞌat u jatsꞌʌr Pablo ten a pimoꞌ.

33 Caj cꞌuchij u jach tsꞌurir soldado yicnʌn Pablo caj araꞌb ten u jach tsꞌurir caꞌ u chucob Pablo quir u maꞌcʌr.

Caj tsꞌoc u chucur Pablo caj cꞌarij yejer caꞌtur mascab.

Jeroj tune,

caj cꞌataꞌb tiꞌ a pimoꞌ maquiꞌ,

bayiriꞌ caj cꞌataꞌb tiꞌ baꞌ u ber ca jʌtsꞌiquex.

34 Cꞌam caj u nuncajob tiꞌ a pimoꞌ.

U jer u jer cu nunquic.

Rajen u jach tsꞌurir soldado mʌꞌ yer biquinin caj pꞌusaꞌb yorob a pimoꞌ,

rajen caj araꞌb u bin purbir Pablo ten u jach tsꞌurirob soldado tu cu naj wenʌnob soldado.

35 Chen barej,

caj cꞌuchob a soldadojoꞌ yejer Pablo tu cu nacʌreꞌ.

Yʌn cꞌochbir Pablo ten a soldadojoꞌ quireꞌ jach tsꞌic a pimoꞌ.

U cꞌatob u caꞌ chuquicob Pablo.

36 Quireꞌ a mac a cu tar tu pach cꞌam awʌtnʌjob:

―Caꞌ ij quinsej a rayoꞌ ―baxuc caj yaꞌarajob a pimoꞌ.

37 Barej orac acsaꞌb Pablo tu cu naj wenʌnob soldado caj u tꞌʌnaj u jach tsꞌurir soldado Pablo:

―Cax tsicbanʌquenob?

―quij Pablo.

Caj u yaꞌaraj u jach tsꞌurir soldado:

―Quin wiric tech a wer u tꞌʌn griego.

38 Mʌꞌ wa tech u winiquirech egipto,

a tu muchꞌquintaj a pimoꞌ quir u tsꞌiquintaꞌr gobierno romano?

Mʌꞌ wa tech caj a pʌyaj u berob a pimoꞌ quir u bin u quinsob u winiquirob gobierno.

Mʌꞌ wa tech caj a muchꞌquintaj cuatro mil xib ich tʌcay ruꞌum uch?

39 Jeroj Pablo,

caj u nuncaj caj u yaꞌaraj:

―A tenoꞌ,

u winiquirenoꞌ judío.

Tar in tar ich u cajar Tarso uch.

A ray cajaroꞌ jach manan noꞌj,

raꞌ tiꞌ yʌn ich u ruꞌumin Cilicia.

Quin chan cꞌatic tech caꞌ a chaꞌj in tsicbar tiꞌ a ray pimoꞌ.

40 U jach tsꞌurir soldado caj u chaꞌj u tsicbar Pablo.

Tiꞌ cu chꞌictar tu cu nacʌr mac a cu bin tu cu naj wenʌnob u soldado romano.

Pablo caj u pecsaj u cꞌʌb caꞌ tsꞌocac u tꞌʌn a pimoꞌ.

Jeroj Pablo caj u yʌnxchun u tsicbar tiꞌob ich u tꞌʌn u winiquirob judío.