Pablo cu bin ich u ruꞌumin Macedonia bayiriꞌ ich u ruꞌumin Grecia
20
Barej caj tsꞌoc u pꞌujurob u winiquirob efesio.
Pablo caj u pʌyaj caꞌ tac u muchꞌquinticob u bʌj a yacsmʌnob tu yorob.
Caj tsꞌoc u chichquintic u yorob caj u yaꞌaraj bin u caꞌ tan u rʌc tꞌʌnanob,
caj joqꞌuij Pablo quir u bin ich u ruꞌumin Macedonia.
2 Pablo caj man yirej a yacsmʌnob tu yorob ich tu cotor a ray ruꞌumoꞌ.
Caj oquij Pablo tu yʌnob suꞌ caj u chichquintaj u yorob yejer u tꞌʌnob.
Caj tsꞌoc u man ti taroꞌ caj ruqꞌuij quir u bin ich u ruꞌumin Grecia.
3 Tiriꞌ pꞌat Pablo ich u ruꞌumin Grecia mʌnaꞌ u nup ic nʌꞌ.
Jach tabar u bin ich chem quir u bin ich u ruꞌumin Siria.
Pablo caj u yubaj yaꞌaraꞌ ten mac tan u pajarob u mucu chucbirob ten u winiquirob judío quir u quinsaꞌ,
rajen caj u tucraj u wʌcꞌʌs bin tu yoc ich u ruꞌumin Macedonia.
4 Caj bin Pablo yet binac Sópater a cʌjaꞌan ich u cajar Berea.
Yet binac Aristarco yejer Segundo,
robob cʌjaꞌanob ich u cajar Tesalónica.
Yet binac Gayo yejer Timoteo a cʌjaꞌan tu cajar Derbe.
Yet binacob Tíquico yejer Trófimo,
robob cʌjaꞌanob tu ruꞌumin Asia.
5 Robob yʌn binob quir u pajicoꞌon ich u cajar Troas.
6 Pablo caj cꞌuchij tu yʌnenob,
quij Lucas.
Tiꞌ cꞌuchij Pablo ich u cajar Filipos.
Tiriꞌ pꞌatenob hasta manij u qꞌuinin u quiꞌquiꞌ janʌnob u winiquirob judío,
raꞌ cu janticob yoꞌoch pan a mʌꞌ u sipꞌeꞌ.
Caj manij cinco u qꞌuinin jeroj,
caj cꞌuchenob ich u cajar Troas tiriꞌ tin nupꞌajob ij quet acsaꞌorirex a tan u pajiquenob,
a robob a yʌn binob ucheꞌ.
Tiriꞌ xan caj in masajob turi semana,
quij Lucas.
Pablo cu yiric u cajar Troas
7 Caj cꞌuchij tu qꞌuinin domingo raꞌ u qꞌuinin cu yʌnxchun semana caj u rʌc muchꞌquintajob u bʌj a yacsmʌnob tu yorobeꞌ.
Mʌꞌ ja wirej,
tar u muchꞌquinticob u bʌj quir u janʌnob an ten bic caj janʌnob u camsʌwinicob Jesús yejer Jesús quireꞌ yer saman bin u caꞌ quinsbir Jesús.
Caj tsꞌoc u janʌnob a yacsmʌnob tu yorob Pablo caj u camsaj tiꞌob quireꞌ yer saman bin u caꞌ Pablo.
Jach amaꞌan caj u camsaj tiꞌob Pablo hasta chumuc acꞌbir caj u camsaj tiꞌob.
8 Tu muchꞌaꞌanob a yacsmʌnob tu yorob u tꞌʌn Jesús taj muchꞌaꞌan caꞌanan tu mʌnaꞌ u nup u tsꞌʌpquinmʌnob naj.
Tiriꞌ tꞌʌbaꞌan yaꞌab quib quir u yeꞌcꞌacꞌticob tu yʌnob.
9 Tiꞌ yʌn tuririꞌ chan xib curucbar ich u nʌcꞌ naj tu cu yocar u sasir chunqꞌuin.
U cꞌabaꞌ chan xib Eutico.
Tac u wenʌn,
a chan xiboꞌ,
quireꞌ amaꞌan tu camsic u tꞌʌn Cꞌuj Pablo.
Jeroj wenij,
quiꞌ wenij,
jeroj caj pitcꞌʌjij ich caꞌanan mʌnaꞌ u nup u tsꞌʌpquinmʌnob naj.
Caj rubij ich ruꞌum,
caj ricꞌsaꞌb caj u yirob mʌnaꞌ,
quimij.
10 Chen Pablo caj emij yirej.
Caj u yiraj quimij.
Jeroj Pablo caj xonrʌj,
caj u chꞌaj u mecꞌaj Pablo a chan xiboꞌ.
Pablo caj u yaꞌaraj tiꞌ a yacsmʌnob tu yorob:
―Mʌꞌ u jacꞌʌr a worex,
quireꞌ cuxaꞌan bajeꞌrer,
Cꞌuj caj u ricꞌsaj tu quimirir.
11 Jeroj tuneꞌ,
Pablo wʌcꞌʌs naquij caꞌanan ich a najoꞌ caj janij yejer u yet acsaꞌorirob.
Caj tsꞌoc u janʌn,
jach amaꞌan tsicbanʌjij Pablo hasta sasij,
jeroj binij.
12 Barej caj ricꞌsaꞌb a chan xiboꞌ ten Pablo robob caj u yacsajob ich naj,
jach quiꞌ yorob.
Cu tsecꞌtic u tꞌʌn Cꞌuj Pablo tu cajar Mileto
13 Pablo caj u yaꞌaraj bin u caj u yoc ich u cajar Asón.
A tenoboꞌ,
quij Lucas,
caj oquenob ich chem quir in binob Asón.
Tiꞌ cu bin ocar Pablo ich chem yejerenob,
ich u cajar Asón quireꞌ baxuc caj u yaꞌaraj Pablo uch.
A tenoboꞌ,
quij Lucas,
pʌyber quin binob,
jeroj caj oquenob caj binenob.
14 Caj cꞌuchenob ich u cajar Asón.
Tiriꞌ caj in nupꞌajob Pablo caj oquij Pablo ich chem tu yʌnenob,
jeroj caj binenob,
quij Lucas,
tu cajar Mitilene.
15 Caj ruqꞌuenob,
ich u cajar Mitilene caj oquenob ich chem caj binenob.
Caj sasij caj cꞌuchenob ich ʌcʌtan u ruꞌumin Quío.
U jer u qꞌuinin caj sasij caj cꞌuchenob ich u jor chem u cajar Samos.
Jeroj caj wʌcꞌʌs ruꞌqꞌuenob ich chem.
Caj ic jeꞌsaj ic bʌjex ich u cajar Trogilio,
jeroj,
caj sasij caj cꞌuchenob tu cajar Mileto.
16 Mʌꞌ oquenob ich u cajar Efeso,
quij Lucas,
quireꞌ mʌꞌ u cꞌat Pablo u pꞌatʌr yaꞌab u qꞌuinin ich u ruꞌumin Asia.
Mʌꞌ ja wirej,
rajiꞌ u cꞌat seb u cꞌuchur ich u cajar Jerusalén caꞌ bin tac tu qꞌuinin Pentecostés,
jaj ix tiꞌ wa cu cꞌuchur.
Pablo cu tsicbʌtic tiꞌ u jach tsꞌurirob a yacsmʌnob tu yorob u tꞌʌn Jesús tu cajar Efeso
17 Quireꞌ tiꞌ toy yʌn ich u cajar Mileto,
Pablo caj u tuchiꞌtaj tꞌʌnbir a nuxiboboꞌ u jach tsꞌurirob a yacsmʌnob tu yorob tu cajar Efeso caꞌ tacob tu cajar Mileto.
18 Barej caj cꞌuchob u jach tsꞌurir a nuxiboboꞌ ich yicnʌn Pablo,
caj araꞌb tiꞌob ten Pablo caj yaꞌaraj tiꞌob:
―A ray u qꞌuininoꞌ caj yʌn batꞌan cꞌuchen ich u ruꞌumin Asia,
a tenoꞌ caj cuxrajen bayiriꞌ caj beyanʌjen an ten bic in naj betic tac tu qꞌuinin ruqꞌuen ich techex.
19 Techex a wirmʌnenex tiꞌ yʌnen tu yʌnechex u burur qꞌuin caj in betaj u beyaj Jaj Tsꞌur tu cotor in wor.
Mʌꞌ jin tucraj wa jach caremen,
quireꞌ caj beyanʌjen tiꞌ in Jaj Tsꞌurir.
Susuꞌ ocꞌnʌjen quireꞌ a baꞌ tar teneꞌ.
Mʌꞌ ja wirej,
a baꞌ caj u tucrajob u winiquirob judío caj u tsꞌaj in mucꞌyajob.
20 A techexoꞌ ―quij Pablo―,
caj a wirajex bic mʌꞌ jin xur in tsecꞌtechex tu cotor a baꞌ yaꞌarmʌn ten Cꞌuj.
Mʌꞌ ja wirej,
caj in camsaj techex tu ca naj muchꞌquintiquex a bʌj quir a wuꞌyiquex u tꞌʌn Cꞌuj,
bayiriꞌ xan,
caj in camsaj techex ich jujuntur a watochex.
21 Ʌcʌtan tu wich Cꞌuj,
caj in toc araj tiꞌ u winiquirob judío bayiriꞌ xan,
tiꞌ a mʌꞌ u winiquirob judío.
Caj in toc araj tiꞌob caꞌ u cꞌaxob tu yorob caꞌ u pꞌʌtob u cꞌasir tu cu manob soc u yacsicob tu yorob u tꞌʌn Jaj Tsꞌur Jesús.
22 Bajeꞌrer quin man ich u cajar Mileto.
Bin in caꞌ ich u cajar Jerusalén.
Bajeꞌrer cu tuchiꞌtiquen u Tajꞌor u Pixam Cꞌuj,
quireꞌ quin quibic u tꞌʌn u Tajꞌor u Pixam Cꞌuj.
Mʌꞌ in wer baꞌ in ber a tenoꞌ caꞌ bin cꞌuchuquen ich u cajar Jerusalén.
23 Chen jariꞌ in wer tu quin bin ich tu cotor u cajarob caj in wuꞌyaj yaꞌaraꞌ ten u Tajꞌor u Pixam Cꞌuj:
Bin u caꞌob u chuquechob caꞌ u puriquechob tu cu naj maꞌcʌr mac.
Bayiriꞌ xan,
caj u yaꞌaraj:
Bin a caꞌ mucꞌyaj yaꞌab,
quij.
24 Mʌꞌ jin chen tucrej wa quinsaꞌben a tenoꞌ.
Mʌꞌ jin chen tucrej in cuxtar a tenoꞌ.
Chen a baꞌ quin jach tucriqueꞌ,
caꞌ in tsꞌocs in beyaj a caj u tsꞌaj in beyaj Jesús soc jach quiꞌ in wor wa cu tsꞌocar in beyaj soc mʌnaꞌ in tucric in beyajiꞌ.
Mʌꞌ ja wirej,
tsꞌaꞌb in beyaj quir in tsicbʌtic tiꞌ mac,
caꞌ yubej u jach tsoyir u tꞌʌn Jesús.
A jeꞌ tꞌʌnaꞌ cu yaꞌaric tiꞌ mac bic Cꞌuj otsir yiric mac.
25 ’Taj quin man ich tu yʌnechex uch caj in toc tsecꞌtaj techex bic tabar cu bin u reyinticob Cꞌuj.
Bajeꞌrer tsꞌoc in tsecꞌtic techex,
quireꞌ in toc er mʌꞌ ja caꞌ irenex tu caꞌten ich yocꞌocab.
26 Bajeꞌrer ―quij Pablo―,
jach taj quin waꞌaric techex wa mac tu cotor ich techex cu satʌr u pixam,
mʌnaꞌ in siꞌpir a tenoꞌ.
27 Mʌꞌ ja wirej,
caj in toc araj techex tu cotor a baꞌ cu tucric Cꞌuj cu betic.
28 Rajen quiꞌ cʌnantex a bʌjex.
Bayiriꞌ xan,
caꞌ a cʌnantex tu cotor a mac a caj u yacsajob tu yorob u tꞌʌn Jaj Tsꞌur an ten bic u yʌjcʌnanyʌjir tʌmʌn yuc cu cʌnantic u yʌrʌcꞌ tʌmʌn yuc.
Quireꞌ caj u tetajechex u Tajꞌor u Pixam Cꞌuj soc a beyajex.
Mʌꞌ ja wirej,
Jesús caj u rʌc boꞌotaj u boꞌorir u siꞌpirob a yacsmʌnob tu yorob caj quimij ich cruz,
soc rajiꞌ yʌninob.
29 In wer caꞌ bin xiquenoꞌ jeꞌ u tar mac quir u tusiquechexob soc a pꞌʌtiquex a wacsiquex ta worex u tꞌʌn Jesús.
A ray macoꞌ,
irob a barum,
a jach tsꞌicoꞌ,
raꞌ cu chen tar u rʌc chiꞌic a wʌrʌcꞌ cax.
30 Jin,
quen,
cax a yacsmʌnob tu yor u tꞌʌn Jesús tu yʌnechex,
jeꞌ u riqꞌuirob yirej wa cu tusiquechexob.
Quir u camsiquechexob a baꞌ quiriꞌ mʌꞌ tajiꞌ soc a sayʌrex tu pachob quir a cʌniquex u tꞌʌnob.
31 Rajen quiꞌ cʌnantex a bʌjex tiꞌ a mac a baxucoꞌ.
A rajraꞌ quiꞌ tucrex an ten bic ca cꞌʌꞌotiquenex u burur qꞌuin,
bayiriꞌ xan,
u burur acꞌbir tac mʌnaꞌ u nup yaxqꞌuin caj in chichquint a worex tu quin mucꞌyaj ta wicnʌnex uch.
32 ’A bajeꞌrer,
in wet acsaꞌorirex,
in cꞌat Cꞌuj caꞌ u quiꞌ cʌnan techex.
In wer u tꞌʌn Cꞌuj tiꞌ u jach tsoyir u pixam Cꞌuj jeꞌ u cʌnantiquechex xan.
U tꞌʌn Cꞌuj jeꞌ u cʌnantic a worex quireꞌ cu yaꞌaric bic tabar jach tsoy a Cꞌujoꞌ.
Mʌꞌ ja wirej,
u tꞌʌn Cꞌuj cꞌuchaꞌan yor u chichquintic a worex,
soc mʌꞌ a pꞌʌtiquex a wacsiquex ta worex hasta caꞌ bin a cꞌʌmiquex a baꞌ caj u toc araj Cꞌuj caꞌ bin cꞌuchuc tu qꞌuinin.
Raꞌ ca bin a cꞌʌmiquex quet yejer tu cotor a mac a yacsmʌnob tu yorob u tꞌʌn Jesús.
Mʌꞌ ja wirej,
Cꞌuj jeꞌ u muchꞌquintic a tu tetajeꞌ soc rajiꞌ yʌnin Cꞌuj,
caꞌ bin cꞌuchuc tu qꞌuinin.
33 A tenoꞌ,
mʌꞌ jin pachtaj a noqꞌuexiꞌ,
mʌꞌ jin pachtaj a taqꞌuinex xan ―quij Pablo―.
34 A bʌjiriꞌex a werex caj in jaraj in taqꞌuin yejer u bʌjiriꞌ in beyaj soc wa baꞌ in cꞌat quin mʌnic.
Bayiriꞌ xan,
a mac in wet tsicbarob u tꞌʌn Cꞌuj,
caj in jʌsaj tiꞌob a baꞌ u cꞌat xan.
35 Mʌꞌ ja wirej,
a tenoꞌ rajraꞌ caj in wesaj techex wa ca chich beyajex an ten bic ten caj in betaj,
jeroj,
yʌn a batꞌan yamtiquex a mac a yʌn u yajir.
Cꞌʌꞌotej techex u tꞌʌn ic Jaj Tsꞌurirex.
Rajiꞌ caj u yaꞌaraj:
“Baꞌ cu jach quiꞌquintic yor mac,
a baꞌ ca tsꞌic tiꞌ mac,
mʌꞌ chen a baꞌ cu cꞌʌmiqueꞌ.”
36 Barej caj tsꞌoc u tsicbar aroꞌ an ten bic nanij cu beticob,
caj xonrʌj Pablo yejer tu cotorob quir u tꞌʌnic Cꞌuj.
37 Caj acꞌtaꞌb Pablo ten tu cotor a nuxibob u jach tsꞌurirob a yacsmʌnob tu yorob,
caj rʌc ocꞌnʌjob tu cotor.
Jeroj caj u pʌtʌxmecꞌtaꞌb Pablo u jach tsꞌurirob a yacsmʌnob tu yorob tu cajar Efeso.
Caj tsꞌutsꞌaꞌb u pꞌuc Pablo,
quireꞌ bin u caꞌ.
38 Jach yaj cu yacꞌticob,
quireꞌ yubob yaꞌaric Pablo.
Mʌꞌ u yʌnyʌn bin irbir u wich.
Hasta yet binacob tu cu yocar ich chem Pablo.