Pablo ich u cajar Efeso
19
U qꞌuinin tiꞌ toy yʌn Apolos ich u cajar Corinto,
a Pablojoꞌ cu man ich tu cotor u ruꞌumin tu chꞌenchꞌen u ruꞌumin,
tu manij uch hasta cꞌuchij tu cajar Efeso.
Tiriꞌ caj u yiraj jun yarob mac a yacsmʌnob tu yorob u tꞌʌn Cꞌuj jariꞌ yerob a baꞌ caj u yaꞌaraj uch a Juanoꞌ a cu yacsic jaꞌ tu joꞌr mac.
2 Pablo caj u cꞌataj tiꞌob:
―Caj a wacsajex waj a worex u tꞌʌn Cꞌuj ta cꞌʌmajex wa ju Tajꞌor u Pixam Cꞌuj?
Robob caj u yaꞌarajob:
―Mʌꞌ ij cuꞌyajex wa tiꞌ yʌn u Tajꞌor u Pixam Cꞌuj.
3 Caj u cꞌataj tiꞌob:
―Bic tabar acsaꞌb jaꞌ ta joꞌrex uch?
Robob caj u nuncajob tiꞌ:
―Acsaꞌb jaꞌ tij coꞌrex an ten bic Juan caj u camsaj mac uch.
4 Caj u yaꞌaraj Pablo:
―Mʌꞌ ja wirej,
Juan caj u yacsaj jaꞌ tu joꞌr mac quir yesic mac caj u cꞌaxaj u yor,
quireꞌ yʌn u siꞌpirob uch.
Bayiriꞌ xan,
caj araꞌb ten Juan tiꞌ u winiquirob judío:
“Caꞌ a wacsex ta worex tiꞌ a mac a cu tar tin pach.”
Raꞌ u cꞌat yaꞌaric:
“Acsex a worex tiꞌ Jesús,
a mac a Cristojoꞌ.”
5 Barej,
a jeꞌ mac a yacsmʌnob tu yorob a mac nupꞌ ten Pablo ich u cajar Efeso caj tsꞌoc u yubicob yaꞌaraꞌ ten Pablo,
caj acsaꞌb jaꞌ tu joꞌrob tu cꞌabaꞌ Jaj Tsꞌur Jesús,
quir yesicob u jach tsꞌurinticob Jesús.
6 Barej caj tsꞌoc u tsꞌancꞌabʌꞌrob ten Pablo,
jeroj tuneꞌ caj tar u Tajꞌor u Pixam Cꞌuj soc tiꞌ yʌn tu yicnʌnob.
Raꞌiriꞌ u qꞌuinin caj u yʌnxchun u tsicbʌticob ich u jer u tꞌʌnob a mʌnaꞌ mac cu najticob,
Bayiriꞌ xan,
caj u tsecꞌtajob u tꞌʌn Cꞌuj quireꞌ tsꞌaꞌb u tucur ten Cꞌuj quir u tsicbʌticob a baꞌ u cꞌat Cꞌuj.
7 Rajiꞌob mac a caj u yacsjob tu yorob a tiꞌ yʌn doce xiboꞌ.
8 Pablo tiꞌ yʌn mʌnaꞌ u nup ic nʌꞌ ich a ray cajaroꞌ,
tan u yocar ich u chan najir tu cu naj cꞌujinticob Cꞌuj u winiquirob judío.
Mʌꞌ ju jacꞌʌr yor u tsecꞌtic u tꞌʌn Cꞌuj.
Rajraꞌ cu tsicbʌtic tiꞌob bic tabar cu reyinticob Cꞌuj,
soc ix tiꞌ cu yacsicob tu yor tiꞌ Cꞌuj wa taj.
9 Yʌn jun yarob u winiquirob judío caj chichnʌjij u joꞌrob.
Mʌꞌ u cꞌat u cꞌʌmicob u tꞌʌn Cꞌuj,
caj u pꞌastajob u jach tsoyir u tꞌʌn Cꞌuj ʌcʌtan a mac a muchꞌaꞌanob ich u chan najir tu cu naj cꞌujinticob Cꞌuj u winiquirob judío.
Pablo caj joqꞌuij tu yʌnob a chichnʌjij u joꞌrob caj binij Pablo.
Tar bin tu najir tu cu cʌnicob juꞌun,
tiriꞌ oquij Pablo.
Yet taracob a mac a yacsmʌnob tu yorob.
U najir tu cu cʌnicob juꞌun pach u cꞌabaꞌ Tiranno.
Tiriꞌ caj u tsecꞌtaj u tꞌʌn Cꞌuj yaꞌab u qꞌuinin ich u najir tu cu cʌnicob juꞌun.
10 Baxuc caj u betaj Pablo ich u najir tu cu cʌnicob juꞌun hasta manij caꞌtur yaxqꞌuin.
Rajen caj u yubajob u tꞌʌn Jaj Tsꞌur ich tu cotor mac ich u ruꞌumin Asia,
cax u winiquirob judío,
cax mʌꞌ u winiquirob judío caj u rʌc uꞌyajob u tꞌʌn Jaj Tsꞌur.
11 Quireꞌ tsꞌaꞌb u mucꞌ ten Cꞌuj Pablo soc jach manan carem u beyaj.
12 Mʌꞌ ja wirej,
jach carem u beyaj Pablo,
cax cu tsꞌabʌr panyuj a caj u tʌraj u yotꞌer Pablo,
cax cabachaj cu chꞌic a caj u tʌraj u yotꞌer Pablo caj cꞌuchob ich Pablo.
Caj u chꞌajob u noqꞌuir cu tsꞌabʌr u tʌrej Pablo,
caꞌ u jenquintaj yocꞌorob a mac yajoꞌ caꞌ jawʌcob u yajirob,
jeroj tuneꞌ,
caj jawij.
Bayiriꞌ xan,
a mac acaꞌan quisin tiꞌ,
caj joqꞌuij a quisininiꞌ.
13 Tiꞌ yʌn jun yarob u winiquirob judío.
Mʌꞌ ju cutarob quireꞌ man u caꞌob.
A jeꞌ u winiquirob judío cu manob tan u jocꞌsicob tiꞌ a mac acaꞌan quisin tiꞌeꞌ.
Caj cꞌuchij tu qꞌuinin u cꞌatob u jocꞌsicob u quisin a acaꞌan tiꞌ mac,
chen caj u cꞌʌnob u cꞌabaꞌ Jaj Tsꞌur quir u jocꞌsic.
Chen a ray xibob,
mʌꞌ yacsmʌnob tu yorob u tꞌʌn Jesús,
rajen caj u tꞌʌnajob a mac a acaꞌan quisin tiꞌeꞌ,
caj u yaꞌarajob tiꞌ:
―Joqꞌuen quisin ich u cꞌabaꞌ Jaj Tsꞌur Jesús a cu tsecꞌtic Pablo.
14 Robob a mac a cu jocꞌsicob u quisin,
robob u siete u parar a tuririꞌ u winiquirob judío,
Esceva u cꞌabaꞌ.
A Escevajoꞌ,
tuririꞌ u jach tsꞌurir ich a sacerdote u winiquirob judío.
15 Jeroj tuneꞌ,
nuncaꞌb ten a quisinoꞌ tiꞌ a siete u parar Esceva.
A quisinoꞌ,
caj u yaꞌaraj:
―A tenoꞌ in cꞌʌꞌo u mucꞌ Jesús,
bayiriꞌ xan,
in cꞌʌꞌo u mucꞌ Pablo.
Chen a maquechex,
quireꞌ mʌꞌ u winiquechex Jesús?
16 Chen a mac a acaꞌan quisin tiꞌeꞌ,
caj u puraj u bʌj ich yocꞌor a siete u parar Esceva,
caj rʌc roxij u parar Esceva hasta mʌꞌ u riqꞌuirob u parar Esceva.
Jeroj tuneꞌ,
caj chʌc putsꞌob u parar Esceva tiꞌ a mac a acaꞌan quisin tiꞌeꞌ,
cax jach yaj chʌc putsꞌob a siete u parar Esceva,
caj jocꞌob ich naj caj u cꞌʌnajob yacab tan u jocꞌar u qꞌuiqꞌuer.
17 A baꞌ u ber tiꞌ u parar Esceva caj yub u jumintaꞌr ten tu cotor mac,
cax u winiquirob judío,
cax mʌꞌ u winiquirob judío ich u cajar Efeso.
Caj u rʌc chꞌajob chꞌic yum sajaquir ten tu cotor mac,
caj u caremquintob u cꞌabaꞌ Jaj Tsꞌur Jesús.
18 Rajen yaꞌab mac a caj u yaꞌarajob caj u yacsajob tu yorob caj tarob yaꞌarej bic tabar caj cuxrajob uch caj u toc arob jach cꞌas caj u betajob uch,
tan u cꞌʌyicob mac.
19 Yaꞌab mac a cu xaquicob juꞌun a yʌnin a quisinoꞌ uch,
caj u muchꞌquintajob u juꞌunin quir u toquicob ich ʌcʌtan tu cotor mac.
Caj u xacajob mun u boꞌorir u juꞌunin a caj u tocajobeꞌ,
caj u yirajob cincuenta mil sʌc taqꞌuin u boꞌorir u juꞌunin.
20 Tu cotor a baꞌ u ber raꞌ cu yesic jach manan u mucꞌ u tꞌʌn Cꞌuj.
Rajen yaꞌab mac,
yejer u jer yaꞌab mac,
rajraꞌ cu yubicob u tꞌʌn Jaj Tsꞌur.
Bayiriꞌ xan,
yaꞌab mac,
yejer u jer yaꞌab mac,
cu yacsob tu yorob u tꞌʌn Jesús.
21 Caj tsꞌoc u man a jeꞌ tu cotoraꞌ,
Pablo caj u tucraj tu yor u bin ich u ruꞌumin Macedonia,
bayiriꞌ xan,
ich u ruꞌumin Acaya quir u yiric u yet acsaꞌorirob.
Caꞌ bin tsꞌocac aroꞌ,
caj u tucraj u caꞌ bin ich u cajar Jerusalén.
Jeroj pachir cu bin ich u cajar Roma.
22 Pablo caj u tuchiꞌtaj ich u ruꞌumin Macedonia caꞌ tur yʌjyaminob u beyaj.
Robob Timoteo yejer Erasto.
Chen u bʌjiriꞌ Pablo tiꞌ toy pꞌat yaꞌab u qꞌuinin ich u ruꞌumin Asia.
Jach pꞌusaꞌb yorob mac ich u cajar Efeso
23 A ray u qꞌuininoꞌ,
caj u pꞌusajob u yorob mac quireꞌ yubob bic tabar u jach tsoyir u tꞌʌn Cꞌuj cu man ich tu cotor mac.
24 Caj pꞌusaꞌb u yorob mac,
quireꞌ tiꞌ yʌn tuririꞌ xib u cꞌabaꞌ Demetrio,
raꞌ u beyaj cu joꞌtꞌic sʌc taqꞌuin.
Rajiꞌ cu betic u chan najir tu cu joꞌtꞌic sʌc taqꞌuin soc irej a cu cꞌujinticob u winiquirob efesio.
Robob cu cꞌujinticob u tus cꞌuj xquic Diana.
Tu cu joꞌtꞌicob u chan najir Diana Demetrio cu nejaric u taqꞌuin,
mʌꞌ chen rajiꞌ baxuc tu cotor mac a cu joꞌtꞌicob sʌc taqꞌuin.
25 Demetrio caj u muchꞌquintaj u racꞌob a ju yet beyajob,
bayiriꞌ xan,
a mac a quet cu joꞌtꞌicob sʌc taqꞌuin an ten bic Demetrio cu betic.
Caj tsꞌoc u muchꞌquinticob u bʌj caj u yaꞌaraj Demetrio:
―U xibirechex u cajar Efeso,
a techexoꞌ,
a werex quic nejariquex ic taqꞌuinex tu quic joꞌtꞌiquex a sʌc taqꞌuinoꞌ.
26 Chen a techexoꞌ,
a wiramʌnex Pablo baxuc a wuꞌymʌnex bic tabar u man u tsicbʌtic Pablo,
quireꞌ rajiꞌ cu yaꞌaric u yochir cꞌuj a baꞌ cu beticob xib mʌꞌ jach Cꞌuj.
Rajen yaꞌab mac caj u quibob a baꞌ cu yaꞌaric.
Chen mʌꞌ jariꞌ ij quet cajarob Efeso caj u quibicob,
bayiriꞌ xan,
tu cotor mac a cʌjaꞌanob ich u ruꞌumin Asia caj u quibob.
27 A jeraꞌ ―quij Demetrio―,
jach cꞌas wa cu rʌc cꞌʌmicob a baꞌ tan u camsaꞌr ten Pablo,
mʌꞌ chen ic rʌc sʌtiquex ic beyajex,
mʌnaꞌ mac cu bin u sʌjticob tu quij cꞌujintiquex ij cꞌujex Diana.
Mʌꞌ ja wirej,
jach carem ij cꞌujex Diana,
tu cotor mac bajeꞌrer cu cꞌujinticob ij cꞌujex Diana cax ich u ruꞌumin Asia cax ich yocꞌocab.
Wa cu rʌc quibicob a baꞌ araꞌb ten Pablo mʌꞌ ju cꞌujintob ij cꞌujex Diana,
bayiriꞌ xan tu cotor mac ich yocꞌocab a cu cꞌujinticob ij cꞌujex Diana,
mʌꞌ ju cꞌujintob xan,
ij cꞌujex Diana ―baxuc caj u yaꞌaraj Demetrio.
28 Barej caj tsꞌoc u yubicob a baꞌ araꞌb tiꞌob ten Demetrio caj jach pꞌujob,
jach cꞌam awʌtnʌjob caj u yaꞌarob:
―Jach carem ij cꞌujex u cꞌujir u winiquirob efesio.
Jach chich u mucꞌ ij cꞌujex u cꞌujir u winiquirob efesio.
29 Caj mac u xiquinob tu cu yawatob.
Mʌꞌ ja wirej,
u jer u jer mac ich tu cotor u cajar caj u yʌnxchun u yawatob.
Jeroj tuneꞌ,
caj chucajob Gayo yejer Aristarco caj chopʌytaꞌb.
A ray xiboꞌ,
caj tarob ich u ruꞌumin Macedonia yejer Pablo uch,
quireꞌ pꞌeriꞌob u manob yejer Pablo.
Jeroj caj u rʌc cꞌʌnajob yacab ich tu cuch tu cu naj muchꞌquinticob u bʌj u winiquirob efesio.
30 Pablo u cꞌat yocar tu muchꞌaꞌanob a jach pꞌujob quir u tsicbar yejerob.
Chen a yacsmʌnob tu yorob,
mʌꞌ ju chaꞌbʌr u yocar Pablo.
31 Bayiriꞌ xan,
yʌn jun yarob u jach tsꞌurirob u ruꞌumin Asia u jach yajob Pablo,
rajen tuchiꞌtaꞌbob tꞌʌnbir Pablo soc mʌꞌ ju yocar tu muchꞌaꞌanob a jach pꞌujoboꞌ.
32 Tiꞌ toy cu macʌrob u xiquinob tu cu jach awʌtob a pimoꞌ tu muchꞌaꞌanob.
U jer u jer cu yawʌt,
u jer u jer cu nunquicob awat.
Yaꞌab mac mʌꞌ yerob biquinin caj u muchꞌquintajob u bʌj.
33 Caj tenchꞌintaꞌb Alejandro ten jun yarob u winiquirob judío.
Tenchꞌintaꞌb caꞌ xic tsicbar yejer a pimoꞌ,
a tiꞌ muchꞌaꞌanob.
Mʌꞌ ja wirej,
araꞌb tiꞌ Alejandro ten jun yarob mac biquinin caj tarob u muchꞌquintob u bʌj u winiquirob efesio.
Alejandro caj u nacsaj u cꞌʌb soc caꞌ macʌc u chiꞌob a pimoꞌ.
Mʌꞌ ja wirej,
u cꞌat u tsicbar yejer pimoꞌ soc taquicob u bʌj u winiquirob judío,
quireꞌ mʌnaꞌ u siꞌpirob u winiquirob judío,
quireꞌ a baꞌ u berob u winiquirob efesio sam.
34 Barej caj u yirajob a pimoꞌ Alejandro caj cꞌʌꞌotaꞌb Alejandro rajiꞌ u winiquir judío ten a pimoꞌ.
Rajen pꞌeriꞌob caj u jach cꞌamquintajob u tꞌʌnob caj yaꞌarob:
―Jach carem ij cꞌujex Diana u cꞌujir u winiquirob efesio ―baxuc caj awʌtnʌjob orac u chucpʌjʌr caꞌtur hora.
35 Barej raꞌ u qꞌuinin cꞌuchaꞌan yor yʌjtsꞌibir juꞌun ich u cajar Efeso caj sisquintaꞌb yorob a pimoꞌ u winiquirob efesio,
caj rʌc tsꞌoc yawʌtob caj u yaꞌaraj tiꞌob:
―Uꞌyex baꞌ quin waꞌaric techex u xibirechex u cajar Efeso.
Tu cotor mac ich yocꞌocab toc yerob quij cʌnantiquex yatoch ij cꞌujex Diana.
Jach carem ij cꞌujex Diana.
Tu cotor mac yerob quij cʌnantiquex u tunichir a jach taj rubij yochir ij cꞌujex Diana caꞌanan.
36 Mʌnaꞌ mac cꞌuchaꞌan yor u maꞌquinticob aroꞌ quireꞌ taj quen.
Rajen toc xur a tꞌʌnex bajeꞌrer.
Mʌꞌ a yʌn betiquex baꞌ,
wa mʌꞌ ta yʌn quiꞌquiꞌ tucrexiꞌ.
37 Mʌꞌ ja wirej,
a jeꞌ xibaꞌ,
a caj a chucajex caj a purex teraꞌ.
Mʌnaꞌ cꞌas caj u betajob tiꞌ ij cꞌujex Diana.
Mʌꞌ ju pꞌastajobiꞌ.
Mʌꞌ ju yaꞌcrajob baꞌ a tiꞌ yʌn ich u yatoch ij cꞌujex Diana.
38 Rajen wa Demetrio yejer u yet joꞌtꞌ sʌc taqꞌuinob yʌn baꞌ quir u taquicob u joꞌr mac,
arej u binob ich ʌcʌtan jach juez u cajar tu cu naj tocar u joꞌr mac.
Tiꞌ a ray carmen najoꞌ,
tiꞌ yʌn tu cu pacran tocar u joꞌrob mac.
39 Cax wa yʌn u jer baꞌ a ca waꞌariquex bajeꞌrer,
soc a quetquintic a tucurex caꞌ a muchqꞌuintiquex a bʌjex tu cu naj muchquinticob u bʌj u jach tsꞌurirob quir u tsicbʌticob a baꞌ a cꞌatex.
Quireꞌ baxuc tiꞌ tsꞌibaꞌan u juꞌunin ic cajarex.
40 Mʌꞌ ja wirej,
toc pecaꞌan in worob quir u tocar in joꞌrob ten gobierno ich u cajar Roma wa cu cꞌatic tenob baꞌwir pꞌujechex bajeꞌrer,
quireꞌ mʌnaꞌ baꞌ cꞌuchaꞌan in worob in waꞌaricob tiꞌ ―baxuc caj u yaꞌaraj yʌjtsꞌibir juꞌunin ich u cajar Efeso.
41 Caj tsꞌoc u yaꞌaric baxucoꞌ,
caj u tuchiꞌtaj caꞌ xicob tu yatochob a pimoꞌ u winiquirob efesio.