Pablo ich u cajar Corinto
18
Caj tsꞌoc u tsecꞌtic u tꞌʌn Cꞌuj ich a mac a tiꞌ yʌnob ich Areópago,
caj ruqꞌuij Pablo ich u cajar Atenas caj bin ich u cajar Corinto.
2 Tiriꞌ Pablo caj u nupꞌaj u yet winiquirob judío Aquila,
yejer u racꞌ Priscila.
Tar u tarob ich u ruꞌumin Ponto.
Tan tu cꞌuchurob ich u cajar Corinto tiꞌ u ruꞌumin Italia,
quireꞌ rʌc jocꞌsaꞌb tu cotor u winiquirob judío ten a reyoꞌ,
u cꞌabaꞌ Claudio.
Rajiꞌ caj u yaꞌaraj caꞌ rʌc jocꞌacob tiꞌ u cajar Roma.
A Pablojoꞌ,
bin yirej Aquila yejer u racꞌ Priscila.
3 Quireꞌ yʌjchuyirob u noqꞌuir naj.
Mʌꞌ ja wirej,
raꞌ u beyaj Pablo xan.
Rajen tiriꞌ pꞌatij Pablo soc pꞌeriꞌob u beyajob.
Robob cu canicob u noqꞌuir naj quir u jaricob u taqꞌuinob.
4 Rajraꞌ cu cꞌuchur tu qꞌuinin cu jesicob u bʌj u winiquirob judío cu bin Pablo ich u chan najir tu cu naj cꞌujinticob Cꞌuj u winiquirob judío.
Tiriꞌ tsicbanʌjij Pablo yejer u winiquirob judío,
bayiriꞌ yejer a mac u winiquirob griego,
caj u yaꞌaraj tiꞌob caꞌ yacsej yorob u tꞌʌn Jesús.
Mʌꞌ ja wirej,
rajiꞌ u cꞌat u yesic a baꞌ tajiꞌ,
a baꞌ rajiꞌ cu tsicbʌtic Jesucristo.
5 Barej caj cꞌuchob Silas yejer Timoteo.
Mʌꞌ ja wirej,
tiꞌ pꞌatob ich u ruꞌumin Macedonia uch,
rajen tiꞌ u tarob ich u ruꞌumin Macedonia.
Robob caj u yirajob bic a Pablojoꞌ tsꞌajan yor u tsecꞌtic u tꞌʌn Jesús ich u winiquirob judío.
Mʌꞌ ja wirej,
caj u camsaj u winiquirob judío wa Jesús,
rajiꞌ jach taj Cristo a cu pajicob u winiquirob israel.
6 Chen tsꞌiquintaꞌb Pablo ten u yet winiquirob judío,
caj cꞌam nuncaꞌb u tꞌʌnob Pablo.
Rajen Pablo u bʌjiriꞌ u nocꞌ caj u titaj,
soc u najticob u yet winiquirob judío soc yerob bin u caꞌ pꞌʌtbirob tu junan.
Mʌꞌ ja wirej,
mʌꞌ ju cꞌʌmajob u tꞌʌn Cꞌuj,
rajen Pablo caj u yaꞌaraj:
―Wa cu satʌr a pixamex a bʌjiriꞌex a siꞌpirexeꞌ.
Mʌꞌ a yʌn pʌqꞌuiquex in pach ―quij Pablo―.
Bajeꞌrer bin in caꞌ in tsecꞌtej u tꞌʌn Cꞌuj ich a mʌꞌ u winiquirob judío.
7 Caj ruqꞌuij tu chan najir tu cu naj cꞌujinticob Cꞌuj a ray u winiquirob judío,
caj bin ich yatoch Justo.
Rajiꞌ cu cꞌujintic Cꞌuj.
Tiꞌ yʌn yatoch Justo caꞌracꞌ yejer u chan najir tu cu naj cꞌujinticob Cꞌuj u winiquirob judío.
8 U jach tsꞌurir u chan naj tu cu naj cꞌujinticob Cꞌuj u winiquirob judío.
Rajiꞌ caj u yacsaj tu yor u tꞌʌn Jesús.
Crispo u cꞌabaꞌ.
Bayiriꞌ xan,
tu cotor mac tu yatoch Crispo caj u yacsajob tu yorob u tꞌʌn Jesús xan.
Bayiriꞌ xan,
yaꞌab u winiquirob corintio caj tsꞌoc u yubicob u tꞌʌn Jaj Tsꞌur caj u yacsajob tu yorob,
jeroj caj acsaꞌb jaꞌ tu joꞌrob xan.
9 Caj araꞌb tiꞌ Pablo ten Jaj Tsꞌur ich u wʌyacꞌ:
―Mʌꞌ u jacꞌʌr a wor a tsecꞌtej.
Mʌꞌ u xur a bin a tsecꞌtej.
10 Quireꞌ tiꞌ yʌnen yejerech quir in cʌnantiquech.
Mʌnaꞌ mac cu bin u chuquiquech u quinsech quireꞌ yaꞌab cʌjaꞌan ich u cajar Corinto bin u caꞌ u yacsob tu yorob in tꞌʌn ―baxuc araꞌb tiꞌ Pablo ten Jaj Tsꞌur.
11 Rajen tiriꞌ pꞌatij Pablo ich u cajar Corinto.
Tiꞌ pꞌatij tuririꞌ yaxqꞌuin caj tar u jer chumuc yaxqꞌuin.
Rajiꞌ caj u camsaj tiꞌob a baꞌ araꞌb ten Cꞌuj.
12 Raꞌ u qꞌuinin tiꞌ toy yʌn u gobernador Galión u ruꞌumin Acaya.
Yʌn jun yarob u winiquirob judío,
caj u muchꞌquintob u bʌj quir u chuquicob Pablo.
Robob caj u chucajob Pablo,
caj bin purbirob ich juez quir u tocar u joꞌr Pablo.
13 Caj araꞌb ten u winiquirob judío tiꞌ a juezoꞌ:
―A jeꞌ xibaꞌ,
cu camsic caꞌ ij cꞌujintex Cꞌuj chen mʌꞌ baxuc caj camsaꞌboꞌonex ten u rey César.
14 Pablo u cꞌat u nunquic,
chen tu yʌn araj a juezoꞌ tiꞌ u winiquirob judío:
―Uꞌyex baꞌ quin waꞌaric techex u winiquirechex judío.
Wa yʌn u siꞌpir wa jach cꞌas caj u betaj,
jeroj jeꞌ in wuꞌyiquex a tꞌʌnexeꞌ u winiquirechex judío.
15 Chen mʌꞌ baxucoꞌ,
jach tsꞌiquechex,
quireꞌ a baꞌ camsaꞌbechex a jeꞌ xibaꞌ.
Rajen jach tsꞌiquechex quireꞌ a baꞌ camsaꞌbechex ten a nunquirex yejer a baꞌ araꞌb ten ich u tꞌʌn a nunquirex xan.
A tenoꞌ ―quij juez―,
mʌꞌ jin waꞌaraj wa yʌn u siꞌpir wa mʌnaꞌ u siꞌpir.
A bʌjiriꞌex ca bin a sisquintex a worex.
Jot.
16 Caj tuchiꞌtaꞌb caꞌ xicob u winiquirob judío.
Caj jocꞌsaꞌbob tancab caꞌ xicob.
17 Barej caj jocꞌsaꞌbob ten juez tu yʌnob uch,
u winiquirob judío caj u chucajob Sóstenes.
Raꞌ u cꞌabaꞌ u jach tsꞌurir u chan najir tu cu naj cꞌujinticob Cꞌuj u winiquirob judío.
Jeroj tuneꞌ,
caj u raxajob Sóstenes,
cax ʌcʌtan juez caj rox.
Mʌꞌ tꞌʌnob ten a juezoꞌ cax iric cu roxaꞌr Sóstenes.
Pablo u caꞌ bin ich u cajar Antioquía bayiriꞌ xan, cu caꞌ chun u tsecꞌtic u tꞌʌn Cꞌuj ich u jer ruꞌum
18 Caj tsꞌoc u roxaꞌr u jach tsꞌurir u chan najir tu cu naj cꞌujinticob Cꞌuj u winiquirob judío,
tiꞌ pꞌat Pablo yaꞌab u qꞌuinin ich u cajar Corinto.
Jeroj tuneꞌ,
caj u tꞌʌnaj u yet acsaꞌrirob tan yaꞌaric bin u caꞌ.
Yet binacob Aquila yejer u racꞌ Priscila,
caj ocob ich chem quir u binob tu ruꞌumin Siria.
Barej caj cꞌuchij ich u jor u chemir u cꞌabaꞌ Cencrea,
caj cꞌos u joꞌr Pablo soc u yesic nupꞌij a baꞌ caj u toc araj Pablo tiꞌ Cꞌuj uch soc Cꞌuj cu yiric.
19 Barej caj cꞌuchob ich u cajar Efeso,
caj pꞌat Aquila yejer u racꞌ Priscila,
jeroj tuneꞌ,
caj bin Pablo tu yʌn u chan najir tu cu naj cꞌujinticob Cꞌuj u winiquirob judío,
quireꞌ tiꞌ yʌn muchꞌaꞌanob u winiquirob judío.
Tiriꞌ tsicbanʌjij Pablo yejerob.
20 U yet acsaꞌorirob,
a tiꞌ yʌnob caj u chich cꞌatajob caꞌ pꞌatʌc Pablo yejerob yaꞌab u qꞌuinin.
Chen Pablo caj u maꞌquintaj mʌꞌ ju pꞌatar.
21 Tabar u bin Pablo caj u yaꞌaraj:
―Bin in caꞌ ich u cajar Jerusalén soc tiꞌ yʌnen tu qꞌuinin u quiꞌquiꞌ janʌnob u winiquirob judío.
Wa tsoy tu tꞌʌn Cꞌuj ―quij―,
jeꞌ in wʌcꞌʌs tar in wirechex ―quij.
Jeroj oquij ich chem caj u pꞌʌtaj u cajar Efeso.
22 Barej caj cꞌuchij ich u cajar Cesarea,
caj bin ich u cajar Jerusalén,
caj cꞌuchij caj oquij tu cu muchꞌquinticob u bʌj a yacsmʌnob tu yorob caj tꞌʌnob.
Caj tsꞌoc u tꞌʌnanob caj bin Pablo ich u cajar Antioquía.
23 Caj tsꞌoc u pꞌatʌr yaꞌab u qꞌuinin ich u cajar Antioquía,
caj joqꞌuij Pablo quir u bin ich tu cotor u cajarob ich u ruꞌumin Galacia yejer u ruꞌumin Frigia cu chichquintic u yorob a mac a yacsmʌnob tu yorob u tꞌʌn Jesús.
Apolos cu tsecꞌtic u tꞌʌn Cꞌuj ich u cajar Efeso
24 Tiꞌ yʌn tuririꞌ u winiquir judío u cꞌabaꞌ Apolos.
Tar u tar uch ich u cajar Alejandría,
quireꞌ tiriꞌ rochaꞌb ten u nʌꞌ Apolos.
Tuririꞌ u qꞌuinin caj cꞌuchij Apolos ich u cajar Efeso.
Apolos u jach er u tsecꞌtaꞌr u tꞌʌn Cꞌuj,
bayiriꞌ xan,
u jach quiꞌ er tu tsꞌibaꞌan u tꞌʌn Cꞌuj.
25 Toc camsaꞌb Apolos tiꞌ u tꞌʌn Jesús.
Cu man u tsicbʌtic u tꞌʌn Jesús,
caj u tsecꞌtaj u tꞌʌn Cꞌuj,
quireꞌ rajiꞌ cu tsicbar an ten bic mac yer tsicbar,
jach quiꞌ yor u tsicbar quireꞌ u jach er tsicbar.
Chen Apolosoꞌ,
jariꞌ yer bic acsaꞌb jaꞌ tu joꞌr mac ten Juan,
yejer a baꞌ camsaꞌb ten Juan uch.
26 Apolos caj u chich tsecꞌtaj u tꞌʌn Cꞌuj ich u chan najir tu cu naj cꞌujinticob Cꞌuj u winiquirob judío.
Mʌꞌ ju jacꞌʌr u yor Apolos u tsecꞌtej.
Caj tsꞌoc u yubicob u tsꞌectic u tꞌʌn Cꞌuj Apolos.
Aquila yejer Priscila caj u pʌyajob Apolos,
quir u tsicbarob tu junanob,
quir u quiꞌ camsicob Apolos u tꞌʌn Cꞌuj quireꞌ yʌn baꞌ mʌꞌ toy yubej Apolos.
27 Apolos u cꞌat u bin ich u ruꞌumin Acaya,
rajen u yet acsaꞌorirob caj u yaꞌaraj u bin.
Caj yamtaꞌb Apolos ten u yet acsaꞌorirob ich u cajar Efeso.
Robob caj u tsꞌibtajob u juꞌunin tiꞌ u yet acsaꞌorirob ich u ruꞌumin Acaya soc u quiꞌ acsaꞌ Apolos.
Caj cꞌuchij ich u ruꞌumin Acaya caj quiꞌ yamtaꞌb a yacsmʌnob tu yorob ten Apolos.
Quireꞌ robob caj u yacsajob tu yorob quireꞌ jach tsoy caj betaꞌbob ten Cꞌuj.
28 Caj nuncaꞌb u tꞌʌn Apolos ten u winiquirob judío,
chen mʌꞌ cꞌuchaꞌan u yorob u nunquicob u tꞌʌn Apolos.
Quireꞌ cu tsicbʌtic tiꞌob yejer u mucꞌ Cꞌuj,
bayiriꞌ xan,
quireꞌ u necʌnmʌn u tꞌʌn Cꞌuj,
Apolos.
Caj u yaꞌaraj tiꞌob a baꞌ tiꞌ yʌn tsꞌibaꞌan ich u tꞌʌn Cꞌuj,
soc yerob taj wa Jesús rajiꞌ tetaꞌb ten Cꞌuj,
quir u tar ich yocꞌocab,
rajen rajiꞌ Cristo a mac u winiquirob judío cu yaꞌaric Mesías.