A JEꞌRAꞌ U JACH TSOYIR U TꞌɅN CꞌUJ TU TSꞌIBTA JUAN
A jeraꞌ cu tsicbar tiꞌ toꞌonex a mac a cu tar ich Cꞌuj soc u tsicbʌtic toꞌonex bicyʌraꞌ Cꞌuj
1
Mʌꞌ toy betac ruꞌum mʌꞌ toy betac caꞌanan xan.
Rajraꞌ tiꞌ yʌn a mac a cu bin tar u tsicbar toꞌonex bicyʌraꞌ Cꞌuj.
Rajiꞌ tiꞌ yʌn yejer ic Tet Cꞌuj quireꞌ rajiꞌ Cꞌuj a cu bin tar.
2 Rajraꞌ tiꞌ yʌn a mac a cu bin tar ich ic Tet Cꞌuj cax mʌꞌ toy betac ruꞌum yejer caꞌanan xan.
La Palabra (Juan 1.1-18)
3 Tu cotor a baꞌ tiꞌ yʌn,
rajiꞌ u beyaj Cꞌuj.
Mʌnaꞌ mac u jer tu betaj.
Rajiꞌ tu junan caj u betaj.
4 Rajiꞌ tu junan cu tsꞌic ij cuxtarex.
Rajiꞌ tu tsꞌaj ic najtiquex ij cuxtarex munt qꞌuin.
Quireꞌ a baꞌ caj u betaj rajen rajiꞌ u sasirir toꞌonex a mac a cu manob ich yocꞌocab a mac a cu manob ich yacꞌbirir quireꞌ yʌn u siꞌpirob.
5 Rajiꞌ quib a cu yeꞌcꞌacꞌtic tu yʌn acꞌbir.
A acꞌbiroꞌ mʌꞌ cꞌuchaꞌan yor u tupic u sasirir.
Baxuc arayoꞌ yejer Jesús xan,
cax mʌꞌ u cꞌatob Jesús mac.
Rajiꞌ tan u tsꞌic toꞌonex ij cuxtarex munt qꞌuin.
A jeraꞌ cu tsicbar bic tabar u parar Cꞌuj tu chꞌaj u winquirir
6 A uchoꞌ tiꞌ yʌn mac u cꞌabaꞌ Juan.
Rajiꞌ tsꞌaꞌb u beyaj ten Cꞌuj.
7 A Juanoꞌ caj u tsecꞌtaj u sasirir a cu tar ich Cꞌuj a cu sasiquintic mac.
Mʌꞌ ja wirej,
wa quij cacsiquex ij corex u sasirir ic pixamex,
mʌꞌ acꞌbir ic pixamexiꞌ.
Juan caj u tsecꞌtaj soc u yacsic tu yor tu cotor mac a baꞌ cu yubic yaꞌaric Juan.
8 A Juanoꞌ mʌꞌ raꞌ cu sasiquintic mac,
u sasirir a cu tar ich Cꞌuj,
cu chen tsecꞌtic a cu sasiquintic mac.
Quireꞌ araꞌb tiꞌ caꞌ u tsecꞌtej.
9 Wa ber a Juanoꞌ tan u tsecꞌtic tiꞌ uch.
Toc tsꞌoc u cꞌuchur teraꞌ ich yocꞌocab,
rajiꞌ a cu tsꞌic ij cuxtarex soc u sasiquintic ic pixamex.
Quireꞌ raꞌ u beyaj.
10 Rajiꞌ cꞌuchij ich yocꞌocab a caj u betaj yocꞌocab.
Chen mʌꞌ cꞌʌꞌotaꞌb ten a mac tiꞌ yʌn ich yocꞌocaboꞌ.
11 Caj cꞌuchij ich yocꞌocab soc u yet manob u winiquirob judío a mac tetaꞌb ten Cꞌuj uch.
Chen mʌꞌ tu sʌjtajobiꞌ.
12 Chen yʌn mʌꞌ yaꞌab mac a tu sʌjtajoꞌ,
a tu yacsaj tu yor a tiꞌoꞌ.
Rajiꞌob yer tsꞌaꞌb u beyaj ten Cꞌuj soc u toꞌcar tiꞌob.
Araꞌb tiꞌob ten Cꞌuj,
rajiꞌob u parar Cꞌuj a cu yacsicob tu yor tiꞌ.
13 Mʌꞌ ja wirej,
a maqueꞌ u parar Cꞌuj quireꞌ caj u yacsaj tu yor.
Rajiꞌ mʌꞌ baxuc a mac jach pararintaꞌb ten u tet quireꞌ rajiꞌ quir a cuxtar techex yocꞌocab.
Rajiꞌ mʌꞌ baxuc u pararintaꞌb ten u nʌꞌ quireꞌ baxuc cu pachtic u pararʌncʌr a xquicoꞌ.
Chen a mac a ju parar Cꞌuj munt qꞌuin u cuxtar.
14 Chen a mac a tar tsicbʌta toꞌonex bicyʌraꞌ Cꞌuj tu chꞌaj u winquirir an ten bic toꞌonex.
Tarij soc ij quet man a mac a ju winiquirob judío.
Tij quiraj jach manan u mucꞌ.
Quireꞌ rajiꞌ u parar Cꞌuj,
rajen baxuc jach manan u neꞌer baꞌ.
Ic Tet Cꞌuj jariꞌ tuririꞌ u parar.
Rajiꞌ quet cu yajquintoꞌonex.
Rajiꞌ quet taj cu tsicbar.
15 A Juanoꞌ caj u tsecꞌtaj tiꞌ a cu bin tar.
Caj u yaꞌaraj tiꞌ:
―A jeroj,
bin,
a mac a tin waꞌaraj techex uch.
A pachir cu tar,
rajiꞌ jach noꞌj beyaj caj in waꞌaraj.
Chen in beyaj a tenoꞌ,
mʌꞌ nenoꞌjeniꞌ.
Cax mʌꞌ toy u rochen in nʌꞌ,
u toc beriꞌ a tiꞌoꞌ quireꞌ rajraꞌ tiꞌ yʌn.
16 Quireꞌ jach tsoy yor a cu tar ich Cꞌuj,
rajen u jach tsoyirir Cꞌuj caj ij cꞌʌmaj.
Rajraꞌ tan u tsꞌic toꞌon a baꞌ tsoy tu tꞌʌn Cꞌuj.
17 Mʌꞌ ja wirej,
u winiquirob judío caj u cꞌʌmajob u nunquirob u tꞌʌn Cꞌuj a tsꞌab ten Moisés uch.
Chen a Jesucristojoꞌ caj u yesaj bic Cꞌuj caj u yajquintaj toꞌonex quireꞌ otsir toꞌonex yiricoꞌonex.
Quireꞌ a Jesucristojoꞌ xan tij cuꞌyajex u tꞌʌn Cꞌuj a baꞌ taj.
18 Mʌnaꞌ mac yirmʌn Cꞌuj.
Chen u parar Cꞌuj tu yiraj u Tet.
Jariꞌ u parar tuririꞌ rajiꞌ jach yajbir ten u Tet.
Rajiꞌ caj u yesaj toꞌonex bicyiraꞌ Cꞌuj.
Juan a cu yacsic jaꞌ tu joꞌr mac caj u tsecꞌtaj tiꞌ Jesucristo
19 U winiquirob judío a tiꞌ cʌjaꞌanob ich u cajar Jerusalén.
Rajiꞌob caj u tuchiꞌtajob sacerdote yejer a mac a cu beyajob ich carem naj tu cu naj cꞌujinticob u winiquirob judío.
Levitas u cꞌabaꞌob.
Tuchiꞌtaꞌb quir u cꞌataꞌ tiꞌ Juan:
―Maquechiꞌ?
Juan el Bautista identifica al Mesías (Juan 1.19-34)
20 A Juanoꞌ mʌꞌ ju mucraj caj u yaꞌaraj:
―Mʌꞌ Cristojeniꞌ,
mʌꞌ yʌjtaquiren maquiꞌ,
a cu bin tar.
21 Caj u caꞌ cꞌatob tiꞌ Juan:
―Arej toꞌon maquechiꞌ?
A techoꞌ wa Elíasech soc in waꞌaricob tiꞌ in racꞌob a tu tuchiꞌtenob?
Juan caj yaꞌaraj:
―Mʌꞌ Elíaseniꞌ.
Caj u caꞌ cꞌatob tiꞌ:
―Mʌꞌ wa tech yʌjtseqꞌuirech u tꞌʌn Cꞌuj a tan in pajicob u tar?
Juan caj u nuncaj,
tan yaꞌaric tiꞌob:
―Mʌꞌ teniꞌ.
22 A tuchiꞌtaꞌb caj u yaꞌarob tiꞌ Juan:
―Arej tenob maquechiꞌ soc in waꞌaricob tiꞌ a macob a tu tuchiꞌtenob baꞌ a beyaj tech,
arej tenob.
23 A Juanoꞌ caj u nuncaj caj u yaꞌaraj:
―Isaías caj u tsecꞌtaj tiꞌ ten uch.
Baxuc a jeraꞌ caj u tsecꞌtaj Isaías uch tan yaꞌaric:
“Tiꞌ cu bin tar mac caꞌ bin cꞌuchuc tu qꞌuinin quir u cꞌam tsecꞌtic ich tʌcay ruꞌum.”
Cꞌam cu bin yaꞌaric:
“Tajquintex a worex soc cꞌuchaꞌan a worex a quiꞌ acsiquex Jaj Tsꞌurir irex ca jariquex u ber soc u tar rey.”
Baxuc caj yaꞌaraj Isaías uch.
24 A mac tuchiꞌtaꞌb ten u winiquirob judío a fariseojoꞌ caj cꞌuchob ich Juan.
25 Caj cꞌuchob caj u cꞌatajob tiꞌ Juan:
―Biquinin ca wacsic jaꞌ tu joꞌr mac wa mʌꞌ tech Cristojech?
Quireꞌ mʌꞌ Elíasech xan,
baxuc mʌꞌ yʌjtseqꞌuirech u tꞌʌn Cꞌuj xan?
26 Juan caj yaꞌaraj tiꞌob:
―A tenoꞌ raꞌ in beyaj quir in wacsic jaꞌ tu joꞌr mac.
Chen a mac jach noꞌj beyaj tiꞌ yʌn tu yʌnechex bajeꞌrer.
Chen a techex mʌꞌ a cꞌʌꞌomʌnexiꞌ.
27 Rajiꞌ a cu tar pachir rajiꞌ jach noꞌj u beyaj chen a tenoꞌ mʌꞌ jach noꞌjen beyaj.
Mʌꞌ pataren a tenoꞌ cax in chen pitic u cꞌanin pechꞌ u xʌnʌb.
28 Caj tarob u cꞌatej tiꞌ Juan tu yʌn cu yaꞌaricob Betábara,
rajiꞌ pichir yaꞌarir Jordán tu cu tar ic yum.
Ti taroꞌ Juan tan yacsic jaꞌ tu joꞌr mac.
Juan caj u yaꞌaraj: Rajiꞌ irej u tʌmʌn yuc Cꞌuj
29 U jer u qꞌuinin Juan caj yiraj Jesús Juan.
A Jesúsoꞌ tan u jutsꞌic u bʌj ich yicnʌn Juan.
Caj yaꞌaraj Juan:
―Ir a wirex a jeꞌ cu taroꞌ tsꞌaꞌb u beyaj ten Cꞌuj.
Rajiꞌ irej u tʌmʌn yuc Cꞌuj quireꞌ cu bin u quinsaꞌr soc u rʌc rucꞌsic ic siꞌpirex.
Baxuc tu cotor mac a tiꞌ yʌn ich yocꞌocab.
30 A jeraꞌ a tin yʌn batꞌan araj tech uch caj in waꞌaraj techex:
“A pachir cu taroꞌ,
rajraꞌ tiꞌ yʌn a pachir cu tar cax mʌꞌ toy u rochen in nʌꞌ uch a tiꞌoꞌ.
Toc beriꞌ uchoꞌ.”
31 Juan caj yaꞌaraj:
―A tenoꞌ xan mʌꞌ tin cꞌʌꞌotaj wa rajiꞌ ij cʌjtaquirex.
Mʌꞌ ja wirej,
taren in wacsic jaꞌ tu joꞌr u winiquirob judío soc u cꞌʌꞌoticob a cu tar ich Cꞌujoꞌ.
32 Juan caj yaꞌaraj tiꞌob:
―A tenoꞌ caj in wiraj u yeman u Tajꞌor u Pixam Cꞌuj ich caꞌanan,
irej susuy caj cꞌuchij tu yʌniꞌ.
Tiꞌ pꞌatij tu yʌniꞌ.
33 A tenoꞌ uch mʌꞌ tin cꞌʌꞌotaj.
Chen a Cꞌujoꞌ a tu tsꞌaj in beyaj quir in wacsic jaꞌ tu joꞌr mac caj yaꞌaraj ten Cꞌuj:
“Caꞌ bin a wirej,
quij Cꞌuj,
u yeman u Tajꞌor u Pixam Cꞌuj.
Ca wiric tu cu pꞌatʌr yejer.
Rajiꞌ cu bin u tsꞌic tech u Tajꞌor u Pixam Cꞌuj.”
Baxuc caj yaꞌaraj Cꞌuj tiꞌ ten ―quij Juan―.
34 Baxuc caj in wiraj,
rajen quin wac techex rajiꞌ u parar Cꞌuj.
U camsʌwinicob Jesús a tu yʌn pʌyajeꞌ
35 U jer u qꞌuinin a Juanoꞌ tiriꞌ yʌn tu yʌn joꞌraj.
Tiꞌ yʌn Juan yejer caꞌtur u camsʌwinicob.
Los seguidores siguen a Jesús (Juan 1.35-51)
―Iriquex a jeraꞌ,
rajiꞌ irej u tʌmʌn yuc Cꞌuj,
quir u rucꞌsic u siꞌpir tu cotor mac ich yocꞌocab.
37 Caj yubob yaꞌaric Juan a caꞌtur u camsʌwinicob Juan caj sayob tu pach Jesús.
38 Jesús caj u sut u bʌj u pʌctej tu pach.
Caj yiraj tan u tar tu pach,
caj araꞌb tiꞌob:
―Baꞌ ca cʌxtiquex?
―quij.
Robob caj yaꞌarob tiꞌ:
―In wʌjcamsʌyʌjirechob,
tu cʌjaꞌanech?
39 Jesús caj u nucaj tiꞌob,
tan yaꞌaric:
―Cuxex a wirej.
Caj cꞌuchob tu yirajob tu cʌjaꞌan.
Jesús caj u yacsaj tiꞌob quireꞌ tabar u bin qꞌuin.
Tiꞌ wenob.
40 Tuririꞌ a tu yuba yaꞌaric Juan,
a caꞌtur u camsʌwinic,
caj say tu pach Jesús,
rajiꞌ u cꞌabaꞌ Andrés.
Rajiꞌ u sucuꞌun Simón Pedro.
41 Seb caj bin u cʌxtej u sucuꞌun Simón.
Caj yaꞌaraj tiꞌ:
―Tin wiraj a cu yaꞌaraꞌ Mesías ―rajiꞌ u cꞌat yaꞌaric Cristo a tuchiꞌtaꞌb ten Cꞌuj.
42 Andrés caj bin yejer u sucuꞌun tub yʌn Jesús.
Caj irir Simón ten Jesús,
caj u yaꞌaraj tiꞌ:
―A techoꞌ ―quij Jesús―,
Simónech,
u pararech Jonás.
Chen yʌn in pʌchic a cꞌabaꞌ Cefas,
aroꞌ Pedro a cꞌabaꞌ ―a Cefasoꞌ ich u tꞌʌn u winiquirob judío,
quet ich u tꞌʌn griego cu yaꞌaric Pedro.
Jesús cu pʌyic Felipe yejer Natanael
43 Caj sasij Jesús u cꞌat u bin ich u ruꞌumin Galilea.
Mʌꞌ toy xiquiꞌ caj u nupꞌa Felipe caj yaꞌara tiꞌ:
―Sayen ―quij Jesús―,
tin pach quir a cʌnic in tꞌʌn.
44 A jeꞌ Felipejaꞌ tiꞌ cʌjaꞌan ich u cajar Betsaida.
Tu cʌjaꞌanob Andrés xan yejer Pedro.
45 Felipe caj bin u cʌxtej Natanael,
caj u yiraj caj yaꞌaraj tiꞌ:
―Tij quiraj ―quij Felipe―,
a mac tsꞌibtaꞌb ten ic nunquir Moisés uch ich u tꞌʌnob.
Baxuc rajiꞌob tu tsꞌibtajob ic nunquir yʌjtseqꞌuirob u tꞌʌn Cꞌuj uch.
Baxuc rajiꞌ u parar José a tiꞌ cʌjaꞌan ich u cajar Nazaret.
46 Natanael caj cꞌataj tiꞌ Felipe tan yaꞌaric:
―Mʌꞌ ij cuꞌwimʌn a mac jach tsoy a cu tar ich u cajar Nazaret.
Felipe caj u nuncaj:
―Cojen irej ―quij yaꞌaraj tiꞌ.
47 Jesús caj u yiraj tan u cꞌʌs jutsꞌic u bʌj Natanael ich Jesús.
Jesús caj yaꞌaraj:
―A jeꞌ cu taraꞌ a mac taj u yor ich u winiquirob judío.
Mʌꞌ yer bic tabar u tus aric mac.
48 Natanael caj u cꞌataj tiꞌ:
―Bic a cꞌʌꞌotiquen?
Jesús caj yaꞌaraj tiꞌ:
―A tenoꞌ ―quij Jesús―,
caj in wirech yaran u cheꞌer higuera cax mʌꞌ toy u tꞌʌnech Felipe.
49 Caj araꞌb tiꞌ ten Natanael:
―In wʌjcamsʌyʌjirech ―quij Natanael―,
a techoꞌ u pararech Cꞌuj.
Baxuc jeꞌ a wocar a reyintic u winiquirob judío.
50 Jesús caj u nuncaj tiꞌ,
tan yaꞌaric:
―Quireꞌ ―quij Jesús―,
caj in waꞌaraj tech caj in wirech yaran u cheꞌer higuera,
rajen caj a wacsa ta wor ten?
Jach tsoy baxuc,
quireꞌ ta wacsaj ta wor.
Caꞌ bin cꞌuchuc tu qꞌuinin jeꞌ in wesic tech jach manan in neꞌer baꞌ.
51 Baxuc xan Jesús caj u yaꞌaraj tiꞌ u camsʌwinicob.
―Taj a baꞌ quin wac techex.
A techexoꞌ jeꞌ a wiriquex u qꞌueꞌpʌjʌr caꞌanan soc a wiriquex u yeman yʌjmasirob u tꞌʌn Cꞌuj tu yʌnen.
Jeꞌ a wiriquex u nacar ich caꞌanan yʌjmasirob u tꞌʌn Cꞌuj.
Quireꞌ a tenoꞌ baxuquenechexoꞌ.