Juan caj u tsecꞌtaj ich tʌcay ruꞌum. Tiꞌ caj u yacsaj jaꞌ tu joꞌr mac
3
Tiꞌ toy cʌjaꞌan Jesús ich u cajar Nazaret,
caj tarij Juan ich u ruꞌumin Judea.
Caj u tsecꞌtaj ich tʌcay ruꞌum.
Caj u yacsaj jaꞌ tu joꞌrob macob.
2 Caj u tsecꞌtaj Juan caj yaꞌaraj:
―Cꞌaxex a worex caꞌ a pꞌʌtex a cꞌasoꞌ quireꞌ cꞌuchij tu qꞌuinin u reyinticob Cꞌuj ―baxuc caj u yaꞌaraj Juan.
3 A jeꞌ Juanaꞌ,
quij Mateo,
tsꞌibtaꞌb uch ten yʌjtseqꞌuir u tꞌʌn Cꞌuj Isaías.
Caj yaꞌaraj Isaías tiꞌ Juan uch cax mʌꞌ tac Juan:
Quij cuꞌwic u tꞌʌn,
quij Isaías.
Quij cuꞌwic u tꞌʌn mac cu tsecꞌtic ich tʌcay ruꞌum.
Aroꞌ a cu tsecꞌtic quij cuꞌwic u yaꞌaric:
“Tajquintex a worex soc cꞌuchaꞌan a worex a quiꞌ acsiquex Jaj Tsꞌur,
irex ca jariquex u ber soc u tar rey.”
Baxuc caj u tsꞌibtaj Isaías tiꞌ Juan uch.
Rajen a bajeꞌrer nupꞌ u tꞌʌn Cꞌuj.
4 A Juanoꞌ u tsotser yʌrʌcꞌ camello cu sactaꞌ u buquintej.
U cꞌax u nʌcꞌ Juanoꞌ,
otꞌ.
Cꞌaxicab cu mʌqꞌuic Juan,
yejer sacꞌ cu chiꞌic Juan.
5 Pim mac cu bin ich Juan quir yubicob u tsecꞌtaꞌ ten Juan.
Tar u tarob ich u cajar Jerusalén.
Tar u tarob ich u ruꞌumin Judea.
Jach pim binob ich Juan a cu tarob ich u ruꞌumin Judea.
6 A mac a caj u yaꞌaraj tiꞌ Cꞌuj,
yʌn u siꞌpir.
A caj u yaꞌaraj yʌn u siꞌpir jawsaꞌb u siꞌpir ten Cꞌuj.
Rajen acsaꞌb jaꞌ tu joꞌrob ten Juan ich yaꞌarir Jordán.
7 Caj yiraj Juan caj tarob u winiquirob judío a fariseojoꞌ.
Yet tarob judío a u winiquirob saduceojoꞌ.
Quireꞌ u winiquirob judío a fariseojoꞌ cu quiꞌ cʌnanticob u tꞌʌn u nunquirob Moisés.
Barej u winiquirob judío a saduceojoꞌ cu yaꞌaricob:
―Mʌnaꞌ mac cu riqꞌuir tiꞌ quimen.
Pim caj yiraj u tarob Juan,
a saduceojoꞌ yejer a fariseojoꞌ.
Caj tarob a saduceojoꞌ yejer a fariseojoꞌ quir yacsaꞌ jaꞌ tu joꞌrob ten Juan.
Caj irir caj araꞌb tiꞌob ten Juan:
―A techexoꞌ ―quij Juan―,
jach cꞌasechex.
U pararechex quisin.
A mac arej a putsꞌurex quireꞌ tabar u tar xur tꞌʌn.
A cꞌat wa ja taquiquex a bʌj?
8 Juan caj u yaꞌaraj tiꞌob:
―Toc pꞌʌtex a cꞌasirex tu ca mʌnex,
soc a mʌnex tu tsoyir,
soc chʌcaꞌan yiricob a racꞌob caj a jach cꞌaxex a worex.
9 Juan caj u yaꞌaraj tiꞌ a saduceojoꞌ yejer a fariseojoꞌ:
―Mʌꞌ a yʌn tucriquex a waꞌariquex ta worex.
Mʌꞌ chichin ca waꞌariquex:
“U chꞌic pararenob Abraham.
Mʌꞌ ja wirej,
raꞌ in nunquirobꞌ.”
Mʌꞌ ja tucriquex wa ju taquiquechex Cꞌuj quireꞌ u chꞌic pararechex a nunquirex Abraham.
Caj araꞌb tiꞌob ten Juan:
―Uꞌyex baꞌ quin wac techex.
A Cꞌujoꞌ cꞌuchaꞌan yor u waysic a jeꞌ tunichaꞌ soc rajiꞌob u chꞌic pararob a nunquirex Abraham soc u cʌnicob a nunquirex Abraham.
10 Juan caj u yaꞌaraj tiꞌ a fariseojoꞌ yejer a saduceojoꞌ:
―Bajeꞌrer an ten bic cꞌuchij tu qꞌuinin u chꞌʌcar cheꞌ a cꞌasoꞌ a mʌnaꞌ u wicheꞌ.
Tiꞌ cu bin purbir caꞌ tocac ich cꞌacꞌ.
Baxuc xan,
a mac a mʌꞌ u betej a baꞌ tsoyir,
raꞌ cu bin uꞌwibir u tsꞌictar ten Cꞌuj.
11 Caj yaꞌaraj Juan:
―A tenoꞌ jach jaj quin wacsic jaꞌ tu joꞌr mac a caj u pꞌʌtaj a cꞌasoꞌ quireꞌ caj u cꞌaxaj tu yor.
Caꞌ bin tac Cristo.
Tabar u tar Cristo.
Rajiꞌ Cristo cu bin u tsꞌic techex u Tajꞌor u Pixam Cꞌuj soc a wet manex u Tajꞌor u Pixam Cꞌuj soc u rʌc rucꞌsic tu cotor a cꞌasirex.
Caꞌ bin tac a Cristojiꞌ jach noꞌoj.
A tenoꞌ ―quij Juan―,
mʌꞌ noꞌojeniꞌ.
Mʌꞌ ja wirej,
a tenoꞌ mʌꞌ jach pajareniꞌ in pitic u cꞌanin u pechꞌ xʌnʌb,
cax u cꞌurewen a tenoꞌ.
12 Caj yaꞌaraj Juan:
―Caꞌ bin tacoꞌ a Cristojoꞌ,
jeꞌ u jʌsic techex irej techex ca rucꞌsiquechex u sor a wochex trigo.
Chen a tsoyoꞌ,
raꞌ cu pꞌatʌr a wochex trigo.
Ca puriquex u sor a toꞌquiquex.
Baxuc caꞌ bin xuruc tꞌʌn,
caꞌ bin u muchꞌquinticoꞌon ic Tetex Cꞌuj.
A cꞌasoꞌ,
raꞌ cu bin purbir ich cꞌacꞌ tu mʌꞌ u tupur cꞌacꞌ.
Chen a tsoyoꞌ cu bin yacsac ich caꞌanan.
Acsaꞌb jaꞌ tu joꞌr Jesús ten Juan
13 Raꞌ u qꞌuininoꞌ,
caj tarij Jesús ich Juan.
Tar u tar ich u ruꞌumin Galilea.
A Juanoꞌ tiꞌ yʌn.
Juan nʌtsꞌaꞌan ich yaꞌarir Jordán.
Tarij ich Juan caꞌ acsac jaꞌ tu joꞌr ten Juan.
14 Chen Juan mʌꞌ ju cꞌat yacsic jaꞌ tu joꞌr.
Caj yaꞌaraj Juan:
―A tenoꞌ,
ca yʌn acsic jaꞌ tin joꞌr ―quij Juan―.
A techoꞌ,
mʌꞌ tarech quir in wacsic jaꞌ ta joꞌriꞌ.
A Juan u cꞌat u yiric u cꞌaxic u tucur Jesús rajen caj u yaꞌaraj Juan tiꞌ Jesús.
15 Caj u nuncaj Jesús caj araꞌb tiꞌ Juan:
―Tsireꞌej bajeꞌrer.
Mʌꞌ ja waꞌaric.
Acsej jaꞌ tin joꞌr.
Caꞌ ic betej tu cotor a baꞌ tsoy tu tꞌʌn Cꞌuj.
Rajen Juan caj u yacsaj jaꞌ tu joꞌr Jesús.
16 Caj tsꞌoc u yacsic jaꞌ tu joꞌr Jesús ten Juan caj joqꞌuij Jesús ich chiꞌ jaꞌ,
caj yiraj u buj caꞌanan.
Seb caj yiraj Jesús u Tajꞌor u Pixam Cꞌuj.
Caj emij tiꞌ caꞌanan.
Caj irir ten Jesús caj emij u Tajꞌor u Pixam Cꞌuj oc yicnʌn Jesús.
Irej susuy.
17 Caj yubob tar u tar u tꞌʌn caꞌanan.
Caj yaꞌaraj Cꞌuj:
―A techoꞌ ―quij―,
a jach in pararech,
in jach yajech.
A techoꞌ caj a quiꞌquintaj in wor.