A JEꞌRAꞌ U JACH TSOYIR U TꞌɅN CꞌUJ TU TSꞌIBTA MARCOS
Juan, a cu yacsic jaꞌ tu joꞌr mac tu tsecꞌtic ich tʌcʌy ruꞌum
1
U jach tsoyir u tꞌʌn Jesucristo u parar Cꞌuj caj u yʌnxchun bic a jeꞌ tsꞌibaꞌan a raꞌ cu bin tarej.
San Marcos 1.1-13
2 Tu yʌnxchun an ten bic Isaías u tsꞌibmʌn uch quireꞌ rajiꞌ tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.
Uꞌyex baꞌ tu tsꞌibtaj:
Iric,
quij Cꞌuj,
quin tuchiꞌtic yʌjtseqꞌuir in tꞌʌn,
quij Cꞌuj,
pʌyber cu tsoyquintic a ber tu ca bin cꞌuchur.
3 Tiꞌ yʌn mac tan u cꞌam tꞌʌnic ich tʌcay ruꞌum.
Rajiꞌ tan yaꞌaric:
“Tajquintex a worex soc cꞌuchaꞌan a worex a quiꞌ acsiquex Jaj Tsꞌur irex tan a jariquex u ber rey quir u tar.”
Baxuc caj u tsꞌibtaj Isaías uch.
4 Rajen cꞌuchij Juan tan u yacsic jaꞌ tu joꞌr mac ich tʌcay ruꞌum tan u tsecꞌtic caꞌ u cꞌaxej tu yor mac soc u pꞌʌticob u cꞌasirob soc u jawsaꞌ u siꞌpirob ten Cꞌuj.
5 Tiriꞌ caj rʌc binob yicnʌn Juan tu cotor mac a cʌjaꞌanob tu ruꞌumin Judea quet bayiriꞌ tu cotor mac tiꞌ u cajar Jerusalén.
Tu toc arajob baꞌ cꞌasir caj u betob quir u jawsaꞌ u siꞌpirob ten Cꞌuj.
Jeroj tuneꞌ,
caj acsaꞌb jaꞌ tu joꞌrob ten Juan ich u yaꞌarir Jordán.
6 A Juanoꞌ u buquinmʌn u nocꞌ a sʌctaꞌb tiꞌ u tsotser u yʌrʌcꞌ camello.
Tu cꞌʌxaj u nʌcꞌ yejer otꞌ.
Rajiꞌ cu chiꞌic sacꞌ.
Cu mʌquic cab a mʌꞌ ʌcrʌcꞌaꞌan.
7 Caj u tsecꞌtaj Juan:
―Tan u tar tin pach a mac jach noꞌj.
A tenoꞌ ―quij Juan―,
mʌꞌ noꞌjen.
Mʌꞌ pataren,
a tenoꞌ,
cax in chen pꞌuxtar in pitic u cꞌanin u pechꞌ xʌnʌb.
8 A tenoꞌ ―quij Juan―,
caj in wacsaj jaꞌ ta joꞌrex chen a mac a caꞌ bin cꞌuchuc jeꞌ u tsꞌic techex u Tajꞌor u Pixam Cꞌuj.
Acsaꞌb jaꞌ tu joꞌr Jesús
9 Mʌꞌ uch caj ruqꞌuij Jesús ich u cajar Nazaret,
raꞌ u waꞌan u ruꞌumin Galilea.
Caj cꞌuchij Jesús yicnʌn Juan caj acsaꞌb jaꞌ tu joꞌr xan ich u yaꞌarir Jordán.
10 Caj tsꞌoc u yacsic jaꞌ tu joꞌr Jesús ten Juan tan u bin ich chiꞌ jaꞌ,
Jesús seb caj u yiraj u buj caꞌanan.
A jeroj caj yiraj xan,
u Tajꞌor u Pixam Cꞌuj tan yeman irej susuy caj oc yicnʌn Jesús.
11 Rajiꞌ caj u yubaj u tꞌʌn a cu tar caꞌananoꞌ,
caj u yaꞌaraj:
―A techoꞌ ―quij―,
in pararech,
in jach yajech.
A techoꞌ ta quiꞌquin tin woreꞌ.
Tumtaꞌb u yor Jesús ten Satanás
12 A jeroj tuneꞌ,
seb caj pay u ber Jesús ten u Tajꞌor u Pixam Cꞌuj caꞌ xic ich tʌcay ruꞌum.
13 Tiriꞌ yʌn Jesús uch ich tʌcay ruꞌum quir u tumtaꞌ u yor ten Satanás,
rajiꞌ u tsꞌurir a quisinoꞌ.
Caj tumtaꞌb u yor ten Satanás cuarenta qꞌuin.
Caj tumtaꞌb yor Jesús ten Satanás quir u yiric wa cu yacsic u siꞌpir.
Tiꞌ yʌn cꞌaxir bʌcꞌ tu yʌn Jesús,
chen tarob u yʌjmasirob u tꞌʌn Cꞌuj quir u yamtaꞌrob Jesús.
Jesús tu yʌnxchun u tsecꞌtic u tꞌʌn Cꞌuj ich u ruꞌumin Galilea
14 Chen caj tsꞌoc u cꞌʌric Juan tu cu naj maꞌcʌr mac,
cꞌuchij Jesús ich u ruꞌumin quir u tsecꞌtic u jach tsoyir u tꞌʌn a cu tar ich Cꞌuj.
San Marcos 1.14-45
―Bajeꞌrer,
cꞌuchij tu qꞌuinin a caj u yaꞌaraj Cꞌuj uch.
Bajeꞌrer cu bin reyinbir Cꞌuj,
rajen cꞌaxex a worex soc a pꞌʌtiquex a cꞌasirex,
ca wacsiquex ta worex a jach tsoyir u tꞌʌn Cꞌujoꞌ.
Jesús caj u pʌyaj xib, a rʌc yʌn u nub xib a cu chuquicob cʌy
16 A ray u qꞌuininoꞌ tan u man Jesús ich u chiꞌ cꞌacꞌnab,
u cꞌabaꞌ u cꞌacꞌnabir Galilea,
jeroj caj u yiraj Simón yejer u yitsꞌin Andrés.
Tu chuquicob cʌy quireꞌ raꞌ u beyajob.
Cu chuquicob cʌy yejer yajow chim.
17 Caj u yaꞌaraj Jesús tiꞌob:
―Sayenex tin pach quir in camsic techex in tꞌʌn soc a manex a tsecꞌtex in tꞌʌn ich a wet winiquirex judío.
18 Seb caj u pꞌʌtajob u chuc cʌyob,
caj sayob tu pach Jesús.
19 Wa ber caj bin mʌꞌ nachiꞌ,
a jeroj caj u yiraj Jacobo,
u parar Zebedeo,
yejer Juan u yitsꞌin Jacobo.
Robob caj u chuyob u chimin u chuc cʌyob ich u chemob.
20 An ten bic caj u yiraj tiꞌob,
seb caj pay Jacobo yejer Juan ten Jesús.
A jeroj tuneꞌ,
caj u pꞌʌtajob u tetob Zebedeo ich chem yejer u cꞌurewoꞌ,
caj sayob tu pach Jesús.
Tiꞌ yʌn xib tuririꞌ, yʌn u cꞌacꞌas quisinin
21 Caj cꞌuchob tu cajar Capernaum.
Ber caj cꞌuchij tu qꞌuinin tu cu jesicob u bʌjob u winiquirob judío,
caj oquij Jesús tu chan najir tu cu naj cꞌujinticob Cꞌuj u winiquirob judío.
Caj oquij tu yʌnxchun u camsaꞌob.
22 A mac a tiꞌ yʌnob a caj u yubob jach jaqꞌuij yorob an ten bic caj u camsaj tiꞌob.
Mʌꞌ ja wirej,
Jesús caj u camsaj,
jach noj u camsej mac.
Mʌꞌ an ten bic yʌjcamsʌyʌjirob u tꞌʌn Moisés.
23 A ray u qꞌuininoꞌ seb caj oquij ich u chan najir tu cu naj cꞌujinticob Cꞌuj u winiquirob judío a mac acaꞌan quisin tiꞌeꞌ.
Rajiꞌ cꞌam caj u yaꞌaraj:
24 ―Baꞌ a cꞌat tiꞌ a tenoboꞌ Jesúsech a cu tar ich u cajar Nazaret?
Taraꞌanech a chꞌesiquenob,
in werechob maquechiꞌ,
a techoꞌ a mac a cu tar ich Cꞌuj,
a techoꞌ caj a ricꞌsaj a wʌcꞌʌs bʌjiriꞌ soc Cꞌuj yʌninech.
25 Jesús caj u qꞌueyaj,
caj u yaꞌaraj:
―Nup a chiꞌ,
caꞌ jocꞌaquech,
caꞌ a pꞌʌtej a jeꞌ xibaꞌ.
26 A cꞌacꞌas quisinoꞌ,
caj u betaj caꞌ babanʌquiꞌ,
jeroj tuneꞌ caj joqꞌuij tiꞌ,
tan u cꞌam awʌt.
27 A mac a tiꞌ yʌnob ich u chan naj tu cu naj cꞌujinticob Cꞌuj u winiquirob judío jach manan rʌc jaqꞌuij yorob,
rajen caj u pacran cꞌaticob ich u yet winiquirob judío:
―Baꞌquiriꞌ a jeraꞌ,
quij yaꞌaraꞌob?
Baꞌ u jer tꞌʌn cu camsaꞌ?
Quireꞌ cu camsaꞌ an ten bic mac yʌn u mucꞌ.
Mʌꞌ ja wirej,
a jeꞌ xibaꞌ,
cax cu tꞌʌnic a quisinoꞌ,
cu quibicob a baꞌ cu yaꞌaraꞌob tiꞌ ten Jesús.
28 Caj jocꞌob a mac a tiꞌ yʌnob ich u chan najir tu cu naj cꞌujinticob cꞌuj u winiquirob judío seb caj u jumbintajob a baꞌ caj u yirob ich tu cotor u ruꞌumin Galilea,
baxuc xan,
caj u jumbintob a baꞌ caj u yubajob.
Jesús cu jawsic u yixquit Simón Pedro
29 Wa ber caj ruqꞌuij Jesús tiꞌ u chan najir tu cu naj cꞌujintiob Cꞌuj u winiquirob judío,
yet binacob u camsʌwinicob.
Yet binacob Jesús a Jacobo yejer Juan,
bayiriꞌ xan Simón Pedro yejer Andrés,
a jeroj caj cꞌuchob tu yatoch Simón Pedro yejer Andrés.
30 Barej u yixquit Simón Pedro characbar quireꞌ jach ar u joꞌr.
Seb caj araꞌb tiꞌ Jesús yaj u yixquit Simón Pedro.
31 Cꞌuchij tun,
rajiꞌ,
caj u mʌchaj u cꞌʌb caj u ricꞌsaj,
jeroj seb caj jaw,
caj u yʌnxchun u jansaꞌrob.
Jesús cu jawsic pim mac
32-33 Tan u bin u qꞌuinin caj jach acꞌbichʌjij tun.
Tu cotor a mac a pꞌeriꞌ u cajarob yejer Simón Pedro yejer Andrés caj cꞌuchob tu cu naj ocar mac tu yatoch Simón Pedro yejer Andrés.
Caj tar purbirob a mac a jach yaj ich Jesús yejer a mac a acaꞌan tiꞌ quisinoꞌ.
Tiriꞌ caj u rʌc muchꞌquintajob u bʌj tu yʌn Jesús.
34 Caj u jawsaj yaꞌab mac yejer yaꞌab u yajirir.
Bayiriꞌ xan,
caj u jocꞌsaj tiꞌ mac a yʌn yaꞌab u quisininoꞌ.
Mʌꞌ ju chaꞌbʌr u jocꞌar u tꞌʌnob ten Jesús quireꞌ u jach erob jach rajiꞌ Cristo.
Jesús caj u tsecꞌt u tꞌʌn ich u ruꞌumin Galilea
35 Cꞌʌs aꞌacꞌbir mʌꞌ toy quiꞌ sasichʌjʌquiꞌ caj ruqꞌuij Jesús tu junan tu mʌnaꞌ mac soc u tꞌʌnic Cꞌuj.
36 Jesús cu man cʌxtaꞌbir ten Simón Pedro yejer u yet camsʌwiniquirob.
37 Wa ber caj irir Jesús ten a mac tarob cʌxtaꞌbir.
Caj u yaꞌarob:
―Tu cotor mac cu cʌxtiquechob.
38 Caj yaꞌaraj tiꞌob:
―Caꞌ xicoꞌonex ich u jer cajarob a baytʌcoꞌ caꞌ in tsecꞌtej xan,
quireꞌ rajen ruqꞌuen tiꞌ a ray cajaroꞌ.
39 Jesús rʌc man ich tu cotor u ruꞌumin Galilea cu yocar jujuntur tu chan najir tu cu naj cꞌujinticob Cꞌuj u winiquirob judío tiriꞌ caj u tsecꞌt u tꞌʌn Cꞌuj.
Jujuntur u cuchir tu cu naj tsecꞌtic u tꞌʌn Cꞌuj tu oquij caj u jocꞌsaj a mac acaꞌan u quisinin tiꞌ.
Jesús caj u jaws a mac u cʌnmʌn iqꞌuer u caꞌ
40 A mac a ju cʌnmʌn iqꞌuer u caꞌ,
cꞌuchij yicnʌn Jesús,
caj xonrʌj caj u yaꞌaraj:
―Wa ja cꞌateꞌ,
cꞌuchaꞌan a wor a jawsic iqꞌuer u caꞌ ten.
41 Jesús caj u tucraj tiꞌ,
caj u nuncaj caj u yaꞌaraj:
―In cꞌat ―quij Jesús―,
jawen quen.
42 A jeroj tuneꞌ,
seb caj jawij a iqꞌuer u caꞌ tiꞌ.
43 Jesús caj u tꞌʌnaj caꞌ xic tan u chich aric tiꞌ:
44 ―Mʌꞌ a bin a waꞌaric tu ca man bic jawech.
Chen tar a bin ich sacerdote u winiquirob judío quir a sijic tiꞌ a baꞌ caj yaꞌaraj Moisés uch.
Soc yerob tu cotor mac jawsaꞌbech ―quij Jesús.
45 Rajiꞌ mʌꞌ caj u yubaj a baꞌ araꞌb ten Jesús,
seb caj u toc rʌc araj ich u racꞌob.
Caj yubob jaw a iqꞌuer u caꞌ tiꞌeꞌ.
Rajen Jesús mʌꞌ cꞌuchaꞌan yor u jocꞌar ich tu cotor mac cax a baꞌ cajarob.
Cu chen jocꞌar tu mʌnaꞌ mac,
cax tiꞌ cu bin Jesús tiꞌ rʌc cꞌuchob yicnʌn Jesús.