Caj u puraj u chim ich cꞌacꞌnab caj araꞌb ten Jesús caj oc u cʌyir quireꞌ jach carem u beyaj Jesús
5
Caj cꞌuchij tu qꞌuinin u man u tsecꞌtej Jesús ich u chiꞌ cꞌacꞌnab u cꞌabaꞌ Geneseret.
Caj cꞌuchob jach pim,
caj u rʌc nʌctantajob u bʌj ich Jesús quireꞌ u cꞌat yubicob u jach tsoyir u tꞌʌn Cꞌuj.
Lucas 5.1-39
2 Jesús caj yiraj tiꞌ yʌn chem ich chiꞌ cꞌacꞌnab,
bʌytʌc u saꞌamin u chiꞌ cꞌacꞌnab.
Caꞌtur caj yiraj chem.
Chen u chem yʌn.
Tiꞌ yʌn u winiquirir u chem tan u pꞌoꞌicob u chim.
3 Jesús caj oc cutar ich chem,
tuririꞌ,
raꞌ u chemin Simón caj cꞌataꞌb tiꞌ ten Jesús:
―Jocꞌsej u chemin nʌnʌchir.
―Chꞌaj a chem caꞌ xiquech caꞌ a purej a chim tub tam.
Jeꞌ a chuquic yaꞌab cʌy yejer a wet beyajob.
5 Caj u nunca Simón:
―In wʌjcamsʌyʌjirech,
u bur u acꞌbir caj chich beyanʌjenob tan in puric in chimob.
Mʌꞌ tin cꞌʌs chuc u cʌyirob.
Chen wa tech aric tenob,
jeꞌ in wʌcꞌʌs bin in purejob in chimob.
6 Caj tsꞌoc u puricob u chimin caj u jach chucajob u cʌyir yaꞌab.
Caj u yʌnxchun u jatʌr u chimin quireꞌ jach manan chup u cʌyir u chimin.
7 A mac tiꞌ yʌnob ich chem yejer Simón caj u babach cꞌʌꞌtajob u yet chucob cʌyob,
a tiꞌ yʌn juntur chem quir u yamtaꞌr u jitic u chimin.
Caj tarob yamtabir Simón.
Caj u jitob caj u butꞌajob ich chemob caj chup u cʌyir ich chemob tabar u jurur u chemob.
8 Caj yiraj Simón Pedro jach yaꞌab caj u chucajob u cʌyir caj xonraj ʌcʌtan ich Jesús.
Caj yaꞌaraj:
―Chan xen Jaj Tsꞌurir pꞌʌten quireꞌ a tenoꞌ jach manen yʌn in siꞌpir.
9 Caj u yaꞌaraj aroꞌ quireꞌ jach jaqꞌuij yor Simón.
Quet caj jaqꞌuij yorob xan a yejer yet chuc cʌyoꞌ Simón.
Quireꞌ yirob jach chup u cʌyir caj u butꞌob ich chem caj u chucajob.
10 Baxuc xan u cꞌabaꞌ Jacobo yejer Juan yet chucob cʌy Simón,
a pꞌeriꞌ u beyajob.
Raꞌ u tetoꞌ Zebedeo,
caj jacꞌ yorob xan.
Caj yaꞌaraj Jesús tiꞌ Simón:
―Mʌꞌ u jacꞌʌr a wor an ten bic caj a chucaj cʌy.
Quireꞌ raꞌ a beyaj,
caꞌ bin a camsej in tꞌʌn ich a racꞌob soc u quibicob in tꞌʌn.
Raꞌ a beyaj bajeꞌrer ―quij Jesús.
11 Caj u jitob u chem ich chiꞌ cꞌacꞌnab caj u rʌc pꞌʌtob u beyajob u chuc cʌy caj rʌc binob tu pach Jesús quir u cʌnicob u tꞌʌn Jesús.
Jesús cu jawsic a ju cʌnmʌn iqꞌuer u caꞌ
12 Caj cꞌuchi tu qꞌuinin tiꞌ yʌn Jesús ich tuririꞌ cajarob carem.
Caj cꞌuchi tuririꞌ xib yaj,
u cʌnmʌn iqꞌuer u caꞌ.
Caj xonraj ich Jesús caj u chich cꞌataj tiꞌ Jesús:
―In wer cꞌuchaꞌan a wor a jawsiquen Jaj Tsꞌurir wa ja cꞌat a jawsiquen ―quij,
a iqꞌuer u caꞌ tenoꞌ.
13 Jesús caj u tichꞌaj u cꞌʌb caj u tʌraj caj yaꞌaraj:
―In cꞌat in wiric a jawʌr ―quij Jesús.
―Mʌꞌ a bin a waꞌaric tu ca man bic jawech.
Chen tar a bin ich u sacerdote u winiquirob judío quir a sijic tiꞌ a baꞌ yaꞌaraj Moisés uch.
Soc yerob tu cotor mac jawsaꞌbech ―quij Jesús.
15 Quireꞌ a pimoꞌ yubaj u jumintaꞌr jach chich u mucꞌ Jesús,
jach manan caj u rʌc jumintaꞌr tiꞌ u racꞌob.
Rajen rʌc tarob pim quir u muchꞌquinticob u bʌj quir yubicob u tsecꞌticob u tꞌʌn Cꞌuj Jesús,
quir u jawsʌr u yajirir xan.
16 Jesús caj u jamach pꞌʌtaj a pimoꞌ quir u bin u tꞌʌnej Cꞌuj tu junan ich tʌcay ruꞌum.
Jesús cu jawsic a mʌꞌ u chꞌictareꞌ
17 Caj cꞌuchij tu qꞌuinin,
tan u camsic Jesús.
Chen jun yarob u winiquirob judío a fariseojoꞌ yejer yʌjcamsʌyʌjirob u tꞌʌn Moisés curucbarob yubejob.
A pimob tiꞌ u tarob ich u ruꞌumin Galilea.
Tiꞌ u tarob u jerob ich u ruꞌumin Judea.
Tiꞌ u tarob u jerob ich u cajar Jerusalén.
Jach tsꞌurintaꞌb Jesús ten u Tajꞌor u Pixam Cꞌuj quir u jawsic u yajirir mac.
18 Jun yarob xib caj tarob purbir a mʌꞌ u chꞌictareꞌ.
Caj u cꞌochob yejer u chꞌac.
U cꞌat yacsaꞌr ich yatochoꞌ tu yʌn Jesús caꞌ u chaquintob ich Jesús.
19 Chen mʌꞌ tu cu yacsicob quireꞌ tiꞌ yʌnob jach pim.
Rajen caj nacob ich u pach yatoch quir u rʌcob u pach yatoch quir u yensaꞌr yejer u chꞌac,
a mʌꞌ u chꞌictaroꞌ ich Jesús.
Caj u patajob u joꞌr yatoch quireꞌ taj u joꞌr yatoch.
20 Caj u yiraj Jesús bic tabar cu yacsicob tu yor tiꞌ Jesús caj yaꞌaraj tiꞌ a mʌꞌ u chꞌictareꞌ:
―Jeꞌ in toc jawsic a siꞌpireꞌ bajeꞌrer.
21 U winiquirob judío a fariseojoꞌ yejer u yʌjcamsʌyʌjirob u tꞌʌn Moisés caj u yʌnxchun u tucricob tu yor:
“Mac winic a jeꞌraꞌ cu tucric cꞌuchaꞌan yor u jawsic u siꞌpir mac?
Tan u pachꞌic Cꞌuj Jesús,
chen a Cꞌujoꞌ cꞌuchaꞌan yor u jawsic u siꞌpir mac.”
22 Jesús yer baꞌ cu tucricob u winiquirob judío rajen caj yaꞌaraj tiꞌob:
―Biquinin tan a waquex tan in pachꞌic Cꞌuj?
23 Wa quin waꞌaric tiꞌ a jeꞌ xibaꞌ:
“Jeꞌ in toc jawsic a siꞌpireꞌ”,
a techexoꞌ mʌꞌ a werex wa yʌn ten u mucꞌ Cꞌuj,
chen wa quin waꞌaric tiꞌ:
“Riqꞌuen caꞌ xiquech”,
ca bin a werex yʌn ten u mucꞌ Cꞌuj.
24 Bajeꞌrer jeꞌ in toc esic techex in muqꞌueꞌ quir in jawsic u siꞌpir a jeꞌ xibaꞌ,
quireꞌ quin bin in jawsic u yajir a mac mʌꞌ u chꞌictareꞌ soc a werex jach yʌn in mucꞌ quir in jawsic u siꞌpir mac,
quireꞌ a tenoꞌ baxuquenechexoꞌ.
Jesús caj u tꞌʌnaj a mac a mʌꞌ u riqꞌuireꞌ:
―Riqꞌuen caꞌ xiquech ta woc,
toc chꞌaj a chꞌac,
xen ich a watoch.
25 Seb caj riqꞌuij a mʌꞌ u chꞌictareꞌ ʌcʌtan u racꞌob caj yirajob u chꞌic u chꞌac yejer u tas caj bin ich yatoch caj u yaꞌaraj tiꞌ Cꞌuj:
―Bayoꞌ Cꞌuj,
ta jawsajen.
26 Caj jaqꞌuij yorob a tiꞌ muchꞌaꞌanob,
caj u chꞌaj sajaquirob caj u yaꞌarajob:
―Jach caremech Cꞌuj quireꞌ mʌꞌ biqꞌuin ij quiramʌniꞌ u jawsic mac hasta bajeꞌrer caj ij quiraj.
Jesús caj u pʌyaj Leví caꞌ tac u cʌnej u tꞌʌn
27 Caj jocꞌ Jesús tub u jawsaj a mʌꞌ u chꞌictar caꞌch.
Caj u yiraj yʌjcꞌʌmin u taqꞌuin gobernador,
rajiꞌ u cꞌabaꞌ Leví,
curucbar tu cu cꞌʌmic u taqꞌuin gobernador.
Caj araꞌb tiꞌ:
―Cojen tin pach caꞌ a cʌnej in camsiquech soc in camsʌwiniquech.
28 Leví,
caj riqꞌuij caj u rʌc pꞌʌtaj u beyaj caj say tu pach Jesús quir u cʌnic u tꞌʌn Jesús.
29 Leví,
caj u muchꞌquintaj u racꞌob quir u quiꞌ janʌnob quir u sʌjticob Jesús.
Caj rʌc tarob ich yatoch Leví,
tiꞌ yʌn u jerob yʌjcꞌʌminob,
u taqꞌuin gobernador jach pim.
Bayiriꞌ tiꞌ yʌn u jerob u racꞌob xan.
Pꞌeriꞌ curicob janʌnob.
30 Caj yirob u winiquirob judío a fariseojoꞌ yejer u yʌjcamsʌyʌjirob u tꞌʌn Moisés a fariseojoꞌ.
Caj choquij yorob,
caj u yʌnxchun yaꞌaraꞌ tiꞌ u camsʌwinicob Jesús:
―Biquinin pꞌeriꞌ a janʌnex ca wucꞌurex xan yejer a mac cu cꞌʌmicob u taqꞌuin gobernador yejer a mac jach yʌn u siꞌpirob?
31 Jesús caj u nuncaj tiꞌob:
―Baxuc a yer tsꞌacoꞌ mʌꞌ u tsꞌʌquic a mʌꞌ yajeꞌ,
cu chen tsꞌacʌr a yʌn u yajireꞌ.
32 Baxuc a tenoꞌ taren in pʌyic a mac a yʌn u siꞌpirob caꞌ u cꞌaxej tu yorob soc u pꞌʌticob a cꞌasoꞌ.
Mʌꞌ taren in yamtic a mac cu yaꞌaric mʌnaꞌ u siꞌpir ―baxuc caj yaꞌaraj Jesús.
Caj cꞌataꞌb tiꞌ Jesús ten u winiquirob judío: Biquinin mʌꞌ u jamach pꞌʌticob u janʌn u camsʌwinicob?
33 A mac tiꞌ yʌn caj u cꞌatob tiꞌ Jesús:
―Arej toꞌon biquinin mʌꞌ u jamach pꞌʌticob u janʌnob a camsʌwiniquirob quireꞌ rajraꞌ tan u quiꞌ janʌnob.
Chen u camsʌwinicob Juan cu jamach pꞌʌticob u janʌn,
quir u tꞌʌnicob Cꞌuj ―baxuc u camsʌwinicob a fariseojoꞌ.
34 Jesús caj u nuncaj:
―Mʌꞌ baꞌ u ber caꞌ u jamach pꞌʌticob u janʌn a yet manoꞌ cu bin u chꞌic u racꞌ quireꞌ quiꞌ yorob.
35 Barej caꞌ bin rucꞌsac a cu bin u chꞌic u racꞌ ten a mac a cu pꞌactic tiꞌ.
Raxben tsoy u jamach pꞌʌticob u janʌn u camsʌwinicob quireꞌ tan yacꞌtaꞌrob a mac rucꞌsaꞌb.
36 Jesús caj u camsaj tiꞌob tan yaꞌaric:
―Mʌꞌ tsoy ic xacꞌtic a baꞌ caj u camsajoꞌon ic nunquirex quireꞌ jach uchben yejer a baꞌ ricꞌben ca wuꞌyiquex.
An ten bic mac mʌꞌ ju jʌtic ricꞌben quir u pʌqꞌuic u rabir u nocꞌ.
Quireꞌ a ricꞌbenoꞌ cu mosar.
Chen wa cu pʌqꞌuic u rabir yejer a ricꞌbenoꞌ,
chen a raboꞌ,
rajiꞌ cu bin jatʌr.
Sat a ricꞌbenoꞌ a caj u jʌtaj quir u pʌqꞌuic ich u rabir.
Mʌꞌ ju bin quet tarob.
37 Baxuc xan,
mʌnaꞌ mac cu tꞌajic u cꞌab uva ricꞌben ich u rabir yotꞌer yʌrʌcꞌ chivo,
quireꞌ jeꞌ u paj u cꞌab uva ich u rabir u yotꞌer chivo,
jeꞌ u bujureꞌ,
cu bin u satʌr u cꞌab uva yejer yotꞌer xan.
38 Rajen yʌn u tꞌajic u cꞌab uva a ricꞌbenoꞌ ich u yotꞌer chivo a ricꞌbenoꞌ.
39 Mʌꞌ ja wirej,
a mac toc naj yuqꞌuic u cꞌab uva a pʌjeꞌ,
quiꞌ yubic.
Mʌꞌ ju yuqꞌuic ricꞌben u cꞌab uva quireꞌ toc naꞌsaꞌb yuqꞌuic pʌj u cꞌab uva.
Rajen,
a techexoꞌ mʌꞌ a cꞌat a pꞌʌtiquex a baꞌ tu naꞌsatechex a nunquirex.
Baxuc mʌꞌ ja cꞌʌmiquex a ricꞌbenoꞌ quin camsiquechex.