U camsʌwinicob Jesús cu joꞌsticob u wich trigo u qꞌuinin tu cu jesicob u bʌj u winiquirob judío
6
Caj cꞌuchij tu qꞌuinin u jesicob u bʌj u winiquirob judío,
ray u qꞌuinin caj bin Jesús yejer u camsʌwinicob caj u chꞌʌctajob u corir trigo.
U camsʌwinicob Jesús caj u joꞌstajob u wich trigo caj u jʌxʌcꞌʌꞌtajob caꞌ rucꞌuc u sor caꞌ u jantejob.
Lucas 6.1-49
―Biquinin a camsʌwinicob tech tan u joꞌsticob u wich trigo u jantejob.
Tu tsꞌibaꞌan u tꞌʌn Moisés cu yaꞌaric mʌꞌ tsoy u beyaj u qꞌuinin tu cu jesicob u bʌj u winiquirob judío.
3 Jesús caj u nuncaj:
―Mʌꞌ wa ja xacmʌnex baꞌ caj u jantaj David uch,
caj wichʌj quet yejer u nupob caj wichʌjob uch.
4 Caj oc tu tꞌinaꞌan u noqꞌuir naj tu cu naj cꞌujinticob Cꞌuj u winiquirob judío uch.
Caj u jantaj pan a tiꞌ yʌnob ich yocꞌor pojcheꞌ tiꞌ ʌcʌtan Cꞌuj.
Caj u cꞌasquintaj u tꞌʌn Cꞌuj David,
quireꞌ rajiꞌ David yejer u nupob caj u jantajob.
Quireꞌ Cꞌuj,
caj yaꞌaraj,
chen a sacerdotejoꞌ cu janticob.
5 Mʌꞌ ja wirej ―quij Jesús―,
a tenoꞌ baxuquenechex,
quin tsꞌurintic tu cotor baꞌ,
inan a baꞌ cu yiric mac tu qꞌuinin tu cu jesicob u bʌj u winiquirob judío ―quij Jesús.
A xiboꞌ a mʌꞌ u jitir u cꞌʌbeꞌ
6 Caj cꞌuchij u jer u qꞌuinin tu qꞌuinin tu cu jesicob u bʌj u winiquirob judío.
Jesús caj oc tu cu naj cꞌujinticob Cꞌuj u winiquirob judío.
Caj u yʌnxchun u camsicob Jesús.
Tiꞌ yʌn xib a mʌꞌ u jitir u cꞌʌb ich u nojeꞌ.
7 Tiꞌ yʌn yʌjcamsʌyʌjirob u tꞌʌn Moisés yejer u winiquirob judío a fariseojoꞌ.
Tan u quiꞌ pʌcticob Jesús quir yiricob wa mʌnaꞌ u jawsic u yajir ray u qꞌuinin tu cu jesicob u bʌj u winiquirob judío,
quireꞌ u cꞌat u taquicob u joꞌr Jesús.
8 Jesús yer baꞌ cu tucricob u winiquirob judío a fariseojoꞌ yejer yʌjcamsʌyʌjirob u tꞌʌn Moisés.
Caj araꞌb tiꞌ xib,
a mʌꞌ u jitir u cꞌʌb:
―Riqꞌuen ta chꞌictar caꞌ taquech chumuc tu yʌnoꞌonex soc chʌcaꞌan yiriquech tu cotor mac.
―Yʌn baꞌ quir in cꞌatic techex.
Tu qꞌuinin quic jesic ic bʌj.
Cꞌuchaꞌan yor mac u betic a baꞌ jach tsoy,
wa cꞌuchaꞌan yor mac u betic a baꞌ cꞌas?
Cꞌuchaꞌan yor mac u yamtic mac u jer wa cꞌuchaꞌan yor u quinsic mac?
10 Jesús caj u rʌc pʌctaj yirej jujuntur,
Jesús caj yaꞌaraj tiꞌ xib:
―Tichꞌ a cꞌʌb caꞌanan.
A xiboꞌ caj u tichꞌaj u cꞌʌb,
seb caj toc quiꞌ jawij.
11 Chen rajiꞌob,
caj yirob aroꞌ caj jach pꞌujob caj u pꞌerinquintajob u tucurob baꞌ cu bin u beticob tiꞌ Jesús.
Tetaꞌb ten Jesús a mac a cu bin u tsecꞌticob u tꞌʌn
12 Caj cꞌuchij tu qꞌuinin Jesús caj bin u tꞌʌnej Cꞌuj ich joꞌr wits.
U burur acꞌbir caj u tꞌʌnaj Cꞌuj Jesús.
13 Caj sasij caj u muchꞌquintajob u camsʌwinicob quir u tetic doce,
rajiꞌ caj u pʌcha u camsʌwinicob:
“A mac a quin tuchiꞌticob quir u tsecꞌticob in tꞌʌn.”
14 Jeraꞌ u cꞌabaꞌ a mac a cu bin tuchiꞌbir ten Jesús quir u tsecꞌtaꞌr u tꞌʌn.
Jeroj Simón caj pach u jer u cꞌabaꞌ Pedro.
U jer caj u tetaj Andrés,
rajiꞌ u bʌjob Simón.
U jer caj u tetaj Jacobo.
U jer caj u tetaj Juan.
U jer caj u tetaj Felipe.
U jer caj u tetaj Bartolomé.
15 U jer caj u tetaj Mateo.
U jer caj u tetaj Tomás.
U jer caj u tetaj Jacobo,
raꞌ u tet Alfeo.
U jer caj u tetaj Simón,
rajiꞌ tan u quiꞌ cꞌujintic Cꞌuj,
a tan u sayʌr u pach cananista.
16 U jer caj u tetaj Judas,
raꞌ u tet Jacobo.
U jer caj u tetaj Judas Iscariote,
rajiꞌ cu bin cꞌubic Jesús.
Jesús cu camsic a pim winiquirob
17 Caj tsꞌoc u tetic a docejoꞌ caj wʌcꞌʌs emij tiꞌ u joꞌr wits.
Jesús caj chꞌicrʌj tu tajir ruꞌum.
Tiꞌ yʌn jach pim u camsʌwinicob.
Tiꞌ yʌn u jerob pim a cu tar ich u ruꞌumin Judea,
bayiriꞌ tiꞌ u tar ich u cajar Jerusalén.
Tiꞌ u tarob ich u cajar Tiro,
raꞌ u chiꞌ cꞌacꞌnab.
Tiꞌ u tarob ich u cajar Sidón raꞌ u chiꞌ cꞌacꞌnab xan.
Rʌc tarob yubicob u tꞌʌn Jesús quireꞌ u cꞌat u jawsaꞌr u yajirob xan.
18 A mac acaꞌan cꞌacꞌas quisin jawsaꞌbob xan ten Jesús.
19 Tu cotor u cꞌat u tarʌr Jesús quireꞌ caꞌ bin tarʌc cu jawar u yajirob quireꞌ cu tar u mucꞌ tiꞌ Jesús quir u jawar u yajirob.
A baꞌ cu jach quiꞌquintic yor mac
20 Caj yiraj Jesús u camsʌwinicob caj yaꞌaraj tiꞌob:
―Quiꞌquint a worex quireꞌ jach otsirchʌjechex bajeꞌrer quireꞌ a Cꞌujoꞌ cu bin u quiꞌ acsiquechex ich caꞌanan tu cu reyinticob Cuj.
21 ’Quiꞌquintej a worex quireꞌ wichʌjechex bajeꞌrer,
jeꞌ a najchʌjʌrex caꞌ bin cꞌuchuc tu qꞌuinin.
A mac tan u yacꞌticob u bʌj bajeꞌrer quiꞌquintej yorob quireꞌ caꞌ bin cꞌuchuc tu qꞌuinin jeꞌ u quiꞌtar yorob,
jeꞌ u cheꞌejobeꞌ,
quireꞌ Cꞌuj cu bin u quiꞌquintic yorob.
22 ’Quiꞌquintej a worex wa ber cu pꞌactiquechex mac wa tan u jocꞌsiquechex tu cu naj cꞌujinticob Cꞌuj.
Wa tan u pꞌastiquechex,
wa tan u yaꞌaricob cꞌasechex quireꞌ ta wacsajex ta wor tiꞌ ten,
a tenoꞌ a baxuquenechexoꞌ.
23 Quiꞌquintej a worex cax wa ber cu pꞌactiquechex,
jach manan yʌn a quiꞌquintiquex a worex wa tan u pꞌastiquechex quireꞌ tan a manex tu tsoyir.
Rajen a Cꞌujoꞌ cu bin u quiꞌ acsiquechex caꞌanan.
Mʌꞌ ja wirej,
quetechex yejer yʌjtseqꞌuirob u tꞌʌn Cꞌuj uch.
Bayiriꞌ caj pꞌactaꞌb ten u racꞌob uch.
24 Jesús caj yaꞌaraj tiꞌ a mac a mʌꞌ tan u manob tu tsoyir a mac neyʌn u taqꞌuin bajeꞌrer:
―Yaj cu bin yubicob quireꞌ toy quiꞌij yorob teraꞌ ich yocꞌocab.
25 ’Mʌꞌ ja wirej,
a mac jach buꞌut bajeꞌrer jach yaj cu bin yubic u wichʌjʌr.
A bajeꞌrer cu tus cheꞌeticob chen a ray u qꞌuininoꞌ cu bin u jach acꞌticob u bʌj.
26 ’Quiꞌ irej ber cu yaꞌaricob:
“Jach tsoyech”,
quireꞌ baxuc caj yaꞌarob tiꞌ u tus ʌjtseqꞌuirob u tꞌʌn Cꞌuj uch.
Jeꞌ u yacꞌticob u bʌj xan.
Caꞌ a yajquintiquex a mac cu pꞌactiquechex
(Mt. 5.38-48; 7.12)
27 Caj yaꞌaraj Jesús tiꞌ a pimoꞌ:
―Uꞌyex baꞌ quin camsiquechex.
Caꞌ a yajquintex a mac cu pꞌactiquechex.
Yamtex a mac cu pꞌactiquechex.
28 Tꞌʌnex Cꞌuj tiꞌ a mac cu tʌmʌchiꞌtiquechex soc u quiꞌtar yorob.
Chich tꞌʌnex Cꞌuj tiꞌ a mac cu tupsic a worex soc u yamtaꞌ ten Cꞌuj.
29 Mʌꞌ a cʌniquex a mac a cu cꞌasquintiquechex.
Wa cu tacꞌ jʌtsꞌticob a pꞌuc,
arex tiꞌ caꞌ u tacꞌ jʌtsꞌtej jumbuj a pꞌuc xan.
Cax wa mac cu taꞌquic a joꞌrex quir u chꞌic a noqꞌuex,
soc mʌꞌ a cʌniquex aroꞌ,
arej tiꞌ caꞌ u toc chꞌaj u caꞌyarir a noqꞌuex.
30 Cax wa mac cu tar u chich cꞌatej techex.
Cax wa sijibar tiꞌ,
cax wa mʌjʌnbar tiꞌ,
tsꞌajex tiꞌ.
Wa mac cu tar u chꞌic a baꞌtac,
mʌꞌ a yʌn cꞌatiquex tiꞌ,
caꞌ u sutextech.
31 Yamtex a racꞌob an ten bic a cꞌatex u yamtiquexob xan.
32 ’A mac a cu chen pacran yajquinticob u bʌj quireꞌ u yajob u bʌj,
chen u bʌjiriꞌ cu tucric,
mʌꞌ tiꞌ Cꞌuj cu tucric.
Quireꞌ baxuc a mac yʌn u siꞌpir cu yajquinticob u bʌj,
quireꞌ u yajob u bʌj.
33 A mac a cu chen yamtic u racꞌob quireꞌ baxuc caj yamtaꞌb uch xan.
U bʌjiriꞌ tan u tucric,
mʌꞌ tiꞌ Cꞌuj,
quireꞌ cu tucric baxuc u yamticob u bʌj a mac yʌn u siꞌpir xan.
34 A mac a cu mʌjʌntic u taqꞌuin tiꞌ u racꞌob cu tsꞌic tiꞌob quireꞌ yer jeꞌ u sutur tiꞌ u jer,
bayiriꞌ xan u bʌjiriꞌ tan u tucric.
Mʌꞌ tiꞌ Cꞌuj quireꞌ bayiriꞌ a mac yʌn u siꞌpir,
quet u mʌjʌnticob u taqꞌuin yer jeꞌ u sutur tiꞌ xan.
35 Caj yaꞌaraj Jesús:
―A tenoꞌ tan in camsic techex.
Yajquintex a mac cu pꞌactiquechex.
Yamtex a mac cu pꞌactiquechex.
Tsꞌajex tiꞌ baꞌ,
a baꞌ u cꞌatic techex,
cax mʌꞌ a pajic u sutic techex.
Baxuc caꞌ bin cꞌuchuquechex ich caꞌanan.
A Cꞌuj cu bin u quiꞌ boꞌotic techex quireꞌ ta cʌnajex Cꞌuj,
rajen u pararechex Cꞌuj.
Mʌꞌ ja wirej,
a Cꞌujoꞌ xan cu yamtic a mac jach cꞌas cax mʌꞌ cu yaꞌaricob tiꞌ Cꞌuj:
“Bayoꞌ Cꞌuj.”
36 Cʌnex a Tet Cꞌuj,
mʌꞌ ja wirej,
a Cꞌujoꞌ cu yajquintic mac.
Baxuc techex caꞌ a yajquintex a racꞌobex.
Mʌꞌ a yʌn taꞌquiquex u joꞌr a racꞌobex
37 Jesús caj yaꞌaraj tiꞌ u camsʌwinicob ich u joꞌr pꞌuc wits:
―Mʌꞌ a taꞌquiquex u joꞌr a racꞌob soc bayiriꞌ mʌꞌ u taꞌquic a joꞌrex Cꞌuj.
An ten bic caj a chich taꞌquex u joꞌr a racꞌob.
Bayiriꞌ a Cꞌujoꞌ u bin u chich taꞌquic a joꞌrex xan.
A mac tu cꞌasquintajechex,
jawsex u siꞌpir soc baxuc a racꞌobex cu bin u jawsic a siꞌpirex.
Baxuc a Cꞌujoꞌ cu bin u jawsic a siꞌpirex xan.
38 Tsꞌajex tiꞌ a racꞌobex a baꞌ u cꞌat,
quireꞌ baxuc Cꞌuj cu bin u tsꞌic techex xan.
An ten mun u pꞌis caj a tsꞌaj tiꞌ a racꞌobex baxuc u pꞌis techex cu bin u tsꞌajex Cꞌuj.
Jach manan yaꞌabir cu bin u tsꞌic techex Cꞌuj,
mʌꞌ ju bin u cꞌuchur a worex caꞌ bin u rʌc tsꞌajtechex.
39 Jesús caj u wʌcꞌʌs araj yej u jer u tꞌʌn quir u camsic:
―Irej a mac chꞌop u wich,
mʌꞌ u pʌyic u bej u jer chꞌop u wich.
Quireꞌ wa yʌn u jor ruꞌum tiꞌ cu bin u pꞌitcꞌʌjob quireꞌ mʌꞌ yirob u bej.
Quireꞌ baxuc techex a mac a mʌꞌ yer Cꞌuj,
mʌꞌ tsoy quir u camsic u tꞌʌn Cꞌuj.
Quireꞌ tan u pʌyicob a bej quir a bin ich u cꞌaqꞌuir.
40 A mac cu camsiquechex baxuc ca bin a cʌnex,
irechex a mac caj u camsajechex caꞌ bin tsꞌocac u camsiquechex.
41 ’Wa tech,
caj a pꞌastaj a racꞌob quireꞌ mʌꞌ tan u man tu tsoyir,
chen a bʌjiriꞌ xan,
mʌꞌ tan a man tu tsoyir,
chen ta man ta cꞌasir.
Irech a mac a cu pꞌastic u racꞌob quireꞌ binaꞌan robir chichin tu wich.
Chen a bʌjiriꞌ mʌꞌ a wiric wa binaꞌan robir ta wich cax carem.
42 Wa ca tsicbar tiꞌ mac quireꞌ caj man tu cꞌasir,
chen a bʌjiriꞌ jach manan yʌn a cꞌasir tech.
Irech wa mac a cu yaꞌaric:
“Arej in jocꞌsej a chichin binaꞌan robir ta wich quireꞌ in bʌjobech.”
Chen u bʌjiriꞌ jach yaꞌab binaꞌan robir tu wich.
Mʌꞌ a yʌn cʌniquex u winiquirob judío a fariseojoꞌ yejer u yʌjcamsʌyʌjirob u tꞌʌn Moisés quireꞌ irob chꞌop u wich.
Mʌꞌ ja wirej,
yʌjtusarirech.
Chen a bʌjiriꞌ mʌꞌ a yʌn jocꞌsic robir a wich.
A techoꞌ yʌjtusarirech.
Yʌn a toc pꞌʌtic a man tu cꞌasir soc cꞌuchaꞌan a wor a wiric caꞌ u pꞌʌt u man tu cꞌasir a racꞌob.
Ca cꞌʌꞌotic u cheꞌer wa ca cꞌʌꞌotic u wich
43 Caj yaꞌaraj Jesús tu cu camsic a pimoꞌ:
―Wa tsoy u cheꞌer bayiriꞌ tsoy u wich.
Wa cꞌas u cheꞌer,
bayiriꞌ cꞌas u wich xan.
Rajen wa cꞌas u cheꞌer mʌꞌ cꞌuchaꞌan yor u tsꞌic u wich a tsoyoꞌ.
Bayiriꞌ xan wa tsoy u cheꞌer mʌꞌ cꞌuchaꞌan,
yor u tsꞌic u wich a cꞌasoꞌ.
44 Wa ca wiric u wich ca cꞌʌꞌotic u cheꞌer xan.
An ten bic mʌꞌ a tꞌaquic u wich ʌrʌxaꞌ ich abʌr,
bayiriꞌ xan,
an ten bic mʌꞌ a tꞌaquic u wich pujam ich pochꞌir.
45 An ten bic a mac tsoy u tucur,
tsoy cu bin jocꞌar u tꞌʌn tu chiꞌ.
A mac cꞌas u tucur cꞌas,
cu bin jocꞌar u tꞌʌn tu chiꞌ.
Mʌꞌ ja wirej,
a baꞌ yʌn tu tucur raꞌ cu bin jocꞌar tu cu tsicbar.
Caꞌtur u najob
46 Caj yaꞌaraj Jesús:
―Biquinin ca chen tꞌʌniquen,
“Jaj Tsꞌurir”,
barej mʌꞌ ca quibic in tꞌʌn?
47 Tu cotor a mac cu yubic in camsic caꞌ u quibej a baꞌ tin waꞌaraj.
48 Rajiꞌ irej a mac tꞌaj.
Quireꞌ ber caj u cꞌʌxaj yatoch,
tam caj u pʌcꞌaj yoc yatoch soc mʌꞌ u riquir.
Caꞌ bin tac u chꞌicyum icꞌ caꞌ bin buruc,
mʌꞌ u riquir quireꞌ jach tam caj u pʌcꞌaj yoc yatoch.
49 Chen a mac cu yubic in camsic,
chen mʌꞌ ju quibej a baꞌ caj in waꞌaraj tiꞌ,
rajiꞌ irej a mac chich u joꞌr.
Quireꞌ caj u cꞌʌxaj yatoch tuririꞌ,
chen mʌꞌ tam caj u pʌcꞌaj yoc yatoch.
Rajen caj riquij caj tar u chꞌicyum icꞌ caj tar yaꞌarir,
caj buꞌurij.
Quireꞌ mʌꞌ tam caj u pʌcꞌaj yoc yatochiꞌ.
Caj rʌc sat yatoch,
caj rʌc cuch ten icꞌ yejer jaꞌ.