A baꞌ caj u tsecꞌtaj Jesús ich chan pꞌuc wits
5
Caj yiraj Jesús jach pim mac.
Jesús caj naquij joꞌr pꞌuc wits.
Tiꞌ curaj Jesús ich u joꞌr wits.
Caj natsꞌob u camsʌwinicob Jesús ich u joꞌr pꞌuc wits.
2 Baxuc a jeraꞌ Jesús caj u camsaj u camsʌwinicob.
A mac jach quiꞌ yorob
3 Caj u camsaj Jesús caj yaꞌaraj tiꞌ u camsʌwinicob:
―Quiꞌ yorob ―quij Jesús―,
quireꞌ yerob jeꞌ u jawsaꞌr u siꞌpirob ten Cꞌuj.
Quireꞌ robob cu bin yamticob Cꞌuj tu cu bin u reyintic caꞌanan.
4 ’Quiꞌ yorob ―quij Jesús―,
a mac mʌꞌ quiꞌ yoreꞌ bajeꞌrer,
quireꞌ cu bin u quiꞌquintaꞌ yor ten Cꞌuj.
5 ’Quiꞌ yorob ―quij Jesús―,
a cu tucricob u racꞌob.
Chen u bʌjiriꞌ mʌꞌ u tucric,
quireꞌ bin u cꞌʌmej a baꞌ araꞌb tiꞌ ten Cꞌuj quir u quiꞌ cuxtar ich yocꞌocab.
6 ’Quiꞌ yorob ―quij Jesús―,
a cu pachticob tu yor u manob ich u tsoyir.
Quireꞌ jeꞌ u yamtaꞌ ten Cꞌuj soc u manob ich u tsoyir.
7 ’Quiꞌ yorob ―quij Jesús―,
a cu tucric tiꞌ u racꞌob,
cu yamtic u racꞌob.
Quireꞌ Cꞌuj cu bin u yajquintic a mac a cu yajquintic u racꞌob.
8 ’Quiꞌ yorob ―quij Jesús―,
a mac jawsaꞌ u siꞌpir ten Cꞌuj.
Quireꞌ jeꞌ yiricob Cꞌuj caꞌananeꞌ.
9 ’Quiꞌ yorob ―quij Jesús―,
a mac cu man u sisquintic u yor u racꞌob.
Quireꞌ a Cꞌujoꞌ jeꞌ bin yaꞌaric:
“Aroꞌ in parar” ―quij―.
10 ’Quiꞌ yorob ―quij Jesús―,
a mac a chucob u pachob,
quireꞌ cu manob tu tsoyir.
Tiꞌ cu bin u reyinticob caꞌanan yejer Cꞌuj.
11 ’Cax cu pꞌastic techex ―quij Jesús―,
quiꞌquintej a worex.
Cax cu cheꞌtiquechex,
quiꞌquintej a worex.
Cax cu chuquicob a pachex,
quiꞌquintej a worex.
Jesús caj yaꞌaraj:
―Cax cu pʌqꞌuicob a pachex quireꞌ caj a wacsajex ta wor tiꞌ in tꞌʌn ―quij Jesús―.
Quiꞌquintej a worex.
12 Caj yaꞌaraj Jesús ich u joꞌr pꞌuc wits tiꞌ u camsʌwinicob:
―Quiꞌquintej a worex,
caꞌ tsoyac a worex wa ber cu pꞌastiquechexob.
A Cꞌujoꞌ ―quij Jesús―,
tiꞌ cu bin u quiꞌ yacsiquechex caꞌanan.
Quireꞌ caj a muctajex tu cu pꞌastiquechexob.
Caj yaꞌaraj Jesús:
―Baxuc caj u chucob u pachob yʌjtseqꞌuirob u tꞌʌn Cꞌuj tu cʌjaꞌanob uch.
Camsaꞌb ten Jesús irob yoꞌoch xaꞌan
13 Caj yaꞌaraj Jesús tiꞌ u camsʌwinicob:
―A techexoꞌ,
irechex xaꞌan teꞌ yocꞌocab.
Chen wa cu jawar chꞌochꞌer cu yubic mʌnaꞌ chꞌochꞌ.
Wa mʌꞌ chꞌochꞌ,
jot mʌꞌ baꞌwir tiꞌ,
quireꞌ mʌꞌ u caꞌ chꞌochꞌtar.
Rajen cu pichꞌintic mac.
Rajen caꞌ a cʌnantex a mucꞌ techex a tsꞌaꞌb techex ten Cꞌuj.
14 Caj yaꞌaraj Jesús:
―A cajaroꞌ,
ich u joꞌr wits,
chʌcaꞌan irir ten tu cotor mac.
An ten bic a quiboꞌ quir u yercꞌacꞌtic a mac cʌjaꞌan ich yocꞌocab,
baxuc techex xan,
quir a yamtiquex mac quireꞌ a werex Cꞌuj.
15 Baxuc a mac cu tꞌʌbic u quib.
Mʌꞌ u yacsic yaran chꞌac.
Cu cuquintic u quib caꞌanan soc sasir yatoch soc u yercꞌacꞌtic yatochob.
16 Rajen caꞌ manaquex tu tsoyir ich a racꞌob soc chʌcaꞌan yiricob,
soc u bin u sʌjticob Cꞌuj a mac ic Tetex a tiꞌ yʌn ich caꞌanan.
Jesús tu camsic a baꞌ yarmʌn Moisés uch
17 Caj yaꞌaraj Jesús tiꞌ u camsʌwinicob ich u joꞌr pꞌuc wits:
―Mʌꞌ taren in waꞌaric techex quir a pꞌʌtiquex u tꞌʌn Moisés.
Mʌꞌ taren in waꞌaric techex quir a pꞌʌtiquex a baꞌ caj u camsajechex yʌjtseqꞌuirob u tꞌʌn Cꞌuj uch.
Caj yaꞌaraj Jesús:
―Caj taren in camsiquechex soc a werex a baꞌ caj u yaꞌaraj Moisés yejer yʌjtseqꞌuirob u tꞌʌn Cꞌuj.
Quireꞌ mʌꞌ taj caj u camsechexob yʌjcamsayʌjirob u tꞌʌn Moisés bajeꞌrer.
Taren ―quij Jesús―,
in rʌc nupꞌsej a baꞌ araꞌb ich u tꞌʌn Moisés,
baxuc ich u tꞌʌn yʌjtseqꞌuirob u tꞌʌn Cꞌuj.
18 Cꞌʌꞌotex a baꞌ quin wac techex ―quij Jesús―.
Mʌꞌ xuruc tꞌʌniꞌ ich yocꞌocabiꞌ hasta cu rʌc nupꞌur u tꞌʌn Cꞌuj a tsꞌibtaꞌb ten Moisés uch.
Mʌꞌ chichin cu pꞌatar caꞌ bin xuruc tꞌʌn ich yocꞌocab.
19 Caj yaꞌaraj Jesús:
―A mac cu jenmastic u tꞌʌn Moisés bajeꞌrer,
cax chichin cu jenmastic.
Baxuc cu bin u camsic tiꞌ u racꞌob,
chen bay cu cꞌuchur ich caꞌanan.
Barej mac taj caj u quibaj u tꞌʌn Moisés.
Baxuc taj cu quiꞌ camsic tiꞌob u tꞌʌn Moisés.
Aroꞌ yaꞌab cu bin u tsꞌurintic caꞌanan.
20 Caj yaꞌaraj tiꞌ u camsʌwinicob,
Jesús:
―A tenoꞌ ―quij Jesús―.
Chich quin wac techex.
Wa mʌꞌ jach manex tu tsoyir.
Mʌꞌ ja wirej,
u winiquirob judío a fariseojoꞌ yejer u racꞌob a cu camsicob u tꞌʌn Moisés mʌꞌ ju manob tu tsoyir.
Mʌꞌ cꞌuchaꞌan a worex a bin ich caꞌanan tu cu reyintic Cꞌuj.
Jesús cu camsic mʌꞌ tsoy u tsꞌictar mac
21 Caj yaꞌaraj tiꞌ u camsʌwinicob,
Jesús:
―Caj a wuꞌyaj yaꞌaric a nunquirex uch:
“Mʌꞌ tsoy a quinsic mac.
Wa cu quinsiqueꞌ,
tar cu bin ʌcʌtan ich juez soc yer bic tabar caj u quinsaj.”
22 Chen a tenoꞌ ―quij Jesús―.
Quin chich aric techex:
A mac cu tsꞌictar yejer u bʌj,
tiꞌ cu bin ʌcʌtan Cꞌuj soc yubic biquinin.
Caj yaꞌaraj Jesús:
―A mac cu pꞌastic u bʌj,
caꞌ bin xic ʌcʌtan tu cotor a jach tsꞌurirob u winiquirob judío soc yaꞌaric bic caj u pꞌastaj.
A mac a cu yaꞌaric tiꞌ u bʌj:
“Jach chich a joꞌr tech”,
tabar u bin yerar ich cꞌacꞌ,
quireꞌ u siꞌpir.
23 Caj yaꞌaraj tiꞌ u camsʌwinicob,
Jesús:
―Rajen a tenoꞌ,
chich quin waꞌaric techex.
24 Wa tabarech a quinsej wacax a sije tiꞌ Cꞌuj soc u jawar a siꞌpir.
Wa ca cꞌʌꞌotic tu tsꞌiquech yejer a bʌj,
jamach pꞌʌtej u boꞌorir a siꞌpir.
Caꞌ sutnʌc a sisquintej yor a bʌj.
Jeroj caj tsꞌoquij a sisquintic yor a bʌj,
tsoy a bin a quinsic wacax soc u jawsic a siꞌpir Cꞌuj.
25 Caj yaꞌaraj tiꞌ u camsʌwinicob,
Jesús:
―Wa yʌn winic cu bin u puriquech ʌcʌtan ich juez quir yiric wa ja boꞌor tiꞌ.
Joqꞌuen sisquintej yor soc mʌꞌ u bin u puriquech ich juez.
Quireꞌ caj tsꞌoc yiric yʌn a siꞌpir,
cu bin u cꞌubiquech tu cu naj maꞌcʌr winic.
26 Caj yaꞌaraj tiꞌ u camsʌwinicob,
Jesús:
―Jach taj quin waꞌaric techex:
Hasta ca quiꞌ boꞌotic policía cu jocꞌsiquech.
Jesús cu camsic mʌꞌ tsoy u man xib, cax xquic mʌꞌ tsoy u man
27 Caj yaꞌaraj tiꞌ u camsʌwinicob,
Jesús:
―A techexoꞌ,
a wuꞌymʌn yaꞌaraꞌ ten a nunquirex:
“Mʌꞌ tsoy u man xib.”
28 Chen a tenoꞌ ―quij Jesús―.
Chich quin waꞌaric techex:
A mac tan tu yiric xquic.
Cu pachtej u man yejer raꞌ xquicoꞌ,
irej wa cu jach man yejer quireꞌ cu jach pachtic yor.
29 Caj yaꞌaraj tiꞌ u camsʌwinicob,
Jesús:
―Wa jumbuj a wich tabar u yacsic a siꞌpir,
mʌꞌ ja quibej.
Tucrej an ten bic caj a toc jocꞌsaj a purej nachir.
Mʌꞌ ja wirej,
jach manan tsoyir a sʌtic tuririꞌ a wich soc mʌꞌ a bin ich cꞌacꞌ munt qꞌuin.
30 Wa raꞌ tabar u siꞌpir a cꞌʌbeꞌ,
mʌꞌ a quibej.
Tucrej an ten bic caj a curchꞌʌctaj caj a puraj.
Quireꞌ jach manan tsoyir a sʌtic a cꞌʌb soc mʌꞌ a bin ich cꞌacꞌ munt qꞌuin.
Mʌꞌ tsoy u pꞌʌtic u racꞌ
31 Caj yaꞌaraj tiꞌ u camsʌwinicob,
Jesús:
―Caj a wuꞌyex yaꞌaraꞌ a nunquirex uch:
“A mac a u cꞌat u pꞌʌtic u racꞌ.
Yʌn u cʌxtic caꞌ u tsꞌibtej u juꞌun soc tsoy u pꞌʌtic u racꞌ.”
32 Chen a tenoꞌ ―quij Jesús―,
chich quin waꞌaric techex:
Mʌꞌ tsoy a pꞌʌtiquex a racꞌ.
Caj yaꞌaraj tiꞌ u camsʌwinicob,
Jesús:
―Chen wa cu man yejer u jer mac tsoy a pꞌʌtic.
Chen a mac wa rajiꞌ cu chꞌic,
a caj u pꞌʌtaj a raqꞌueꞌ.
Wa cu chꞌic u jer mac,
cax mʌnaꞌ u siꞌpir chen caj u chꞌaj u raqꞌuintej caj u pʌyaj u siꞌpir.
Baxuc a pꞌataꞌb ten u mam,
yʌn u siꞌpir.
Mʌꞌ tsoy u yaꞌaric mac: Cꞌuj cu yiric ber cu toc aric baꞌ tiꞌ mac
33 Caj yaꞌaraj tiꞌ u camsʌwinicob,
Jesús:
―A wuꞌymʌnex yaꞌaraꞌ ten a nunquirex uch:
“Caꞌ a boꞌotej,
a caj a toc araj tiꞌ Cꞌuj,
wa caj a chuquex Cꞌuj.”
34 Chen a tenoꞌ ―quij Jesús―,
chich quin camsic techex;
mʌꞌ tsoy a waꞌariquex:
“Cꞌuj cu yiric” wa ber ca toc ariquex baꞌ tiꞌ mac.
Baꞌiriꞌ xan:
mʌꞌ tsoy a chuquex Cꞌuj caꞌanan,
tiꞌ taroꞌ tu cu reyintic Cꞌuj.
35 Mʌꞌ tsoyiꞌ ―quij Jesús―,
a chuquiquex ich ruꞌum,
tu ca toc aric baꞌ tiꞌ mac quireꞌ Cꞌuj tiꞌ yʌn ich ruꞌum xan.
Mʌꞌ tsoy a chuquiquex Jerusalén,
tu ca toc ariquechex baꞌ tiꞌ a racꞌob,
quireꞌ raꞌ u cajar Cꞌuj.
36 Cax mʌꞌ a waꞌariquex:
“In joꞌr cu yiric” tu ca toc ariquex baꞌ tiꞌ mac.
Quireꞌ mʌꞌ cꞌuchaꞌan a worex a waysiquex a joꞌrex sʌc,
mʌꞌ yaꞌax a joꞌrex cꞌuchaꞌan a waysiquex.
Cax turiꞌ u tsotser a joꞌrex mʌꞌ u cꞌuchur a worex tiꞌ.
37 Jesús caj u yaꞌaraj tiꞌ u camsʌwinicob:
―Wa ca chen ariquex tiꞌ a racꞌob:
“Jeꞌ in bin” ―quech tiꞌ―,
wa “mʌꞌ jin bin” ―quech tiꞌ―.
Baxuc tsoy a nunquiquex tiꞌ.
Wa ju jer a tꞌʌn ca waquex tiꞌ,
tiꞌ cu tar ich quisin.
Rajen turiꞌ tꞌʌn ca nunquiquex soc u quibic a tꞌʌn.
Jesús caj u camsaj a mʌꞌ tsoy u pʌquic u boꞌorir
38 Caj yaꞌaraj tiꞌ u camsʌwinicob,
Jesús:
―A wuꞌymʌnex yaꞌaraꞌ ten a nunquirex uch:
“Toc pʌquej u boꞌorir yejer a mac caj u chucaj a pach.”
39 Chen a tenoꞌ ―quij Jesús―,
chich quin camsic techex:
Mʌꞌ ja pʌquic u boꞌorir a jach cꞌasoꞌ,
cax cu raxic a techoꞌ.
Mʌꞌ a pʌquej a bʌj.
Wa caj u raxaj jumbuj a pꞌuc.
Raꞌ mʌꞌ a cʌniquex.
Ca tsꞌic u raxej jumbuj a pꞌuc xan.
40 Caj yaꞌaraj Jesús tiꞌ u camsʌwinicob ich u joꞌr pꞌuc wits:
―Wa mac u taꞌquic a joꞌr soc u chꞌic a nocꞌ.
Pitej a nocꞌ,
caꞌ a tsꞌaj tiꞌ ―quij Jesús―,
cax u caꞌ yaꞌarir a nocꞌ xan.
41 Caj yaꞌaraj Jesús:
―Wa cu tsꞌʌric a pach soldado caꞌ a cuchej u baꞌtac turiꞌ nachir.
Caꞌ arej tiꞌ:
“Jeꞌ in cuchic caꞌtureꞌ nachir quir in yamtiquech.”
42 Caj yaꞌaraj Jesús tiꞌ u camsʌwinicob:
―Wa mac caj u cꞌataj tech a baꞌtac.
Mʌꞌ ja waꞌaric mʌꞌ ja tsꞌic tiꞌ.
Tsꞌajex tiꞌ,
cax a mac a cu tar u majantej.
Tsꞌajex tiꞌ.
Yajquintej a mac a cu pꞌactiquechex
(Lc. 6.27-28, 32-36)
43 Caj yaꞌaraj tiꞌ u camsʌwinicob,
Jesús:
―A wuꞌymʌnex yaꞌaraꞌ ten a nunquirex uch ―quij Jesús―:
“A mac cu yajquintiquex,
quet yajquintej.
A mac a cu pꞌactiquexoꞌ quet a pꞌactiquex xan.”
44 Chen a tenoꞌ ―quij Jesús―,
chich quin camsic techex.
Yajquintex a mac cu pꞌactic techex.
Quiꞌ tꞌʌnex a mac a cu cʌrʌxtꞌʌntiquex.
Ca waquex tiꞌ:
“Caꞌ u yamtech Cꞌuj.”
Quiꞌ yamtex a mac a cu pꞌactiquechex.
A mac cu pꞌactiquechex,
tꞌʌnex Cꞌuj tiꞌ.
Cax cu cheꞌtiquechex,
tꞌʌnex Cꞌuj tiꞌ xan.
45 Caj yaꞌaraj Jesús tiꞌ u camsʌwinicob:
―Wa ca yaj a cu pꞌactiquechexoꞌ u pararechex Cꞌuj,
caj a cʌnex Cꞌuj.
Quireꞌ a Cꞌujoꞌ cu yajquintic mac,
cax tiꞌ yʌn a cꞌasoꞌ,
cax a tiꞌ yʌn a tsoyoꞌ.
A Cꞌujoꞌ cu chaꞌic u tar jaꞌ tiꞌ a cꞌasoꞌ soc u chꞌijir u pʌcꞌar.
Baxuc xan,
tiꞌ a tsoyoꞌ,
cu chaꞌic u tar jaꞌ soc u chꞌijir u pʌcꞌar xan.
46 Caj yaꞌaraj Jesús:
―Wa ca chen yajquintiquex a mac a yajexeꞌ.
Jeꞌ wa ju boꞌotiquechex Cꞌuj.
Mʌꞌ ju boꞌotiquechex,
quireꞌ a mac jach cꞌas xanoꞌ,
cu yajquintic a ju jach yaj u racꞌob.
U jeroj,
mʌꞌ ju yajquintej,
cu pꞌactic.
47 Caj yaꞌaraj Jesús tiꞌ u camsʌwinicob:
―Baꞌwir ca tꞌʌniquex a racꞌob chen mʌꞌ a tꞌʌniquex a cu pꞌactiquechex.
Tsoy wa mʌꞌ a tsoyiꞌ?
―quij Jesús―.
Quireꞌ a mac mʌꞌ yer Cꞌuj baxuc cu tꞌʌnic u racꞌob xan,
mʌꞌ ju tꞌʌnic a mac cu pꞌacticob.
48 Caj yaꞌaraj tiꞌ u camsʌwinicob,
Jesús:
―Cʌnex Cꞌuj ―quij Jesús―.
Quire mʌnaꞌ u siꞌpir a Cꞌujoꞌ soc irechex Cꞌuj,
mʌnaꞌ a siꞌpirex.