Jesús cu camsic mʌꞌ tsoy u pꞌʌtic u racꞌ
19
Caj tsꞌoc yaꞌaric Jesús bic tabar u jawsic u yet acsaꞌorir caj u pꞌataj u ruꞌumin Galilea.
Caj cꞌuchij tu ruꞌumin Judea caj caꞌ bin pʌchir yaꞌarir Jordán tu cu tar ic yum.
2 Jach pim caj sayob tu pach Jesús caj bin pʌchir yaꞌarir Jordán caj jawsaꞌb u yajir.
3 Caj tar cꞌatbir tiꞌ Jesús ten jun yarob u winiquirob judío a fariseojoꞌ.
Caj u jutsꞌajob u bʌj ich Jesús quir u tumtaꞌrob yor Jesús.
Caj tus cꞌatob tiꞌ:
―Tsoy wa ju pꞌʌtic u racꞌ cax a baꞌ quiriꞌ?
4 Caj u nuncaj:
―Mʌꞌ wa ja xacmʌnex tu tsꞌibaꞌan:
“A Cꞌujeꞌ tu yʌn betaj xib yejer xquic caj u betaj yocꞌocab?”
5 Bayiriꞌ Cꞌuj caj yaꞌaraj xan:
“Rajen a xiboꞌ yʌn u pꞌʌtic u tet bayiriꞌ u nʌꞌ soc u bin u chꞌaꞌej u racꞌ.
Caj tsꞌoc u chꞌic u racꞌ caꞌtur yejer u racꞌ irej wa tu junan.”
6 Caj yaꞌaraj Jesús:
―Rajen mʌꞌ biqꞌuin caꞌtur a mac a tu chꞌaj u racꞌ quireꞌ a Cꞌujoꞌ cu yiric tuririꞌ yʌn.
Quireꞌ Cꞌuj caj u toc muchꞌquintaj xib,
yejer u racꞌ raꞌ u qꞌuinin caj u chꞌaj u racꞌ.
Jeroj,
turiꞌ cu yiric Cꞌuj rajen mʌꞌ tsoy u pꞌʌtic u racꞌ xib.
7 Caj yaꞌaraj u winiquirob judío a fariseojoꞌ:
―Biquinin caj yaꞌaraj Moisés uch:
“Tsoy caꞌ a tsꞌibtej u juꞌunin quir a pꞌʌtic a racꞌ?”
8 Jesús caj u nuncaj tiꞌob:
―Quireꞌ chich u joꞌr a racꞌob rajen yaꞌaraj Moisés:
“Tsoy u tsꞌibtic u juꞌunin quir u pꞌʌtic u racꞌ.”
Chen tu yʌnxchun tu cotor baꞌ mʌꞌ tsoy u pꞌʌtic u racꞌ quireꞌ baxuc u cꞌat Cꞌuj.
9 A tenoꞌ ―quij Jesús―.
Quin waꞌaric techex.
Tsoy a pꞌʌtiquex a racꞌ wa cu man.
Barej wa mʌꞌ u man,
mʌꞌ tsoy a pꞌʌtiquex a racꞌ.
Mʌꞌ tsoy u pꞌʌtic u racꞌ caꞌ u raqꞌuinte u jer.
Wa caj u raqꞌuintaj u jer cu man.
Wa caj u raqꞌuintaj u jer a pꞌat ten xib cu man yejer.
10 U camsʌwinicob Jesús caj yaꞌarob:
―Wa ja xibeꞌ cu chen pꞌʌtic u racꞌ a cu man mʌꞌ baꞌ wir caꞌ ic chꞌaꞌic ic raqꞌuintej.
11 Caj yaꞌaraj Jesús:
―Mʌꞌ tu cotor mʌꞌ cꞌuchaꞌan yor mʌꞌ u chꞌic u racꞌ quireꞌ Cꞌuj tsꞌaꞌb tiꞌ u mucꞌ soc mʌꞌ ju chꞌic u racꞌ.
Jaririꞌ mʌꞌ u chꞌic u racꞌ quireꞌ Cꞌuj cu tsꞌic u mucꞌ quir u quibej.
12 Yʌn u jer xib mʌꞌ ju chꞌic u raqꞌuintej xquic quireꞌ toc cꞌas caj rochaꞌb ten u nʌꞌ uch.
U jer xib mʌꞌ ju chꞌic u racꞌ quireꞌ capontaꞌb ten mac.
Yʌn u jer xib mʌꞌ ju chꞌic u racꞌ soc u quiꞌ beyaj tiꞌ Cꞌuj.
A mac cꞌuchaꞌan yor mʌꞌ u cꞌat u chꞌic u racꞌ,
tsoy.
A mac mʌꞌ cꞌuchaꞌan yor,
tsoy u chꞌic u racꞌ.
A mac mʌꞌ ju bin u chꞌic u racꞌ quireꞌ u cꞌat u quiꞌ beyaj yejer Cꞌuj tsoy xan.
Caj tar purbir ich Jesús a chichan
13 Yʌn mac caj tar purbir chichan ich Jesús quir u tsꞌancꞌʌbtic Jesús soc u yamtaꞌ ten Cꞌuj.
Caꞌ u tꞌʌnej Cꞌuj Jesús quir u yamtaꞌr a chichanoꞌ Jesús.
Rajiꞌob qꞌueyaꞌb ten u camsʌwinicob Jesús a mac tar u puricob a chichanoꞌ.
14 Caj yaꞌaraj Jesús:
―Tsireꞌej u tar purbir chichan.
Mʌꞌ ja mʌquex u berob quir u tarob ten.
Mʌꞌ ja wirej,
a chichanoꞌ sep cu tar tu yʌnen.
Wa mac u cꞌat yocar tu cu bin u reyintejob Cꞌuj caꞌ u cʌnejob a chichanoꞌ.
15 Caj u taꞌrob ten Jesús a chichanoboꞌ soc u yamtaꞌr a chichanoboꞌ ten Cꞌuj.
Caj wʌcꞌʌs bin Jesús.
Mʌꞌ uch xuruc a jach neyʌn u taqꞌuin. Rajiꞌ cu tsicbar yejer Jesús
16 Caj bin ich Jesús a mʌꞌ uch xuruc xib,
caj u cꞌataj tiꞌ Jesús:
―Baꞌ quin yʌn uꞌyic in wʌjcamsayʌjirech quireꞌ jach tsoyech.
Baꞌ caꞌ in betej a jach tsoyoꞌ,
soc in cuxtar munt qꞌuin?
17 Caj u nuncaj Jesús:
―Biquinin ca waꞌaric jach tsoyiren?
Chen Cꞌuj a jach tsoyoꞌ,
mʌnaꞌ u jer.
Wa ja cꞌat u yacsiquech Cꞌuj caꞌ a quibej u tꞌʌn tu tsꞌibaꞌan.
18 Caj u cꞌataj xib a mʌꞌ uch xuruc.
Caj yaꞌaraj:
―Tu yʌn?
―quij.
Caj u nuncaj Jesús:
―Mʌꞌ a yʌn quinsic mac.
Mʌꞌ a yʌn man yejer a mʌꞌ a racꞌ.
Mʌꞌ a waꞌcric baꞌ.
Mʌꞌ a tus pʌquic mac.
19 Caj yaꞌaraj Jesús tiꞌ:
―Sʌjtej a tet,
bayiriꞌ sʌjtej a nʌꞌ.
Yajquintej a wet cajar an ten bic a yajquintic a wʌcꞌʌs bʌjiriꞌ.
20 Caj u nuncaj a mʌꞌ uch xuruc xib:
―Aroꞌ caj in toc rʌc quibaj,
caj in toc quibaj tin chichanin.
Yʌn wa ju jer wa jaririꞌoꞌ?
21 Caj yaꞌaraj Jesús:
―Wa ja cꞌat caꞌ u quiꞌ acsech Cꞌuj.
Joqꞌuen,
xen cʌnej a baꞌtac.
Caj tsꞌoc a canic a baꞌtac,
yʌn a taqꞌuin,
tsꞌaj tiꞌ a mac jach otsiroꞌ.
Soc a baywoꞌ yʌn tech ich Cꞌuj jach manan tsoyir,
quireꞌ caj a yamtaj a racꞌob.
Pachir caj sayʌr tin pach quir a cʌnic in tꞌʌn.
22 Caj yuba a mʌꞌ uch xuruc xib.
Caj tsꞌoc yubic a baꞌ araꞌb ten Jesús tiꞌ caj choquij yor quireꞌ nejach yʌn u taqꞌuin.
Caj wʌcꞌʌs bin a xib mʌꞌ uch xuruc.
23 Caj yaꞌaraj tiꞌob u camsʌwinicob,
Jesús:
―Taj quin waꞌaric techex.
Jach yaj yubic a neyʌn u taqꞌuin.
Jach yaj yubic xan,
quir u yocar tu cu bin u reyinticob Cꞌuj,
quireꞌ u yaj u taqꞌuin.
24 In wʌcꞌʌs caꞌ aric techex ―quij Jesús―,
jeꞌ wa ju cꞌuchur yor yocar yʌrʌcꞌ tsimin ich u jor yitꞌ putsꞌ?
Mʌꞌ u cꞌuchur yor,
quireꞌ chichin u jor yitꞌ putsꞌ.
Jeꞌ wa ju cꞌuchur yor ocar ich caꞌanan a mac neyʌn u jach taqꞌuin?
Mʌꞌ ju yocar quireꞌ u yaj u taqꞌuin.
Jaj ix tʌcojoꞌ jeꞌ yocar yʌrʌcꞌ tsimin ich u jor yitꞌ putsꞌ.
Chen a mac neyʌn u taqꞌuin mʌꞌ ju yocar tu cu bin u reyintejob Cꞌuj quireꞌ u yaj u taqꞌuin.
25 Caj yubob u camsʌwinicob caj jaqꞌuij yorob.
Caj u cꞌatajob tiꞌ Jesús u wʌcꞌʌs u bʌjirirob u camsʌwinicob Jesús:
―A mac cu bin tacbir ten Cꞌuj?
26 Jesús caj u pʌctaj u camsʌwinicob caj yaꞌaraj tiꞌob:
―A xiboꞌ mʌꞌ cꞌuchaꞌan yor u taquic u bʌj.
Chen Cꞌuj cꞌuchaꞌan yor u taquic tu cotor quireꞌ cꞌuchaꞌan yor tiꞌ tu cotor baꞌ.
27 Caj yaꞌaraj Pedro:
―Jach Tsꞌurir,
biquinin a yʌn u taqꞌuin mʌꞌ tu rʌc pꞌʌtaj u baꞌtac mʌꞌ u sayʌr ta pach quir u cʌnic a tꞌʌn?
A tenoboꞌ,
caj in rʌc pꞌatajob a baꞌ yʌn tenob caj sayenob ta pach quir in cʌnicob a tꞌʌn.
Baꞌ cu bin u tsꞌic tenob Cꞌuj quireꞌ caj in toc rʌc pꞌʌtob in baꞌtacob?
28 Jesús caj u nuncaj:
―Jach taj,
quinin waꞌaric techex.
Raꞌ u qꞌuinin caꞌ bin u betej u jer ricꞌben teꞌ ich yocꞌocab.
Raꞌ u qꞌuinin xan quin bin in cutar tu cu bin u reyinticob Cꞌuj.
Tiꞌ quin bin in cutar tu sasirir Cꞌuj a tenoꞌ taren in yamtic mac tu cotor.
Bayiriꞌ techex,
a bin a tsꞌurintiquex u winiquirob Israel.
Caꞌ a tsꞌurintiquex a doce yoꞌnen u winiquirob Israel.
29 A mac tu rʌc pꞌʌtaj yatoch tu cotor.
Cax u wʌcꞌʌs u bʌjob.
Cax u wʌcꞌʌs tet,
cax u nʌꞌ,
cax wa ju racꞌ cax wa ju parar cax wa ju ruꞌumin.
Quireꞌ cu tar tin pach quir u cʌnic in tꞌʌn.
Rajen cu pꞌʌtic tu cotor soc u quibic in tꞌʌn.
A caj u rʌc pꞌʌtaj aroꞌ,
cu bin u cꞌʌmej tiꞌ Cꞌuj a baꞌ jach tsoy bajeꞌrer.
Jach manan cu bin tsꞌabʌr tiꞌ.
Baxuc xan,
caꞌ bin xuruc tꞌʌn jeꞌ u tsꞌabʌr tiꞌ quir u cuxtar munt qꞌuin.
30 Caj yaꞌaraj Jesús:
―A mac caj u yʌn acsaj tu yor in tꞌʌn cu quiꞌ acsaꞌr ten Cꞌuj.
Bayiriꞌ a mac pachir caj u yacsaj tu yor.
Bayiriꞌ xan cu bin quiꞌ acsaꞌrbir ten Cꞌuj.
A Cꞌujoꞌ mʌꞌ u coyen acsej a caj u yʌn acsaj tu yor.
Quet caꞌ bin u rʌc acsejob a pachir caj u yacsajob tu yorob.