Jesús cu camsic mʌꞌ tsoy u pꞌʌtic u racꞌ
10
Caj ruqꞌuij tiꞌ taroꞌ caj tar tu cu xur u ruꞌumin Judea caj u chꞌʌtaj yaꞌarir u cꞌabaꞌ Jordán.
A yaꞌab macobeꞌ caj u wʌcꞌʌs muchꞌquintajob u bʌj tu yicnʌn Jesús.
Jeroj tuneꞌ,
caj u yʌnxchun u wʌcꞌʌs camsic tiꞌob an ten bic cu nanij u camsic tiꞌob uch.
San Marcos 10.1-31
2 Caj cꞌuchob u winiquirob judío a fariseojoꞌ yicnʌn Jesús,
caj u chich cꞌatajob tiꞌ quir u tumticob yor,
wa tsoy tuririꞌ mam u pꞌʌtic u racꞌ.
3 Barej Jesús caj u nuncaj,
caj u yaꞌaraj tiꞌob:
―Baꞌ yarmʌn techex Moisés uch?
4 Robobeꞌ caj u yaꞌarajob:
―A Moiséseꞌ araꞌb u tsꞌibtej u juꞌunin quir u pꞌʌtic u racꞌ.
Caꞌ bin tsꞌocac u tsꞌibtic u juꞌunin jeroj tsoy u pꞌʌtic.
Baxuc araꞌb ten Moisés.
5 Caj u nuncaj Jesús,
caj u yaꞌaraj tiꞌob:
―Barej caj u tsꞌibtaj techex a raꞌ tꞌʌnoꞌ caj u tsꞌibtaj quireꞌ caj u yiraj jach chich a joꞌrex.
6 Barej u chꞌic chunin ber caj betaꞌb ich yocꞌocabeꞌ,
raꞌ u qꞌuinin caj betaꞌb tu cotor a baꞌ,
caj araꞌb ich u tꞌʌn Cꞌuj:
“Xib yejer xquic caj betaꞌb ten Cꞌuj.”
7 “Rajen juntur a xibeꞌ bin u pꞌʌtej u tet yejer u nʌꞌ quir u pꞌeriquintic u bʌj yejer u racꞌ.
8 A caꞌturoꞌ caꞌcheꞌ tu pꞌeriꞌquintaj u bʌjob.”
Rajen robob mʌꞌ caꞌturobiꞌ chen tuririꞌ yʌn.
9 Rajen a baꞌ pꞌeriquintaꞌb ten Cꞌuj mʌꞌ tsoy u jʌsic a xiboꞌ.
10 Barej caj ocob ich naj u camsʌwinicob caj tarob u cꞌaticob tiꞌ baꞌ caj u camsaj tiꞌob sam.
11 Caj u yaꞌaraj tiꞌob:
―Wa mac cu pꞌʌtic u racꞌ quir u bin u chꞌic u jer,
caj tsꞌoc u chꞌic u jer,
yʌn u siꞌpir,
irej a mac a cu man yejer u jer xquic.
12 Wa ja xquicoꞌ cu pꞌʌtic u mam quir u bin u chꞌic u jer,
caj tsꞌoc u chꞌic u jer,
yʌn u siꞌpir,
irej a xquicoꞌ a cu man yejer u jer xiboꞌ.
Jesús cu tꞌʌnic Cꞌuj tiꞌ a chichanoꞌ
13 Yʌn mac caj tar purbir chichan ich Jesús quir u tsꞌancꞌʌbaꞌrob ten Jesús soc u yamtaꞌrob ten Cꞌuj.
Caj u tꞌʌnej Cꞌuj Jesús quir u yamtaꞌrob chichan ten Cꞌuj.
A yʌjpurirob chichan ich Jesús caj qꞌueyaꞌbob ten u camsʌwinicob Jesús.
14 Cꞌuxij yor Jesús caj u yiraj rajen caj u yaꞌaraj tiꞌob:
―Tsireꞌej u tar purbir a chichanoꞌ,
caꞌ u yirenob.
Mʌꞌ a mʌquex u berob quir u tarob ten.
Mʌꞌ ja wirej,
a chichanoꞌ seb cu tar tu yʌnen.
15 Wa mac u cꞌat u yocar tu cu bin u reyintejob Cꞌuj arej u cʌnejob a chichanoꞌ.
16 Jeroj tuneꞌ,
caj u chꞌaj u mecꞌob jujuntur a chichanoꞌ caj u tsꞌaj u cꞌʌb yocꞌorob jujuntur a chichanoꞌ caj u tꞌʌnaj Cꞌuj soc u yamtaꞌrob ten Cꞌuj a chichanoꞌ.
A mʌꞌ uch xuruc u baquer xib a neyʌn u taqꞌuin
17 A ray u qꞌuininoꞌ cu jocꞌar Jesús quir u bin tu bej,
caj tar yacab yicnʌn Jesús tuririꞌ mac,
caj xonraj ʌcʌtan caj u cꞌataj tiꞌ:
―Jach tsoyech in wʌjcamsʌyʌjirech.
Arej ten baꞌ caꞌ in betej soc in cuxtar munt qꞌuin?
18 Jesús caj u yaꞌaraj tiꞌ a xiboꞌ:
―Biquinin ca waꞌaric tsoyen?
Mʌnaꞌ mac jach tsoy chen jariꞌ Cꞌuj tsoyoꞌ.
19 Tech a wer baꞌ caj u tsꞌibtaj Moisés uch:
“Mʌꞌ a yʌn man yejer xquic,
baxuc xquic mʌꞌ u yʌn man yejer xib.
Baxuc xan,
mʌꞌ ja quinsic mac.
Baxuc xan,
mʌꞌ a waꞌcric baꞌ.
Baxuc xan,
mʌꞌ a yʌn tusic mac.
Baxuc xan,
mʌꞌ a yʌn tusaric baꞌ.
Yʌn sʌj ta tet yejer a nʌꞌ xan.”
20 Rajiꞌ tuneꞌ,
caj u nuncaj,
caj u yaꞌaraj tiꞌ:
―In wʌjcamsayʌjirech,
tu cotor aroꞌ caj in toc quibaj tin chichʌnin uch.
21 Jesús tuneꞌ,
caj u pʌctajeꞌ caj u yajquintaj,
caj u yaꞌaraj tiꞌ:
―Yʌn tuririꞌ baꞌ mʌꞌ ta quibaj,
caꞌ a betej aroꞌ.
Canej tu cotor a baꞌ yʌn tech.
Cu tsꞌocar a rʌc canic,
caꞌ a jʌsej a taqꞌuin tiꞌ a mac otsiroꞌ.
Cu tsꞌocar aroꞌ caꞌ taquech tin pach quir a cʌnic in tꞌʌn,
cax wa jeꞌ a quimin.
Caꞌ bin cꞌuchuquech ich caꞌanan,
cu bin tsꞌabʌr tech a baꞌ jach coꞌojoꞌ.
22 Caj tsꞌoc yubic a baꞌ caj u yaꞌaraj Jesús tiꞌ caj tucurnʌjij quireꞌ jach yʌn u taqꞌuin.
Caj bineꞌ,
yajij yor.
23 Jesús tuneꞌ,
caj sut u bʌj caj pacatnʌjij caj u yaꞌaraj tiꞌ u camsʌwinicob:
―Jach yaj yocar mac a neyʌn u taqꞌuineꞌ tu cu reyinticob Cꞌuj.
24 Caj jacꞌ yorob u camsʌwinicob Jesús quireꞌ a ray tꞌʌnoꞌ a baꞌ caj u yaꞌaraj Jesús.
Jeroj tuneꞌ,
caj u wʌcꞌʌs araj tiꞌob:
―In pararechex,
jach yaj yocar mac a neyʌn u taqꞌuineꞌ tu cu reyinticob Cꞌuj quireꞌ u yaj u taqꞌuin.
25 Jeꞌ wa ju cꞌuchur yor yocar yʌrʌcꞌ tsimin ich u jorir yitꞌ putsꞌ?
Mʌꞌ u cꞌuchur yor quireꞌ chichin u jorir yitꞌ putsꞌ.
Jeꞌ wa ju cꞌuchur yor ocar ich caꞌanan a mac a ne yʌn u taqꞌuin?
Mʌꞌ u yocar quireꞌ u yaj u taqꞌuin.
Jaj ix tʌcoj,
jeꞌ u yocar yʌrʌcꞌ tsimin ich u jorir u yitꞌ putsꞌ.
Chen a mac a neyan u taqꞌuin mʌꞌ ju yocar tu cu bin u reyintejob Cꞌuj quireꞌ u yaj u taqꞌuin.
26 Caj u yubajob u camsʌwinicob caj jaqꞌuij yorob caj u pacran cꞌatajob ich u yet camsʌwinicob:
―A mac cu bin tacbir ten Cꞌuj tun?
27 Jesús caj pactaꞌbob caj u yaꞌaraj:
―A xiboꞌ mʌꞌ cꞌuchaꞌan yor u taquic u bʌj,
chen Cꞌuj cꞌuchaꞌan yor u taquic tu cotor mac,
quireꞌ Cꞌuj cꞌuchaꞌan yor tiꞌ tu cotor baꞌ.
28 Pedro tuneꞌ,
caj u yʌnxchun yaꞌaric tiꞌ:
―Jaj Tsꞌurir biquinin a neyʌn u taqꞌuin mʌꞌ u rʌc pꞌʌtaj a baꞌ yʌn tiꞌ quir u say ta pach quir u cʌnic a tꞌʌn?
A tenob caj in rʌc pꞌʌtajob a baꞌ yʌntenob caj sayenob ta pach quir in cʌnicob a tꞌʌn.
An baꞌ cu bin u tsꞌic tenob Cꞌuj,
quireꞌ caj in toc rʌc pꞌʌtajob a baꞌ yʌn tenob uch?
29 Caj u nuncaj Jesús caj u yaꞌaraj:
―Jach taj quin waꞌaric techex.
A mac a caj u pꞌʌtaj yatoch tu cotor,
cax u wʌcꞌʌs u bʌjob,
cax u wʌcꞌʌs tet,
cax u nʌꞌ,
cax wa ju pararob,
cax wa ju ruꞌumin quir u yamtiquen yejer u jach tsoyir u tꞌʌn Cꞌuj.
30 A mac a caj u pꞌʌtaj aroꞌ cu bin u cꞌʌmej tiꞌ Cꞌuj a baꞌ jach tsoyoꞌ tu qꞌuinin bajeꞌrer,
jach manan cu bin tsꞌabʌr tiꞌ.
Cu bin tsꞌabʌr yatochob.
Cu bin tsꞌabʌr tiꞌ u ruꞌumob.
Raꞌiriꞌ u qꞌuinin xan,
jeꞌ u chuquicob u pach quireꞌ caj u yacsaj tu yor in tꞌʌn.
Baxuc xan,
caꞌ bin xuruc tꞌʌn,
jeꞌ u tsꞌabʌr tiꞌ u cuxtar munt qꞌuin.
31 Barej yaꞌab a raꞌ yʌn pʌybejeꞌ bajeꞌrer,
cu bin man pachir cu man u tsꞌatiꞌ pachir pʌybejiꞌ.
Jesús cu wʌcꞌʌs aric bin u caj quimin
32 Jesús cu bin ich u berir Jerusalén,
yet binacob yaꞌab macob.
Jesús pʌybej cu bin.
Jacꞌaꞌan yorob cu binob a yet binacob,
a cu sayʌrob tu pacheꞌ caj sajʌcchʌjob.
Jeroj tuneꞌ,
tu junanob caj u pʌyaj u camsʌwinicob quireꞌ u tsicbʌtic tiꞌob u docejob.
Caj u yʌnxchun u yaꞌaric tiꞌob a baꞌ cu bin tar tiꞌ caꞌ bin cꞌuchucob tu cajar Jerusalén:
San Marcos 10.32-52
33 ―Iric quic binex tu cajar Jerusalén.
Tiꞌ cu bin u quinsiquenob.
Tiꞌ cu yʌn bin u cꞌubiquenobiꞌ tiꞌ u jach tsꞌurirob sacerdote u winiquirob judío,
yejer yʌjcamsʌyʌjirob u tꞌʌn Moisés.
Robob cu bin yaꞌarejob caꞌ quinsaquen,
a tenoꞌ a baxuquenechexeꞌ.
Mʌꞌ ja wirej,
cu bin u cꞌubiquenob xan tiꞌ a mʌꞌ u winiquirob judío.
34 Robob bin u pꞌastiquenob,
bin u jʌtsꞌenob,
bin u tubiquenob,
jeroj tuneꞌ,
bin u quinsenob.
Mʌnaꞌ u nup u qꞌuinin caꞌ bin riqꞌuiquen tiꞌ in quimirir.
A baꞌ u cꞌatob Jacobo yejer Juan
35 Jacobo tun,
yejer Juan,
u pararob Zebedeojoꞌ caj tarob tu yicnʌn Jesús,
caj u yaꞌarajob:
―In wʌjcamsayʌjirechob,
wa quin cꞌaticob baꞌ tiꞌ tech,
in cꞌatob caꞌ a betej tiꞌ a tenob.
36 Rajiꞌ tuneꞌ,
caj u yaꞌaraj tiꞌob:
―Baꞌ a cꞌatex caꞌ in betej techex?
37 Robob caj u yaꞌarajob tiꞌ:
―Arej tenob caꞌ curaquenob tuririꞌ ta noj bayiriꞌ tuririꞌ ta tsꞌic caꞌ bin cꞌuchuc tu qꞌuinin caꞌ ocaquech tu cu reyinticob Cꞌuj a mac tu cotor.
38 Jesús tuneꞌ,
caj u yaꞌaraj tiꞌob:
―A techexoꞌ,
mʌꞌ a werex baꞌ ca cꞌatiquex ten.
Arex ten wa cꞌuchaꞌan a worex a mucꞌyajex an ten bic caꞌ bin mucꞌyajnʌquen ich cruz?
Bayiriꞌ xan,
arex ten wa cꞌuchaꞌan a worex a mucꞌyajex an ten bic caꞌ bin mucꞌyajnʌquenob tiꞌ a macob?
39 Robob caj u yaꞌarajob tiꞌ:
―Cꞌuchaꞌan in worob in mucꞌyajob an bic tech.
Jesús caj u yaꞌaraj tiꞌob:
40 ―Taj quin waꞌaric.
Jeꞌ a mucꞌyajex an bic ten.
Chen mʌꞌ cꞌuchaꞌan in wor in curquintiquechex ich in noj mʌꞌ ich in tsꞌic quireꞌ mʌꞌ ten yʌnin.
Quireꞌ in Tet Cꞌuj yʌnin quir u curquintic mac u cꞌat Cꞌuj.
Rajiꞌ u yʌn ricsmʌn uch.
41 Barej caj yubob a diezoꞌ u yet camsʌwinicob a baꞌ cꞌataꞌb tiꞌ Jesús ten Juan yejer Jacobo.
U yet camsʌwinicob caj pꞌujob yejer Juan yejer Jacobo.
42 Barej Jesús caj u tꞌʌnaj caꞌ u muchꞌquintejob u bʌj u camsʌwinicob quir u camsic,
caj u yaꞌaraj tiꞌob:
―A werex a mac u jach tsꞌurirob u cajarob a mʌꞌ u winiquirob judío,
cu jach tsꞌuririnticob u winiquirob.
Bayiriꞌ xan,
cu naj tsꞌuririnticob u winiquirob quir u beticob a baꞌ u cꞌatob u jach tsꞌurirob.
43 Mʌꞌ a yʌn cʌniquex a baxuc u jach tsꞌurirob a mʌꞌ u winiquirob judío,
a mac u cꞌat u tsꞌuririnticob u yet acsaꞌorirob.
Arej caꞌ u yamtej u yet camsʌwinicob.
44 Cax a mac ich techex u cꞌat u tsꞌuririntic u yet camsʌwinicob,
arej caꞌ u yamtej u yet camsʌwinicob soc irej u cꞌurew.
45 Caj u yaꞌaraj Jesús:
―Caꞌ a cʌniquenex,
a tenoꞌ a baxuquenechex.
Mʌꞌ taren quir u yamtiquenob.
Taren in yamtic tu cotor mac.
Taren quir in quinsaꞌr soc in rʌc boꞌotic u boꞌorir caꞌ siptacob u binob u siꞌpirob yaꞌab mac.
Jawsaꞌb u wich Bartimeo ten Jesús
46 Caj tarob tu cajar Jericó.
Quireꞌ cu jocꞌar ich u cajar Jericó yet binacob u camsʌwinicob yejer xan pꞌencʌch yaꞌab macob,
tiꞌ curaꞌan a chꞌop u wicheꞌ ich nʌcꞌ bej.
Cu cꞌatic u taqꞌuin quir u janʌn.
Bartimeo u cꞌabaꞌ a chꞌop u wicheꞌ,
rajiꞌ u parar Timeo.
47 Barej caj u yubaj Jesús a cu tar tu cajar Nazaret caj maneꞌ caj u yʌnxchun u yawʌt caj yaꞌaraj:
―Jesús,
u pararech a nunquir u rey David,
chan yajquin ten.
48 Qꞌueyaꞌb ten yaꞌab mac caꞌ u mʌc u chiꞌ.
Barej rajiꞌ caj u jach cꞌamquintic awʌt:
―U pararech a nunquir u rey David chan yajquin ten.
49 Jesús caj xurij ich bej caj u pʌyaj a chꞌop u wicheꞌ.
Caj u pʌyajob a pimoꞌ tiꞌ a chꞌop u wicheꞌ,
caj yaꞌarob tiꞌ:
―Chichquintej a wor,
riqꞌuen cu tꞌʌniquech ―quij yaꞌaraꞌ ten a pimoꞌ.
50 Bartimeo tuneꞌ,
caj ricꞌ caj u pitaj u caꞌ yaꞌarir u noqꞌueꞌ,
caj u chꞌaj u sitꞌ,
caj tarij yicnʌn Jesús.
51 Caj tꞌʌn ten Jesúseꞌ,
caj u yaꞌaraj tiꞌ:
―Baꞌ a cꞌat ten quir in yamtiquech?
A Bartimeojoꞌ caj u yaꞌaraj tiꞌ:
―In wʌj camsʌyʌjirech caꞌ sasichʌjʌc in wich soc chʌcaꞌan in wiric in ber.
52 Caj u yaꞌaraj Jesús tiꞌ:
―Xen,
quireꞌ caj a wacsaj ta wor ten,
jaw a wich.
Seb caj jaw u wich,
caj pacatnʌjij,
caj bin tu pach Jesús ich bej.