2 Caj yaꞌaraj tiꞌob:

―Xenex ich u chan cajar cꞌʌs baytʌc.

Caꞌ bin ocaquechex ich u cajar jeꞌ a wiriquex chan tsimin tiꞌ macaꞌan,

mʌnaꞌ mac nacaꞌan cʌptar u cʌpmʌn tu pach.

Pitex caꞌ a pʌyex teraꞌ.

3 Wa mac cu cꞌatic techex:

“Biquinin ca pitiquex chan tsimin?”

Yʌn are baxuc a jeraꞌ:

Quireꞌ ic Jaj Tsꞌurir u cꞌat u cʌptar tu pach,

quechex tiꞌ.

Caꞌ bin tsocac u cꞌʌniqueꞌ seb cu wʌcꞌʌs tuchiꞌtej teraꞌ.

4 Caj binob caꞌtur u camsʌwinicob Jesús caj u yirajob a chan tsininoꞌ tiꞌ macaꞌan tancab baytʌc tu yʌn u jor a najoꞌ.

Tu ber yʌn.

Jeroj tuneꞌ,

caj u pitajob a chan tsiminoꞌ.

5 Jun yarob tiꞌ a macob,

a tiꞌ tar yʌnobob,

caj u cꞌatajob tiꞌob:

―Baꞌ ca betex?

Biquinin ca pitiquex a chan tsiminoꞌ?

6 Robob tuneꞌ,

caj u yaꞌarajob tiꞌob quireꞌ araꞌbob ten Jesúseꞌ,

caj chaꞌaj tiꞌob chan tsimin.

7 A caꞌtur u camsʌwinicob caj u paytajob chan tsimin,

caj binob u purej ich Jesús,

caj u jʌyajob nocꞌ tu pach chan tsimin.

U camsʌwinicob Jesús caj u yamtajob Jesús quir u cʌptar tu pach chan tsimin.

8 Yaꞌab mac cu jʌyicob uch u caꞌ yarir u nocꞌob teꞌ ich bejoꞌ tu cu man yʌrʌcꞌ chan tsimin an ten bic rey cu cꞌuchur tu cajar.

U jer jun yarob caj u chꞌʌcajob u cꞌʌb cheꞌ caj u jʌyajob teꞌ ich bej xan,

a baywoꞌ cu yesicob cu sʌjticob a mac a cu tar ich bej.

9 A mac a cu bin pʌybej tiꞌ Jesús yejer a raꞌ cu tarob tu pach,

caj cꞌayʌnʌjob tu cu yaꞌaricob:

―Jach caremech Cꞌuj.

Cꞌuj caj a yamtaj a mac a cu tar tu cꞌabaꞌ Jaj Tsꞌur.

Caꞌ ij carex Hosanna.

10 Jach manan tsoy wa macob cu quiꞌ tꞌʌnticob tu cu bin u reyinticob u rey ic nunquirex David a cu bin tar.

Caꞌ ij carex Jach caremech Cꞌuj.

11 Caj oc Jesús tu cajar Jerusalén.

Barej caj oc Jesús tu carem naj tu cu naj cꞌujinticob Cꞌuj u winiquirob judío,

caj u rʌc pʌctaj tu cotor a baꞌ tiꞌ yʌnoꞌ.

Jeroj tuneꞌ,

caj jocꞌ quir u bin tu cajar Betania yejer u docejoꞌ u camsʌwinicob quireꞌ cu bin qꞌuin.

12 Caj sasij,

jeroj tuneꞌ,

caj jocꞌob tu cajar Betania,

caj wiꞌijchʌjij.

13 Caj u yiraj nach tuririꞌ u cheꞌer higo,

yʌn u reꞌ,

rajen caj u jutsꞌ u bʌj Jesús yirej wa jix tiꞌ yʌn u wich,

caj yiraj mʌnaꞌ u wich chen u reꞌ yʌn,

quireꞌ mʌꞌ raꞌ u qꞌuinin u wichʌnʌcʌr.

14 Jeroj tuneꞌ,

caj u tꞌʌnaj,

Jesús caj u yaꞌaraj tiꞌ:

―Mʌꞌ biqꞌuin caꞌ bin macꞌʌc a wich ten mac ―quij yaꞌaraꞌ tiꞌ u cheꞌer higo.

Caj uꞌyaꞌb ten u camsʌwinicob.

15 Barej caj urob tu cajar Jerusalén tiriꞌ caj oquij Jesús ich carem naj tu cu naj cꞌujinticob Cꞌuj u winiquirob judío.

Caj u yʌnxchun u jocꞌsic a mac a cu canicob u baꞌtac tu japnin carem naj,

bayiriꞌ xan,

a mac cu mʌnicob,

caj u rʌc jʌwʌcchꞌintej Jesús u pocheꞌir tu cu cꞌaxicob u taqꞌuin,

bayiriꞌ xan,

caj u rʌc jʌwʌcchꞌintej u cutanob tu cu canic u yʌrʌcꞌ susuy.

16 Mʌꞌ chaꞌb u chꞌaꞌacob baꞌ ich carem naj tu cu naj cꞌujinticob Cꞌuj u winiquirob judío.

17 Caj u camsaj tiꞌob,

tan yaꞌaric:

―Mʌꞌ wa cꞌaj techex tub tsꞌibaꞌan ich u tꞌʌn Cꞌuj tu cu yaꞌaric Cꞌuj:

“A jeraꞌ u najir quir u yocar mac u tꞌʌnic Cꞌuj,

cax tu cotor mac tu cu tarob tu cajarob ich tu cotor u ruꞌumirob”;

chen a techexoꞌ caj a waysajex irej u japnin tunich tu cu naj tar a mac a cu yaꞌcricob baꞌ.

18 Barej caj uꞌyaꞌb ten u jach tsꞌurirob tu cotor u sacerdote u winiquirob judío yejer yʌjcamsʌyʌjirob u tꞌʌn Moisés caj u cʌxtob bic tabar u quinsicob.

Quireꞌ tu cotor macob jacꞌaꞌan yorob tiꞌ a baꞌ cu camsic,

rajen robob,

u jach tsꞌurirob tu cotor sacerdote yejer yʌjcamsʌyʌjirob u tꞌʌn Moisés caj u chꞌaj saquirob tiꞌ Jesús.

19 Barej ber cu bin qꞌuin,

caj jocꞌob tu cajar Jerusalén caj bin Jesús quet yejer u camsʌwinicob.

20 Aꞌacbir samam caj manob caj u yirajob rʌc tijij u cheꞌer higo tac tu mots.

21 Caj cꞌajij yicꞌ Pedro,

caj u yaꞌaraj tiꞌ:

―In wʌjcamsʌyʌjirech,

iric quimij a ray u cheꞌer higo a ta roꞌroꞌ tꞌʌntaj,

caj rʌc tijij u cheꞌer.

22 Caj u nuncaj Jesúseꞌ,

caj u yaꞌaraj tiꞌob:

―Caꞌ acsex ta worex tiꞌ Cꞌuj.

23 Taj quin waꞌaric techex,

jeꞌ u cꞌuchur a worexeꞌ a tꞌʌnex cax a jeꞌ witsaꞌ caꞌ xic ich u chiꞌcꞌacꞌnab,

jeꞌ u bineꞌ wa ca wacsiquex ta worex,

wa ta worex mʌꞌ a waꞌariquex:

“Jeꞌ wa ju bineꞌ wa quin wac tiꞌ.”

Mʌꞌ ja wirej,

jeꞌ u bineꞌ quireꞌ caj a wacsajex ta worex jeꞌ u bineꞌ.

24 Rajen,

quin waꞌaric techex,

wa ber ca tꞌʌniquex Cꞌuj tiꞌ a baꞌ a cꞌatex,

acsej ta worex wa bin a cꞌʌmiquex jeroj tuneꞌ bin tac tiꞌ techex tu cotor a baꞌ caj a cꞌatajex tiꞌ Cꞌuj.

25 Wa ber ca tꞌʌniquex Cꞌuj caꞌ a pacran jawsex u siꞌpir a ca tucriquex wa mac caj u betaj cꞌas tiꞌ techex soc a Tetex caꞌanan caꞌ u jawsej a siꞌpirex xan.

26 Quireꞌ wa techex mʌꞌ ja jawsiquex u siꞌpirob bayiriꞌ xan a Tetex a tiꞌ yʌn ich caꞌananoꞌ mʌꞌ u bin u jawsic a siꞌpirex xan.

27 Caj cꞌuchij Jesús ich u cajar Jerusalén yejer u camsʌwinicob.

Quireꞌ cu man ich carem naj tu cu naj cꞌujinticob Cꞌuj u winiquirob judío,

caj u jutsꞌob u bʌj u jach tsꞌurirob tu cotor sacerdote u winiquirob judío yejer yʌjcamsʌyʌjirob u tꞌʌn Moisés yejer u jach tsꞌurirob u winiquirob judío a Nuxibeꞌ.

Caj u jutsꞌob u bʌj ich Jesús caj cꞌatab tiꞌ Jesús.

28 Caj u yaꞌarajob tiꞌ:

―Mac caj u yaꞌaraj tech caꞌ a jocꞌsej joꞌoraj?

Tub u tar a mucꞌ quir a jawsic mac?

Tub u tar a mucꞌ quir a camsic mac?

Mac caj u tsꞌaj a mucꞌ?

29 Caj nuncaj Jesúseꞌ,

caj u yaꞌaraj tiꞌob:

―Baxuc techex xan,

jeꞌ in cꞌatic techex wa taj ca nunquiquex ten jeꞌ in waꞌaric techexeꞌ tub u tar in muqꞌueꞌ quir in betic aroꞌ.

30 Arex ten ―quij Jesús―.

Mac tuchiꞌtej Juan quir u yacsic jaꞌ tu joꞌr mac.

Cꞌuj wa tuchiꞌtej wa xib tu tuchiꞌtaj?

31 Caj tsꞌoc yubicob a baꞌ cꞌataꞌb tiꞌob ten Jesús,

cu pacran nunquicob u tꞌʌn ich u bʌjiriꞌob tan yaꞌaricob:

―Wa quij cariquex tiꞌ:

“Cꞌuj tuchiꞌtej”,

jeꞌ u yaꞌaric toꞌonex:

“Biquinin mʌꞌ ta quibex u tꞌʌn Juan uch?”

32 Barej wa quij cariquex tiꞌ:

“A Juanoꞌ tuxtaꞌb ten xib”,

quic sʌjtiquex a yaꞌab macob quireꞌ robob cu tucricob tuchiꞌtaꞌb ten Cꞌuj rajen yerob jach jaj Juaneꞌ a mac tsꞌaꞌb u tucuric ten Cꞌuj quir u tsicbar a baꞌ u cꞌat Cꞌujoꞌ.

33 Caj u nucajob,

caj u yaꞌarajob tiꞌ Jesús:

―Mʌꞌ in werob mac tuchiꞌtej Juan.

Baxuc caj wʌcꞌʌs nuncaꞌb ten Jesús caj u yaꞌaraj:

―Baxuc xan,

mʌꞌ in waꞌaric tub u tar in mucꞌ a baꞌ quin betic.