Jesús tiꞌ yʌn yejer Zaqueo
19
Caj oc Jesús ich u cajar Jericó.
Tiꞌ man chumuc u cajar.
2 Tiꞌ yʌn turiꞌ xib neyʌn u taqꞌuin u cꞌabaꞌ Zaqueo,
u jach tsꞌurir yʌjcꞌʌminob u taqꞌuin gobierno.
3 Zaqueo u cꞌat u yiric Jesús quir u cꞌʌꞌotic,
chen mʌꞌ cꞌuchaꞌan yirej quireꞌ a pimob,
cabar u baquer.
Mʌꞌ cꞌuchaꞌan yor yirej quireꞌ tiꞌ yʌn a pimob.
4 Rajen caj u cꞌʌnaj yacab caj naquij ich cꞌʌb cheꞌ quireꞌ tiꞌ yʌn u berir quir u man Jesús soc yiric.
Rajen pʌybej caj bin.
5 Tiꞌ manij Jesús tu yʌn Zaqueo.
Jesús caj u pʌctaj tiꞌ,
caj yaꞌaraj tiꞌ:
―Zaqueo ―quen―,
seb a wemʌn quireꞌ yʌn in jamach pꞌatʌr ta watoch.
6 Rajen Zaqueo seb caj emij ich ruꞌum,
quiꞌ yor caj u quiꞌ acsaj tu yatoch.
7 A mac a caj u yirajob yocar Jesús ich yatoch Zaqueo caj u pacran arajob ich u racꞌob,
tan u choctar yorob:
―Biquinin cu yʌn ocar aroꞌ ich yatoch a mac yʌn u siꞌpir quir u wenʌn?
8 Caj chꞌicraj Zaqueo ʌcʌtan tu cotor mac soc chʌcaꞌan yubicob.
Caj yaꞌaraj tiꞌ Jaj Tsꞌurir:
―Iric Jaj Tsꞌurir ―quij―.
Yʌn in tsꞌic tiꞌ in taqꞌuin tiꞌ a otsiroꞌ.
Chumuc tu cotor a yʌn tenoꞌ quin bin in tsꞌic tiꞌ.
Wa caj in tus chꞌaj u taqꞌuin mac uch,
quin bin in sutej tiꞌ.
Cuatro u tenin quin sutic tiꞌ.
9 Jesús caj yaꞌaraj tiꞌ:
―Bajeꞌrer Cꞌuj caj u taꞌquech yejer tu cotor mac a tiꞌ yʌn ta watoch.
Jach taj u pararech a nunquir Abraham,
quireꞌ caj a wacsaj ta wor tiꞌ Cꞌuj an ten bic ic nunquir Abraham uch,
caj u yacsaj tu yor.
10 Mʌꞌ ja wirej,
a baxuquenechexoꞌ caj u tuchiꞌten Cꞌuj caꞌ in wesej quin yajquintic mac a tabar u bin ich cꞌacꞌ quir in taꞌquic a mac a cu yacsic tu yor ten.
Jesús cu camsic quir u cʌnic tiꞌ diez taqꞌuin
11 Tiꞌ toy cu yubicob an ten bic Jesús caj u tsicbʌtaj tiꞌ Zaqueo.
Jesús caj u yʌnxchun u camsic tiꞌob quireꞌ tabar u cꞌuchur ich u cajar Jerusalén.
Rajen cu tucricob cꞌuchij tu qꞌuinin u reyinticob Jesús u ruꞌumin u winiquirob judío.
12 Rajen caj yaꞌaraj Jesús:
―A mac jach noꞌj u tet ―quij―,
caj bin ich tanxer ruꞌum soc u yacsaꞌ rey.
Caj tsꞌoc yacsaꞌ rey caj wʌcꞌʌs urij.
13 Caj bin ich tanxer ruꞌum caꞌch caj u tꞌʌnaj diez u cꞌurew caj u tsꞌaj jujuntur u cꞌurewob dos cientos pesos caj u yaꞌaraj tiꞌob:
“Cꞌʌnej a jeꞌ taqꞌuinaꞌ caꞌ a jarex u jer taqꞌuin jach yaꞌab hasta quin wuꞌur.”
14 Jeroj caj binij.
Tiꞌ yʌn mac ich u cajar aroꞌ caj pꞌactaꞌb ten u yet cajarob a cu bin yocar rey.
Rajen caj u tuchiꞌtaj mac tu pach aroꞌ caj u yaꞌaraj tiꞌ rey:
“Mʌꞌ in cꞌatob u yocar quir in reyinticob.
Mʌꞌ a wacsic tiꞌ.”
15 Caj urij a jeꞌ xiboꞌ caj u yʌnxchun u reyinticob caj u pʌyaj u cꞌurew a caj u tsꞌa tiꞌ u taqꞌuin uch caꞌ tacob ʌcʌtan ich rey.
Quireꞌ u cꞌat yer mun tꞌaj u taqꞌuin jujunturob.
16 A pʌybejoꞌ tarij caj yaꞌaraj:
“Jach Tsꞌurir ―quij―,
a taqꞌuin a ta tsꞌaj ten,
dos cientos pesos uch,
jach netꞌajij bajeꞌrer yʌn dos mil pesos.”
17 U jach tsꞌurir caj yaꞌaraj tiꞌ:
“Jach tsoy a beyaj,
jach tsoy in cꞌurewech.
In wer bajeꞌrer ca quiꞌ cʌnantic a baꞌ mʌꞌ yaꞌab tech.
Rajen quin bin in tsꞌic diez cajarob quir u reyintiquech.”
18 A caꞌtur u cꞌurew tarij caj yaꞌaraj tiꞌ:
“Jach Tsꞌurir ―quij―.
A taqꞌuin a caj a tsꞌaj ten dos cientos pesos,
jach tꞌaj bajeꞌrer yʌn mil pesos.”
19 U jach tsꞌurir caj yaꞌaraj tiꞌ:
“Tech quin bin in tsꞌic cinco cajarob quir u reyintiquech.”
20 Caj tar u jer u cꞌurew caj yaꞌaraj tiꞌ:
“Jaj Tsꞌurir ―quij―,
jeꞌ a taqꞌuinaꞌ.
Caj in tapa caj in ricꞌsaj,
21 quireꞌ caj in chꞌaj sajaquir tech quireꞌ tsꞌiquech.
Quireꞌ tech ca chꞌic a baꞌ mʌꞌ tech yʌnin.
Quireꞌ tech ca jaqꞌuic u nar mac cax tech mʌꞌ ta pʌcꞌaj.”
22 U jach tsꞌurir caj u yaꞌaraj tiꞌ:
“Jach cꞌas in cꞌurewech,
a wʌcꞌʌs tꞌʌn tech a caj a waꞌaraj.
Rajiꞌ cu bin u taꞌquic a joꞌr quireꞌ a wer jach tsꞌiquen quireꞌ a tenoꞌ quin chꞌic u taqꞌuin mac a caj u jaraj.
Quireꞌ quin jaqꞌuic u nar mac a mʌꞌ tin pʌcꞌaj.
23 Rajen biquinin mʌꞌ ta majantaj in taqꞌuin tiꞌ mac soc cꞌʌs tꞌajij in taqꞌuin caꞌ bin urquen.
Caꞌ in chꞌic cax mʌꞌ yaꞌab?”
24 Caj araꞌb ten u jach tsꞌurir tiꞌ a mac tiꞌ yʌn tu yicnʌn u cꞌurew a cꞌasoꞌ:
“Taquej tiꞌ u taqꞌuin a tiꞌ yʌn tiꞌ a dos cientos caꞌ a tsꞌic tiꞌ a mac yʌn tiꞌ dos mil pesos.”
25 U cꞌurewob caj yaꞌarajob tiꞌ:
“Jach Tsꞌurir ―quij―,
toc yʌn tiꞌ dos mil pesos a caj a pꞌʌtaj tiꞌ.”
26 U jach tsꞌuric caj yaꞌaraj tiꞌob:
“Quin wac techex a mac a cu betic tsoy yejer a baꞌ quin tsꞌic tiꞌ.
Jeꞌ in tsꞌic tiꞌ jach yaꞌab.
A maqueꞌ a mʌꞌ u cꞌʌnic a baꞌ quin tsꞌic tiꞌ.
Jeꞌ in taꞌquic tiꞌ,
cax mʌꞌ yaꞌab yʌn tiꞌ.
27 Techex a werex a mac a cu pꞌactiquen caꞌch.
Robob a mʌꞌ u cꞌat in wocar rey toc chuquejob caꞌ a quinsejob ʌcʌtan ten.”
Jesús cu yocar ich u cajar Jerusalén
28 Caj tsꞌoc a baꞌ caj u camsa sam ich yatoch Zaqueo.
Caj u pꞌʌtaj u cajar Jericó quir u bin ich u cajar Jerusalén.
29 Tabar u cꞌuchur ich u cajar Betfagé,
baxuc tiꞌ yʌn u cajar Betania,
nʌtsꞌaꞌan tiꞌob yʌn u chan pꞌuc witsir u cꞌabaꞌ Olivos.
Quireꞌ raꞌ u cꞌabaꞌ u cheꞌer a tiꞌ yʌnoꞌ.
Jesús caj u tuchiꞌtaj caꞌtur u camsʌwinicob.
30 Caj araꞌb tiꞌob:
―Xenex ich u chan cajar cꞌʌs bʌytʌc caꞌ bin ocaquechex ich u cajar.
Jeꞌ a wirex chan tsimin tiꞌ macaꞌan,
mʌnaꞌ mac u cʌptanmʌn u pach.
Pitex tiꞌ caꞌ a paytex teraꞌ.
31 Wa mac cu cꞌatic techex:
“Biquinin ca pitiquex chan tsimin?”
Caj a waquex tiꞌ baxuc a jeꞌraꞌ:
“Quireꞌ ic Jaj Tsꞌurir u cꞌat u cʌptar tu pach”,
quech tiꞌ.
32 U camsʌwinicob caj binob caj yirajob tiꞌ macaꞌan chan tsimin an ten bic Jesús caj yaꞌaraj tiꞌob.
33 Caj u pitajob chan tsimin caj tarij a mac yʌnin caj u cꞌataj:
“Biquinin ca pitiquex chan tsimin?”
34 Rajiꞌob caj u nuncajob:
―Quireꞌ ic Jaj Tsꞌur u cꞌat u cʌptar tu pach.
35 A caꞌtur u camsʌwinicob caj u paytajob chan tsimin caj binob u purej ich Jesús.
Caj u jʌyajob u noqꞌuir u pach chan tsimin.
U camsʌwinicob caj u yamtajob Jesús quir u cʌptar tu pach chan tsimin.
36 Caj bin Jesús tu berir Jerusalén.
Tiꞌ cʌpaꞌan Jesús tu pach chan tsimin ich u bej tu cu man Jesús.
A winiquir judíojoꞌ caj u pitaj u caꞌ yarir u nocꞌob quir u jʌyicob tu ber Jesús.
Irej nanij cu yacsicob rey tu cajarob quireꞌ quiꞌ yorob yiricob.
37 Tabar u cꞌuchur Jesús ich u cajar Jerusalén.
Tiꞌ yʌn chan pꞌuc witsir Olivos tu cu bin yemantic Jesús.
U camsʌwinicob a pimoꞌ caj u yʌnxchun u quiꞌquinticob yorob.
Cꞌam caj yaꞌarajob:
―Jach caremech Cꞌuj quireꞌ caj in wirob jach carem a beyaj.
38 A pimoꞌ caj yaꞌarajob:
―Tan in cꞌujinticob a jeꞌ reyaꞌ a cʌpʌcbar tu pach chan tsimin a caj u tuchiꞌtaj Cꞌuj.
Caꞌ ij carej tiꞌ:
Bayoꞌ Cꞌuj,
tiꞌ yʌnech ich caꞌanan quireꞌ caj a quetquintaj ij corex yejerech ―baxuc caj yaꞌarajob a pimoꞌ.
39 Tiꞌ yʌn mʌꞌ yaꞌab u winiquirob judío a fariseojoꞌ ich a pimoꞌ,
caj yaꞌarajob tiꞌ Jesús:
―Arej u mʌcob u chiꞌ a camsʌwinicob.
40 Jesús caj u nuncaj tiꞌob,
caj yaꞌaraj:
―Quin wac techex,
wa cu mʌquicob u chiꞌ a jeꞌ winicaꞌ,
jaj ixtʌcoj,
a jeꞌ tunichaꞌ jeꞌ u jocꞌar u tꞌʌn,
tan yaꞌaric:
“Quin cꞌujintiquechob.”
41 Jesús tabar u natsꞌʌr caj yiraj u cajar Jerusalén caj ocꞌnʌjij Jesús quireꞌ otsir yiric,
a mac tiꞌ yʌn tu cajar Jerusalén.
42 Caj yaꞌaraj Jesús:
―Jaj ix tʌcoj wa ja toc erex bic cꞌuchaꞌan a worex a quetquintiquex a worex yejer Cꞌuj chen bajeꞌrer Cꞌuj mʌꞌ u chaꞌic a wiriquex baꞌ a ber techex.
43 Quireꞌ caꞌ bin cꞌuchuc tu qꞌuinin a mac a cu pꞌactiquechex cu bin u tsꞌʌpquinticob tunich soc mʌꞌ tu ca putsꞌurex.
Quireꞌ caj u toc bʌcris tsꞌʌptajob tunich.
44 Cu bin u quinsicob techex yejer a pararobex.
Cu bin u rʌc jubsicob u tunichir a cajarex cu bin u rʌc pichꞌinticob tunich.
Baxuc cu bin u beticob techex quireꞌ mʌꞌ ta wacsajex ta worex tiꞌ Cꞌuj quireꞌ caj u tuchiꞌtajen a tenoꞌ a baxuquenechexoꞌ tiꞌ techex quir in yamtic techex.
Jesús cu joqꞌsic a mac tiꞌ yʌn ich carem naj a cu canicob baꞌ
45 Caj oquij Jesús ich carem naj tu cu naj cꞌujinticob Cꞌuj u winiquirob judío.
Caj u yʌnxchun u jocꞌsic a mac cu canicob u baꞌtac tu japnin carem naj baꞌiriꞌ a mac a cu mʌnicob baꞌ.
46 Jesús caj yaꞌaraj tiꞌob:
―Tiꞌ tsꞌibaꞌan ich u tꞌʌn Cꞌuj,
cu yaꞌaric:
“In watoch a jeꞌraꞌ quir u tar mac u tꞌʌnic Cꞌuj”,
chen techex caj a waysaj irej wa tu cu muchꞌquinticob u bʌj a cu yacꞌrʌꞌ baꞌ.
47 Jesús caj tsꞌoc u jocꞌsic a mac a cu canicob baꞌ ich carem naj tu cu naj cꞌujinticob Cꞌuj u winiquirob judío.
Rajraꞌ Jesús cu camsic a mac a cu tar ich carem naj tu cu naj cꞌujinticob Cꞌuj u winiquirob judío.
Chen u jach tsꞌurirob u sacerdote yejer yʌjcamsʌyʌjirob u tꞌʌn Moisés yejer u jach tsꞌurir u winiquirob judío u cꞌat u quinsicob Jesús.
48 Chen mʌꞌ yerob bic tabar cu bin u quinsicob tiꞌ quireꞌ a pimoꞌ u jach cꞌat yubicob u tꞌʌn Jesús.
Lucas 19.1-48