Caj cꞌuchij Jesús ich u cajar Jerusalén
21
Tabar u cꞌuchur Jesús ich u cajar Jerusalén.
Jach bʌytʌc u cꞌuchur ich u cajar Betfagé.
Nʌtsꞌaꞌan u witsir u cheꞌer Olivos.
Jesús caj u tuchiꞌtaj u camsʌwinicob caꞌtur caꞌ xicob ich u cajar jach bʌytʌc,
2 caj yaꞌaraj:
―Jeꞌ a wiriquex chan tsimin yejer yar.
Pitex caꞌ taquechex a purex teraꞌ.
Seb ―quij Jesús―,
caꞌ bin a toc irex chan tsimin yejer u yar caꞌ taquex a purex ten.
3 Wa tiꞌ yʌn mac ―quij―.
Cu yiric a pitic chan tsimin yejer yar.
Wa cu yaꞌaric techex:
“Baꞌwir techex?”
Arex tiꞌ:
“U Jach Tsꞌurir jeꞌ u wʌcꞌʌs tar u purej techeꞌ caꞌ bin tsꞌocac u cꞌʌnic.”
Jeꞌ u chaꞌic a pitiquex.
Seb cu bin u chaꞌej a pitiquex.
4 Caj u jamach mʌjantaꞌb u chan tsimin tiꞌ yejer yar quir u cʌptar tu pach tsimin Jesús.
Quir u nupꞌur a baꞌ tsꞌibaꞌan ten yʌjtseqꞌuir u tꞌʌn Cꞌuj uch.
Caj u toc araj yʌjtseqꞌuir u tꞌʌn Cꞌuj uch tiꞌ Cristo.
5 Arex tiꞌ u winiquirob a cʌjaꞌan ich u cajar Jerusalén:
“Ira wirex cu cꞌuchur a reyex.
Aroꞌ mʌꞌ tsꞌic,
a cʌpaꞌan ich u pach chan tsimin.
Quet u tar yejer yar tsimin.”
Baxuc caj u tsꞌibtaj uch yʌjtseqꞌuir u tꞌʌn Cꞌuj.
6 U camsʌwinicob Jesús caj binob.
Caj u pʌyajob u chan tsimin a toc araꞌb ten Jesús.
7 Caj tarob u purej chan tsimin yejer yar ich Jesús.
Caj u jʌyob u noqꞌuirob tu pach tsimin.
Jesús caj nac u cʌpʌtar ich u pach chan tsimin.
8 A pim mac a cu yiricob Jesús cu jʌyicob u noqꞌuir ich tan bej soc u yachꞌʌctic u chan tsimin.
Caj u rʌc jan chꞌʌctajob u reꞌ cheꞌ irej u reꞌ tuts quir u jʌyicob ich tan bej quir u yachꞌtic chan tsimin.
Rajen cu jʌyicob u reꞌ cheꞌ ich tan bej yejer u nocꞌob.
Cu rʌc jʌyicob quireꞌ cu yesicob cu sʌjticob Jesús irej rey cu sʌjticob.
9 A mac caj u pʌyob u ber Jesús.
Bayiriꞌ caj binob tu pach Jesús caj u cꞌam tꞌʌnicob Jesús soc yubicob u racꞌob:
―Quiꞌ quiꞌ tꞌʌnex a pimoꞌ,
u parar a nunquirex David.
Caꞌ ij caric tiꞌ Cꞌuj:
“Bayoꞌ Cꞌuj caj a tuchiꞌtaj a mac a cu bin u reyinticob u winiquirob judío.”
Caꞌ ij carej tiꞌ Cꞌuj:
“Jach caremech Cꞌuj.”
10 Caj jach cꞌuchij Jesús ich u cajar Jerusalén.
Tu cotor mac caj u rʌc cꞌatob:
―Mac a jeraꞌ?
―quij.
Caj rʌc jocꞌob ich yatochob.
Rʌc xibcheꞌchʌjijob cu manob caj yubob yaꞌaraj:
―Cu tar Cristo a tuchiꞌtaꞌb ten Cꞌuj.
11 Caj yaꞌaraj a pimoꞌ:
―Rajiꞌ Jesús,
yʌjtseqꞌuir u tꞌʌn Cꞌuj.
Tiꞌ cu tar ich u cajar Nazaret ich u ruꞌumin Galilea.
Jesús tu rʌc jocꞌsaj a baꞌ cu canicob ich carem naj tu cu naj cꞌujinticob Cꞌuj u winiquirob judío
(Mr. 11.15-19; Lc. 19.45-48; Jn. 2. 13‑22)
12 Caj cꞌuch Jesús ich u cajar Jerusalén,
caj oc ich carem naj tu cu naj cꞌujinticob Cꞌuj u winiquirob judío.
Jesús caj u rʌc jocꞌsaj a mac a cu canicob baꞌ.
Bayiriꞌ a mac a cu mʌnicob,
caj u rʌc jʌwʌcꞌchꞌintaj Jesús u pojcheꞌir tu cu cꞌaxicob u taqꞌuin.
Baxuc caj u rʌc jʌwʌcꞌchꞌintaj u cutanob tu cu canicob u yʌrʌcꞌ susuy.
13 Jesús caj yaꞌaraj tiꞌob:
―Mʌꞌ wa cꞌaj techex tu tsꞌibaꞌan u tꞌʌn Cꞌuj:
“A jeraꞌ u najir quir u yocar u tꞌʌnicob Cꞌuj”,
chen techex caj a waysajex irej u japnin tunich tu cu tar a mac a cu yacꞌricob baꞌ.
14 Caj tarob a chꞌop u wicheꞌ,
yet tarac a mech yoqueꞌ ich carem naj tu cu naj cꞌujinticob Cꞌuj u winiquirob judío.
Caj u jutsꞌob u bʌj ich Jesús a chꞌop u wicheꞌ yejer a mech yoqueꞌ.
Caj jawsaꞌb tiꞌob ten Jesús.
15 Caj pꞌujob u jach tsꞌurirob sacerdote yejer yʌjcamsʌyʌjirob u tꞌʌn Moisés.
Caj irob u jawsic Jesús a mac yajoꞌ rajen pꞌujob.
Caj yubob yawʌt tꞌʌnticob ten a chichan ich carem naj tu cu naj cꞌujinticob Cꞌuj u winiquirob judío:
“Quiꞌ tꞌʌnex u parar ic nunquir rey David.”
16 Caj yaꞌarajob u jach tsꞌurirob sacerdote yejer yʌjcamsʌyʌjirob u tꞌʌn Moisés:
―Uyej baꞌ cu yaꞌaricob a chichanoboꞌ?
Caj u nuncaj Jesús:
―In wer a xacmʌnex tub tsꞌibaꞌan u tꞌʌn Cꞌuj:
An ten bic a chichan a cu chuch cu yaꞌaricob bic jach carem Cꞌuj quireꞌ camsaꞌb bayiriꞌ a man jacaꞌanoꞌ.
Biquinin mʌꞌ tsoy yaꞌaric:
Jach carem Cꞌuj a jeꞌ chichanaꞌ quireꞌ taren teraꞌ?
17 Caj jocꞌ Jesús ich carem naj caj u pꞌʌtaj tu yʌnob u tsꞌurirob sacerdote yejer yʌjcamsʌyʌjirob u tꞌʌn Moisés.
Caj bin ich u cajar Betania quir u wenʌn acꞌbir.
Jesús caj u tꞌʌnaj u cheꞌer higuera soc mʌꞌ u wichʌncʌr
18 Caj sasij caj wʌcꞌʌs bin Jesús ich u cajar Jerusalén.
Caj wichʌjij ich bej.
19 Yiraj Jesús tiꞌ yʌn u cheꞌer higuera ich nʌcꞌ bej.
Caj u jutsꞌ u bʌj Jesús.
Caj cꞌuchij ich u cheꞌer caj yiraj mʌnaꞌ u wich,
chen u reꞌ yʌn.
Caj yaꞌaraj Jesús tiꞌ u cheꞌer higuera:
―Mʌꞌ a yʌn yʌn caꞌ ichancʌr biqꞌuin.
Seb caj quim u cheꞌer.
20 Caj yirob u camsʌwinicob Jesús,
caj quim u cheꞌer,
caj jaqꞌuij yorob.
Caj cꞌataꞌb ten u camsʌwinicob Jesús:
―Biquinin seb caj quimin u cheꞌer higuera?
21 Jesús caj u nuncaj tiꞌob:
―Jach taj quin waꞌaric techex.
Wa ca acsiquex ta worex wa mʌꞌ tan a waquex ta worex:
“Mʌꞌ cꞌuchaꞌan in worob tiꞌ.”
Mʌꞌ chen jariꞌ cꞌuchaꞌan a worex tiꞌ a baꞌ caj in waꞌaraj tiꞌ u cheꞌer higuera.
Jeꞌ u cꞌuchur a worex tiꞌ baꞌ.
Cax a jeꞌ witsaꞌ ca tꞌʌniquex caꞌ xic ich chiꞌcꞌacꞌnab.
Jeꞌ u bineꞌ ―quij―,
wa taj ca wacsic ta wor ―quij Jesús.
22 Jesús caj yaꞌaraj:
―Wa yʌn baꞌ a cꞌat tu ca tꞌʌniquex Cꞌuj.
Jeꞌ a quiꞌ cꞌʌmiquex wa taj ca wacsiquex ta wor.
Tu cu tar u mucꞌ Jesús
23 Caj cꞌuchij Jesús ich u cajar Jerusalén caj caꞌ oquij ich carem naj tu cu naj cꞌujinticob Cꞌuj u winiquirob judío.
Caj u jutsꞌob u bʌj u jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ.
Caj u jutsꞌob u bʌj ich Jesús tu cu camsic mac caj cꞌataꞌb tiꞌ Jesús:
―Tu yʌn mac caj u yaꞌaraj tech caꞌ a jocꞌsej joꞌoraj.
Tub u tar a mucꞌ quir a jawsic mac.
Tub u tar a mucꞌ quir a camsic mac.
Mac tu tsꞌaj a mucꞌ?
24 Jesús caj u nuncaj tiꞌob:
―Baxuc techex xan,
jeꞌ in cꞌatic techex wa taj ca nunquiquex ten.
Jeꞌ in waꞌaric techex tub u tar in mucꞌ quir in betic aroꞌ.
25 Arej ten ―quij Jesús―.
Mac tu tuchiꞌtaj Juan quir u yacsic jaꞌ tu joꞌr mac.
Cꞌuj wa tuchiꞌtej wa xib tuchiꞌtej?
Caj tsꞌoc yubicob a baꞌ cꞌataꞌb tiꞌob ten Jesús.
Caj u nuncob u tꞌʌn ich u bʌjirirob tan yaꞌaricob:
―Wa quij caric tiꞌ:
“Cꞌuj tuchiꞌtej”,
jeꞌ yaꞌaric toꞌon:
“Biquinin mʌꞌ ta quibex u tꞌʌn Juan uch?”
26 Wa quij caric tiꞌ:
“Tuchiꞌtaꞌb ten xib,
quic sʌjticob a pim quireꞌ a pim cu tucricob tuchiꞌtaꞌb Juan ten Cꞌuj u tsecꞌtej u tꞌʌn Cꞌuj uch.”
27 Baxuc caj araꞌb tiꞌ Jesús:
―Mʌꞌ ij quer mac tuchiꞌtej Juan.
Baxuc caj u caꞌ nuncaj Jesús caj yaꞌaraj:
―Baxuc xan,
mʌꞌ in waꞌaric tub u tar in mucꞌ a baꞌ quin betic.
Jesús cu camsic bic u quibicob u tꞌʌn u tet a caꞌtur u parar
28 Jesús caj u cꞌataj tiꞌ u jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ:
―Arex ten baꞌ ca najtiquex tiꞌ a jeraꞌ.
Tiꞌ yʌn xib caꞌtur u pararob.
Caj yaꞌaraj tiꞌ u parar tuririꞌ:
“Xen ta beyaj ich in cor bajeꞌrer quir a tꞌaquic u wich uva.”
29 Caj u nuncaj u parar:
“Mʌꞌ in cꞌat in bin beyaj.”
Pachir caj u cꞌaxaj u tucur caj bin beyaj.
30 A mac yʌn u parar caꞌtur caj bin yirej u parar juntur.
Caj yaꞌaraj:
“Xen ta beyaj ich in cor.”
Caj u nuncaj:
“Jeꞌ in bin beyaj Tet”,
quij.
Chen mʌꞌ binij.
31 Jesús caj u cꞌataj tiꞌ u jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ:
―Arex ten mac caj u quibaj u tꞌʌn u tet?
U tsꞌurirob caj u nuncajob:
―A tu yʌn tuchiꞌtꞌaj bin beyaj cax tu cay araj:
“Mʌꞌ u bin.”
Jesús caj yaꞌaraj:
―Jach taj,
quin waꞌariquex tech an ten biquechex u parar a mʌꞌ tu quibaj u tꞌʌn u tet.
Quireꞌ techex mʌꞌ ca quibex u tꞌʌn Cꞌuj.
Rajen a xquicoꞌ a cu man cu bin quiꞌ acsaꞌbir ten Cꞌuj tu cu bin u reyintej Cꞌuj.
Bayiriꞌ,
a mac a cu cꞌʌmicob u taqꞌuin gobierno,
quireꞌ caj u quibob u tꞌʌn Juan a tu yacsaj jaꞌ tu joꞌr mac.
Chen a techex mʌꞌ u yacsiquechex Cꞌuj.
32 Mʌꞌ ja wirej ―quij Jesús―.
Caj tar uch quir u tsecꞌtic techex u tꞌʌn Cꞌuj mʌꞌ ta quibexiꞌ.
Chen a xquic a cu manoꞌ,
baxuc a yʌjcꞌʌmirob u taqꞌuin gobierno,
rajiꞌob caj u cꞌaxajob u yorob caj u quibob u tꞌʌn Juan.
Chen a techex mʌꞌ ja quibex u tꞌʌn Juan mʌꞌ ja cꞌaxex a worex cax caj a wirex cu cꞌaxicob yorob a mac yʌn u siꞌpirob.
Jesús cu camsic tiꞌ a tsꞌuroꞌ a mʌꞌ boꞌotaꞌb ten u winiquirob
33 Caj yaꞌaraj Jesús tiꞌ u tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ:
―Uꞌyex baꞌ quin camsiquex u jer.
Rajiꞌ u ruꞌumin tu tu pʌcꞌaj yaqꞌuir uva ich u yajaw cor.
Caj u paꞌteꞌtaj u cor.
Caj u betaj u baꞌinquir quir u yʌtsꞌic u cꞌab u wich uva.
Caj u tsꞌʌpquintaj tunich quir u chꞌictar caꞌanan soc u cʌnantic yaqꞌuir u wich uva soc mʌꞌ u rʌc mʌqꞌuicob chꞌichꞌ.
’Caj yaꞌaraj u cʌnantaꞌr u cor ten u winiquirob.
Quireꞌ bin u caꞌ tiꞌ u jer ruꞌum nachir.
34 Caj cꞌuchij tu qꞌuinin u wichʌncʌr,
caj tuchiꞌtob u cꞌurew ten u jach tsꞌurir quir u cꞌatic u boꞌorir tu cu tꞌacaꞌrob u wich uva yʌjcʌnanyʌjirob u cor.
Quireꞌ yʌn u jasʌrob tiꞌ u tsꞌurir,
quireꞌ u boꞌorir u cor tu cu cʌnantaꞌob u cor.
35 Caj chuc u cꞌurew ten yʌjcʌnanyʌjirob u cor.
Caj u jʌtsꞌajob tuririꞌ,
u jer quinsaꞌb.
U jer caj u chꞌinajob u joꞌr.
36 U wʌcꞌʌs tsꞌurir caj u tuchiꞌtaj u caꞌ jer cꞌurew quir u cꞌaticob u boꞌorir tiꞌ yʌjcʌnanyʌjirob tu tu tꞌacajob u wich uva ich u cor.
Pim caj u toc tuchiꞌtaj u cꞌurew u jach tsꞌurir.
A tu yʌn tuchiꞌtaj mʌꞌ pimiꞌ.
Raꞌiriꞌ caj u chꞌinajob u cꞌurew u jach tsꞌur ten yʌjcʌnanyajirob u cor.
Caj jatsꞌob xan,
caj quinsaꞌb u jer.
37 ’Caj cꞌuchij tu qꞌuinin caj u tuchiꞌtaj u parar.
Yer yʌjcʌnanyʌjirob u cor jeꞌ u sʌjtaꞌr u parar ten yʌjcʌnanyʌjirob u cor.
38 Caj cꞌuchij u parar caj ir ten yʌjcʌnanyʌjirob u cor caj yaꞌarajob:
“Rajiꞌ u parar cu tar.
Rajiꞌ cu bin chꞌic u cor wa cu quimin u tet.
Caꞌ xicoꞌon ij quinsej u parar soc toꞌon quic bin ic chꞌic u cor.”
39 Caj u chucajob caꞌ xicob u quinsejob ich u nʌcꞌ cꞌaxir u cor.
Tiꞌ tu jach quinsajob ich nʌcꞌ cꞌaxir u cor.
40 Jesús caj u cꞌataj tiꞌob:
―Arex ten baꞌ cu bin u betic u jach tsꞌurir u cor tiꞌ u yʌjcʌnanyʌjirob u cor caꞌ bin tac?
41 U jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ caj u nuncajob:
―U jach tsꞌurir cu rʌc bin quinsic u yʌjcʌnanyʌjirob u cor quireꞌ jach cꞌas.
Jeꞌ u caꞌ cʌxtic u jer winiquirob a mac cu boꞌotaꞌr u tꞌaquic u wich uva ich u cor.
Caꞌ bin cꞌuchuc tu qꞌuinin cu tsꞌicob tiꞌ u tsꞌurir u wich uva u boꞌorir u cor.
42 Jesús caj yaꞌaraj tiꞌ u tsꞌurirob u winiquirob judío:
―Mʌꞌ wa ja xacmʌnex a tu tsꞌibtaj yʌjtseqꞌuir u tꞌʌn Cꞌuj uch caj yaꞌaraj:
U yoc naj caj u pichꞌintajob yʌjcꞌʌxirob naj quireꞌ mʌꞌ u cꞌatob.
A jeꞌ tu purajob mʌnaꞌ u jer jach chich u mucꞌ.
Caj bin u wʌcꞌʌs chꞌaꞌej u cꞌʌxej naj.
Aroꞌ caj u betaj Cꞌuj rajen cu jacꞌʌr ij cor,
quij quiric.
Baxuc caj u tsꞌibtaj yʌjtseqꞌuir u tꞌʌn Cꞌuj uch tiꞌ Cristo.
43 ’Rajen quin waꞌariquex tech,
an ten bic caj pichꞌtaꞌb yoc naj,
caj bin u wʌcꞌʌs chꞌaꞌej quir u wʌcꞌʌs cꞌʌxic yatoch.
Baxuc ten,
ca bin a xumpꞌʌtenex soc in quinsaꞌr.
Rajen a Cꞌujo cu bin u taquic techex a ruꞌumex quir u tsꞌic tiꞌ u jer mac soc rajiꞌob cu quiꞌ beyajob tiꞌ u boꞌorir u ruꞌumob.
44 Ber u qꞌuinin mac mʌꞌ u cꞌamiquen an ten bic mac rub ich yajaw tunich.
Jach yaj caj yubaj caj rub ich yocꞌor.
Baxuc xan,
a mac a quin tsꞌictar yejer an ten bic mac cu tar actun tu yocor,
caj rʌc maxij.
45 U jach tsꞌurirob sacerdote yejer u winiquirob judío a fariseojoꞌ caj yubob a baꞌ caj u camsaj Jesús.
Caj yertajob caj u camsaj Jesús quir u cʌnic u tsꞌurirob u winiquirob judío.
46 Rajen u jach tsꞌurirob sacerdote yejer u winiquirob judío a fariseojoꞌ u cꞌat chucurob Jesús.
Cu chen sʌjtaꞌrob a pimoꞌ.
Mʌꞌ ja wirej,
yerob a pimoꞌ rajiꞌ yʌjtseqꞌuir u tꞌʌn Cꞌuj Jesús.