Jesús cu camsic tiꞌ a mac cu bin u chꞌic u racꞌ
22
Jesús caj u yʌnxchun u wʌcꞌʌs caꞌ camsic tiꞌ a pimoꞌ.
Caj yaꞌaraj tiꞌob:
2 ―Quin waꞌaric techex bic cu bin u reyinticob Cꞌuj ich caꞌanan,
irej rey a cu pʌyic u racꞌob quir u quiꞌquiꞌ janʌnob.
Quireꞌ u parar rey cu bin u chꞌic u racꞌ.
3 A reyoꞌ,
caj u tuchiꞌtaj u cꞌurew quir u pʌyicob a mac a caj u yaꞌaraj caꞌ tacob,
quireꞌ cꞌuchij tu qꞌuinin.
Robob mʌꞌ ju quibajob u tarob.
4 Caj u wʌcꞌʌs caꞌ tuchiꞌtaj u jerob u cꞌurew:
“Arex tiꞌob a mac caj in yʌn araj u tarob.
Arex tiꞌob tin toc rʌc quinsaj a woꞌoch bʌqꞌuex quir a quiꞌ janʌnex.
Jach paroc ca bin a jantex.
Toc rʌc chʌcaꞌan soc a jantiquex.
Cojenex ta quiꞌ janʌnex soc u chꞌic u racꞌ in parar.”
5 Mʌꞌ ju quibob caj bin pʌybir caj u pꞌastob yoꞌoch.
Caj bin tuririꞌ tu cor.
U jer caj bin tu cu conan baꞌ.
6 U jerob caj u chucajob u cꞌurewob rey,
caj u raxob caj u quinsajob u cꞌurew.
7 Caj yuba baꞌ u ber u cꞌurew rey caj jach tsꞌiquij.
Caj u tuchiꞌtaj u soldadojob quir u quinsaꞌr yʌjquinsirob u cꞌurewob,
caꞌ u rʌc toꞌcacob u cajarob.
8 Caj yaꞌaraj tiꞌ u cꞌurewob,
rey:
“Toc rʌc tsꞌacaꞌan yoꞌochob quir u quiꞌquiꞌ janʌnob quir u chꞌic u racꞌ in parar.
Chen a mac caj in yʌn chꞌic pʌyaj mʌꞌ ju quibob u tarob jot,
quij.
Mʌꞌ tsoyob u tarobiꞌ.
9 Joqꞌuenex xenex pʌyex a tu cu naj muchꞌquinticob u bʌj ich bej.
Arex tiꞌob.
Cojenex ta quiꞌquiꞌ janʌnex quireꞌ caꞌ u chꞌaj u racꞌ in parar.
Arex tiꞌ caꞌ rʌc tacob a muchꞌaꞌan a ca wiriquexeꞌ.”
10 U cꞌurewob caj binob ich u berir tu cu naj muchꞌquinticob u bʌj winic.
Caj u rʌc pʌyajob,
cax tsoy caj u pʌyob,
cax mʌꞌ tsoy caj u pʌyob xan.
Tu pʌyob caj rʌc tarob,
caj rʌc chup tu najir tu cu yocar.
11 ’Caj oc yiraj rey a mac caj u pʌyob u cꞌurewob.
Caj yiraj xib tiꞌ yʌn.
Mʌꞌ tu quiꞌ buquintaj u nocꞌ quir yiric u chꞌic u racꞌ mac.
12 Caj yaꞌaraj rey:
“Biquinin caj oquech teraꞌ quireꞌ mʌꞌ ja buquintaj a nocꞌ quir a wiric u chꞌic u racꞌ in parar?”
Caj rʌc tsꞌoc u tꞌʌnob,
quireꞌ yubaj yaꞌaraꞌ ten u rey.
13 A reyoꞌ,
caj yaꞌaraj tiꞌ u cꞌurewob a cu jansicob a pimoꞌ:
“Maquex yoc yejer u cꞌʌb.
Jocꞌsex,
a purex tancab soc u yacꞌtic u bʌj.
Quireꞌ mʌꞌ ju buquintaj u nocꞌ.
Tiꞌ cu bin u chiꞌic u yacꞌ quireꞌ cu mucꞌyaj.”
14 Mʌꞌ ja wirej ―quij Jesús―,
jach yaꞌab mac caj payij ten Cꞌuj soc u yocar u reyinticob Cꞌuj.
Chen mʌꞌ yaꞌab cu bin tetbir ten Cꞌuj quireꞌ mʌꞌ ju quibob u tꞌʌn.
Jesús cu camsic bic tabar u boꞌotic u boꞌorir u cꞌʌb gobierno
15 U winiquirob judío a fariseojoꞌ caj bin muchꞌquinticob u bʌj quir yubicob bic tabar cu bin u chuquicob Jesús,
quir u wayticob u tꞌʌn Jesús,
quir u taꞌquicob u joꞌr Jesús.
16 Caj u tuchiꞌtajob u camsʌwinicob a fariseojoꞌ ich Jesús,
yet binac u camsʌwinicob Herodes.
Caj cꞌuchob ich Jesús caj yaꞌarajob tiꞌ:
―In wʌjcamsʌyʌjirech,
in werob taj ca camsiquenob bic tabar in manob tu tsoyir baxuc u cꞌat Cꞌuj.
Caj yaꞌarajob tiꞌ Jesús:
―Cax mac cu cꞌuchur tu yʌnech mʌꞌ ja pꞌastej,
quireꞌ pꞌeriꞌoꞌon ca wiricoꞌonex.
17 Arej tenob wa tsoy caꞌ ic boꞌotej u boꞌorir ic ruꞌum tiꞌ César u rey u winiquirob romano?
Wa mʌꞌ tsoy ic boꞌotic?
Arej tenob baꞌ ca tucric a techeꞌ?
18 Jesús caj yubaj tarob quir u waytaꞌr u tꞌʌn Jesús.
Caj araꞌb tiꞌob ten Jesús:
―Biquinin ca tarex a tumtic in worex yʌjtusarirechex ten.
19 Joqꞌuenex chꞌa tenex a taqꞌuinex tu ta boꞌotajex a ruꞌumex soc in wiric ―quij Jesús.
Caj binob u chꞌajob taqꞌuin.
20 Caj yaꞌaraj Jesús tiꞌob:
―Mac yochir a joꞌortꞌʌn ich taqꞌuin?
21 Caj u nuncajob:
―Rajiꞌ yochir a joꞌortꞌʌn César,
u rey u winiquirob romano.
Jesús caj yaꞌaraj:
―Caꞌ a quibex u tꞌʌn a cu yaꞌaric techex César.
Bayiriꞌ xan,
caꞌ a quibex a baꞌ cu yaꞌaric techex Cꞌuj.
22 Caj yubob yaꞌaric Jesús a jeraꞌ,
caj jach jaqꞌuij yorob.
Caj u pꞌʌtob Jesús,
caj binob ich u winiquirob judío a fariseojoꞌ.
Caj tarob u cꞌatob ich Jesús yubej wa cu riqꞌuir tu cu quimin
23 Raꞌiriꞌ u qꞌuinin caj cꞌuchij u winiquirob judío a saduceojoꞌ.
Raꞌ cu camsicob mac mʌꞌ u riqꞌuir tiꞌ quimen.
Caj cꞌuchob ich Jesús caj tarob cꞌatbir tiꞌ Jesús ten u winiquirob judío a saduceojoꞌ.
24 Caj yaꞌarob tiꞌ Jesús:
―In wʌjcamsʌyʌjirechob,
ic nunquir Moisés caj yaꞌaraj uch.
Wa xib cu quimin,
mʌnaꞌ u parar yejer u racꞌ.
U yitsꞌin cu caꞌ wʌcꞌʌs bin u chꞌaj u muꞌ.
Cu wʌcꞌʌs caꞌ bin u chꞌaꞌic soc u pararancʌr yejer u muꞌ quir u cꞌʌꞌotic u ixbaꞌ sucuꞌun,
a quimeneꞌ.
25 Yʌn seis yitsꞌin a yʌn quimen xib,
caj quimij mʌnaꞌ u parar.
U yitsꞌin aroꞌ caj u caꞌ chꞌaj u muꞌ.
26 Baxuc caj u caꞌ chꞌaj u jer u muꞌ,
caj quimij mʌnaꞌ u parar xan.
U yitsꞌin aroꞌ tu caꞌ chꞌaj u muꞌ.
Mʌnaꞌ u parar yejer caj quimin.
Hasta tu rʌc chꞌaj u muꞌ caj rʌc quimin mʌnaꞌ u parar yejer.
27 Caj rʌc tsꞌoc u quiminob u mamob caj quimin xquic xan.
28 Caj yaꞌaraj u winiquirob judío a saduceojoꞌ:
―Are tenob mac cu bin raqꞌuintej caꞌ bin caꞌ riqꞌuir mac tu quimin.
Mʌꞌ ja wirej,
siete caj u chꞌaj u mam.
29 Jesús caj u nuncaj:
―A wʌcꞌʌs bʌj cu tusariquex.
Mʌꞌ ja najtiquex a baꞌ tsꞌibaꞌan ich u tꞌʌn Cꞌuj.
Mʌꞌ ja werex wa jach chich u mucꞌ Cꞌuj.
30 Caꞌ bin cꞌuchuc tu qꞌuinin u wʌcꞌʌs riqꞌuir tiꞌ quimen.
A xiboꞌ mʌꞌ ju raqꞌuintej xquic.
Bayiriꞌ a xquic mʌꞌ ju mʌmintej xib quireꞌ u jer cu bin waysaꞌr ten Cꞌuj irej yʌjtꞌʌnirob Cꞌuj caꞌanan.
31 ’Soc a cʌniquex baꞌ u cꞌat yaꞌaric jeꞌ u riqꞌuir mac tiꞌ quimen.
Cꞌaj wa techex tu tsꞌibaꞌan u tꞌʌn Cꞌuj.
Caj yaꞌaraj Cꞌuj tiꞌ u winiquirob israel:
32 “Tu cꞌujinten Abraham uch.
Bayiriꞌ Isaac yejer Jacob.”
A Cꞌujoꞌ mʌꞌ quimen yiric a nunquirex.
Cuxaꞌan yiric a Cꞌujoꞌ.
Mʌꞌ ja wirej,
cuxaꞌan yiric Cꞌuj tu cotor mac.
33 Caj yubob a pimoꞌ,
caj jaqꞌuij yorob.
Caj yubob yaꞌaraj ten Jesús bic Cꞌuj cu yiric mʌꞌ quimen mac.
U tꞌʌn Cꞌuj caꞌ ij quiꞌ quibic
34 U winiquirob judío a fariseojoꞌ caj yubob yaꞌaric Jesús mʌꞌ cꞌuchaꞌan yorob u nunquicob u tꞌʌn Jesús a saduceojoꞌ.
Caj u muchꞌquintajob u bʌj yejer u winiquirob judío a saduceojoꞌ soc u tarob ich Jesús.
35 Caj tuchiꞌtaꞌb ten u winiquirob judío a fariseojoꞌ yejer u winiquirob judío a saduceojoꞌ tuririꞌ u racꞌob.
Caj bin u tus cꞌatejob baꞌ tiꞌ Jesús soc tumtaꞌr yor Jesús.
Rajiꞌob caj u tuchiꞌtajob yʌjcamsʌyʌjir u tꞌʌn Moisés.
36 Caj cꞌataꞌb tiꞌ Jesús ten yʌjcamsʌyʌjir u tꞌʌn Moisés:
―In wʌjcamsʌyʌjirech.
Arej tenob a jach manan tsoyir u tꞌʌn Cꞌuj caꞌ in quiꞌ quibejob.
37 Jesús caj u nuncaj tiꞌ:
―Caꞌ a yajquintej Cꞌuj,
quireꞌ rajiꞌ a Jaj Tsꞌurir.
Quet a yajquintej Cꞌuj yejer tu cotor a pixam yejer tu cotor a tucur yejer tu cotor a wor xan,
quireꞌ rajiꞌ pʌybej ich u tꞌʌn Cꞌuj.
38 Mʌnaꞌ u jer jach manan tsoyir,
quireꞌ rajiꞌ pʌyber ich u tꞌʌn Cꞌuj.
Rajen caꞌ a quiꞌquibex a jeraꞌ.
39 Quet bayiriꞌ,
tiꞌ yʌn u jer cu yaꞌaric:
“Yajquintej a racꞌob an ten bic ca wʌcꞌʌs yajquintic a bʌj.”
40 Wa ca quibic a jeꞌ caꞌtur tꞌʌn tsꞌibaꞌan uch.
Caj a rʌc quibaj tu cotor u tꞌʌn Cꞌuj a tsꞌibaꞌan ten Moisés yejer yʌjtseqꞌuirob u tꞌʌn Cꞌuj uch.
Mac u nunquir Cristo
41 Mʌꞌ toy xicob u winiquirob judío a fariseojoꞌ tu muchꞌaꞌan ich Jesús.
Caj cꞌataꞌb tiꞌob ten Jesús:
42 ―Baꞌ ca najtiquex tiꞌ Cristo,
a tuchiꞌbir ten Cꞌuj.
Mac u nunquir?
Caj yaꞌarob a winiquirob judío a fariseojoꞌ:
―Raꞌ u nunquir David.
43 Jesús caj yaꞌaraj:
―Arex ten biquin David caj u tꞌʌnaj:
“In Jaj Tsꞌurirech.”
Mʌꞌ ja wirej,
caj yamtaꞌb ten u Tajꞌor u Pixam Cꞌuj caj u tsꞌibtaj a jeraꞌ:
44 A Cꞌujoꞌ caj in wuꞌyaj yaꞌaric tiꞌ in Jaj Tsꞌurir,
quij David:
“Curen tin noj,
quij Cꞌuj,
hasta quin rʌc chꞌesic a mac a cu pꞌactiquechoꞌ.”
Baxuc tu tsꞌibtaj David uch.
45 Bic tabar Cristo u parar a nunquirex David wa David u bʌj tꞌʌnej:
“In Jaj Tsꞌurir.”
Rajen ij quer rajiꞌ mʌꞌ chen u parar a nunquirex David.
46 Mʌnaꞌ mac caj u nuncaj u tꞌʌn Jesús,
mʌꞌ ju caꞌ tarob u cꞌaticob u jer tꞌʌn tiꞌ Jesús.