Mac aric tiꞌ Jesús quir u camsic aroꞌ
20
Jesús tiꞌ yʌn turiꞌ u qꞌuinin ich carem naj tu cu naj cꞌujinticob Cꞌuj u winiquirob judío,
caj u camsaj tiꞌob.
Baxuc caj u tsecꞌtaj tiꞌob u jach tsoyir u tꞌʌn Cꞌuj.
Caj cꞌuchob u jach tsꞌurirob sacerdote yejer yʌjcamsʌyʌjirob u tꞌʌn Moisés yejer u tsꞌurirob u winiquirob judío a nuxiboꞌ.
Lucas 20.1-47
―Mac caj u tsꞌajaj a mucꞌ caj a cꞌʌmaj?
Mac arej tech quir a camsicob quir a tsecꞌticob?
Arej tenob mac caj u yaꞌaraj tech caꞌ a camsej tiꞌob?
3 Jesús caj yaꞌaraj tiꞌob:
―Baxuc ten bin in caꞌ in cꞌatic techex.
Nunquex ten.
4 Arex ten mac tuchiꞌtej Juan quir yacsic jaꞌ tu joꞌr mac?
Cꞌuj wa tuchiꞌtej Juan wa xib tuchiꞌtej?
5 Caj u tucrajob bic tabar cu bin u nunquicob tiꞌ.
Caj pacran arajob:
―Wa quij aric tiꞌ,
Cꞌuj caj u tuchiꞌtaj Juan quir u yacsic jaꞌ tu joꞌr mac,
jeꞌ yaꞌaric toꞌon:
“Biquinin mʌꞌ ta wacsajex ta worex tiꞌ?”
6 Wa quij aric xib caj u tuchiꞌtaj,
a pimoꞌ,
jeꞌ u chꞌinicoꞌonob quireꞌ yerob taj tuchiꞌtaꞌb ten Cꞌuj Juan quir u tsecꞌtic tꞌʌn.
7 Caj u nuncob:
―Mʌꞌ in werob mac tuchiꞌtej Juan quir u yacsic jaꞌ tu joꞌr mac.
8 Jesús caj yaꞌaraj tiꞌob:
―Baxuc techex,
mʌꞌ a waꞌaric mac tuchiꞌtej Juan,
baxuc ten ―quij Jesús―,
mʌꞌ in wac techex mac caj u yaꞌaraj ten quir in camsic tiꞌob.
Jesús cu camsic: Irej wa mac caj u majantaj u corir u wich uva
9 Jesús caj u yʌnxchun u camsic a pimob caj u camsaj baxuc a jeꞌraꞌ soc yerob a maqueꞌ a mʌꞌ u cꞌat u yacsicob tu yor tiꞌ quireꞌ bin u caꞌ ich cꞌacꞌ.
Rajen caj u camsaj a jeꞌraꞌ:
―Tiꞌ yʌn mac uch caj tsꞌoc u chꞌʌquic u cheꞌer u cor caj u rʌc tocaj u robirir caj u pʌcꞌaj u yaqꞌuir u wich uva.
Caj tsꞌoc u pʌqꞌuic,
caj u tsꞌaj tiꞌ mac quir u cʌnanticob.
U boꞌorir u cor caꞌ bin cꞌuchuc tu qꞌuinin u tꞌaquic u wich uva.
Cu tsꞌicob tiꞌ u tsꞌurir u cor jun xotꞌ u wich.
U tsꞌurir caj bin nach amaꞌan caj urij.
10 Caj cꞌuchij tu qꞌuinin cu tꞌocar u wich uva.
U tsꞌurir caj u tuchiꞌtaj u cꞌurew tu yʌn a mac a cu cʌnanticob u corir uva quir u cꞌat junxotꞌ u wich uva u boꞌorir u cor.
Chen a mac a cu cʌnanticob u cor caj u raxajob u cꞌurew caj wʌcꞌʌs tuchiꞌtaꞌb mʌꞌ tu tsꞌajajob tiꞌ u wich uva.
11 U jach tsꞌuriroꞌ caj u caꞌ tuchiꞌtaj u jer u cꞌurewoꞌ.
A mac cu cʌnanticob u corir u wich uva caj u raxob u cꞌurew.
Caj u pꞌastajob xan caj u putsꞌob caꞌ xic mʌꞌ tu tsꞌajajob tiꞌ.
12 U jach tsꞌurir caꞌ u wʌcꞌʌs caꞌ tuchiꞌtaj u jer u cꞌurewoꞌ chen a mac a cu cʌnanticob u corir u wich uva,
baxuc xan,
caj u jʌtsꞌajob hasta em u qꞌuiqꞌuer caj u pichꞌintajob tu nʌcꞌ cꞌaxir u corob.
13 ’U jach tsꞌurir u cor u wich uva caj yaꞌaraj:
“Baꞌ quin bin in betej?”
U bʌjir cu tꞌʌn tu junan:
“Jeꞌ in tuchiꞌtic in parar in jach yaj,
jaj ixtʌcoj cu sʌjticob yʌjcʌnʌnyʌjirob u pach u corir uva.”
14 Chen a mac a cu cʌnanticob u pach u cor uva caj u yirob u tar u parar u tsꞌurir:
“Araꞌ cu tar u pararoꞌ,
raꞌ cu bin u chꞌic u cor u tet caꞌ bin quimquiꞌ.”
Baxuc caj yaꞌarob ich u racꞌob:
“Caꞌ ij quinsej soc toꞌon caꞌ bin ic chꞌic u cor.”
15 Tiꞌ taroꞌ caj u quinsajob u parar u tsꞌurir caj u jocꞌsajob u pichꞌintej ich nʌcꞌ cꞌax.
Baꞌ cu bin u betej u jach tsꞌurir tiꞌ yʌjcʌnanyʌjirob u pach u corir uva?
16 Jeꞌ u tar u jach tsꞌurir quir u jocꞌsic u quinsej quir u tsꞌic u cor tiꞌ u jer mac.
Caj yubob yaꞌaric u winiquirob judío caj yaꞌarob:
―Jaj ixtʌcoj mʌꞌ u tar toꞌon.
17 Jesús caj u pʌctaj u wichob caj yaꞌaraj tiꞌob:
―Arex ten ajeraꞌ baꞌ cu yaꞌaric ich u tꞌʌn Cꞌuj tu tsꞌibaꞌan?
Tan yaꞌaric:
A tenoꞌ iren a yoc najoꞌ soc u chich tar u mucꞌ naj,
chen a ray yoc najoꞌ pichꞌitaꞌb ten yʌjcꞌʌxirob naj uch.
Quireꞌ mʌꞌ u cꞌat,
chen caj u wʌcꞌʌs chucajob quir u cꞌʌxicob yatoch soc u chichtar u mucꞌ.
18 A mac a mʌꞌ u yacsic tu yor ten bajeꞌrer.
Rajiꞌ irej a mac cu nacchꞌʌtic tunich caj yajij yoc.
Chen caꞌ bin cꞌuchuc tu qꞌuinin u xur tꞌʌn,
a mac a mʌꞌ tu yacsaj tu yor tiꞌ Cꞌuj,
rajiꞌ irej mac cu rubur tunichir tu yocꞌor cu maxʌreꞌ toc ramʌn ich ruꞌum.
Cax ic boꞌotej u boꞌorir u beyaj gobierno
19 Raꞌiriꞌ u qꞌuinin u jach tsꞌurirob sacerdote yejer yʌjcamsʌyʌjirob u tꞌʌn Moisés u cꞌat u chuquicob Jesús.
Quireꞌ yerob a baꞌ caj u camsaj sam quireꞌ Jesús yer mʌꞌ tu yacsicob tu yorob.
Mʌꞌ tu jach chucob Jesús quireꞌ cu chꞌic saquirob a pimob.
Mʌꞌ ja wirej,
a pimob u necꞌat yubic u tsicbar Jesús.
20 Tan u chꞌucticob u chuquej Jesús,
rajen caj u tuchiꞌtajob mac quir u tus waytarob u tꞌʌn soc cu tus taꞌquicob u joꞌr ich gobernador.
U cꞌat u taꞌquic u joꞌr tiꞌ gobernador soc u quinsaꞌ.
Rajen yet tarob a mac a cu tus aric tsoy yorob.
Soc u tus aric a baꞌ cu yubic u tsicbar Jesús.
21 Rajen caj u cꞌatob tiꞌ Jesús:
―In wʌjcamsʌyʌjirech ―quij―,
in werob taj a baꞌ ca wac.
Baxuc taj a baꞌ ca camsic tiꞌ u tꞌʌn Cꞌuj.
Mʌꞌ a coyen chich aric tiꞌ mac quet ca waꞌaric tiꞌ.
Quireꞌ baxuc taj ca camsic tenob a baꞌ u cꞌat Cꞌuj tiꞌ tenob.
22 In cꞌatob in wer wa tsoy in boꞌoticob in ruꞌum tiꞌ rey?
Wa mʌꞌ tsoy in boꞌoticob in ruꞌum?
23 Jesús caj u yubaj baꞌ cꞌas cu tucricob tu yorob,
caj yaꞌaraj tiꞌob:
Caj u yesob tiꞌ Jesús.
Jesús caj u yaꞌaraj tiꞌob:
―Mac jotꞌaꞌan u yochiriꞌ?
Baꞌ quiriꞌ u cꞌabaꞌ tsꞌibaꞌan tiꞌ?
Rajiꞌob caj u yaꞌarob tiꞌ:
―Raꞌ u yochir u rey César,
jotꞌaꞌan ich sʌc taqꞌuin.
25 Caj yaꞌaraj Jesús tiꞌob:
―Taj a baꞌ ca waquex.
Rajen caꞌ a quibʌquex a baꞌ cu yac techex u rey,
César,
baxuc xan,
caꞌ a quibʌquex a baꞌ cu yaꞌaric Cꞌuj techex.
26 Mʌꞌ cꞌuchaꞌan yor yubic baꞌ cu yaꞌaric Jesús ich a pimoꞌ soc u tus taꞌquicob u joꞌr Jesús.
Chen jacaꞌan yorob a baꞌ yubicob yaꞌaric Jesús.
Rajen tsꞌoc u tꞌʌnob.
Cu tar u cꞌaticob saduceo, mac cu riqꞌuir tu quimen
27 Baxuc xan,
tarob u winiquirob judío a saduceojoꞌ.
Aroꞌ cu yaꞌaric mʌꞌ u riqꞌuir mac tu quimirir.
Caj tarob u cꞌatej baꞌ tiꞌ Jesús;
caj yaꞌarajob tiꞌ Jesús:
28 ―In wʌjcamsʌyʌjirech ―quij-,
ic nunquir Moisés caj u tsꞌibtaj toꞌon uch a baꞌ caꞌ ic betej.
Caj yaꞌaraj wa ju mam cu quimin,
cu pꞌatʌr u racꞌ,
mʌnaꞌ u parar yejer caj quimin u mam,
tu junan.
Caj yaꞌaraj Moisés,
raꞌ u yitsꞌin u mam,
rajiꞌ cu bin u chꞌic u raqꞌuintej a muꞌ.
Soc yiric wa jeꞌ u pararancʌr yejer soc u chꞌisic u parar,
irej waj u tus parar u sucuꞌun uch.
29 A sucuꞌunbir yʌn seis yitsꞌinob.
A sucuꞌunbir,
rajiꞌ tu yʌn chꞌaj u racꞌ hasta quimin,
mʌnaꞌ u parar.
30 A itsꞌinbiroꞌ rajiꞌ u taꞌquic u chuꞌch u sucuꞌun.
Rajiꞌ caj u chꞌaj u racꞌ u sucuꞌun,
mʌnaꞌ u parar xan.
31 A jach caꞌ itsꞌinbiroꞌ,
rajiꞌ caj u taꞌca u chuꞌch u caꞌ sucuꞌun.
Rajiꞌ caj u chꞌaj u racꞌ u caꞌ sucuꞌun.
Mʌnaꞌ u parar xan.
Hasta nup u rʌc chꞌic u yitsꞌinob u mam hasta rʌc quimob,
mʌnaꞌ u parar.
32 Caj cꞌuchij tu qꞌuinin u quimin a xquicoꞌ caj quimij.
33 Caꞌ bin riqꞌuic tu quimen,
mac cu bin u chꞌic u raqꞌuintej quireꞌ siete caj u chꞌaj u mam.
34 Rajen Jesús caj u nuncaj tiꞌob,
caj yaꞌaraj:
―A teꞌ ich yocꞌocab cu chꞌic u racꞌ mac,
baxuc xquic cu chꞌic u mam xan.
Baxuc a pararex xan cu chꞌic u racꞌ,
baxuc xquic a pararex xan,
cu chꞌic u mam.
35 Caꞌ bin tsꞌocac u riqꞌuir mac tu quimen,
a mac jach tsoyoꞌ cu bin chaꞌbir yocar ten Cꞌuj ich caꞌanan.
Munt qꞌuin tiꞌ yʌnob.
Mʌꞌ u chꞌic u racꞌ a ich Cꞌujoꞌ.
Mʌꞌ ju bin u chꞌic u mam.
36 Quireꞌ a taroꞌ,
mʌꞌ ju bin quimen,
irob baxucob yʌjmasirob u tꞌʌn Cꞌuj.
Quireꞌ u pararob Cꞌuj quireꞌ ricꞌob tu quimen ten Cꞌuj uch.
37 Mʌꞌ wa cꞌaj techex a baꞌ caj u tsꞌibtaj Moisés uch a caj u yiraj tu cu yerar cꞌacꞌ ich chan cheꞌer uch.
Caj araꞌb ten Cꞌuj tiꞌ Moisés.
“A tenoꞌ u Cꞌujirenob a nunquirex Abraham yejer a nunquirex Isaac yejer a nunquirex Jacob.”
Rajen ij quer cu bin riqꞌuir mac tu quimirir.
38 A Cꞌujoꞌ,
rajiꞌ u Cꞌuj tu cotor mac.
Rajiꞌ u Cꞌuj a mac cuxaꞌan.
Baxuc xan,
rajiꞌ u Cꞌuj a mac quimen quireꞌ a quimenoꞌ cuxaꞌan ʌcʌtan tiꞌ Cꞌuj.
39 Mʌꞌ yaꞌab tiꞌ yʌnob yʌjcamsʌyʌjirob u tꞌʌn Moisés caj yaꞌarob tiꞌ:
―In wʌjcamsʌyʌjirech,
taj a baꞌ caj a waꞌaraj tiꞌ u winiquirob judío a saduceojoꞌ.
40 Quireꞌ sajaquir u caꞌ u cꞌatob tiꞌ Jesús.
Rajen caj u pꞌʌtajob u cꞌata baꞌ.
Jesús caj u cꞌataj tiꞌ yʌjcamsʌyʌjirob u tꞌʌn Moisés mac a Cristojoꞌ?
41 Jesús caj u cꞌataj tiꞌob:
―Bic tabar cu yaꞌaricob a pimob yejer u tsꞌurirob u winiquirob judío,
u parar u nunquir David.
Rajiꞌ Cristo a mac tuchiꞌtaꞌb ten Cꞌuj?
42 Mʌꞌ ja wirej,
u bʌjiriꞌ David,
caj u tsꞌibtaj ich u juꞌunin Salmos ich a uchben u tꞌʌn Cꞌujoꞌ.
Caj yaꞌaraj:
Ic Jach Tsꞌur Cꞌuj,
quij David,
caj u yaꞌaraj tiꞌ in Jach Tsꞌur:
“Tar a cutar,
quij Cꞌuj,
tin noj soc pꞌeriꞌ quic reyinticob mac.
43 Soc pꞌeriꞌ quic reyinticob mac hasta cu cꞌuchur tu qꞌuinin quin rʌc chꞌersic a mac a cu pꞌactiquech.”
Baxuc caj araꞌb tiꞌ ic nunquir David ten Cꞌuj.
44 Jesús caj u cꞌataj tiꞌob caj yaꞌaraj:
―A jeꞌ u tꞌʌn Cꞌuj cu yesic toꞌon David caj u tꞌʌnaj a Cristojoꞌ,
in Jach Tsꞌur,
quij David.
Rajen biquinin ca waquex u parar David a Cristojoꞌ quireꞌ wa rajiꞌ u Jach Tsꞌurir,
quet baꞌiriꞌ?
Jesús cu chich aric tiꞌ u camsʌwinicob, quiꞌ cʌnantej a bʌj tiꞌ yʌjcamsʌyʌjirob u tꞌʌn Moisés
45-46 Jesús cu tsicbar tiꞌ u camsʌwinicob pꞌeri caj yubajob a pimoꞌ:
―Quiꞌ cʌnantajex a bʌj soc mʌꞌ a cʌniquex yʌjcamsʌyʌjirob u tꞌʌn Moisés.
Mʌꞌ ja wirej,
yʌjcamsʌyʌjirob u tꞌʌn Moisés.
Jach tsoy u nocꞌ cu manob soc u tus turicob u racꞌob,
jach noꞌjob aroꞌ.
Quiꞌ yorob yiricob baxucob.
Jach quiꞌ yorob yiricob u tꞌʌnʌn ten u racꞌob tu cu naj bin u mʌnicob yoꞌoch quireꞌ cu yiricob tus noꞌjob aroꞌ.
Baxuc cu tetic u cutanob tu cu cutar a jach noꞌjoꞌ tu cu naj cꞌujinticob Cꞌuj.
Baxuc tu cu quiꞌquiꞌ janʌnob soc u tus irir jach noꞌjob.
47 Mʌꞌ ja wirej.
yʌjcamsʌyʌjirob u tꞌʌn Moisés cu tus aricob tiꞌ a u quimenob u mam.
Soc u tus chꞌic yatoch yejer u baꞌtac cax yʌn tu yatoch.
Jach amaꞌan u tsꞌocar u tꞌʌnicob Cꞌuj soc u racꞌob cu tus tucricob cu quiꞌ cꞌujinticob Cꞌuj.
Jach manan cu bin tsꞌabʌr u mucꞌyajob ten Cꞌuj quireꞌ cu beticob aroꞌ cax yerob u tꞌʌn Cꞌuj.
Chen u jerob mac mʌꞌ neyaj cu bin mucꞌyajob.