Jesús cu camsic bic tabar ic tꞌʌnic Cꞌuj
(Mt. 6.9-15; 7.7-11)
11
Tiꞌ yʌn Jesús tu cu tꞌʌnic Cꞌuj uch caj tsꞌoc u tꞌʌnic Cꞌuj caj cꞌuchob u camsʌwinicob Jesús turiꞌ.
Caj yaꞌaraj tiꞌ:
―Jach Tsꞌurir ―quij―,
camsenob bic in tꞌʌnicob Cꞌuj an ten bic Juan caj u camsaj u camsʌwinicob.
Lucas 11.1-54
2 Caj nuncaꞌb tiꞌob ten Jesús:
―Caꞌ binex a tꞌʌniquex Cꞌuj.
Baxuc a jeꞌraꞌ ca waquex tiꞌ:
In Tetob a mac tiꞌ yʌnoꞌ ich caꞌanan.
Quin cꞌatob soc tu cotor mac cu cꞌujintiquech.
Quin cꞌaticob tech caꞌ bin cꞌuchuc tu qꞌuinin caꞌ bin a reyintej ich yocꞌocab.
3 Chan chuquej tenob in woch soc tiꞌbir yʌn tenob tiꞌ u qꞌuinin bajeꞌrer.
4 Jawsej tenob in siꞌpirob a baꞌ siꞌpir caj in betajob quireꞌ quin jawsicob u siꞌpirob in racꞌob cax a baꞌ cꞌasir caj u betajob ten xan.
Mʌꞌ ja chaꞌic in binob tu quin pʌyicob in siꞌpirob.
Mʌꞌ ja chaꞌic in tsꞌurinticob a baꞌ quin pachticob tin worob a cꞌasoꞌ.
5 Jesús caj yaꞌaraj tiꞌ u camsʌwinicob:
―Quiꞌ tucrej a baꞌ u ber wa caꞌ bin xiquech tu yʌn a ju yajech cax chumuc acꞌbir tiꞌ ca bin a cꞌatic tiꞌ.
Ca waꞌaric tiꞌ:
“Chan chuquej ten a woch pan quireꞌ a yajen,
cax mʌnaꞌ u nup pan.
6 Mʌꞌ ja wirej,
tan tu cꞌuchur a mac u yajen,
nach u tar,
caj tarij quireꞌ mʌnaꞌ ten quir in jansic.”
7 A mac a tiꞌ yʌn ich yatoch a mac a ju jach yaj,
a mac tar cꞌatbir yoch.
Jaj ixtʌco cu nunquic:
“Mʌꞌ a pecsic in wor quireꞌ caj in toc mʌcaj u jor in watoch.
Toc tiꞌ yʌnen yejer in parar tin wenʌnob.
Mʌꞌ jin riqꞌuir in tsꞌic tech a baꞌ a cꞌat.”
8 Quireꞌ ―quij Jesús―,
taj quin waꞌaric techex.
Cax mʌꞌ u riqꞌuir u tsꞌic tiꞌ yoch quireꞌ jach yaj yiric.
Chen jeꞌ u riqꞌuir u tsꞌic tiꞌ a baꞌ u cꞌat quireꞌ rajraꞌ cu jach pꞌisic u bʌj u cꞌatic tiꞌ.
9 Baxuc tiꞌ Cꞌuj xan ―quij Jesús―:
Cꞌatej tiꞌ Cꞌuj,
jeꞌ u tsꞌiquex tex.
Cʌxtex a baꞌ a cꞌat,
Cꞌuj cu bin u chaꞌic a wiriquex.
Cꞌatex tiꞌ Cꞌuj,
irej a mac cu cꞌatic ich u jor naj,
jeꞌ u tsꞌabʌr techex an bic ca cꞌatic.
10 A tenoꞌ,
quin wac techex ―quij Jesús―,
tu cotor mac a cu cꞌatic tiꞌ,
jeꞌ u tsꞌabʌr tiꞌ.
Tu cotor mac cu cʌxtic a baꞌ u cꞌat,
jeꞌ u yiriqueꞌ.
Tu cotor mac cu cꞌatic a baꞌ u cꞌat,
an ten bic caj u cꞌataj tiꞌ xib ich u jor yatoch.
Jeꞌ u tsꞌabʌr tiꞌ.
11 Caj yaꞌaraj Jesús tiꞌ u camsʌwinicob:
―Wa mac tiꞌ yʌn ta wicnʌnex a yʌn u pararoꞌ jeꞌ wa ju tsꞌic tiꞌ tunich wa caj u cꞌataj yoch pan?
Mʌꞌ ju tsꞌic tunich tiꞌ.
Jeꞌ wa ju tsꞌic tiꞌ can quir u chꞌic wa cu cꞌatic yoch cʌy?
Mʌꞌ ju tsꞌic tiꞌ.
12 Jeꞌ wa ju tsꞌic tiꞌ roroch quir u chiꞌic wa cu cꞌatic yoch yeꞌer cax.
Mʌꞌ ju tsꞌic tiꞌ.
13 A techexoꞌ cax jach cꞌasechex a werex a tsꞌiquex tiꞌ a parar a baꞌ jach tsoyoꞌ.
Jach manan tsoyir a tiꞌ yʌn ich caꞌananoꞌ.
Baxuc a Cꞌujoꞌ a tiꞌ yʌn ich caꞌanʌnoꞌ jach manan tsoyir cu tsꞌabʌr tiꞌ u Tajꞌor u Pixam Cꞌuj tiꞌ a mac a cu cꞌatic tiꞌeꞌ.
Pacꞌ u pach Jesús acaꞌan quisin tiꞌ
14 Caj u jocꞌsaj quisin Jesús tiꞌ a xiboꞌ a mʌꞌ ju jocꞌar u tꞌʌneꞌ.
Caj tsꞌoc u jocꞌsic caj yʌnxchun u tꞌʌn.
Rajen jaqꞌuij yorob a pimoꞌ.
15 Chen yʌn mac mʌꞌ yaꞌabir caj u yaꞌarajob:
―A jeꞌ xibaꞌ cu jocꞌsic cꞌacꞌas quisin quireꞌ yamtaꞌb ten Beelzebú quireꞌ raꞌ u Jach Tsꞌurir u quisinin.
16 Chen tiꞌ yʌnob u jerob u cꞌat u tus tumticob yor Jesús quir u yesic carem beyaj soc yerob wa tuchiꞌtaꞌb ten Cꞌuj wa mʌꞌ.
17 Chen Jesús yer baꞌ cu tucricob tu yorob tu pʌcꞌob u pach u jach tsꞌurir quisin Jesús.
Caj yaꞌaraj tiꞌob:
―Mʌꞌ ja wirej,
tu cotor ruꞌum tu cu reyinticob rey.
Wa ju jer junxot cu tsꞌictarob yejer u jer junxot cu bin u rʌc chꞌesicob u yet cajarob mʌꞌ ju pꞌat mac.
Baxuc xan a mac pꞌeriꞌ cʌjricob ich yatoch cax u wʌcꞌʌs u bʌjob wa cu pacran tsꞌictarob cu bin u chꞌesicob u bʌj.
18 Baxuc xan a Satanásoꞌ,
wa ju winiquirob Satanás cu pacran tsꞌictarob cu bin u rʌc chꞌesicob u bʌj.
Mʌnaꞌ mac cu bin u reyinticob Satanás.
Quireꞌ techex ta waꞌarajex quin jocꞌsic in wet quisinin.
Quireꞌ caj u yamtajen Beelzebú.
19 Wa baxuc quin jocꞌsic quisin an ten bic ca tucriquex.
Baxuc arex ten bic u camsʌwinicobex,
cu jocꞌsicob a quisininoꞌ.
Mʌꞌ u jocꞌsicob quireꞌ yamtaꞌb ten Beelzebú quireꞌ a werex yamtaꞌbob ten Cꞌuj quir u jocꞌsicob.
Mʌꞌ ja taꞌquiquex in joꞌr,
tan in yamtaꞌr ten Beelzebú.
20 Mʌꞌ taj cu yamtiquen Beelzebú quir in jocꞌsic quisin.
Chen u mucꞌ Cꞌuj quir in jocꞌsic a quisinoꞌ.
Aroꞌ cu yesic cꞌuchij tu qꞌuinin a reyintiquex Cꞌuj.
21 Tiꞌ toy cu camsic Jesús caj yaꞌaraj:
―A werex ―quij Jesús―,
a mac jach chich u mucꞌ,
irej a quisinoꞌ,
u mʌchmʌn u mascab quireꞌ cu cʌnantic a baꞌ yʌn tiꞌ.
22 Caꞌ bin cꞌuchuc tu qꞌuinin cu tar a jach manan chich u mucꞌ,
iren ―quij Jesús―.
Cu tsꞌictar yejer a quisinoꞌ,
cu rʌc toꞌcar u mascab tu cu cʌnantic a baꞌ yʌn tiꞌ,
cu tsꞌocar u toꞌcar tiꞌ,
cu rʌc chꞌic u jʌsic ich u racꞌob.
23 ’Quireꞌ a mac mʌꞌ ju yamtiquen cu yamtic a quisinoꞌ quireꞌ a mac mʌꞌ ju yamtiquen irej,
tan u jocꞌsic mac caꞌ xic erar ich cꞌacꞌ.
A cꞌacꞌas quisinoꞌ caj urij a jocꞌsaꞌb cucheꞌ
24 Caj yaꞌaraj Jesús tiꞌob:
―A uchoꞌ jocꞌsaꞌb quisinin ten mac tar cu manoꞌ u quisinin ich tacay ruꞌum tu yʌn u yet quisinin.
Caj u cʌxtaj tu cu jesic u bʌj.
Chen mʌꞌ tu yiraj.
A quisinoꞌ caj yaꞌaraj:
“Jeꞌ in caꞌ bin tu joqꞌuen a uchoꞌ soc in wʌcꞌʌs ocar tiꞌ.”
25 Caj sutnʌj a quisinoꞌ caj u yiraj a jeꞌ xibaꞌ,
irej yatoch toc misaꞌan chen mʌnaꞌ mac yʌnin u pixam a xiboꞌ,
toc quiꞌ yor.
26 Rajen caj bin u pʌyej siete yet quisinin jach manan cꞌas u yet quisinoꞌ.
A tiꞌ uchoꞌ mʌꞌ nejach cꞌasiꞌ.
Caj rʌc ocob a quisinoꞌ quir u tsꞌurintaꞌ a quisinoꞌ ten a xiboꞌ.
A xiboꞌ a acaꞌan tiꞌ quisin jach manan cꞌas bajeꞌrer,
a uchoꞌ mʌꞌ necꞌasiꞌ.
A mac jach quiꞌ yor jach jaj
27 Tiꞌ toy cu tsicbar Jesús tiꞌ a pimoꞌ.
Turiꞌ xquic ich yicnʌnob caj u puraj u tꞌʌn tiꞌ Jesús caj yaꞌaraj:
―Mun tsoyir a nʌꞌoꞌ a tu chꞌisajech a ta chuch a yim.
28 Caj yaꞌaraj Jesús:
―Jaj ixtʌc taj a baꞌ ca wac chen jach manan quiꞌ yor a cu quibic u tꞌʌn Cꞌuj a tan u man tu tsoyir a baꞌ cu betic.
A mac jach cꞌasoꞌ cu cꞌaticob yiricob carem beyaj
29 Caj u rʌc tar a pimoꞌ uch quir u rʌc bʌcristicob Jesús,
caj u yʌnxchun yaꞌaric ucheꞌ:
―A techexoꞌ ―quij Jesús―,
a mac cuxaꞌan u qꞌuinin bajeraꞌ jach cꞌasechex quireꞌ ca cꞌatiquex a wiriquex carem beyaj soc a werex wa tuchiꞌten Cꞌuj.
Chen turiꞌ cu bin tsꞌabʌr techex soc a werex caj u tuchiꞌten Cꞌuj.
Cu bin u betej Cꞌuj an ten bic caj u betaj tiꞌ yʌjtseqꞌuir u tꞌʌn Cꞌuj uch,
u cꞌabaꞌ Jonás.
30 Soc yerob winiquirob uch ich u cajar Nínive tuchiꞌtaꞌb ten Cꞌuj Jonás.
Baxuc ten ―quij Jesús―,
soc a wer caj u tuchiꞌtajen Cꞌuj xan.
31 Tiꞌ toy cu tsicbar Jesús tiꞌ a pimoꞌ:
―Caꞌ bin cꞌuchuc ―quij Jesús―,
tu qꞌuinin cu xur tꞌʌn,
a ray u qꞌuininoꞌ,
cu bin riqꞌuir mac a quimen a uchoꞌ.
Cu bin tar xquic u reina u winiquirob u cajar Seba.
Aroꞌ tar cu bin ʌcʌtan Cꞌujoꞌ,
cu bin u taꞌquic a joꞌrex a mac cuxaꞌan u qꞌuinin bajeraꞌ,
quireꞌ cꞌas caj a betaj techex.
Mʌꞌ ja wirej,
a ray xquicoꞌ jach nach u tar uch quir yubic u tꞌʌn Salomón quireꞌ u nejach er baꞌ Salomón.
Chen tiꞌ yʌnen bajeꞌraꞌ ―quij Jesús―,
jach noꞌjen a tenoꞌ.
A Salomón uchoꞌ mʌꞌ nejach noꞌjiꞌ chen techex mʌꞌ ja quiꞌ quibiquex in tꞌʌn.
32 Caꞌ bin cꞌuchuc tu qꞌuinin u xur tꞌʌn,
a ray u qꞌuinin caꞌ bin xic ʌcʌtan Cꞌuj tu cotor mac.
Quireꞌ u winiquirob tu cajar Nínive caꞌ bin tsꞌocac u riqꞌuir tu quimen a uchoꞌ.
Tar cu binob ʌcʌtan Cꞌuj quir u taꞌquiquex a joꞌrob.
Quireꞌ cꞌas caj betajex.
Mʌꞌ ja wirej,
robob caj u cꞌaxajob yorob soc u pꞌʌticob u cꞌasirob uch caj yubob caj u tsecꞌtic u tꞌʌn Cꞌuj Jonás.
Mʌꞌ jach noꞌj a Jonás a uchoꞌ.
Caj u cꞌaxob u yor u winiquirob u cajar Nínive.
A tenoꞌ jach noꞌjen chen mʌꞌ tan a cꞌaxiquex a worex tiꞌ in tꞌʌn.
Ij quich irej quib
33 U camsaꞌbar Jesús,
irej cu tꞌʌbic quib quir u yercꞌacꞌtic mac.
Rajen Jesús caj yaꞌaraj:
―A mac a cu tꞌʌbic u quib caꞌ bin tsꞌocar u tꞌʌbic mʌꞌ u bʌric yejer xac.
Mʌꞌ ju taꞌquic u quib tu yatoch soc mʌꞌ yiric mac.
Caꞌ bin tsꞌocar u tꞌʌbic cu chen naꞌsic caꞌanan quir yercꞌacꞌtic a mac a cu yocar.
Baxuc ten ―quij Jesús―.
Mʌꞌ tin mucric u tꞌʌn Cꞌuj tiꞌ techex.
Caj in chen tsecꞌtaj techex u tꞌʌn Cꞌuj ʌcʌtan tu cotor mac soc u rʌc uꞌwic.
34 A quiboꞌ quir u yercꞌacꞌtic mac.
Rajen wa mʌꞌ pꞌur butsꞌ tiꞌ u ras quib chʌcaꞌan ic betic a baꞌ ij cꞌat.
Wa pꞌur butsꞌ tiꞌ u ras quib mʌꞌ u neyercꞌacꞌtic baꞌ.
Rajen acꞌbir ij cʌjtoch soc mʌꞌ chʌcaꞌan ic betej a baꞌ ij cꞌat.
Baxuc techex yejer a wichex wa tsoy ta tꞌʌn ca wiriquenex,
jeꞌ u yocar in tꞌʌn tu quin camsic techex.
Wa mʌꞌ tsoy ta tꞌʌn ca wiriquenex,
mʌꞌ u yocar in tꞌʌn ta pixamex tu quin camsic techex,
rajen a pixamex cu bin tu yacꞌbirir.
35 Rajen quiꞌ cʌnantex a bʌj soc mʌꞌ ja rucꞌsiquex in tꞌʌn ich a pixamex quireꞌ wa ca mʌꞌquintic in tꞌʌn cu bin yacꞌbirchʌjʌr a pixamex.
36 Quireꞌ wa tiꞌ yʌn in tꞌʌn ta pixamex wa mʌꞌ a cꞌʌs rucꞌsiquex in tꞌʌn ta pixamex cu bin u quiꞌ yamtic techex soc a manex tu tsoyir.
Mʌnaꞌ yacꞌbirir ta pixamex.
Aroꞌ an ten bic cu yercꞌacꞌtic tech quib.
Jesús tan u taꞌquic u joꞌrob u winiquirob judío a fariseojoꞌ yejer yʌjcamsayʌjirob u tꞌʌn Moisés
37 Caj tsꞌoc u tsicbar Jesús a baꞌ caj u camsaj sam.
Caj tariꞌ turiꞌ a fariseojoꞌ caj payij quir u janʌn ich yatoch.
Caj binij Jesús caj oquij caj curʌj tu pojcheꞌir tu cu janʌn.
38 Rajen jaqꞌuij yor a fariseojoꞌ quireꞌ mʌꞌ tu pꞌoꞌaj u cꞌʌb Jesús,
mʌꞌ toy janʌquiꞌ.
Mʌꞌ ja wirej,
u winiquirob judío a fariseojoꞌ nanij u pꞌoꞌic u cꞌʌb mʌꞌ toy janʌquiꞌ.
Quireꞌ cu tucricob baxuc cu quiꞌquinticob yor Cꞌuj.
39 Jesús yer jacꞌaꞌan yor a fariseojoꞌ,
rajen caj u yaꞌaraj tiꞌ:
―A techexoꞌ u winiquirechex judío a fariseojoꞌ,
irechex ruch a ca pꞌoꞌiquex u pach chen tu japnin mʌꞌ a pꞌoꞌiquex.
A techexoꞌ u winiquirechex judío a fariseojoꞌ irechex u rʌquir a woch a ta quiꞌ pꞌoꞌajex tu pach chen u japnin mʌꞌ ta pꞌojechexiꞌ,
rajen tiꞌ toy eqꞌuiꞌ.
A techex irex u ruchir a wochex chen pꞌoꞌaꞌan u pach,
quireꞌ ca quiꞌ pꞌoꞌic a cꞌʌb soc mac yiric jach tsoyechex chen mʌꞌ a tucric wa pꞌoꞌaꞌan a pixamex.
Jach ecꞌ a pixamex quireꞌ tu cotor a siꞌpirex.
40 Mʌꞌ ja wirej,
Cꞌuj caj u betaj ic winiquir baxuc ic pixam,
rajen mʌꞌ u chen cꞌat caꞌ ichinʌcoꞌon ij winiquir,
u cꞌat xan toc tsoy ic pixam xan.
41 Soc yʌn techex jach tsoy a pixamex chuquex a baꞌ yʌn techex tiꞌ a mac a mʌnaꞌ tiꞌ.
42 ’Jach otsirechex u winiquirechex judío a fariseojoꞌ caj a chuquiquex tuririꞌ a baꞌ yʌn techex ich a diezoꞌ soc a tsꞌiquex tiꞌ Cꞌuj.
Cax a baꞌ pʌcꞌar quir a tsꞌʌquic a bʌj,
cax a baꞌ a tsꞌac a woch,
a tuririꞌ ich a diezoꞌ.
Jot,
cax mʌꞌ a tsꞌiquex tiꞌ,
quireꞌ mʌꞌ tan a yajquintic mac,
mʌꞌ ca yajquintex Cꞌuj.
Baꞌ quiriꞌ jach manan tsoyir caꞌ a yajquintex mac.
Baxuc aroꞌ caꞌ a yajquintiquex Cꞌuj.
Chen mʌꞌ a yʌn pꞌʌtiquex a tsꞌiquex tiꞌ Cꞌuj a baꞌ nani ca tsꞌiquex tiꞌ.
43 ’Jach otirechex u winiquirechex judío a fariseojoꞌ.
A cꞌat caꞌ u yiriquechexob jach noꞌjechex.
Rajen a cꞌatex u cutan jach tsoy ich tu cu naj cꞌujinticob Cꞌuj u winiquirob judío.
Baxuc a cꞌatex soc mac cu quiꞌ tꞌʌniquex tu cu najmʌnicob yoch.
44 ’A techexoꞌ,
jach otsirechex u winiquirechex judío a fariseojoꞌ.
A techexoꞌ,
u winiquirechex judío a fariseojoꞌ irechex u mucnaj mac tu cu najmuquic mac,
chen mʌnaꞌ u mucnaj,
mʌꞌ chʌcaꞌan.
Rajen a mac a cu man tan u chꞌʌctic quireꞌ mʌꞌ yer wa mucaꞌan mac tiꞌ.
45 Tiꞌ yʌn turiꞌ yʌjcamsʌyʌjir u tꞌʌn Moisés caj u nuncaj caj yaꞌaraj:
―Cax ca waꞌaric tiꞌob u winiquirob judío a fariseojoꞌ tan a pꞌastiquenob quireꞌ pꞌeriꞌenob yejer u winiquirob judío a fariseojoꞌ.
46 Caj yaꞌaraj Jesús tiꞌ yʌjcamsʌyʌjir u tꞌʌn Moisés:
―A techexoꞌ,
jach otsirechex yʌjcamsʌyʌjirechex u tꞌʌn Moisés.
Mʌꞌ ja wirej,
ca tsꞌʌric u pach a racꞌob u betic a baꞌ jach yaj quireꞌ ca jenmastic u tꞌʌn Moisés.
Aroꞌ irej a mac cu tsꞌʌric u pach caꞌ u cuchej a baꞌ jach ar,
chen u bʌjiriꞌ mʌꞌ u yamtic u cuchej.
Mʌꞌ ju cꞌat u cuchej.
47 ’Otsirechex yʌjcamsʌyʌjirechex u tꞌʌn Moisés,
ca tsꞌʌpquintiquex tunich tu mucnaj yʌjtsequirob u tꞌʌn Cꞌuj soc tsoy yiric tu cotor mac.
Raꞌiriꞌ yʌjtseqꞌuirob u tꞌʌn Cꞌuj a quinsaꞌb ten a nunquirex uch.
48 Cax ca tsꞌʌpquintiquex tunich tu mucnaj soc a sʌjtiquex yʌjtseqꞌuirob u tꞌʌn Cꞌuj.
Jach irex a nunquirex a mac tu quinsajob yʌjtseqꞌuirob u tꞌʌn Cꞌuj quireꞌ ich a tucurex a cꞌat a quinsenex.
49 ’Rajen Cꞌuj a yer tu cotor baꞌ caj yaꞌaraj:
“Quin tuchiꞌtic yʌjtseqꞌuirob u tꞌʌn Cꞌuj tu yʌnechex,
yʌn jun yar cu bin u quinsicob,
yʌn jun yar cu bin tsꞌabʌr u mucꞌyajob”,
baxuc caj yaꞌaraj Cꞌuj uch.
50 Jach taj caj a betajex an ten bic caj u yaꞌaraj Cꞌuj.
Rajen ca bin a boꞌotiquex u boꞌorir tu ta quinsajobex,
cax tu yʌnxchun tu cotor baꞌ.
51 Quireꞌ tu yʌnxchun u quinsicob Abel a uchoꞌ hasta u qꞌuinin bajeꞌrer caj u quinsajob Zacarías.
Tiꞌ caj u quinsajob Zacarías nʌtsꞌaꞌan tu cu quinsicob wacʌx quir u tsꞌic tiꞌ Cꞌuj baxuc cꞌʌs nʌtsꞌaꞌan carem naj.
Jeꞌ a rʌc bin a boꞌotiquex u boꞌorir tu rʌc quinsaꞌb yʌjtseqꞌuirob u tꞌʌn Cꞌuj.
Tiꞌ techex a mac cuxaꞌan u qꞌuinin bajeꞌrer.
52 Caj yaꞌaraj Jesús tiꞌ yʌjcamsʌyʌjirob u tꞌʌn Moisés:
―Otsirechex techex ―quij Jesús―,
yaꞌab ca najtiquex tiꞌ u tꞌʌn Moisés.
Ca camsic tiꞌob xan,
chen mʌꞌ a quiꞌ camsej a baꞌ jach tajeꞌ.
Mʌꞌ ja quibiquex a baꞌ tiꞌ yʌn ich u tꞌʌn Moisés.
A mac a ju cꞌat u quibej mʌꞌ a chaꞌic u quibic.
53 Caj tsꞌoc u tꞌʌn Jesús yejerob a fariseojoꞌ yejerob yʌjcamsʌyʌjirob u tꞌʌn Moisés,
caj bin Jesús,
jach tsꞌicob u winiquirob judío a fariseojoꞌ yejer yʌjcamsayʌjirob u tꞌʌn Moisés robob u cꞌat naꞌsicob yor quinsac Jesús.
54 Mʌꞌ ja wirej,
caj u chꞌuctajob yubejob baꞌ cu yac Jesús soc u binob u taꞌquicob u joꞌr Jesús quireꞌ a baꞌ cꞌas caj u yaꞌaraj.