U camsʌwinicob Jesús caj u jiꞌchtajob u wich trigo
12
Caj u chꞌʌctob u cor mac Jesús.
A ju camsʌwinicob caj tarob tu pach Jesús.
Caj u jiꞌchtajob u wich trigo u jantejob quireꞌ wichʌjob.
Raꞌ u qꞌuinin cu jesicob u bʌj u winiquirob judío.
2 U winiquirob judío a farisejoboꞌ,
irob u jiꞌchticob u wich trigo.
Caj araꞌb tiꞌ Jesús ten u winiquirob judío a farisejoboꞌ:
―Iric,
biquinin cu jiꞌchticob u wich trigo a camsʌwinicob quireꞌ u qꞌuinin ic jesicob ic bʌj.
Baxuc tsꞌibaꞌan ich u tꞌʌn Moisés uch.
Mʌꞌ tsoy u beyaj tu qꞌuinin tu cu jesic u bʌj u winiquirob judío.
3 Jesús caj yaꞌaraj tiꞌ u winiquirob judío a farisejoboꞌ:
―Mʌꞌ wa ja xacajex tu tsꞌibaꞌan u tꞌʌn Cꞌuj tiꞌ David uch?
Caj wichʌjob David yejer u racꞌob uch.
4 Caj oquij David yejer u racꞌob ich yatoch tu tꞌinaꞌan yotꞌer chivo tu cu naj cꞌujinticob Cꞌuj u winiquirob judío.
Caj tsꞌaꞌb yoꞌoch pan ten sacerdote caꞌ u jantajob David yejer u racꞌob quireꞌ wichʌjob,
cax mʌꞌ tsoy u janticob caj tsꞌab tiꞌ David ten sacerdote.
Mʌꞌ ja wirej,
raꞌ quir u tsꞌabʌr tiꞌ Cꞌuj.
Cu chen janticob u winiquirob judío a sacerdotejoꞌ.
5 Jesús caj yaꞌaraj tiꞌ u winiquirob judío a farisejoboꞌ:
―Baxuc xan,
mʌꞌ a xacmʌnex ich u tꞌʌn Moisés a cu yaꞌaric u beyajob sacerdote cax u qꞌuinin tu cu yʌn jesicob u bʌj.
Rajiꞌob cu beyajob ich carem naj tu cu naj cꞌujinticob Cꞌuj u winiquirob judío aroꞌ mʌꞌ cꞌasiꞌ.
Mʌꞌ ju tar u siꞌpirob.
6 Quin waꞌaric techex ―quij Jesús―,
tiꞌ u winiquirob judío a farisejoboꞌ.
Quireꞌ tsꞌaꞌb u mucꞌ ten Cꞌuj tiꞌ sacerdote soc u beyajob ich carem naj tu cu naj cꞌujinticob Cꞌuj.
Cax cu beyajob a sacerdotejoꞌ tu qꞌuinin tu cu jesicob u bʌj,
chen tsoyoꞌ ―quij Jesús―.
Chen a tenoꞌ jach manan u tsꞌabʌr in mucꞌ ten Cꞌuj.
A ray u mucꞌoꞌ tsꞌaꞌb tiꞌ sacerdote mʌꞌ u cꞌuchur u mucꞌ teniꞌ.
7 A techexoꞌ,
―quij Jesús― mʌꞌ a wuꞌyex a baꞌ cu yaꞌaric a jeꞌ tsꞌibaꞌan ich u tꞌʌn Cꞌuj?
Uꞌyex ―quij Jesús―:
“In cꞌat ―quij Cꞌuj―,
caꞌ a yajquintej a racꞌob caꞌ a yamtej tiꞌob.
Mʌꞌ a chen quinsiquex a wʌrʌcꞌ quir a sijic ten quir in jawsic a siꞌpirex.
Jach manan tsoyir caꞌ a yajquintej a racꞌob.”
Baxuc cu yaꞌaric tu tsꞌibaꞌan u tꞌʌn Cꞌuj.
Wa ja najtajex aroꞌ,
mʌꞌ a pʌqꞌuiquex u pachob in wʌjcamsayʌjirob,
quireꞌ mʌꞌ cꞌas caj u betob.
8 Caj yaꞌaraj Jesús tiꞌ u winiquirob judío a farisejoboꞌ:
―A tenoꞌ baxuquenechex,
cu tsꞌurintiquen tu cotor baꞌ,
cax a baꞌ cu yiric mac tu qꞌuinin tu cu jesicob u bʌj u winiquirob judío ―quij Jesús.
A xiboꞌ a mʌꞌ u jitir u cꞌʌbeꞌ
9 Raꞌ u qꞌuininoꞌ Jesús caj toc pꞌat u winiquirob judío a farisejoboꞌ,
caj bin Jesús,
caj oc tu cu naj cꞌujinticob Cꞌuj u winiquirob judío.
10 Tiꞌ yʌn xibiꞌ a mʌꞌ u jitir u cꞌʌb.
Caj cꞌataꞌb tiꞌ Jesús ten u winiquirob judío:
―Are toꞌonex.
Tsoy wa jic jawsic mac tu qꞌuinin ic jesicob ic bʌj?
U cꞌat u pacꞌarob u pach Jesús,
rajen caj u tus cꞌatic u winiquirob judío.
11 Jesús caj u nuncaj:
―A techex ―quij Jesús―,
wa cu rubur a wʌrʌcꞌ tʌmʌn yuc.
Cu rubur tu chꞌicaꞌan.
Mʌꞌ wa ja jocꞌsex enan tu qꞌuinin tu ca jesiquex a bʌj?
A mʌꞌ ca jocꞌsiquex a wʌrʌcꞌ tʌmʌn yuc xan enaj tu qꞌuinin a jesiquex a bʌj.
12 Mʌꞌ ja wirej,
a xiboꞌ,
jach coꞌoj enan a wʌrʌcꞌ tʌmʌn yuc a ca jocꞌsiqueꞌ,
mʌꞌ necoꞌojiꞌ.
Rajen tsoy a man a yamtiquex mac tu qꞌuinin tu ca jesiquex a bʌjex.
Mʌꞌ ja wirej,
mʌꞌ cꞌasiꞌ ―quij Jesús.
13 Jesús caj u tꞌʌnaj xib a mʌꞌ u jitir u cꞌʌb:
―Tichꞌ a cꞌʌb caꞌanan ―quij Jesús.
Caj u tichꞌaj u cꞌʌb,
caj jawij u cꞌʌb an ten bic jumbuj u cꞌʌb caj jawij.
14 Caj jocꞌob u winiquirob judío a farisejoboꞌ caj irob jawij u cꞌʌb a mʌꞌ ju jitir u cꞌʌb.
Caj u rʌc muchꞌquintob u bʌjob a farisejoboꞌ quir u tsicbʌticob tiꞌ u racꞌob soc yubicob bic tabar caꞌ bin u quinsejob Jesús.
Toc araꞌb ten yʌjtseqꞌuirob u tꞌʌn Cꞌuj: Jeꞌ u tar Cristo
15 Jesús caj yubaj baꞌ cu tucricob.
Caj u pꞌʌtaj u cajar a mʌꞌ u jitir u cꞌʌb,
caj bin Jesús.
Caj uyaꞌb u bin Jesús,
caj binob a pim mac ich u pach Jesús.
Caj rʌc jawsaj u yajirob.
16 Caj yaꞌaraj Jesús tiꞌ a tu jawsaj:
―Mʌꞌ a yʌn bin a waꞌarex wa tin jawsajechex soc mʌꞌ yerob mac tu tuchiꞌtajen Cꞌuj.
17 A baywoꞌ caj u nupꞌsaj Jesús a baꞌ tsꞌibtaꞌb tiꞌ ten Isaías uch.
Mʌꞌ ja wirej,
caj yaꞌaraj Isaías caj araꞌb tiꞌ Jesús:
18 A jeraꞌ in cꞌurew,
raꞌ cu beyaj ten,
a mac caj in tetaj,
quij Isaías,
tiꞌ Cꞌuj.
A mac caj in yajquintaj quiꞌ in wor yejer a tin tetajeꞌ,
quij Isaías,
quireꞌ yʌn u Tajꞌor u Pixam Cꞌuj tiꞌ in cꞌurew.
Jeꞌ u bin ʌcʌtan tu cotor mac quir u tsecꞌtic in tꞌʌn soc u manob tu tsoyir.
Cax ich a mʌꞌ u winiquirob judío cu bin ʌcʌtan quir u tsecꞌtic tiꞌob.
19 Mʌꞌ ju tsꞌictar in cꞌurew,
mʌꞌ u nunquic u tꞌʌn mac,
in cꞌurew,
quij Isaías.
Mʌnaꞌ mac cu bin yubic u tsꞌictar in cꞌurew.
Mʌꞌ u bin u tupsic yor mac,
a caj u yacꞌt u bʌj quireꞌ u siꞌpir.
20 Chen cu bin chichquintic yorob.
Rajraꞌ cu bin u betic soc caꞌ bin cꞌuchuc tu qꞌuinin cu bin manob tu tsoyir.
A rajiꞌob,
a mac a tiꞌ yʌn yocꞌocab a cu bin u yacsicob tu yorob tiꞌ.
21 Rajen tu cotor mac ich u cajarob caj u pajob Cristo quir u tocar ten Cꞌuj.
Baxuc caj yaꞌaraj Cꞌuj tiꞌ Isaías uch caj u tsꞌibtaj.
Pacꞌ u pach Jesús acaꞌan quisin tiꞌ
22 Caj tar purbir xib ten u racꞌob a chꞌop u wicheꞌ.
Mʌꞌ ju jocꞌar u tꞌʌn quireꞌ yʌn cꞌacꞌas quisin tiꞌ xib.
Caj u jawsaj Jesúsoꞌ,
caj jocꞌ u tꞌʌn,
caj yiraj u berir xan.
23 Caj jaqꞌuij yorob u racꞌob caj yirob u jawar a mʌꞌ u jocꞌar u tꞌʌn,
a chꞌop u wich ucheꞌ.
Caj yaꞌaraj a pimoꞌ:
―Mʌꞌ wa ju parar ic nunquirex David a caj ic pajex caꞌ tac?
24 A ju winiquirob judío a fariseoboꞌ caj yubob a baꞌ araꞌb ten u racꞌob.
Caj yaꞌarob:
―A jeꞌ xibaꞌ cu jocꞌsic quisin.
Mʌꞌ raꞌ tsꞌic u muqꞌuiꞌ u tsꞌurir quisin.
U mucꞌ u tsꞌurir quisin Beelzebú caj u jocꞌsej quisin.
25 Caj yubaj Jesús a baꞌ caj u tucraj u winiquirob judío a fariseoboꞌ.
Caj yaꞌaraj Jesús tiꞌ u winiquirob judío a fariseoboꞌ:
―Wa ju wʌcꞌʌs bʌjiriꞌ cu bin tsꞌictar ich u ruꞌumin tu cu reyinticob rey.
Jeꞌ u rʌc chꞌesicob u bʌj.
Cax ich u chan cajar tu cu bin u tsꞌictarob.
Cax wa ju wʌcꞌʌs bʌjob cu tsꞌictarob jeꞌ u rʌc quinsicob u bʌj.
26 Bayiriꞌ a quisinoꞌ,
u jach cꞌabaꞌ Satanás.
Wa ju yet quisinin bin u jocꞌsejob.
Jeroj caj u toc chꞌesob u bʌj.
Jeroj mʌnaꞌ quisin.
27 Jesús caj u nuncaj tiꞌ u winiquirob judío a fariseoboꞌ:
―A techexoꞌ,
ca waꞌariquex caj in jocꞌsaj cꞌacꞌas quisin yejer u mucꞌ Beelzebú.
Wa taj a baꞌ ca waꞌariquex ―quij Jesús―.
Arex ten bic tabar cu jocꞌsic cꞌacꞌas quisin a camsʌwiniquex?
Caj yaꞌaraj Jesús tiꞌ u winiquirob judío a fariseoboꞌ:
―Cu jocꞌsicob quireꞌ cꞌacꞌas quisin yejer u mucꞌ jach tsꞌur Beelzebú xan.
Mʌꞌ ju jocꞌsejob quisin yejer u mucꞌ Beelzebú.
Rajen a camsʌwiniquex xan,
cu yesicob mʌꞌ taj a baꞌ ca waꞌariquex tiꞌ ten ―quij Jesús.
28 Caj yaꞌaraj Jesús tiꞌ u winiquirob judío a fariseoboꞌ:
―A tenoꞌ,
quin jocꞌsic cꞌacꞌas quisin ―quij Jesús―.
Quireꞌ caj u tsꞌaj ten u Tajꞌor u Pixam Cꞌuj.
Rajen chʌcaꞌan a wiriquex tiꞌ yʌn u mucꞌ Cꞌuj tu yʌnechex.
29 Caj yaꞌaraj Jesús tiꞌ u winiquirob judío a fariseoboꞌ:
―Bic tabar in jocꞌsic u cꞌacꞌas quisin wa mʌꞌ tin yʌn rubsaj u mucꞌ u jach tsꞌurir quisin,
Satanás?
A baywoꞌ ―quij Jesús―,
cꞌuchaꞌan in wor in jocꞌsic quisin.
Quireꞌ aroꞌ irej a mac oquij ich yatoch a mac chich u mucꞌ irej wa caj u cꞌʌxaj soc u rʌc chꞌic u baꞌtac.
30 ’A mac a mʌꞌ ju yamtiquen,
cu pꞌactiquen an ten bic a pꞌactiquenex.
A mac mʌꞌ ju chaꞌic caꞌ in taquic mac caj u jocꞌsaj u racꞌob caꞌ xicob ich cꞌacꞌ.
31 ’Rajen quin waꞌariquex tech ―quij Jesús―.
Techex ca pꞌastiquenex caj a wirex in jocꞌsic cꞌacꞌas quisin.
Cax ca pꞌastiquenex ―quij Jesús―.
Cax ca pachꞌiquenex quin jawsiquex a siꞌpirex.
Caj yaꞌaraj Jesús:
―Wa ca pꞌastiquex u Tajꞌor u Pixam Cꞌuj mʌꞌ biqꞌuin cu jawʌr a siꞌpirex.
32 A tenoꞌ,
taren in yamtej tu cotor mac.
A mac a cu pꞌastiqueneꞌ,
jeꞌ u jawʌr u siꞌpireꞌ.
A mac a cu jach pꞌastic u Tajꞌor u Pixam Cꞌuj mʌꞌ u bin jawʌr u siꞌpir,
cax u qꞌuinin bajeꞌrer,
cax u qꞌuinin u xur tꞌʌn,
mʌꞌ u jawʌr u siꞌpir.
A werex wa baꞌ cheꞌer a mʌꞌ u wichʌncʌr
33 Caj yaꞌaraj Jesús tiꞌ u winiquirob judío a fariseoboꞌ:
―Wa ca wiriquex u cheꞌer a cu wichʌncʌr.
Mʌꞌ a werex wa jach tsoy u cheꞌer wa cꞌas u cheꞌer.
Wa chʌcaꞌan a wiriquex wa tsoy u wich a wer tsoy u cheꞌer.
Bayiriꞌ xan,
wa chʌcaꞌan a wiric wa cꞌas u wich a werex cꞌas u cheꞌer.
Rajen a werex biquiraꞌ u cheꞌer.
Cʌnex tiꞌ aroꞌ.
Mʌꞌ a chen man a pʌqꞌuiquex u pach a racꞌob,
an ten bic caj a waꞌarex ten quin beyaj yejer quisin ―quij Jesús―.
A mac cu man tu tsoyir caꞌ a waꞌarex:
“Tsoy a rayoꞌ”,
an bic caj a wirex in jocꞌsic cꞌacꞌas quisin.
Mʌꞌ wa tsoy caꞌ in jocꞌsej quisin?
―quij Jesús―.
A mac mʌꞌ ju man tu tsoyir tiꞌ cu man tu cꞌasir.
34 Caj yaꞌaraj Jesús tiꞌ u winiquirob judío a fariseoboꞌ:
―Jach cꞌasechex ―quij Jesús―.
Tiꞌ cu jocꞌar a tꞌʌnex ich a chiꞌex an ten biquechex can.
Mʌꞌ ja wirej,
a canoꞌ,
cu chiꞌic mac.
Mʌꞌ u jocꞌar tsoy a tꞌʌnex.
Mʌꞌ ja wirej,
toc cꞌasechex.
Rajen mʌꞌ taj a baꞌ ca waꞌariquex,
quireꞌ a baꞌ cu jocꞌar ta chiꞌex tiꞌ cu tar ich a pixamex quireꞌ cꞌas a pixamex.
35 Caj yaꞌaraj Jesús:
―A xiboꞌ,
wa toc tsoy cu jocꞌar u tꞌʌn,
toc tsoy u pixam.
Baxuc xan,
a xiboꞌ,
wa cꞌas cu yaꞌaric,
mʌꞌ toc tsoy u pixam.
Mʌꞌ ja wirej,
cꞌas cu yaꞌaric.
36 Rajen quin waꞌaric techex.
Taj quin waꞌaric techex,
raꞌ u qꞌuinin caꞌ bin xuruc tꞌʌn a baꞌ caj a waꞌarex raꞌ ca bin a wuyiquex yaꞌaric techex Cꞌuj.
Quireꞌ cꞌas caj a waꞌarex.
Tu cotor mac cu bin yubic yaꞌaraꞌ ten Cꞌuj u ricꞌsmʌnex a tꞌʌnex Cꞌuj.
37 A wʌcꞌʌs tꞌʌnex cu bin u taꞌquiquex a joꞌrex quir a bin erarex.
Bayiriꞌ xan,
a wʌcꞌʌs tꞌʌnex cu bin u taquiquex soc mʌꞌ a werarex.
A mac cꞌas cu tar u tus cꞌatej carem beyaj
38 Caj tarob u winiquirob judío a fariseoboꞌ.
Caj cꞌataꞌb tiꞌ Jesús.
Yet tarac yʌjcamsʌyʌjirob u tꞌʌn Moisés.
Mʌꞌ yaꞌab tarob ich Jesús.
Caj araꞌb tiꞌ Jesús ten u winiquirob judío a fariseoboꞌ yejer u camsʌyʌjirob u tꞌʌn Moisés:
―Esej toꞌonex carem beyaj in wʌjcamsʌyʌjirech soc ij querex tarech ich Cꞌuj.
39 Caj u nuncaj Jesús:
―A techexoꞌ,
a mac cʌjaꞌan tu qꞌuinin bajeꞌrer jach cꞌasechex.
Mʌꞌ taj ca cꞌujintiquex Cꞌuj.
Rajen caj a tus cꞌatenex caꞌ in wesic techex carem beyaj.
Jariꞌ ca bin a wirex an ten bic Jonásen,
u yʌjtseqꞌuirir u tꞌʌn Cꞌuj uch,
soc a werex taren ich Cꞌuj.
40 An ten bic Jonás tiꞌ yʌn ich u japnin u nʌcꞌ cʌy.
Caj rucꞌ ten cʌy a caremoꞌ.
Mʌnaꞌ u nupꞌ u qꞌuinin tiꞌ yʌn Jonás ich u japnin u nʌcꞌ cʌy.
Acꞌbir xan tiꞌ yʌn Jonás.
Baxuc ten xan biqꞌuinoꞌ mʌnaꞌ u nupꞌ u qꞌuinin tiꞌ yʌnen ich u japnin ruꞌum xan.
Mʌnaꞌ u nupꞌ acꞌabir xan tiꞌ yʌnen quireꞌ taren in yamtic mac tu cotorob.
41 Caj yaꞌaraj Jesús:
―Cꞌaj techex wa Jonás caj bin u tsecꞌtej u tꞌʌn Cꞌuj ich u cajar Nínive caj jocꞌ ich u nʌcꞌ cʌy.
Caj u rʌc cꞌaxaj tu yorob caꞌ u rʌc pꞌʌtob u manob tu cꞌasir tu cotor mac ich u cajar Nínive.
Jesús caj yaꞌaraj:
―Caꞌ bin xuruc tꞌʌn,
a mac caj u cꞌaxaj tu yorob caj u pꞌʌtajob u cꞌasirob ich u cajar Nínive cu bin yaꞌaricob:
“Jach cꞌasechex”,
mʌꞌ ta cꞌaxex a worex soc a pꞌʌtiquex a cꞌasirex cax caj a wirex in tar in tsecꞌtechex a wuꞌyex u tꞌʌn Cꞌuj ―quij Jesús―.
Jach manan in tsecꞌtic techex ―quij Jesús―.
A Jonásoꞌ mʌꞌ necꞌuchaꞌan yor u tsecꞌtic.
42 Cꞌaj wa techex,
caj tar xquic reina tu cu reyinticob u ruꞌumin Etiopía.
Tar yubej a baꞌ cu najtic Salomón tu cotor a baꞌ tiꞌ yʌn ich yocꞌocab.
Cax jach nach caj tar yubic ich Salomón.
Caꞌ bin xuruc tꞌʌn jeꞌ yaꞌaric xquic tiꞌ Cꞌuj:
“Jach cꞌas aroꞌ a mac cʌjaꞌanob tu qꞌuinin tiꞌ yʌn Jesús ich yocꞌocab.
Quireꞌ mʌꞌ tu cꞌʌmajob u tꞌʌn Jesús.”
Chen a tenoꞌ ―quij Jesús―,
taren in tsecꞌtic u tꞌʌn Cꞌuj quir a najtiquex,
chen mʌꞌ a cꞌʌmexiꞌ.
Chen a Salomónoꞌ,
mʌꞌ ne manan u camsic.
A tenoꞌ ―quij Jesús―,
jach manan quin camsic tu cotor mac.
A cꞌacꞌas quisin ―quij Jesús―, cu wʌcꞌʌs ur tu cʌjaꞌan a mac acaꞌan tiꞌ
43 Caj yaꞌaraj Jesús tiꞌ u winiquirob judío a fariseoboꞌ:
―A techex irex a mac acaꞌan cꞌacꞌas quisin tiꞌ uch.
Caj joc quisinꞌ caj bin ich tʌcay ruꞌum quir u cʌjtar quisin chen mʌꞌ tu yiraj.
44 Rajen a cꞌacꞌas quisinoꞌ u cꞌat u wʌcꞌʌs ur ich winic tu jocꞌsaꞌb uch.
Caj tar yiraj jach tsoy,
irej naj,
toc mistaꞌan.
45 Rajen rʌc bin u pʌyic yet quisinin.
Siete caj u pʌyaj u yet quisinin.
Jach manan cꞌasir u yet quisinin.
Caj wʌcꞌʌs oc ich a xiboꞌ.
Jach manan cꞌas,
a uchoꞌ,
mʌꞌ necꞌasiꞌ.
Baxuc ca rʌc bin a cʌniquex a cuxaꞌanex mac bajeꞌrer ―quij Jesús―,
a raꞌ acaꞌan u quisininoꞌ.
Caj tar irbir Jesús ten u nʌꞌ bayiriꞌ u yitsꞌinob caj tarob
46 Jesús mʌꞌ toy tsꞌocac u tsicbar yejer a pimoꞌ caj cꞌuchij u nʌꞌ Jesús yejer yitsꞌinob Jesús.
Tar xur nach tu mʌnaꞌ mac,
quireꞌ pim bʌcristaꞌb Jesús.
Tarob u tsicbarob yejer Jesús.
47 Caj araꞌb tiꞌ Jesús ten mac:
―Tu tꞌʌniquech a nʌꞌ yejer a witsꞌinob ―quij―.
U cꞌat u tsicbar yejerech a nʌꞌ ―quij―,
quet yejer a witsꞌinob.
48 Caj tꞌan ten Jesús tiꞌ a mac a tar tꞌʌnbir Jesús:
―Taj ca waꞌaric,
raꞌ in nʌꞌ yejer in witsꞌinob.
49 Caj u tuchbar tiꞌ u camsʌwinic,
Jesús: