A mac tuchiꞌtaꞌb ten Juan ich Jesús. A raꞌ cu yacsic jaꞌ tu joꞌr
11
Caj tsꞌoc u camsic aroꞌ tiꞌ u camsʌwinicob Jesús.
Caj bin Jesús quir u man u tsecꞌtic u tꞌʌn Cꞌuj ich tu cotor u racꞌob ich tu cotor u cajarob,
caꞌ bin u camsic u racꞌob xan.
2 Tiꞌ yʌn Juan a cu yacsic jaꞌ tu joꞌr mac tiꞌ yʌn tu cu naj maꞌcʌr winic.
Caj yubaj u jumintaꞌ Juan ten u camsʌwinicob.
Quireꞌ yaꞌarob u camsʌwinicob:
“Jach carem u beyajob Jesús.”
Caj u tuchiꞌtaj caꞌtur u camsʌwinicob Juan ich Jesús quir u cꞌatic baꞌ tiꞌ Jesús.
3 Caj cꞌuch u camsʌwinicob Juan ich Jesús.
Caj araꞌb ten u camsʌwinicob Juan:
―Arej tenob wa Cristojech,
a quin pajicob u tar tiꞌ Cꞌuj quir u taquiquenob ―quij yac tiꞌ,
u camsʌwinicob Juan―.
Arej tenob wa yʌn in pajicob u jer?
4 Caj araꞌb tiꞌ u camsʌwinicob Juan ten Jesús:
―Joqꞌuen,
arex tiꞌ Juan a baꞌ caj a wirex in camsic mac.
5 Arex tiꞌ Juan,
a caj a wirex in jawsic a chꞌop u wicheꞌ.
A caj a wirex in jawsic a mech yoqueꞌ.
Arex tiꞌ Juan,
a caj a wirex in jawsic iqꞌuer u caꞌob.
Arex tiꞌ Juan,
a caj a wirex in jawsic a mʌꞌ u yubejoꞌ tꞌʌn.
Bayiriꞌ a caj a wirex in ricꞌsic u quimirir mac ―quij Jesús―.
Arex tiꞌ Juan,
a caj a wirex in tsecꞌtic u jach tsoyir u tꞌʌn Cꞌuj a mac a cu yaꞌaricob:
“Otsirchʌjen a tenoꞌ.”
6 Caj yaꞌaraj Jesús tiꞌ u camsʌwinicob Juan:
―Arex tiꞌ Juan.
A tenoꞌ,
quin waꞌaric a mac a rajraꞌ cu yacsic tu yor tiꞌ ten yejer tu cotor u pixam tsoy yʌn tiꞌ.
7 Caj bin u camsʌwinicob Juan.
Wʌcꞌʌs sutnʌjob u camsʌwinicob Juan tu pachob.
Caj u tsicbʌtaj Jesús Juan tiꞌ u winiquirob judío,
a tiꞌ yʌnob ich Jesús.
Caj araꞌb ten Jesús tiꞌ u winiquirob judío:
―Baꞌ bin a wirex ich Juan tu cu tsecꞌtic u tꞌʌn Cꞌuj uch.
Baxuc wa caꞌtur u tucur?
Samaneꞌ wa ju jer u tucur.
A mac irej jʌrʌr cu yumtaꞌ ten icꞌ?
Baxuc wa caj a wirex Juan?
Mʌꞌ caj a wirex aroꞌ.
8 Caj araꞌb tiꞌ u winiquirob judío ten Jesús:
―Mʌꞌ wa binechex a wirex mac a cu cꞌaxic u tucur.
Mʌꞌ binex a wirex a mac a cu buquintic jach tsoy u nocꞌ.
A mac cu buquintic jach tsoy u nocꞌ tiꞌ yʌn ich yatoch rey.
A Juanoꞌ mʌꞌ u buquintic jach tsoy u noqꞌuiꞌ.
9 Mʌꞌ chen binechex a wirex mac cu buquintic jach tsoy nocꞌ.
Mʌnaꞌ mac a cu cꞌaxic u tucur.
Jach binechex a wirex a mac a cu jach tsecꞌtic u jach tsoyir u tꞌʌn Cꞌuj.
Rajiꞌ mʌꞌ chen a mac a cu tsecꞌtic u tꞌʌn Cꞌuj.
10 Caj yaꞌaraj Jesús:
―Mʌꞌ ja wirej,
tsꞌibtaꞌb tiꞌ Juan ten yʌjtseqꞌuir u tꞌʌn Cꞌuj Isaías uch cax mʌꞌ toy tac Juan.
Caj yaꞌaraj Isaías uch:
Jeꞌ u tar yʌjtseqꞌuir u tꞌʌn Cꞌuj,
quij Isaías.
Pʌyber cu bin tar.
Mʌꞌ ja wirej,
tabar u tar Cristo soc mac yer jeꞌ u tareꞌ Cristo.
Baxuc caj yaꞌaraj Isaías uch.
11 Caj yaꞌaraj Jesús tiꞌ u winiquirob judío:
―Jach taj quin wac techex.
Mʌnaꞌ mac cu cꞌuchur orben tiꞌ Juan a cu yacsic jaꞌ tu joꞌr mac.
Cax a mac a tiꞌ yʌn ich yocꞌocab.
Cax a mac cʌjaꞌan bajeꞌrer.
Mʌꞌ ju cꞌuchur orben tiꞌ Juan,
a cu yacsic jaꞌ tu joꞌr mac.
A mac cu bin cꞌuchur orben tiꞌ Juan a cu yacsic jaꞌ tu joꞌr cax chichin caj u yacsaj tu yor.
Hasta cu cꞌuchur tu qꞌuinin u reyinticob Cꞌuj jeꞌ u cꞌuchur orben tiꞌ.
12 Jesús caj yaꞌaraj tiꞌ u winiquirob judío:
―Caj u yʌnxchun u tsecꞌtic Juan a cu yacsic jaꞌ tu joꞌr mac.
Caj rʌc tarob u winiquirob judío quireꞌ u jach cꞌat yocarob tu cu bin u reyintejob Cꞌuj.
Caj u jach pꞌisob u bʌj tiꞌ u tꞌʌn Cꞌuj.
Quireꞌ u cꞌat yubicob u tꞌʌn Cꞌuj cax bajeꞌrer.
13 Mʌꞌ ja wirej,
rajiꞌob caj u tsecꞌtajob yʌjtseqꞌuirob u tꞌʌn Cꞌuj uch,
cax Moisés caj u tsecꞌtaj u tꞌʌn Cꞌuj tu cu bin u reyintejob Cꞌuj hasta tari Juan a cu yacsic jaꞌ tu joꞌr mac.
14 Caj yaꞌaraj Jesús tiꞌ u winiquirob judío:
―Wa ja cꞌat a cꞌʌmiquex u tꞌʌnob Juan.
Quireꞌ a Juanoꞌ,
irej Elías a uchoꞌ,
a cu tsecꞌtic u tꞌʌn Cꞌuj uch.
Eliás rajiꞌ ca pajiquex caꞌ tac.
A tsecꞌtaꞌb uch:
“Jeꞌ u tareꞌ.”
15 Rajen caꞌ a wuꞌyex a baꞌ caj in waꞌaraj techex.
16 Caj yaꞌaraj Jesús tiꞌ u winiquirob judío:
―A mac a cuxaꞌan a jeꞌ qꞌuinaꞌ,
quin wiric an ten bic a chichanoꞌ,
a cu baxarob tu cu naj mʌnicob yoꞌoch mac.
Cu puricob u tꞌʌn tiꞌ u yet baxarob.
17 Cu yaꞌaricob tiꞌ yet baxʌrob:
“Cax chen churnʌquenob,
mʌꞌ a wocꞌatex quireꞌ quiꞌ a worex.
Cax chen cꞌaynʌquenob,
mʌꞌ a wocꞌarex,
cax ocꞌnʌjenob a quin cꞌʌyicob techex.”
18 Quireꞌ caj tar Juan a cu yacsic jaꞌ tu joꞌr mac.
Mʌꞌ u nejanan Juan a nequiꞌ yoꞌochoꞌ.
Mʌꞌ u yucꞌur u cꞌab u wich uva.
Caj yaꞌaraj Jesús tiꞌ u winiquirob judío:
―Caj a waꞌaraj techex:
“Acaꞌan quisin tiꞌ Juan.”
Rajen rajiꞌob a mac a cuxaꞌan a jeꞌ qꞌuinaꞌ irob a ray chichanoꞌ.
19 Jesús caj yaꞌaraj tiꞌ u winiquirob judío:
―Caj taren quir in yamtic mac tu cotor.
Quin quiꞌ janʌn ―quij Jesús―.
Quin wuꞌqꞌuic u cꞌab u wich uva.
Ca tus aꞌariquex jach manan quiꞌ quin janʌn ―quij Jesús tiꞌ u winiquirob judío―.
Bayiriꞌ ca tus aꞌariquex quin neꞌucꞌur.
A techexoꞌ ―quij Jesús―,
a ca waꞌariquex in wet man yejer a yʌn u siꞌpirobeꞌ.
Bayiriꞌ ca tus aꞌariquex in wet man yejer a mac a cu cꞌʌmicob u taqꞌuin gobernador.
Quireꞌ jach manan cu cꞌaticob taqꞌuin gobernador.
Caj yaꞌaraj Jesús tiꞌ u winiquirob judío:
―A mac a cu pꞌactic u beyaj quin beticob mʌꞌ tꞌajiꞌ.
Quireꞌ a mac a tꞌajiꞌ yerob a baꞌ quin beticob raꞌ u beyaj Cꞌuj.
A ich u cajar u winiquirob judíojoꞌ mʌꞌ u yubejob u tꞌʌn Cꞌuj
20 Jesús caj yubaj ich u cajar u winiquirob judío mʌꞌ ju cꞌaxic yorob quir u pꞌʌticob u cꞌasir,
cax caj u yirob jach carem u beyaj Jesús.
Caj chich qꞌueyaꞌb u winiquirob judío ten Jesús.
21 Caj yaꞌaraj Jesús tiꞌ u winiquirob judío:
―Otsirechex ich a cajarex u cꞌabaꞌ Corazín,
quireꞌ mʌꞌ ja cꞌaxex a worexiꞌ quir a pꞌʌtiquex a cꞌasirex.
Bayiriꞌ a mac a tiꞌ yʌnob tu cajar Betsaida.
Wa caj u chen irob carem u beyaj ucheꞌ caj u cꞌaxob yorob ich u cajar Sidón uch.
Bayiriꞌ ich u cajar Tiro wa caj u yirob carem u beyaj ucheꞌ an ten bic carem in beyajiꞌ.
A mʌꞌ seb caj u cꞌaxob yorob quireꞌ yirob carem in beyaj.
Caj manob yacꞌticob u bʌj,
quireꞌ manob tu cꞌasir uch.
Caj u buquintob tsots nocꞌ yejer u tꞌotꞌic tan tu joꞌr jeꞌ u manob yacꞌtob u bʌj an ten bic nani u betic u winiquirob judío.
22 Quin waꞌaric techex ―quij Jesús―.
Jach yaj ca bin a mucꞌyajex caꞌ bin xuruc tꞌʌn.
Chen a mac tu cʌjaꞌanob tu cajar Tiro mʌꞌ neyaj cu bin yubic u mucꞌyajob.
Bayiriꞌ xan,
ich u cajar Sidón.
Mʌꞌ neyaj cu bin yubic u mucꞌyajob.
23 Caj yaꞌaraj Jesús tiꞌ u racꞌob a cʌjaꞌanob ich u cajar Capernaum:
―A techexoꞌ,
teꞌ cʌjaꞌanechex ich u cajar Capernaum.
Ca tucriquex jeꞌ u sʌjtiquechex a racꞌob quireꞌ ca wiriquex tiꞌ cʌjaꞌaneniꞌ ―quij Jesús―.
Caꞌ bin xuruc tꞌʌn ich yocꞌocab ―quij Jesús―.
Tiꞌ ca bin erarexiꞌ,
quireꞌ mʌꞌ ja cꞌaxex a woriꞌ.
Mʌꞌ ja wirej,
wa caj u yirob in carem beyajob tu cajar Sodoma ucheꞌ,
a caj a wirajex uch ta cajarex uch,
tiꞌ toy yʌn u cajariꞌ Sodoma bajeꞌrer.
Mʌꞌ erabir ten Cꞌuj uchiꞌ.
24 Quin waꞌaric techex ―quij Jesús―.
Caꞌ bin xuruc tꞌʌn,
jach yaj ca bin a werarex ich u cajar Capernaum.
Mʌꞌ ja wirej,
mʌꞌ ja cꞌaxex a worexiꞌ ―quij Jesús―.
Chen a tiꞌ cʌjaꞌan uch ich u cajar Sodoma mʌꞌ neyaj cu bin yubic yerarobiꞌ.
Cojen tu yʌnen ―quij Jesús―, caꞌ in jawechex wa baꞌ ca tucriquex
25 Raꞌ u qꞌuininaꞌ,
caj urob u camsʌwinicob ich u winiquirob judío,
caj u tꞌʌnaj Cꞌuj,
Jesús.
Caj yaꞌaraj Jesús tiꞌ Cꞌuj:
―Jach caremech Cꞌuj in Jach Tsꞌurech u Cꞌujirech yocꞌocab xan,
quireꞌ u Cꞌujirech caꞌanan xan.
A techoꞌ Cꞌuj ―quij Jesús―,
caj a wesaj a tꞌʌn tiꞌ a mac a mʌꞌ u neꞌer a tꞌʌn.
A techoꞌ Cꞌuj ―quij Jesús―,
mʌꞌ ja wesaj tiꞌ a mac a cu tus aꞌaric u neꞌer a tꞌʌn.
A cu tus aꞌaric cu jach najtic a tꞌʌn.
26 Caj u tꞌʌnaj Cꞌuj:
―Jach jaj Cꞌuj,
quireꞌ raꞌ tsoy ta tꞌʌn tech,
quireꞌ baxuc a cꞌat.
27 Caj yaꞌaraj Jesús tiꞌ a mac a tiꞌ yʌnoboꞌ:
―Cꞌuj caj u rʌc tsꞌaj ten tu cotor baꞌ ich yocꞌocab quir u tsꞌurinticob ten.
Baxuc ich caꞌanan Cꞌuj caj u rʌc tsꞌaj ten quir u tsꞌurinticob ten.
Mʌnaꞌ mac cu najtiquen a teraꞌ ―quij Jesús―.
Chen in Tet cu jach najtiquen.
Baxuc Cꞌuj xan,
mʌnaꞌ mac cꞌuchaꞌan yor u najtic Cꞌuj,
chen ten quin najtic Cꞌuj.
Mʌnaꞌ mac cꞌuchaꞌan yor u najtar in Tet,
jariꞌ a mac a jin bʌjiriꞌ caj in camsaj soc yer biquiraꞌ in Tet.
28 ’Cojen tu yʌnen ―quij Jesús―,
caꞌ in jawsej wa baꞌ ca tucriquex,
wa choc a worex tiꞌ a siꞌpirex,
soc u quiꞌtar a worex.
29 Caj yaꞌaraj Jesús:
―Quibex a baꞌ quin waꞌaric techex.
Mʌꞌ yaj a cʌniquex in tꞌʌn.
Quireꞌ ―quij Jesús―,
wa ca cꞌʌmiquex in tꞌʌn,
jach quiꞌ a worex.
Caꞌ a cʌnenex ―quij Jesús―.
Mʌꞌ tsꞌiquen a tenoꞌ,
mʌꞌ biqꞌuin quin pꞌujur a tenoꞌ ―quij Jesús―.
30 Wa baxuc techexoꞌ,
mʌꞌ yaj ca bin quibiquex in tꞌʌn,
quireꞌ jach tsoy ca bin a wuꞌyiquex in tꞌʌn.