Jesús cu jawsic u cꞌurew yʌjtꞌʌnir cien u winiquirob soldado romano
7
Jesús caj tsꞌoc u camsic a pimoꞌ a jeꞌ tꞌʌnaꞌ,
caj bin ich u cajar Capernaum.
Lucas 7.1-50
2 Tiꞌ yʌn ich u cajar Capernaum u capitán u soldado u winiquirob romano.
Rajiꞌ yʌn u cꞌurew,
u yaj u cꞌurew,
tabar u quimin u cꞌurew.
3 Caj yubaj yaꞌaraꞌ capitán,
tiꞌ yʌn Jesús.
Caj tuchiꞌtaꞌb jun yarob u jach tsꞌurirob u winiquirob judío,
a nuxibeꞌ,
caj chich paꞌay Jesús caꞌ tac jawsaꞌbir u cꞌurew capitán.
4 Caj u jutsꞌob u bʌj ich Jesús caj u yʌnxchun u chich pʌyicob Jesús,
caj yaꞌarob tiꞌ Jesús:
―Cojen caꞌ a jawsej u cꞌurew capitán quireꞌ jach tsoy a jeꞌ capitánoꞌ.
Rajiꞌ tsoy caꞌ a yamtej tiꞌ.
5 Quireꞌ a capitánoꞌ cu yajquintic u winiquirob judío.
Mʌꞌ ja wirej,
u bʌjiriꞌ caj u boꞌotaj yʌjcꞌʌxirob naj tu quij cꞌujintic Cꞌuj ―baxuc caj araꞌb yʌjpʌyirob Jesús.
6 Jesús caj bin yejerob.
Bʌytʌc u cꞌuchurob Jesús ich yatoch capitán caj tuchiꞌtaꞌb tꞌʌnbir Jesús u racꞌob capitán.
Caj yaꞌarob:
―Tsireꞌej,
cax mʌꞌ a wocar tin watoch ti tar a xuroꞌ ich tancab.
A tenoꞌ mʌꞌ pataren quir in wacsiquech.
7 Rajen mʌꞌ joqꞌuen in tꞌʌnech quireꞌ in wer mʌꞌ tsoyen.
Chen arej tiꞌ caꞌ jawac in cꞌurew.
8 Mʌꞌ ja wirej,
quin chen quibic u tꞌʌn in jach tsꞌurob.
Bayiriꞌ a tenoꞌ xan,
quin tsꞌurintic soldado u winiquirob romano.
Rajen wa quin waꞌaric tiꞌ mac caꞌ xic,
cu bin.
Quin wac tiꞌ u jer,
caꞌ tac,
cu tar.
Wa quin wac tiꞌ in cꞌurew u betej,
cu betic.
Rajen in wer wa ca waric u jawʌr in cꞌurew cu jawʌr ―baxuc caj araꞌb tiꞌ Jesús ten capitán.
9 Caj yuba Jesús aroꞌ caj jaqꞌuij yor caj yuba bic tabar caj u yacsaj tu yor capitán.
Rajen Jesús caj u sut u bʌj tu pach soc u tꞌʌnic a mac a cu tarob tu pach.
Jesús caj yaꞌaraj tiꞌob:
―A tenoꞌ quin wac techex,
mʌꞌ biqꞌuin in wiramʌn yacsic tu yor cax ich u winiquirob judío,
an ten bic a jeꞌ xibaꞌ caj u yacsaj tu yor ―baxuc caj araꞌb ten Jesús.
10 Caj wʌcꞌʌs urob ich yatoch a tuchiꞌtaꞌbob ten capitán caj yirob jawij u cꞌurew capitán.
A Jesúseꞌ caj u ricꞌsaj u parar a quimen u mameꞌ
11 Caj tsꞌoc u jawsaꞌr u cꞌurew capitán caj bin Jesús ich u chan cajar Naín.
Raꞌ u cꞌabaꞌ Naín.
Yet binacob u camsʌwinicob yejer a pimob.
12 Tabar u cꞌuchur Jesús ich u cajar Naín,
tu joꞌrir u paꞌteꞌir tunich,
tan u jocꞌsaꞌrob u baquer quir u mucur.
Rajiꞌ u parar a xquicoꞌ,
a quimen u mamoꞌ.
Tuririꞌ u parar.
Yet taracob a pim u racꞌob.
13 Jesús caj yiraj a xquicoꞌ,
a quimen u mamoꞌ,
caj yajquintaꞌb ten Jesús.
Caj araꞌb tiꞌ:
―Mʌꞌ a wacꞌtic a parar xib ―quij Jesús.
14 Jesús caj u jutsꞌ u bʌj tʌrbir tu butꞌaꞌan u baquer tu cꞌochaꞌan ten u racꞌob.
Caj xurob yʌjcꞌochirob u baquer.
Jesús caj yaꞌaraj tiꞌ a quimen a chichanoꞌ:
―Riqꞌuen,
quen.
15 A quimen caꞌcheꞌ caj riqꞌuij cutar,
caj u yʌnxchun u tsicbar yejer u racꞌob.
Caj tsꞌaꞌb tiꞌ u nʌꞌ ten Jesús.
16 Caj yirob aroꞌ caj u jach chꞌajob sajaquirob,
caj u yʌnxchun yaꞌaricob tiꞌ Cꞌuj:
―Jach caremech Cꞌuj.
Caj a tuchiꞌtaj u jer yʌjtseqꞌuir u tꞌʌn Cꞌuj a mac jach carem.
Caj tar Cꞌuj quir u yamtic u winiquirob israel ―baxuc caj yaꞌarob.
17 Caj u jumintajob ich u racꞌob bic tabar caj u ricꞌsaj Jesús u chan parar xib a xquicoꞌ,
a quimen u mamoꞌ.
Caj u rʌc jumintajob ich tu cotor u cajarob u ruꞌumin Judea.
Baxuc tantanxer caj u rʌc jumintajob.
A mac tuchiꞌtaꞌb ten Juan a cu yacsic jaꞌ tu joꞌr mac
18 U camsʌwinicob Juan caj u yubob u jumintaꞌ u carem beyajob Jesús.
Caj binob arbir tiꞌ Juan.
19 A Juanoꞌ caj u pʌyaj caꞌtur u camsʌwinicob caꞌ u tuchiꞌtejob ich Jesús quir u cꞌataꞌr tiꞌ Jesús:
―Wa jach taj rajiꞌ Cristo a cu bin tar ich Cꞌuj?
Wa yʌn ic pajic u jer?
20 Caj cꞌuchob u camsʌwinicob Juan ich Jesús.
Caj yaꞌarob tiꞌ Jesús:
―Tu tuchiꞌtenob Juan raꞌ cu yacsic jaꞌ tu joꞌr mac quir in cꞌatob tech.
Wa jach Cristojech a cu tar ich Cꞌuj wa caꞌ in pajob u jer?
―baxuc caj yaꞌarob.
21 Caj cꞌuchob ich Jesús caj u jawsaj a mac yʌn u yajirir cax a bar yajir yʌnob tiꞌ.
A mac yʌn u cꞌacꞌas quisinin caj u jocꞌsaj.
A mac chꞌop u wich caj u jawsa caj sasichʌj u wich.
22 Jesús caj tsꞌoc yubic biquinin tarob u camsʌwinicob Juan,
caj u nuncaj tiꞌob:
―Xen arex tiꞌ Juan bic tabar ta wirex in jawsic a chꞌopoꞌ caj sasichʌj u wich,
a mech yoc caj jawij caj ximbajnʌj.
Bayiriꞌ caj jaw tiꞌ a iqꞌuir u caꞌoꞌ.
Bayiriꞌ a macar u xiquin caj jawi caj sasichʌj u xiquin.
Bayiriꞌ a mac quimen caj ricꞌ.
Bayiriꞌ caj a wuꞌyex in tsecꞌtic tiꞌ u tꞌʌn Cꞌuj a jach otsirob.
23 Caꞌ bin xiquechex ich Juan:
Arex tiꞌ jach quiꞌ yor a mac a yacsic tu yor wa tu tuchiꞌtajen Cꞌuj ―quij Jesús.
24 Caj binob u camsʌwinic Juan.
Caj wʌcꞌʌs bin Jesús quir u tsicbar tiꞌ a pimoꞌ.
Caj u tsicbʌtaj bic tabar Juan.
Caj u cꞌataj tiꞌob a pimoꞌ Jesús:
―Mac binechex a wirex ich tʌcay ruꞌum uch?
Mʌꞌ wa ta wirex Juan a seb cu quibic baꞌ?
Mʌꞌ binechex a wirex mac a seb cu quibic baꞌ.
25 Mʌꞌ binechex a wirex tuririꞌ xib a ju buquimʌn nocꞌ irej wa neyʌn u taqꞌuin a cu buquintic u nocꞌ.
Mʌꞌ ja wirej,
a mac cu nebuquintic u jach tsoyir u nocꞌ tiꞌ cʌjaꞌanob ich u palacio rey.
Robob cu quiꞌ janʌnob xan.
Mʌꞌ a bin a wirex irej wa Juan ich tʌcay ruꞌum.
26 Binechex a wirex yʌjtseqꞌuir u tꞌʌn.
Rajen binechex soc a wirejex yʌjtseqꞌuir u tꞌʌn Cꞌuj.
Caj binechex a wirex Juan mʌꞌ chen yʌjtseqꞌuir u tꞌʌn Cꞌuj,
quireꞌ rajiꞌ caj u payaj in ber.
Rajiꞌ irej Elías.
27 Rajiꞌ Juan a tsecꞌtaꞌb ich u tꞌʌn Cꞌuj tu tsꞌibaꞌan tu cu yaꞌaric:
Yʌn in tuchiꞌtic,
quij Cꞌuj,
a mac cu yaꞌaric in tar,
rajiꞌ yʌjtseqꞌuir in tꞌʌn cu bin u pʌyic in ber tu cu tsecꞌtic u tꞌʌn Cꞌuj.
Baxuc Cꞌuj caj yaꞌaraj tiꞌ u yʌjtseqꞌuir u tꞌʌn Cꞌuj uch,
caj u tsꞌibtaj uch.
28 Tu cotor a mac tiꞌ yʌn ich yocꞌocab mʌnaꞌ mac jach carem chen jariꞌ Juan jach carem.
Rajiꞌ cu yacsic jaꞌ tu joꞌr mac.
Chen a mac a cu chaꞌic Cꞌuj u tsꞌurintic,
cax mʌꞌ noꞌj teraꞌ,
caꞌ bin u cꞌuchuc tu qꞌuinin jeꞌ u bin u quiꞌ najtej u tꞌʌn Cꞌuj.
Jach manan cu bin u najtej u tꞌʌn Cꞌuj.
A Juanoꞌ cꞌʌs tiꞌ tiꞌ cu najtic.
29 Chʌc yʌn yʌjcꞌamirob u taqꞌuin gobernador yejer u jerob u racꞌob,
a yacsaꞌb jaꞌ tu joꞌrob ten Juan,
caj u cꞌʌꞌotajob jach cꞌasob ʌcʌtan tu wich Cꞌuj.
Caj yubob u tꞌʌn Jesús caj u yaꞌaraj:
―Jach carem Cꞌuj.
Quireꞌ acsaꞌb jaꞌ tu joꞌrob ten Juan.
30 Chen u winiquirob judío a fariseojoꞌ yejer yʌjcamsʌyʌjirob u tꞌʌn Moisés,
rajiꞌob mʌꞌ acsaꞌb jaꞌ tu joꞌr ten Juan quireꞌ caj u pꞌastob Cꞌuj a baꞌ u cꞌat Cꞌuj tiꞌob.
31 A Jaj Tsꞌur caj u yaꞌaraj tiꞌob:
―Bic tabar quin quetquintic quir in camsic a mac cuxaꞌan bajeꞌrer?
Bic tabar quin waꞌaric tiꞌob quireꞌ chich u joꞌrob?
32 Jesús caj yaꞌaraj tiꞌob:
―Bin in quetquintic techex irex a chichan cu yacꞌticob cu jenjen tꞌʌnticob u yet chichinin cu tus aricob quireꞌ mʌnaꞌ baꞌ cu quiꞌquinticob yorob:
“Caꞌ ic tus aric ic chꞌic ic racꞌ.
Chen mʌꞌ a tus ʌrʌcꞌʌncʌr Cojen caꞌ ʌrʌcꞌnʌcoꞌon.
Caꞌ ic tus arej ic muc u baquer mac.
Chenoꞌ mʌꞌ a tus ʌrʌcꞌʌncʌr”,
baxuc cu yaꞌaricob a chicanoꞌ tu cu mʌnicob yoch u tet.
33 Mʌꞌ ja wirej,
caj tar Juan raꞌ cu yacsic jaꞌ tu joꞌr mac,
mʌꞌ nanij u nequiꞌ janʌn,
mʌꞌ ju yuqꞌuic u cꞌab uva.
Chen techex ca waꞌariquex tiꞌ Juan yʌn u cꞌacꞌas quisinin.
34 Caj taren a tenoꞌ ―quij Jesús―,
a baxuquenechexoꞌ.
Mʌꞌ wirej,
a tenoꞌ ca waꞌariquex rajraꞌ quin nejanʌn bayiriꞌ ca waꞌariquex quin ne ucꞌur.
Bayiriꞌ ca waquex jach coch in nʌcꞌ ca waquex quin jach carchʌjʌr.
Ca waquex in wet man yʌjcꞌʌminob u taqꞌuin gobernador.
Bayiriꞌ ca waquex in wet man a neyʌn u siꞌpirob.
35 A mac caj u yacsaj tu yor tiꞌ Cꞌuj.
Cu tsꞌabʌr u tꞌʌnin ten Cꞌuj soc u jach er u camsaꞌr.
Rajen ij quer taj yor Cꞌuj.
Jesús tiꞌ yʌn ich yatoch Simón, rajiꞌ turiꞌ u winiquir judío a fariseojoꞌ
36 Tuririꞌ u winiquir judío a fariseojoꞌ caj paꞌay Jesús quir u janʌn.
Jesús caj bin tu yatoch.
Caj curaj janʌn ich u pocheꞌir yoꞌoch.
37 Caj u yubaj xquic tiꞌ cu bin Jesús ich yatoch u winiquir judío a fariseojoꞌ quir u janʌn.
A xquicoꞌ rajiꞌ yʌn u siꞌpir.
Caj tar purbir u cuchir tiꞌ tꞌajaꞌan a quiꞌ u boqueꞌ.
U cꞌabaꞌ u cuchir alabastro.
Tunich u cuchir tu tꞌajaꞌan a quiꞌ u boqueꞌ.
38 Caj u jutsꞌa u bʌj a xquicoꞌ ich yoc Jesús.
Caj u yʌnxchun u yacꞌtic u bʌj a xquicoꞌ caj pꞌob yoc Jesús yejer u wʌcꞌʌs arir u wich tu cu yocꞌar.
Caj u tisa yoc Jesús yejer u wʌcꞌʌs tsotser u joꞌr xquic.
Tan u tsꞌuꞌtsꞌar yoc Jesús ten xquic.
Caj u jicꞌtaj ich yoc Jesús a quiꞌ u boqueꞌ.
39 A winiquir judío a fariseojoꞌ a mac caj u pʌyaj Jesús caj yiraj a baꞌ caj u betaj xquic.
Tu yor caj u tucraj a fariseojoꞌ:
“Wa Jesús u jach ʌjtseqꞌuir u tꞌʌn Cꞌuj yer Jesús yʌn u siꞌpir a xquicoꞌ.”
40 Jesús caj yaꞌaraj tiꞌ u winiquir judío a fariseojoꞌ,
u cꞌabaꞌ Simón:
―Yʌn baꞌ quin wac tech.
Caj u nunca Simón:
―Arej ten baꞌ ca bin a waꞌarej in wʌjcamsʌyʌjirech.
41 Jesús caj yaꞌaraj tiꞌ Simón:
―A caꞌtur xibeꞌ yʌn u boꞌor quireꞌ caj u mʌjʌntajob taqꞌuin tiꞌ a mac cu mʌjʌntic taqꞌuin.
Turiꞌ caj u pꞌaxaj cincuenta denarios,
raꞌ u cꞌabaꞌ u sʌc taqꞌuin.
U racꞌob caj u pꞌaxaj quinientos sʌc taqꞌuin.
42 A jeꞌ caꞌtur xibaꞌ mʌꞌ cꞌuchaꞌan yorob u boꞌoticob u boꞌorob.
A tu mʌjʌntajob uch caj u yaꞌaraj tiꞌob:
“Tsireꞌej,
cax mʌꞌ a boꞌotiquex.”
Caj yaꞌaraj Jesús:
―Arej ten mac jach manan cu bin yajquintej a raꞌ xiboꞌ.
A jach yaꞌab u boꞌor wa ja mʌꞌ neyaꞌab u boꞌor cu bin u jach yajquintej?
43 Caj u nuncaj Simón:
―Jaj ixtʌcoj,
a mac jach yaꞌab u boꞌor,
rajiꞌ cu jach bin yajquinbir.
Jesús caj yaꞌaraj:
―Taj a baꞌ caj a waꞌaraj.
44 Caj u sut u bʌj quir u pʌctic xquic Jesús.
Caj u yaꞌaraj tiꞌ Simón:
―Ca wiric,
a jeꞌ xquicaꞌ a baꞌ caj u betaj ten.
Tech,
caj a wacsajen ta watoch,
mʌꞌ ta tsꞌajten jaꞌ quir in pꞌoꞌic in woc.
Chen a jeꞌ xquicaꞌ caj u pꞌoj in woc yejer u yaꞌarir u wich.
Caj u tisaj yejer u tsotser u joꞌr.
45 A techoꞌ,
mʌꞌ ta wutsꞌbentenoꞌ,
cax raꞌ nanij u betic u winiquirob judío a cu yacsic tu yatoch.
Chen a jeꞌ xquicaꞌ rajraꞌ cu yutsꞌbentic in woc.
Mʌꞌ ja wirej,
cu quiꞌ sʌjtiquen.
46 A techoꞌ,
mʌꞌ ta jicꞌtaj tsats tin joꞌriꞌ an ten bic nanij u betic u winiquirob judío a cu yacsic tu yatoch.
Chen a jeꞌ xquicaꞌ caj u jicꞌtaj a quiꞌ u boqueꞌ ich in woc.
47 Rajen quin waꞌaric tech cax yaꞌab u siꞌpir caj in toc rʌc jawsaj rajen yaꞌab cu yajquintiquen.
A mac a mʌꞌ neyaꞌab u siꞌpir cax jawsaꞌb u siꞌpir,
mʌꞌ u quiꞌ yajquinten.
48 Caj yaꞌaraj tiꞌ xquic:
―A techoꞌ rʌc jawsaꞌb a siꞌpir.
49 Tiꞌ rʌc curaꞌanob janʌnob caj yʌnxchun yaꞌaricob ich u racꞌob:
―Baꞌ winquirir a jeꞌraꞌ cꞌuchaꞌan yor u jawsic u siꞌpir mac?
50 Caj yaꞌaraj tiꞌ xquic Jesús:
―Cꞌuj bin u tacajech quireꞌ caj a wacsaj ta wor.
Caꞌ xiquech ta watoch quiꞌquintej a wor ―baxuc caj yaꞌaraj Jesús tiꞌ.