Jesús cu jawsic iqꞌuer u caꞌ tiꞌ xib
8
Ucheꞌ tiꞌ yʌn Jesús ich u joꞌr pꞌuc wits.
Caj emij caj rʌc sayob tu pach mac.
Jach pim caj binob tu pach Jesús.
2 Caj u jutsꞌaj u bʌj tu yʌn Jesús raꞌ u cʌnmʌn iqꞌuer u caꞌ,
xib.
Caj xonraj ich tu yʌn Jesús.
Caj yaꞌaraj:
―In wer cꞌuchaꞌan a wor a jawsiquen Jaj Tsꞌurir wa ja cꞌat a jawsiquen ―quij a iqꞌuer u caꞌ.
3 Jesús caj u tʌraj a iqꞌuer u caꞌ.
Caj u tʌraj Jesús caj araꞌb ten Jesús:
―In cꞌat in wiric a jawʌr ―quij Jesús.
―Iric,
mʌꞌ a bin a waꞌaric tu ca man bic jawech.
Chen tar a bin ich sacerdote u winiquirob judío quir a sijic tiꞌ a baꞌ yaꞌaraꞌ Moisés uch.
Soc yer tu cotor mac jawsaꞌbech ―quij Jesús.
Jawsaꞌb ten Jesús u cꞌurew yʌjtꞌʌnin cien soldados u winiquir romano
5 Caj cꞌuchij ich u cajar Capernaum caj u nupꞌaj u winiquir romano.
Yʌjtꞌʌnin cien soldados caj cꞌuchij ich Jesús caj u chich cꞌataj caꞌ xic ich yatoch.
6 Caj yaꞌaraj tiꞌ:
―Jaj Tsꞌurir ―quij―.
Yaj in cꞌurew tiꞌ yʌn tin watoch.
Jach yaj mʌꞌ u pec.
7 Jesús araꞌb tiꞌeꞌ:
―Jeroj,
cux in jawsej.
8 Caj u nuncaj yʌjtꞌʌnin cien soldados:
―Jaj Tsꞌurir,
mʌꞌ tsoy in wacsiquech tin watoch,
quireꞌ yʌn in siꞌpir.
Caꞌ a jawsej in cꞌurew.
9 Mʌꞌ ja wirej,
cax yʌjtꞌʌninen cien soldados quin tsꞌurintic.
Raꞌ in tsꞌurir a mac a cu yaꞌaric in beyaj,
raꞌ in jach tsꞌurir.
Rajen wa quin tꞌʌnic tuririꞌ in soldado caꞌ xic,
cu bin.
Wa quin tꞌʌnic u jer caꞌ tac,
cu tar.
Wa quin tꞌʌnic in cꞌurew caꞌ xic tu beyaj,
cu bin.
Baxuc a techoꞌ,
in wer wa ca waꞌaric caꞌ jawʌc,
jeꞌ u jawʌreꞌ.
10 Caj tsꞌoc yubic Jesús a baꞌ araꞌb tiꞌ ten yʌjtꞌʌnin cien soldados caj jaqꞌuij yor Jesús.
Caj u tꞌʌnaj a mac a cu tar u cʌnicob u tꞌʌn.
Caj yaꞌaraj Jesús:
―Mʌꞌ in wiramʌn mac tu cotor ich u winiquirob judío,
wa caj u quiꞌ acsaj tu yor an bic yʌjtꞌʌnin cien soldados.
Raꞌ caj u quiꞌ acsaj tu yor tiꞌ Cꞌuj.
11 Caj yaꞌaraj Jesús tiꞌ:
―Uꞌyex baꞌ quin wac.
Tar u tar jach pim ich yocꞌocab,
quireꞌ u yet binacob Abraham yejer Isaac yejer Jacob,
soc pꞌeriꞌob u cʌjtarob ich caꞌanan tu cu bin u reyinticob Cꞌuj.
12 Barej a techexoꞌ,
a cu tus yaꞌaricob:
“A tenob,
in nunquirob Abraham,
rajen cu bin u yacsiquenob Cꞌuj.”
Chen a tenoꞌ,
quin waꞌaric techex,
cu bin jocꞌsaꞌbirechex ten Cꞌuj ich cꞌacꞌ.
Tiꞌ ca bin a jʌchꞌiquex a cojex ich cꞌacꞌ,
quireꞌ jach yaj ca bin a mucꞌyajex.
Ta ca bin a wacꞌtiquex a bʌjex ich cꞌacꞌ.
13 Caj yaꞌaraj Jesús.
Yaꞌaraj tiꞌ yʌjtꞌʌnin cien soldados:
―Xen ta watoch.
A ta wuꞌyajeꞌ,
toc jaw,
quireꞌ caj a wacsaj ta wor.
Raꞌ u qꞌuinin caj jaw u yajir u cꞌurew yʌjtꞌʌnin cien soldados.
Jesús caj u jawsaj yixquit Pedro
14 Jesús caj bin tu yatoch Pedro.
Caj yiraj yixquit Pedro.
Caj yiraj characbar tu chꞌac,
yaj u joꞌr.
15 Caj tar u cꞌʌb yixquit ten Jesús.
Caj jaw u yajir u joꞌr.
Caj riqꞌuij,
caj yʌnx chun u jansic tiꞌob.
Jesús caj u jawsaj mac; yaꞌab mac caj u jawsaj u yajirir
16 Caj acꞌbirchʌjij,
caj tar u muchꞌquinticob u bʌjob ich Jesús.
Jach pim caj rʌc tar ich Jesús.
Caj tarob purbir tiꞌ,
a acaꞌan tiꞌob quisin.
Caj rʌc jocꞌsaꞌb u quisinin ten Jesús.
Caj u tꞌʌnaj quisin caꞌ jocac.
Rʌc jaw u yajirir a mac a jach tar purbir tiꞌ.
17 Jawsaꞌb ten Jesús tu cotor mac quir u nupꞌur u tꞌʌn a tsꞌibtaꞌb ten yʌjtseqꞌuir u tꞌʌn Cꞌuj,
Isaías uch.
Caj yaꞌaraj Isaías uch:
“U bʌjiriꞌ Cristo cu bin u jawsic u yajir a mac yʌn tiꞌ”,
baxuc caj yaꞌaraj Isaías uch.
A mac a ju cꞌat u sayʌr tu pach Jesús
18 Caj yiraj jach pim mac Jesús.
Mʌꞌ tu cu man,
quireꞌ jach pim.
Caj yaꞌaraj:
―Caꞌ xicoꞌonex pʌchir cꞌacꞌnab.
19 A raꞌ u qꞌuininoꞌ,
caj cꞌuchij yʌjcamsʌyʌjir u tꞌʌn Moisés ich Jesús.
Caj araꞌb tiꞌ ten yʌjcamsʌyʌjir u tꞌʌn Moisés:
―In wʌjcamsʌyʌjirech,
arej in tar ta pach quir in cʌnic a tꞌʌn cax tu ca bin.
20 Jesús caj u nuncaj tiꞌ:
―A bʌcꞌoꞌ yʌn u way tu cu wenʌn.
A chꞌichꞌoꞌ yʌn u cꞌʌꞌcheꞌ tu cu wenʌn.
Barej a tenoꞌ,
a baxuquenechexoꞌ,
mʌnaꞌ in watoch tu quin wenʌn.
21 U jer u camsʌwinicob caj yaꞌaraj tiꞌ Jesús:
―Arej in yʌn pꞌatʌr ich yicnʌn in tet hasta cu quimin.
Caꞌ bin tsꞌocac u quimin,
caj in mucaj u baquer in tet.
Quin tar ta pach quir in cʌnic a tꞌʌn.
22 Jesús caj u nuncaj tiꞌ:
―Cojen tin pach.
Tsireꞌej a tet.
Arej a mac a toc quimen ʌcʌtan tu wich Cꞌuj,
quireꞌ mʌꞌ ju yacsob tu yorob,
caꞌ u muquejob u baquer u quimirirob.
Jesús caj u tꞌʌnaj yicꞌar caꞌ chꞌenac caꞌ chꞌenac u yaꞌamin xan
23 Caj tsꞌoc aroꞌ.
Jesús caj oquij ich chem quir u chꞌʌctic cꞌacꞌnab.
Yet binac u camsʌwinicob.
24 Caj tar yicꞌar tu yʌnob ich cꞌacꞌnab.
Cꞌam yicꞌar caj tarij.
Caj burij u chem quireꞌ u yaminin.
Wenʌn u caꞌ Jesús caj burij chem.
25 U camsʌwinicob caj as Jesús caj yaꞌarob:
―Tabar in jururob,
Jaj Tsꞌurir.
Cʌnante tenob soc mʌꞌ in jururob.
26 Jesús caj u nuncaj tiꞌ u camsʌwinicob:
―Biquinin sajaquechex?
Chichin a wacsmʌnex ta worex.
Caj riqꞌuij Jesús u tꞌʌnej yicꞌar.
Quet caj chꞌen yicꞌar yejer u yaminin.
Quiꞌ chꞌen u yaminin.
Quiꞌ chꞌen yicꞌar xan.
27 Caj yirob u camsʌwinicob caj jaqꞌuij yorob.
Caj yaꞌarajob:
―Baꞌ xibiriꞌ a jeraꞌ,
cax cu jawsic u tar yicꞌar?
Cax u yaminin cꞌacꞌnab cu jawsic.
Jocꞌsaꞌb cꞌacꞌas quisin ten Jesús. Caꞌ tur xib jocꞌsaꞌb cꞌacꞌas quisin tiꞌob
28 Caj cꞌuchij Jesús pʌchij cꞌacꞌnab tu ruꞌumin Gadara.
Caꞌtur xib caj cꞌuchob ich Jesús tu cu butꞌur u baquer macob.
Tiꞌ cʌjaꞌanob tu cu butꞌur u baquer macob.
Caj jocꞌob tu japnin tunich tu cu butꞌur u baquer macob.
A caꞌtur xiboꞌ yʌn u quisinin.
Jach tsꞌicob,
rajen mʌꞌ u chaꞌbʌrob u manob u racꞌob.
29 A mac acaꞌanob tiꞌ quisineꞌ,
raꞌ caj u purob u tꞌʌn tiꞌ Jesús.
Caj yaꞌarob:
―Baꞌ a cꞌat tenob Jesús?
A techoꞌ,
u pararech Cꞌuj.
Tarech a puriquenob ich cꞌacꞌ cax mʌꞌ cꞌuchuc tu qꞌuinin?
30 Mʌꞌ nenach yʌn tu yʌn Jesús yejer u camsʌwinicob.
Tiꞌ yʌn acaꞌanob cꞌacꞌas quisiniꞌ.
Tiꞌ yʌn yʌrʌcꞌ cajij qꞌuecꞌʌn,
jach pim.
Cu manob u janʌnob xiw.
31 A quisinoꞌ,
acaꞌanob ich a caꞌtur xib,
caj u chich cꞌatajob tiꞌ Jesús:
―Ar in binob ich cajij qꞌuecꞌʌn wa ca jocꞌsiquenob.
32 Caj u nuncaj Jesús caj u yaꞌaraj tiꞌob:
―Xenex ―quij.
Caj jocꞌ u quisinin ich xibob,
caj bin ich u cajij qꞌuecꞌʌn.
Caj yubob u quisinin u cajij qꞌuecꞌʌn caj rucꞌ yacꞌab.
Caj rucꞌ yacꞌab ich chꞌicaꞌanin wits.
Caj u purob u bʌjob ich cꞌacꞌnab.
Caj rʌc bint jaꞌ,
caj rʌc quimin.
33 A cu cʌnanticob u yʌrʌcꞌ cajij qꞌuecꞌʌn,
caj yirob u rʌc bin cajij qꞌuecꞌʌn,
caj jaqꞌuij yorob.
Caj u cꞌʌnajob yacꞌab,
caj u bin yaꞌarajob tu cajar a baꞌ u ber tiꞌ u yʌrʌcꞌ cajij qꞌuecꞌʌn.
Caj binob yaꞌarej tu cajar baꞌ u ber tiꞌ u racꞌob,
a mac acaꞌanob quisin tiꞌ u racꞌob xan.
34 Caj rʌc jocꞌob tu cajar tu cotor mac.
Caj binob ich Jesús.
Caj yirob Jesús caj chich araꞌb tiꞌ Jesús:
―Xen tech ich u jer ruꞌum.