Mʌꞌ a taꞌquiquex u joꞌr a racꞌob
(Lc. 6.37-38, 41-42)
7
Jesús caj u yaꞌaraj tiꞌ u camsʌwinicob ich u joꞌr pꞌuc wits:
―Mʌꞌ a yʌn tucriquechex,
wa tsoyechex quir a wocar juezirechex tiꞌ a racꞌob,
soc a taꞌquiquex u joꞌr.
2 Wa ca wocarex juezirechex quir a taꞌquiquex u joꞌr a racꞌob.
An ten bic techex caj a taꞌquex u joꞌr a racꞌob,
baxuc Cꞌuj cu bin u taꞌquic a joꞌr techex.
Toc jawsex a baꞌ cꞌasir caj u betaj techex a racꞌob,
soc Cꞌuj cu jawsic baꞌ cꞌasir caj a betajex xan.
3 Caj yaꞌaraj tiꞌ u camsʌwinicob,
Jesús:
―Biquinin ca pʌqꞌuiquex u pach a racꞌob,
cax chichin baꞌ yʌn tiꞌ?
Mʌꞌ ja wirej,
a baꞌ yʌn techex,
a cu pʌqꞌuicob u pach u racꞌob,
jach manan cꞌas.
Aroꞌ irej a cu yiric u pꞌupꞌir a chichinoꞌ tu wich u racꞌob.
Chen u bʌjiriꞌ,
mʌꞌ ju cꞌʌꞌotic yʌn u pꞌupꞌir jach carem tu wich.
4 Caj yaꞌaraj Jesús:
―Mʌꞌ ja wirej,
wa ca tsicbarex tiꞌ a racꞌob a baꞌ caj u yʌn betaj uch.
Chen a techexoꞌ,
a baꞌ yʌn techex jach cꞌas,
aroꞌ irej wa ca waꞌariquex tiꞌ a racꞌob:
“Arej in rucꞌsej u pꞌupꞌir a wich a chichinoꞌ.”
Chen a techexoꞌ,
u pꞌupꞌir ta wichex jach carem.
5 A techexoꞌ,
caꞌtur a tucurex.
Mʌꞌ ja wirej,
caꞌ a pꞌʌtex a jach cꞌasoꞌ techex soc cꞌuchaꞌan a worex a yamtiquex a bʌjoꞌ caꞌ u pꞌʌtej u cꞌasir a cu betic chichin.
6 Caj yaꞌaraj Jesús tiꞌ u camsʌwinicob:
―Jaj ix tʌcoj,
mʌꞌ tsoy ca wesiquex Cꞌuj tiꞌ mac a jach tam u pixam.
Jaj ix tʌcoj,
cu tsꞌictar wa ca tsicbar tiꞌ u tꞌʌn Cꞌuj,
irej pecꞌ wa ca tsꞌiquex tiꞌ yoꞌoch.
Cu chen tar u chiꞌechex.
Irej qꞌuecꞌʌn cu tar u yaꞌchꞌʌctic uj wa ca puriquex tiꞌ a wujex a jach coꞌoj.
Jesús cu camsic quiꞌ cꞌatej tiꞌ Cꞌuj a baꞌ a cꞌat
(Lc. 11.9-13; 6.31)
7 Jesús caj u camsaj tiꞌ u camsʌwinicob ich u joꞌr pꞌuc wits:
―Cꞌatex tiꞌ Cꞌuj a baꞌ a cꞌatex.
Jeꞌ u tsꞌic techex Cꞌuj.
Mʌꞌ ja wirej,
aroꞌ irechex ca cꞌatiquex baꞌ tiꞌ a racꞌob,
jeroj cu tsꞌic techex.
Wa ca tꞌʌniquex mac tu yatoch.
Jeroj cu yacsiquechex.
8 Wa ca cʌxtiquex a baꞌ a cꞌatex.
Jeroj jeꞌ a wiriquexeꞌ.
9 Caj yaꞌaraj Jesús tiꞌ u camsʌwinicob:
―Jeꞌ wa ja tsꞌiquex u jantej a pararex tunich,
wa cu tar u cꞌatic techex yoꞌoch waj?
A techexoꞌ,
ca tsꞌiquex tiꞌ yoꞌoch waj quireꞌ a parar.
10 Jeꞌ wa ca tsꞌiquex quir u chiꞌic can,
wa cu cꞌatic techex cʌy quir u chiꞌic?
Jeꞌ a tsꞌiquex tiꞌ yoꞌoch cʌy.
11 Caj yaꞌaraj Jesús tiꞌ u camsʌwinicob:
―Cax cꞌasechex,
ca tsꞌiquex tiꞌ a pararex a baꞌ jach tsoy.
Mʌꞌ ja tsꞌiquex tiꞌ a pararex a baꞌ cꞌasiꞌ.
Baxuc a Cꞌujoꞌ.
Jach manan tsoyir cu tsꞌic tiꞌ a mac cu cꞌatic tiꞌeꞌ.
A mac cu cꞌatic tiꞌ ic Tet Cꞌuj caꞌanan.
Tsꞌajaꞌan yor cu tsꞌic tiꞌ.
12 Caj yaꞌaraj tiꞌ u camsʌwinicob,
Jesús:
―Rajraꞌ caꞌ a yamtex a racꞌob an ten bic a cꞌatex u yamtiquechex xan.
Wa baxuc ca betiquex caj a toc quibex a baꞌ tsꞌibtaꞌb ten Moisés yejer yʌjtseqꞌuirob u tꞌʌn Cꞌuj uch.
Jach chichin u jor quir yocar ich u berir caꞌanan
13 Caj yaꞌaraj Jesús tiꞌ u camsʌwinicob:
―Cax jach yaj a wuꞌyiquex a pꞌʌtiquex a baꞌ ca pachtiquex ta worex.
Chen pꞌixex a bʌjex soc a pꞌʌtiquex aroꞌ quir a quibex u tꞌʌn Cꞌuj,
soc a binex caꞌanan.
A tenoꞌ ―quij Jesús―,
quin waꞌaric techex.
Mʌꞌ yaꞌab cu bin cꞌuchur ich caꞌanan.
14 Mʌꞌ ja wirej,
aroꞌ an ten bic chichin u jor tu cu yocar,
baxuc u bej,
jach cꞌax tu cu manob.
Chen a mac a cu manob tu cu pachticob tu yorob tiꞌ yʌnob ich coꞌcoch u jor quir u yocarob.
Baxuc tiꞌ yʌnob ich coꞌcoch u bej tu cu manob.
Chen caꞌ bin xicob ʌcʌtan Cꞌuj tiꞌ cu bin jocꞌsaꞌ ten Cꞌuj caꞌ xicob ich cꞌacꞌ.
Jesús cu camsic biquiraꞌ a cu tus camsicob u tꞌʌn Cꞌuj
15 Caj yaꞌaraj tiꞌ u camsʌwinicob,
Jesús:
―Quiꞌ cʌnantex a bʌjex soc mʌꞌ u tusiquechex u tus ʌjcamsʌyʌjirob u tꞌʌn Cꞌuj.
Rajiꞌob cu yaꞌaricob:
“Mʌꞌ jach caremenobiꞌ”,
chen jach cꞌasob.
16 Jeꞌ a cꞌʌꞌotiquex a tus ʌjcamsʌyʌjirob u tꞌʌn Cꞌuj,
quireꞌ jeꞌ a wiriquex u manob ich u cꞌasir.
Mʌꞌ ja wirej,
jeꞌ wa ja bin a wirex u wich uva ich u cheꞌer a yʌn u qꞌuiꞌixereꞌ.
Mʌꞌ raꞌ u yaqꞌuir u wich uva.
Mʌꞌ ja bin a wirex u wich higo ich u cheꞌer a yʌn u qꞌuiꞌixereꞌ.
Mʌꞌ raꞌ u cheꞌer u wich higo.
17 Cʌnex a jeraꞌ ―quij Jesús―.
Wa tsoy u cheꞌer tsoy u wich xan.
Wa mʌꞌ tsoy u cheꞌer,
cꞌas u wich xan.
18 A tsoy u cheꞌer,
mʌꞌ u cꞌastar u wichiꞌ,
tsoy u wich.
A cꞌas u cheꞌer cu cꞌastar u wich.
Mʌꞌ cꞌuchaꞌan yor u tsoyquintej u wichob,
quireꞌ cꞌas u cheꞌer.
19 Baxuc rajiꞌob a tus yʌjcamsʌyʌjirob u tꞌʌn Cꞌuj.
A tu cu beyajob ca bin a wirex wa cu manob tu tsoyir wa cu chen tusaricob.
Cꞌʌꞌotex a cꞌas u cheꞌer,
cu jocꞌsic mac quir u toquej.
20 Baxuc a tus ʌjcamsʌyʌjirob cu bin yubicob u tsꞌiquir Cꞌuj.
Tar cu binob ich cꞌacꞌ.
Mʌꞌ ju bin ocar tu cotor tu cu bin u reyinticob Cꞌuj
21 Jesús caj yaꞌaraj tiꞌ u camsʌwinicob:
―Tu cotor mac a cu tꞌʌnic ten:
“Jaj Tsꞌur” ―quij―,
irej wa caj u cꞌʌmaj in tꞌʌn.
Mʌꞌ jin bin in wacsic tu cu reyintic Cꞌuj.
Jariꞌ a mac a cu quibic u tꞌʌn in Tet caꞌanan.
Raꞌ quin bin in wacsej.
22 U qꞌuinin caꞌ bin cꞌuchuc,
tu qꞌuinin u xur tꞌʌn,
yaꞌab mac cu bin mamax aꞌaric ten:
“Jaj Tsꞌur,
caj in tsecꞌtaj a tꞌʌn.
Caj in jocꞌsob cꞌacꞌas quisin xan.
Caj in waꞌarob:
Joqꞌuen cꞌacꞌas quisin ich u cꞌabaꞌ Jesús.
Baxuc caj in betob carem tech.”
Baxuc cu bin yaꞌaric tiꞌ ten caꞌ bin xuruc tꞌʌn.
23 Raꞌ u qꞌuinin caꞌ bin in cꞌasej tiꞌob.
Jeꞌ in wac tiꞌob:
“Mʌꞌ jin wer maquechex.
Mʌꞌ jin wirmʌnechex.”
Quin bin in waꞌaric tiꞌob:
“Xenex quireꞌ caj manex ta cꞌasir.”
A mac jach tꞌaj
24 Jesús caj yaꞌaraj tiꞌ u camsʌwinicob:
―A mac jach tꞌaj cu yubic in tꞌʌn,
cu quibic a baꞌ quin chich aric tiꞌ.
Aroꞌ irej a cu cʌxtic u panic yoc naj tu yʌn tunich soc mʌꞌ u riquir.
25 Pachir caj tarij jaꞌ,
caj burij,
caj tarij icꞌ yejer jaꞌ.
Caj u pecsaj naj icꞌ yejer jaꞌ.
Chen mʌꞌ riquiꞌ naj quireꞌ chich yoc u najir.
Rajen mʌꞌ ju riquir.
26 Caj yaꞌaraj Jesús:
―A mac cu yubic in tꞌʌn chen mʌꞌ ju quibej irej a mac jach chich u joꞌr.
Mʌꞌ ja wirej,
aroꞌ caj u cꞌʌxaj naj tu jupꞌ.
27 Caj tarij jaꞌ,
caj burij.
Caj tarij jaꞌ yejer yicꞌar.
Caj u pecsaj naj.
Caj riquij yoc.
U najir caj rupꞌ ich ruꞌum.
Cꞌam caj rupꞌ u najir.
Caj u jacꞌsaj yor mac.