Jesús caj u tꞌʌnaj caꞌ u cꞌaxej yor a pimoꞌ
13
Raꞌiriꞌ u qꞌuinin tiꞌ yʌn mac ich Jesús.
Mʌꞌ ja wirej,
tarob u toc arob tiꞌ Jesús a baꞌ u ber tiꞌ u winiquirob judío a cu tarob ich u ruꞌumin Galilea.
Quireꞌ quinsaꞌb ten u soldado,
Pilato,
tu cu quinsicob wacʌx quir u tsꞌic tiꞌ Cꞌuj.
Quireꞌ araꞌb ten Pilato.
Lucas 13.1-35
―Ca tucriquex wa jach cꞌasob a cu tarob ich u ruꞌumin Galilea?
Rajen quinsaꞌb tu cu naj cꞌujinticob Cꞌuj.
Barej u racꞌob a cu tarob ich u ruꞌumin Galilea mʌꞌ necꞌasiꞌ.
3 Rajen quin wac techex ―quij Jesús―,
mʌꞌ taj a baꞌ ca waquex.
Baxuc techex wa mʌꞌ tan a cꞌaxiquex a worex caj a pꞌʌtex a cꞌasoꞌ jeꞌ a rʌc quiminex xan,
irej tiꞌob caꞌ quinsaꞌb.
4 Cꞌaj wa techex a mac petsꞌtaꞌb ten u tunichir tu tsꞌʌpaꞌan?
Bʌytʌc tu yʌn u tsꞌʌpaꞌan tunich caꞌanan u cꞌabaꞌ Siloé soc nach cu yiric.
Caj petsꞌtaꞌbob dieciocho.
Arex ten wa jach cꞌasob rajen petsꞌtaꞌb chen a mac ich u cajar Jerusalén mʌꞌ necꞌasobiꞌ?
5 Rajen quin wac techex ―quij Jesús―,
mʌꞌ taj a baꞌ ca waquex.
Baxuc techex wa mʌꞌ tan a cꞌaxiquex a worex caꞌ a pꞌʌtex a cꞌasoꞌ.
Jeꞌ a rʌc quiminex xan,
irej caj petsꞌabob.
Quir u camsic tiꞌ u pʌcꞌar higuera a mʌꞌ ju wichʌncʌr
6 Jesús caj u camsaj baxuc a jeꞌ tꞌʌnaꞌ soc tabar u cꞌaxicob u yorob.
Rajen caj yaꞌaraj:
―Tiꞌ yʌn u pʌcꞌar higuera ich corir u yaqꞌuir uva mac.
Caj bin yiric wa yʌn u wich.
Mʌꞌ tu yira u wich.
7 Rajen ―quij Jesús―,
caj araꞌb ten a mac yʌnin u cor tiꞌ a mac a cu cʌnantic u cor:
“Yʌn tres yaxqꞌuin,
rajraꞌ quin tar in wiric wa yʌn u wich higuera.
Chen mʌꞌ in wiric u wich.
Toc chꞌʌquej u cheꞌer,
baꞌwir cu cꞌʌnic u ruꞌumin?”
8 Caj araꞌb ten a mac a cu cʌnantic u cor:
“Tsireꞌej,
Jach Tsꞌurir ―quij―,
soc in juptic u ruꞌumin chen a jeꞌ yaxqꞌuinaꞌ quin bin in purej u taꞌ tsimin soc u neꞌichancʌr.
9 Jaj ixtʌcoj,
jeꞌ u wichancʌr caꞌ bin tac tu qꞌuinin u wichʌncʌr.
Jach Tsꞌurir,
wa mʌꞌ u wichancʌr,
arej in chꞌʌquej.”
Jesús cu jawsic a pꞌux u bin xquic u qꞌuinin u jesicob u bʌj u winiquirob judío
10 U qꞌuinin u jesicob u bʌj u winiquirob judío,
Jesús caj u camsaj u winiquirob judío tu cu naj cꞌujinticob Cꞌuj.
11 Tiꞌ yʌn tu cu naj cꞌujinticob Cꞌuj uch xquic,
a pꞌux u bin,
yʌn dieciocho yaxqꞌuin caj u cʌnaj u yajir.
Quireꞌ acaꞌan cꞌacꞌas quisin tiꞌ,
rajen mʌꞌ u tajtar u pach.
12 Rajen Jesús caj yiraj caj u tꞌʌna caj yaꞌaraj tiꞌ:
―Xquic ―quen―,
toc jaw a yajir.
13 Caj u tsꞌancꞌʌbtaj seb caj tajij xquic a pꞌux u bin cuch.
Caj u yʌnxchun yaꞌaric tiꞌ Cꞌuj:
―Bayoꞌ Cꞌuj ―quij―,
caj a jawsajen.
14 Chen u jach tsꞌurir tu cu naj cꞌujinticob Cꞌuj u winiquirob judío caj tsꞌiquij quireꞌ yiraj u jawsic Jesús xquic u qꞌuinin cu jesicob u bʌj u winiquirob judío.
Rajen caj yaꞌaraj tiꞌ a mac tiꞌ yʌnob.
Yʌn seis u qꞌuinin quir a beyajex techex.
A seis u qꞌuininoꞌ tsoy a tarex quir a jawsic a yajirex,
chen mʌꞌ raꞌ u qꞌuinin bajeꞌraꞌ.
15 Caj u nuncaj Jesús caj yaꞌaraj tiꞌ:
―Caꞌ yarir a wacꞌ a techexoꞌ ca tus etsꞌiquex a cꞌujintiquex Cꞌuj.
Mʌꞌ wa tiꞌ yʌn mac a teraꞌ a mʌꞌ ju siptic yʌrʌcꞌ wacʌx yejer yʌrʌcꞌ tsimin tu cu jansic quir u tsꞌic u yucꞌur cax raꞌ u qꞌuinin caj u jesob u bʌj u winiquirob judío?
Jach taj ca siptiquex tiꞌ quir a tsꞌic yoꞌoch jaꞌ.
16 Irex a jeꞌ xquicaꞌ,
u parar u caꞌ parar Abraham uch.
Yʌn dieciocho yaxqꞌuin caj yajij quireꞌ quisin.
Jach jaj yʌn u bin siptaꞌbir u yajirir cax tu qꞌuinin caj u jesob u bʌj u winiquirob judío.
17 Mʌꞌ toy tsꞌocac Jesús u tsicbar tiꞌob tu cu naj cꞌujinticob Cꞌuj a mac tu pʌcꞌob u pach Jesús caj u chꞌajob suraquir.
Chen u jerob u racꞌob caj quiꞌjij yorob quireꞌ yirob carem u beyajob Jesús a caj u betaj tiꞌ a xquicoꞌ.
Quir u camsic tiꞌ u yijir mostaza
18 Jesús caj yaꞌaraj:
―Bin in caꞌ in camsic techex soc a werex cu bin u reyintic Cꞌuj soc a pꞌerquintiquex.
19 Aroꞌ irej u yijir mostaza jach mijin.
Barej cu chꞌic u pʌqꞌuic ich u chan cor.
Cu chꞌijireꞌ cu majan xitꞌir u cꞌʌbir.
A chꞌichꞌoꞌ cu tar u cꞌʌxic u cꞌuꞌ ich u cꞌʌbir.
Quir u camsic tsꞌac a cu sipꞌoꞌ
20 Tiꞌ toy cu tsicbar Jesús caj u caꞌ aꞌaraj:
―Bin in caꞌ in pꞌeriꞌquintic u ruꞌumin tu cu bin u reyintej Cꞌuj.
21 An bic ten cu sipꞌ yoch pan wa cu puric tsꞌac.
Mʌnaꞌ u nup u puric u tenin u tsꞌac ich harina cu tsꞌocar u puric u tsꞌac cu rʌc sipꞌ tu cotor.
Jesús cu camsic a pimoꞌ: Pꞌis a bʌj soc a wocarex tu cu bin u reyinticob Cꞌuj cax cꞌax u jor tu cu yocar
(Mt. 7.13-14, 21-23)
22 Tiꞌ toy cu bin Jesús ich u berir Jerusalén.
Tiꞌ cu man ich u chan cajar baxuc ich u yajaw cajar a tiꞌ yʌn ich bej.
Tiꞌ cu camsic mac ti taroꞌ.
23 Yʌn mac tu cꞌataj tiꞌ:
―Jaj Tsꞌurir ―quij―,
arej ten wa yaꞌab cu bin tacbir ten Cꞌuj wa mʌꞌ yaꞌab cu bin tacbir?
Jesús caj yaꞌaraj tiꞌ a pimoꞌ:
―Mun cu bin tacbir?
24 Jach pꞌisex a bʌjex quir a wocarex tu cu bin u reyinticob Cꞌuj cax yaj tu ca wocarex.
Quiꞌ tucriquex quireꞌ mʌꞌ yaꞌab cu bin yocar tiꞌ.
25 Mʌꞌ ja wirej ―quij Jesús―,
jeꞌ u cꞌuchur tu qꞌuinin a mac yʌnin yatoch cu bin u cꞌʌric u jor.
Caꞌ bin taquechex ich tancab caꞌ bin a yʌn tꞌʌniquex:
“Qꞌueyej in joꞌrob,
Jaj Tsꞌurir,
quir in wocarob.”
Chen a tiꞌoꞌ cu bin u nunquic:
“Mʌꞌ in wer maquechex,
mʌꞌ in wer tub a tarex.”
26 Raꞌiriꞌ u qꞌuinin ca bin a yʌnxchun a waꞌariquex:
“Pꞌeriꞌ ic janʌn uch,
pꞌeriꞌ ij cucꞌur xan uch.
Baxuc caj a camsajenob tu berir uch tu cʌjaꞌanenob.”
27 A Jaj Tsꞌuroꞌ caꞌ bin u nunquej:
“Caj in waꞌaraj caꞌch mʌꞌ in wer tub a tarex.
Caꞌ xiquechex tu cotorex quireꞌ nanex a manex ta cꞌasirex.”
28 Caꞌ bin a wacꞌtiquex a bʌj caꞌ bin a jʌchꞌiquex a coj quireꞌ tsꞌiquechex quireꞌ caj a wiraj mʌꞌ u yacsiquechex.
Quireꞌ caj a wiraj u yacsaꞌrob Abraham yejer Isaac yejer Jacob yejer tu cotor yʌjtseqꞌuirob u tꞌʌn Cꞌuj.
Chen tancab pꞌatechex tu cu yocarob u reyinticob Cꞌuj.
29 A winicoꞌ tar cu bin tarob tu cu tar qꞌuin.
Baxuc cu bin tarob tu cu bin ic yum.
Baxuc cu bin tarob xʌman caꞌanan.
Baxuc cu bin tarob ich nojar.
Tiꞌ cu rʌc binob ich caꞌanan tu cu bin u reyinticob Cꞌuj.
Tiꞌ cu bin cutarob u janʌnob.
30 Uꞌyex baꞌ quin wac,
yʌn mac a teraꞌ mʌꞌ noꞌjiꞌ chen caꞌ bin cꞌuchuc tu qꞌuinin tu cu bin u reyinticob Cꞌuj jach noꞌj.
Yʌn mac a teraꞌ jach noꞌj bajeꞌraꞌ caꞌ bin cꞌuchuc tu qꞌuinin tu cu reyintic Cꞌuj.
Mʌꞌ noꞌjiꞌ.
Jesús cu toc aric: Tabar in quinsaꞌ ich u cajar Jerusalén
31 Jesús caj tsꞌoc u camsicob a baꞌ caj u yaꞌaraj sam.
Caj cꞌuchij mʌꞌ yaꞌab u winiquirob judío a fariseojoꞌ.
Caj yaꞌarob tiꞌ:
―Caꞌ xiquech quireꞌ Herodes u cꞌat u quinsiquech.
32 Jesús caj yaꞌaraj tiꞌob:
―A Herodesoꞌ,
rajiꞌ cu tusaric mac.
Joqꞌuenex a waꞌariquex tiꞌ:
“Chen teꞌ yʌnenaꞌ,
mʌꞌ yaꞌab u qꞌuinin soc in yʌn jocꞌsic a mac acaꞌan cꞌacꞌas quisin tiꞌ.
Soc in yʌn jawsic u yajir mac xan.
Tabar in tsꞌocsic in beyaj a teraꞌ.”
33 Arex ―quij Jesús―,
tiꞌ Herodes a baꞌ quin betic bajeꞌraꞌ.
Baxuc xan in betic saman.
Baxuc yʌn in betic caꞌbej xan hasta quin cꞌuchur ich u cajar Jerusalén.
Quireꞌ ich u cajar Jerusalén tiriꞌ cu quinsicob yʌjtseqꞌuirob u tꞌʌn Cꞌuj,
mʌꞌ a teraꞌ ―quij Jesús.
34 Caj yaꞌaraj Jesús:
―A techexoꞌ tiꞌ cʌjaꞌanechex ich u cajar Jerusalén.
Ca quinsiquex yʌjtseqꞌuirob u tꞌʌn Cꞌuj uch.
Ca rʌc chꞌiniquex u joꞌrob a mac tuchiꞌtaꞌb ten Cꞌuj tiꞌ techex.
Yaꞌab u tenin in cꞌat in muchꞌquintic techex an ten bic cax cu juquintic yar soc u cʌnantic.
Chen techex mʌꞌ ja cꞌatex in muchꞌquintiquechex baxuc aroꞌ.
35 Uꞌyex baꞌ quin wac techex.
Caj in toc pꞌʌtechex ta junanex.
Quin wac techex mʌꞌ a bin a wiriquenex hasta cu cꞌuchur tu qꞌuinin a ray u qꞌuininoꞌ ca waquex:
“Caꞌ ij cꞌujintej a jeꞌ xibaꞌ a cu tar quireꞌ tuchiꞌtaꞌb ten Cꞌuj.”