Jesús cu jawsic a chup u bʌqꞌueroꞌ
14
Caj cꞌuchij tu qꞌuinin caj bin tu janʌn Jesús ich yatoch u tsꞌurir u winiquirob judío a fariseojoꞌ quireꞌ pʌybir.
Ray u qꞌuinin u jesicob u bʌj u winiquirob judío.
A ju yet janʌnob tan u chꞌucticob a baꞌ cu bin u betej Jesús.
Lucas 14.1-35
2 Tiꞌ yʌn xib xan tu yʌn Jesús.
A yʌn u yajir chup u bʌqꞌuer.
3 Jesús caj yaꞌaraj tiꞌob a fariseojoꞌ yejer yʌjcamsayʌjirob u tꞌʌn Moisés a ju yet janʌnob,
caj yaꞌaraj tiꞌob:
―Baꞌ cu yaꞌaric tu tsꞌibaꞌan u tꞌʌn Moisés?
Cu chaꞌic wa jic jawsic u yajir mac wa mʌꞌ u chaꞌic ic jawsic mac u qꞌuinin quir a jesiquex a bʌjex?
4 Mʌnaꞌ mac caj u nuncaj a baꞌ cꞌataꞌb tiꞌob.
Rajen Jesús caj u mʌchaj u cꞌʌb caj u jawsaj u yajir.
Caj tsꞌoc u jawareꞌ caj u chaꞌ u bin a mac jawsaꞌb.
5 Jesús caj yaꞌaraj tiꞌob a mac rʌc tiꞌ yʌnob ich yatoch u tsꞌurir a fariseojoꞌ:
―Wa yʌn techex a wʌrʌcꞌ chan tsimin cax a wʌrʌcꞌ wacʌx ton,
wa pitcꞌʌjij caj butꞌ ich u jorir ruꞌum ich yicꞌ jaꞌ,
mʌꞌ wa seb ca jariquex cax u qꞌuinin a jesiquex a bʌjex?
6 Mʌꞌ cꞌuchaꞌan yor u nunquicob tiꞌ Jesús.
Jesús caj u camsaj a mac tiꞌ yʌnob ich yatoch u tsꞌurir a fariseojoꞌ
7 Jesús caj yiraj bic cu teticob u cutanob a payob tu janʌnob.
U cꞌat u cutarob soc jach noꞌj tu curaꞌanob.
Rajen Jesús caj yaꞌaraj tiꞌob:
8 ―Wa ju pʌyiquechex mac quir a janʌnex tu cu bin u chꞌic u racꞌ.
Mʌꞌ ja yʌn cutarex tu cu cutar a mac jach noꞌj.
Quireꞌ wa tiꞌ ca cutarex jaj ixtʌcoj wa cu tar a mac jach noꞌjoꞌ quireꞌ techex mʌꞌ jach noꞌjechexiꞌ.
9 Wa tiꞌ curaꞌanech cu bin tar yac tech a mac tu pay a janʌn:
“Chan joqꞌuen a techoꞌ ―quij― caꞌ xiquech tiꞌ taroꞌ soc in wacsic a jeꞌ xibaꞌ teraꞌ ta cutan.”
Rajen ―quij Jesús―,
caꞌ bin a chꞌic suraquir tu ca bin a cutar tu mʌꞌ noꞌj a cutan.
10 Chen wa cu payiquechex mac quir a janʌnex tu cu bin u chꞌic u racꞌ.
Tar a cutarex tu curaꞌan a mac mʌꞌ noꞌjoꞌ soc wa cu tar a mac tu pʌyechex cu bin yac techex:
“In jach yajech ―quij―,
cojen a cutar tu jach noꞌj.”
Raꞌiriꞌ u qꞌuinin cu bin sʌjtaꞌbirechex ten a mac curaꞌanob janʌnob yejerech.
11 Mʌꞌ ja wirej ―quij Jesús―,
a mac a cu tucric:
Jach noꞌjen,
a Cꞌujoꞌ cu bin yiric mʌꞌ noꞌjiꞌ.
A mac a cu tucric:
Mʌꞌ noꞌjen a tenoꞌ,
a Cꞌujoꞌ cu bin yiric jach noꞌj.
12 Jesús tiꞌ toy cu tsicbar tiꞌ a mac caj u pʌy tu janʌn.
Caj yaꞌaraj tiꞌ:
―Barej ca pʌyic mac quir u janʌnob cax cu quiꞌ janʌnob?
Mʌꞌ ja chen pʌyic a mac a jach yaj.
Mʌꞌ ja pʌyic a witsꞌinob,
mʌꞌ ja pʌyic a bʌjob,
mʌꞌ ja pʌyic a wet cajar a neyʌn u taqꞌuinob quireꞌ baxuc xan cꞌuchaꞌan yorob u wʌcꞌʌs pʌyiquech ta janʌn xan.
Baxuc aroꞌ tu wʌcꞌʌs botechob.
13 Chen wa ca pʌyiquex mac quir u quiꞌ jananob.
Pʌyej a mac otsij,
baxuc pʌyej a xon cꞌupaꞌan yocoꞌ wa ju cꞌʌb xan.
Baxuc pʌyej a mech yoqueꞌ.
Baxuc pʌyej a chꞌop u wicheꞌ xan.
14 Wa baxuc ca pʌyicob janʌnob a Cꞌujoꞌ cu bin u quiꞌquintic a wor quireꞌ a raꞌ winiquirob mʌꞌ cuchaꞌan yorob u wʌcꞌʌs boꞌotiquech tu ta payajexob.
Chen Cꞌuj cu bin u boꞌotiquex caꞌ bin riqꞌuic a mac quimenoꞌ a mac curʌjij an ten bic Cꞌuj u cꞌat uch.
Jesús cu camsic tiꞌ a mac a mʌꞌ u cꞌat u tarob u quiꞌ janʌnob
15 A mac a pꞌeriꞌ curic janʌnob a caj u yubaj yaꞌaric Jesús caj yaꞌaraj tiꞌ Jesús:
―Jach quiꞌ yorob a mac a cu bin janʌnob tu qꞌuinin cu bin u reyinticob Cꞌuj a payob janʌnob.
Baꞌiriꞌ cu cꞌuchur quir u janʌn.
16 Jesús caj yaꞌaraj tiꞌ:
―Yʌn mac caj u toc pʌyaj yaꞌab caꞌ tac u quiꞌ janʌnob.
Tar cu bin pʌybir tu yatochob.
17 Caj cꞌuchij tu qꞌuinin toc tsꞌacaꞌan yoꞌoch caj tuchiꞌtaꞌb caꞌ u tꞌʌnej a mac payob janʌnob uch.
U cꞌurewob a tu pʌyaj tiꞌ janʌnob:
“Cojen ―quij―,
toc tsꞌacaꞌan a wochex.”
18 Chen tu cotor a payob caꞌch caj u yʌnxchun yaꞌarob.
Biquinin mʌꞌ cꞌuchaꞌan yor u binob,
a tu yʌn cꞌuch,
caj yaꞌaraj:
“A tenoꞌ caj in mʌnaj in ruꞌum,
yʌn in bin in wiric biquiraꞌ.
Toc chan arej tiꞌ a jach tsꞌurir mʌꞌ cꞌuchaꞌan in wor in tar.
Arej u jawsen a Jaj Tsꞌurir.”
19 Caj cꞌuchij u cꞌurew ich u jer a mac payob caꞌch.
Rajiꞌ caj u yaꞌaraj:
“A tenoꞌ caj in mʌnaj cinco caꞌ caꞌtur in wʌrʌcꞌ wacʌx a ton,
a cu jitic baꞌ.
Bin in caꞌ in wirej wa cu beyajob.
Toc chan arej tiꞌ a Jach Tsꞌurir mʌꞌ cꞌuchaꞌan in wor in tar.
Arej u jawsen.”
20 Caj cꞌuchij u cꞌurew ich u jer a mac payob uch.
Rajiꞌ caj u yaꞌaraj:
“Mʌꞌ jin tar ―quij―,
quireꞌ tant in chꞌic in racꞌ,
rajen mʌꞌ cꞌuchaꞌan in wor in tar.”
21 Caj tsꞌoc yuꞌur u cꞌurew caj yaꞌaraj tiꞌ u Jach Tsꞌurir a baꞌ caj u yaꞌaraj a mac payob uch.
Rajen caj tsꞌiquij caj yaꞌaraj tiꞌ u cꞌurew:
“Sebquintej a bin ich tanbej ich u cajar,
baxuc ich u berir u cor mac.
Caꞌ a rʌc pʌyic a mac otsir.
Baxuc a mac xoncꞌub yoc wa cꞌʌb.
Baxuc a mac mech.
Baxuc a mech yoqueꞌ.
Baxuc a chꞌop u wichoꞌ xan.”
22 Caj tsꞌoc u betic aroꞌ caj wʌcꞌʌs bin ich u Jach Tsꞌurir caj yaꞌaraj:
“In Jach Tsꞌurir ―quij―,
caj in toc betaj a baꞌ caj a waꞌaraj.
Tiꞌ toy yʌn,
mʌꞌ chupuc a watoch.”
23 Caj yaꞌaraj tiꞌ u cꞌurew:
“Joqꞌuen,
rʌc pʌyej ich tancab u cajar cax tu cu manob ich bej.
Chich pʌyob caꞌ tacob tu janʌnob soc u rʌc chupur in watoch.”
24 Caj yaꞌaraj u Jach Tsꞌurir:
“Taj quin wac tech a mac a caj in yʌn pʌyajob,
mʌꞌ ju bin u janticob in woch.
A toc tsꞌacaꞌan,
quireꞌ mʌꞌ in chaꞌic u tarob.”
A mac a cꞌuchaꞌan yor u sayʌr tu pach Jesús quir u cʌnic u tꞌʌn
25 Pꞌeriꞌ cu binob Jesús yejer a pimob.
Caj u sut u bʌj caj u yaꞌaraj tiꞌob:
26 ―Wa mac ich techex u cꞌat u tar tin pach quir u cʌnic in tꞌʌn.
Wa ju jach yajquintic u tet yejer u nʌꞌ yejer u racꞌ yejer u parar yejer u bʌjob.
Cax u wʌcꞌʌs bʌjiriꞌ chen mʌꞌ ten u quiꞌ yajquintic ten ―quij Jesús―,
aroꞌ mʌꞌ cꞌuchaꞌan yor u tar u cʌnic in tꞌʌn.
27 Wa mac ich techex ―quij Jesús―,
mʌꞌ u cꞌat u mucꞌyaj,
mʌꞌ u cꞌat u quimin,
cax ich cruz wa raꞌ u cꞌat Cꞌuj.
Arej mʌꞌ cꞌuchaꞌan yor u tar u cʌnic in tꞌʌn.
28 Wa mac ich techex ―quij Jesús―,
u cꞌat u tsꞌʌpquintic tunich soc u cꞌʌxic yatoch jach carem.
Cu yʌn tucric mun u boꞌorir,
mʌꞌ toy yʌnchun u beyaj soc yiric wa cꞌuchaꞌan u tsꞌocsic tiꞌ.
29 Wa mʌꞌ tu quiꞌ tucraj mun u boꞌorir quir u tsꞌocsic caꞌ bin u tsꞌʌpquintic tunich quir u nacsic u joꞌr caꞌanan.
Caꞌ bin yirej mʌꞌ cꞌuchaꞌan yor u tsꞌocsic.
Tu cotor mac cu bin tar u cheꞌticob quireꞌ caj u yirob mʌꞌ cꞌuchaꞌan yor u tsꞌocsic.
30 Cu bin u yaꞌaricob:
“A jeꞌ xiboꞌ caj u yʌnxchun cu chen tsꞌʌpquintic tunich mʌꞌ cꞌuchaꞌan yor u tsꞌocsic.”
Baxuc a mac a cu tar u cʌnic in tꞌʌn.
Cu yʌn tucric mun u boꞌorir wa toy yʌnxchun u tar tin pach.
31 Jesús caj yaꞌaraj tiꞌ a pimoꞌ,
a mac tarob tu pach:
―Baxuc a reyoꞌ ―quij Jesús―,
wa cu bin u tsꞌictar yejer u yet reyir quireꞌ pꞌactaꞌb.
Cu yʌn quiꞌ tucric wa cꞌuchaꞌan yor tiꞌ quir u nupꞌic yejer diez mil,
cax yet reyir yʌn veinte mil soldado.
32 Wa cu yiric mʌꞌ cꞌuchaꞌan yor tiꞌ yet reyir.
Tiꞌ toy yʌn yet reyir nach,
tan u tar quinsbir.
Jeꞌ u tuchiꞌtic mac quir u sisquintic yor soc cu pꞌeriꞌquinticob yor soc mʌꞌ ju tar quir u quinsaꞌ.
33 A mac a cu bin u betic a baꞌ jach noꞌj,
yʌn u quiꞌ tucric wa cꞌuchaꞌan yor u tsꞌocsic.
Baxuc techex ―quij Jesús―,
mʌꞌ cꞌuchaꞌan a worex a tar a cʌniquex in tꞌʌn,
wa mʌꞌ a cꞌat a pꞌʌtiquex tu cotor a baꞌ yʌn techex.
Jesús cu camsic tiꞌ a xaꞌanoꞌ a mʌꞌ tabtaꞌaniꞌ
34 Caj yaꞌaraj Jesús:
―A wochexoꞌ,
mʌꞌ quiꞌ wa mʌꞌ tabtaꞌan yejer xaꞌan.
Chen wa cu rucꞌur u xaꞌanin.
Baꞌ yʌn ic betej soc u wʌcꞌʌs tar u xaꞌanin?
35 A rucꞌaꞌan u xaꞌaninoꞌ,
mʌꞌ baꞌwir tiꞌ,
mʌꞌ tiꞌ a cor quir u chꞌisej baꞌ an ten bic u taꞌ tsimin,
ca chen jocꞌsic a puric nach.
Baxuc techex wa mʌꞌ a quibiquex in tꞌʌn cu bin u jocꞌsic u puric techex.
Quiꞌ uꞌyex a baꞌ quin wac.